SULAT PARA KANG TITO

1 Gikan kang Pablo, nga ulipon sa Diyos ug apostol ni Jesu-Kristo sumala sa pagtuo sa mga pinili sa Diyos ug sa tukmang kahibalo sa kamatuoran nga nalangkit sa debosyon ngadto sa Diyos 2 ug gibase sa paglaom nga kinabuhing walay kataposan+ nga gisaad kaniadto sa Diyos, kinsa dili gyod mamakak;*+ 3 apan sa iyang gitakdang panahon, iyang gipahibalo ang iyang pulong pinaagi sa buluhatong pagsangyaw nga gisalig kanako+ sumala sa sugo sa atong Manluluwas, ang Diyos; 4 ngadto kang Tito, nga tinuod nakong anak diha sa pagtuo:

Hinaot maanaa kanimo ang dili hitupngang pagkamaayo* ug ang kalinaw gikan sa Diyos nga Amahan ug ni Kristo Jesus nga atong Manluluwas.

5 Gibilin ka nako sa Creta aron sa pagtul-id sa mga butang nga kinahanglang tul-iron ug sa pagtudlog mga ansiyano sa matag siyudad, sumala niining akong instruksiyon kanimo: 6 ang ansiyano kinahanglang* wala akusahig bisan unsa, usa ray asawa, may mga anak nga magtutuo nga wala akusahig dili maayong pagkinabuhi o pagkarebelyoso.+ 7 Kay ingong piniyalan sa Diyos, ang tigdumala kinahanglang wala akusahig bisan unsa, dili mabuotbuoton,+ dili daling masuko,+ dili palahubog, dili bayolente,* dili magtinguha nga mamentaha, 8 kondili maabiabihon,+ mahigugmaon sa pagkamaayo, maayog panghunahuna,*+ matarong, maunongon,+ may pagpugong sa kaugalingon,+ 9 nga nangupot pag-ayo sa kasaligang mensahe* kon bahin sa iyang paagi sa pagpanudlo,+ aron makapalig-on* siya pinaagi sa maayong* pagtulon-an+ ug makabadlong+ niadtong mosulti batok niini.

10 Kay daghan ang rebelyoso, mga tigsultig walay pulos, ug mga maglilimbong, ilabina kadtong nag-ingon nga kinahanglang magpatuli.+ 11 Kinahanglan silang pahilomon, kay kining mga tawhana nagdaot sa pagtuo sa tibuok nga mga panimalay pinaagi sa pagtudlog mga butang nga dili nila angayng itudlo, tungod sa ilang kahakog sa materyal nga mga butang. 12 Usa kanila, nga ila mismong propeta,* miingon: “Ang mga Cretanhon bakakon, pintas kaayo nga mga mananap, mga tapolan, hangol ug pagkaon.”

13 Tinuod kana nga pamatuod. Tungod niini mismo, padayon sa paghatag kanilag bug-at nga pagbadlong aron mahimsog sila sa pagtuo, 14 nga dili magtagad sa hinimohimo nga mga estorya sa mga Hudiyo ug sa mga sugo sa mga tawo nga nagsalikway sa kamatuoran. 15 Ang tanang butang hinlo para sa mga tawong hinlo;+ apan sa mga tawong hugaw ug walay pagtuo, walay bisan unsa nga hinlo, kay ang ilang hunahuna ug konsensiya hugaw.+ 16 Moingon sila nga nakaila sila sa Diyos, apan ilang gilimod siya pinaagi sa ilang mga buhat,+ tungod kay sila dulumtanan ug dili masinugtanon ug wala uyoni sa pagbuhat sa bisan unsang maayong buhat.

2 Apan ikaw, padayon sa pagsulti subay sa maayo* nga pagtulon-an.+ 2 Ang edarang mga lalaki kinahanglang may pagpugong sa kaugalingon, seryoso, maayog panghunahuna, ug lig-on sa pagtuo, gugma, ug paglahutay. 3 Ang edarang mga babaye sab kinahanglang mogawi nga may pagtahod sa Diyos, dili magbutangbutang, dili ulipon sa daghang bino, mga magtutudlo sa maayo, 4 aron makatambag* sila sa batan-ong mga babaye nga higugmaon ang ilang bana, higugmaon ang ilang mga anak, 5 magbaton ug maayong panghunahuna, mahimong putli, kugihan* sa balay, magbaton ug maayong panggawi, magpasakop sa ilang bana,+ aron ang pulong sa Diyos dili mapasipalahan.

6 Sa susama, padayong dasiga ang batan-ong mga lalaki sa pagbaton ug maayong panghunahuna.+ 7 Kinahanglang ehemplo ka sa maayong mga buhat sa tanang paagi. Seryosong itudlo kon unsay putli,*+ 8 nga maggamit ug maayong* sinultihan nga walay makasaway,+ aron maulawan kadtong mosupak kay walay negatibong* ikasulti kanato.+ 9 Sa tanang butang, ang mga ulipon kinahanglang magpasakop sa ilang mga tag-iya,+ nga maningkamot nga pahimut-an sila, dili magtubagtubag, 10 dili mangawat kanila,+ hinuon ilang ipakita nga kasaligan gyod sila, aron sa tanang paagi mas madayeg pa ang pagtulon-an sa atong Manluluwas, ang Diyos.+

11 Kay ang dili hitupngang pagkamaayo* sa Diyos gipadayag na, nga moresultag kaluwasan sa tanang matang sa tawo.+ 12 Gibansay ta niini nga isalikway ang pagkadili-diyosnon ug ang kalibotanong mga tinguha,+ magkinabuhi nga may maayong panghunahuna, mosubay sa pagkamatarong, ug magpakitag debosyon sa Diyos samtang nia kita niini nga sistema sa mga butang,*+ 13 samtang nagpaabot ta sa makapalipay nga paglaom+ ug sa mahimayaong pagpadayag sa bantogang Diyos ug sa atong Manluluwas, si Jesu-Kristo. 14 Iyang gihatag ang iyang kaugalingon para kanato+ aron ipagawas* kita+ gikan sa tanang matang sa pagkamalapason ug hinloan kita aron mahimong iyang espesyal nga katawhan, nga dasig sa maayong mga buhat.+

15 Padayon sa pagsulti niining mga butanga ug sa pagtambag* ug sa pagbadlong sumala sa awtoridad nga gihatag kanimo.+ Ayaw tugoti nga may motamay nimo.

3 Padayon silang pahinumdomi nga magpasakop ug magmasinugtanon sa mga gobyerno ug mga awtoridad,+ andam sa matag maayong buhat, 2 dili magsultig daotan kang bisan kinsa, dili palaaway, kondili makataronganon,+ nga kanunayng magpakitag kalumo sa tanang tawo.+ 3 Kay bisan gani kita kaniadto dili maayog panghunahuna, dili masinugtanon, nalimbongan, ulipon sa lainlaing tinguha ug kalipayan, nagkinabuhi nga daotan ug masinahon, dulumtanan, ug nagdumtanay.

4 Apan dihang gipadayag sa Diyos, nga atong Manluluwas,+ ang iyang pagkamaayo ug gugma para sa katawhan 5 (dili tungod sa matarong nga mga buhat nga atong nahimo,+ kondili tungod sa iyang kaluoy),+ kita iyang giluwas pinaagi sa tubig* nga naghatag kanatog kinabuhi+ ug pinaagi sa pagbag-o kanato pinaagi sa balaang espiritu.+ 6 Kini nga espiritu dagaya niyang gibubo kanato pinaagi ni Jesu-Kristo nga atong Manluluwas,+ 7 aron dihang mapahayag na ta nga matarong tungod sa iyang dili hitupngang pagkamaayo,*+ kita mahimong mga manununod+ sumala sa paglaom nga kinabuhing walay kataposan.+

8 Kasaligan kining mga pulonga, ug gusto nako nga padayon nimo kining ipasiugda, aron kadtong nagtuo sa Diyos kanunayng magpokus sa ilang hunahuna sa paghimog maayong mga buhat. Kining mga butanga maayo ug mapuslanon sa mga tawo.

9 Apan likayi ang binuang nga mga argumento, ang pagsusi sa mga kagikan, ug ang panaglalis ug panag-away bahin sa Balaod, kay kini walay kaayohan ug walay pulos.+ 10 Bahin sa tawo nga nagpasiugdag sekta,+ likayi siya+ human mapasidan-ig* kaduha,+ 11 kay ang maong tawo mitipas sa dalan sa kamatuoran ug nagpakasala ug naghimo sa iyang kaugalingon nga hinukman.

12 Dihang mapadala na nako si Artemas o si Tiquico+ diha kanimo, paningkamoti nga makaadto ka nako sa Nicopolis, kay nakadesisyon ko nga didto magpalabay sa tingtugnaw. 13 Paneguroa nga mahatag kang Zenas, nga batid sa Balaod, ug kang Apolos ang ilang mga gikinahanglan sa panaw aron dili sila makulangag bisan unsa.+ 14 Apan ang atong mga igsoon sab kinahanglang makakat-on nga padayong maghimog maayong mga buhat aron makatabang sila kon naay dinaliang mga panginahanglan,+ aron malikayan nga mahimo silang dili mabungahon.+

15 Ang tanan nakong kauban nangomosta nimo. Ikomosta ko sa mga igsoon sa pagtuo nga nagmahal kanamo.

Hinaot ang dili hitupngang pagkamaayo maanaa kaninyong tanan.