UNANG SULAT PARA KANG TIMOTEO

1 Gikan kang Pablo, nga apostol ni Kristo Jesus pinaagi sa sugo sa Diyos nga atong Manluluwas ug ni Kristo Jesus, nga atong paglaom,+ 2 ngadto kang Timoteo,*+ nga tinuod nakong anak+ diha sa pagtuo:

Hinaot maanaa kanimo ang dili hitupngang pagkamaayo,* kaluoy, ug kalinaw gikan sa Diyos nga Amahan ug ni Kristo Jesus nga atong Ginoo.

3 Dihang moadtoay ko sa Macedonia, mihangyo ko nimo nga magpabilin ka sa Efeso. Mao sab nay akong ihangyo karon, aron tambagan nimo ang pipila ka indibiduwal nga dili magtudlog lahi nga doktrina, 4 dili magtagad sa bakak nga mga estorya,+ ug dili magsubay sa mga kagikan. Kay wala kanay kapuslanan,+ apan moresulta lag mga estorya nga walay pamatuod imbes makahatag ug bisan unsa gikan sa Diyos nga makapalig-on sa pagtuo. 5 Sa pagkatinuod, ang tuyo niini nga instruksiyon* mao ang paghigugma+ nga may hinlong kasingkasing, maayong konsensiya, ug pagtuo+ nga dili pakaaron-ingnon. 6 Kay kining mga butanga gibalewala sa uban, sila nalangkit sa way pulos nga mga estorya.+ 7 Gusto nila nga mahimong mga magtutudlo+ sa balaod, apan wala sila makasabot sa mga butang nga ilang gipanulti o sa mga butang nga ilang giinsistir.

8 Apan nahibalo ta nga maayo ang Balaod kon husto* ang pagpadapat niini. 9 Gawas pa, ang balaod dili para sa tawong matarong, kondili para sa mga tawong masinupakon+ ug dili masinugtanon, dili diyosnon ug mga makasasala, dili maunongon* ug mga mapasipalahon, mga mopatayg amahan o inahan o ubang tawo, 10 mga naghimog seksuwal nga imoralidad,* mga lalaking makigsekso* sa mga lalaki, mga kidnaper, mga bakakon, mga tigpanumpa ug bakak, ug uban pa nga supak sa maayong* pagtulon-an+ 11 sumala sa mahimayaong maayong balita sa malipayong Diyos, nga iyang gisalig kanako.+

12 Mapasalamaton ko kang Kristo Jesus nga atong Ginoo, nga naghatag kanakog gahom, kay giisip ko niya nga matinumanon pinaagi sa paghatag kanakog sagradong buluhaton,+ 13 bisan pag kaniadto ako tigpasipala, maglulutos, ug bagis.+ Apan gipakitaan kog kaluoy, kay nahimo nako kadto tungod sa kawalay-kahibalo ug kawalay-pagtuo. 14 Apan ang dili hitupngang pagkamaayo sa Ginoo midagaya pag-ayo kanako apil ang pagtuo ug gugma maylabot kang Kristo Jesus. 15 Kining mga pulonga kasaligan ug angay gayong tuohan: Si Kristo Jesus mianhi sa kalibotan aron luwason ang mga makasasala.+ Ug ako ang kinalabwan nila.+ 16 Apan gikaluy-an ko aron ingong kinalabwang makasasala, mapakita ni Kristo Jesus pinaagi kanako ang tanan niyang pailob, aron himoon kong ehemplo para niadtong magbase sa ilang pagtuo kaniya para sa kinabuhing walay kataposan.+

17 Karon, ngadto sa Hari nga walay kataposan,+ walay kamatayon,+ dili makita,+ ang bugtong nga Diyos,+ iya ang dungog ug himaya hangtod sa kahangtoran. Amen.

18 Kini nga instruksiyon* akong gisalig kanimo, anak kong Timoteo, sumala sa mga tagna bahin kanimo, aron nga pinaagi niini padayon kang makigsangka sa maayong gubat,+ 19 nga huptan ang pagtuo ug maayong konsensiya,+ nga gisalikway sa uban maong nadaot ang ilang pagtuo samag nadaot nga barko. 20 Apil kanila si Himeneo+ ug Alejandro, ug gitugyan nako sila kang Satanas+ aron nga pinaagig disiplina matudloan sila nga dili magpasipala.

2 Busa una sa tanan, ako nag-awhag nga ang mga pangamuyo, pag-ampo, paghangyo, ug pagpasalamat himoon para sa tanang matang sa tawo, 2 sa mga hari ug sa tanan nga taas ug katungdanan,*+ aron padayon kitang magkinabuhi nga malinawon uban ang bug-os nga debosyon sa Diyos ug pagkaseryoso.+ 3 Kini maayo ug makapalipay sa atong Manluluwas, ang Diyos,+ 4 kansang kabubut-on nga ang tanang matang sa tawo maluwas+ ug makakat-on sa tukmang kahibalo sa kamatuoran. 5 Kay dunay usa ka Diyos,+ ug usa ka tigpataliwala+ sa Diyos ug sa mga tawo,+ si Kristo Jesus.+ Siya ang tawo 6 nga naghatag sa iyang kaugalingon ingong katugbang nga lukat para sa tanan*+​—⁠mao kini ang ipahayag sa gitakdang panahon niini. 7 Alang niini nga pagpamatuod+ nga ako gitudlo sa Diyos ingong magwawali ug apostol+​—⁠nagsulti kog tinuod, wala ko mamakak⁠—​usa ka magtutudlo sa mga nasod+ bahin sa pagtuo ug kamatuoran.

8 Busa nanghinaot ko nga sa tanang lugar ang mga lalaki magpadayon sa pag-ampo, nga magbayaw sa ilang maunongong mga kamot,+ nga walay kasuko+ ug panaglalis.+ 9 Ang mga babaye sab angayng magpatahom pinaagi sa pagsul-ob ug desente* nga sinina, uban ang pagtahod sa kaugalingon ug sa uban* ug maayong panghunahuna,* dili pinaagig mga estilo sa pagsalapid sa buhok ug bulawan o mga perlas o mahalon kaayong sinina,+ 10 kondili sa paagi nga angay sa mga babaye nga nagpaila nga may debosyon sa Diyos,+ sa ato pa, pinaagi sa maayong mga buhat.

11 Ang babaye maghilom* ug bug-os nga magpasakop+ samtang ginatudloan. 12 Dili ko motugot nga ang babaye magtudlo o magbuot sa lalaki, kondili maghilom* siya.+ 13 Kay si Adan ang unang gibuhat, dayon si Eva.+ 14 Dugang pa, si Adan wala malimbongi, apan ang babaye ang bug-os nga nalimbongan+ ug nakasala. 15 Apan ang babaye magpabiling luwas pinaagi sa pagkahimong inahan,+ basta siya* magpadayon diha sa pagtuo, gugma, ug pagkabalaan uban ang maayong panghunahuna.*+

3 Kasaligan kini nga pamulong: Kon dunay mangab-ot sa pagkahimong tigdumala,+ siya nagtinguhag maayong buhat. 2 Busa ang tigdumala kinahanglang dili salawayon, usa ray asawa, may pagpugong sa kaugalingon, maayog panghunahuna,*+ talahoron,* maabiabihon,+ kuwalipikadong manudlo,+ 3 dili palahubog,+ dili bayolente,* kondili makataronganon,+ dili palaaway,+ dili mahigugmaon sa kuwarta,+ 4 lalaki nga nagdumala sa iyang panimalay sa maayong paagi, nga ang mga anak mapinasakopon ug maayog panggawi+ 5 (kay kon ang lalaki dili makamaong modumala sa iyang panimalay, unsaon man niya pag-atiman sa kongregasyon sa Diyos?), 6 dili lalaki nga bag-ong magtutuo,*+ kay basig mahimo siyang mapasigarbohon ug makadawat sab sa paghukom nga nadawat sa Yawa. 7 Kinahanglang maayo sab siyag reputasyon* sa mga tawo sa gawas,+ aron dili siya mapakaulawan ug dili mabitik sa Yawa.

8 Ang mga ministeryal nga alagad kinahanglan sab nga seryoso, dili duhay sinultihan,* dili magpalabig inom ug bino, dili magtinguha nga mamentaha,+ 9 nga nangupot sa sagradong tinago sa pagtuo uban ang hinlong konsensiya.+

10 Kinahanglan sab nga sulayan una sila kon angayan* ba; unya kon walay akusasyon kanila, mahimo silang mga ministeryal nga alagad.+

11 Ang mga babaye angay sab nga seryoso, dili magbutangbutang,+ may pagpugong sa kaugalingon, matinumanon sa tanang butang.+

12 Ang mga ministeryal nga alagad kinahanglang usa ray asawa, nga nagdumala sa ilang mga anak ug panimalay sa maayong paagi. 13 Kay ang mga lalaki nga nag-alagad sa maayong paagi dunay maayong reputasyon ug dakong kagawasan sa pagsulti diha sa pagtuo maylabot kang Kristo Jesus.

14 Naglaom ko nga moanha nimo sa dili madugay, apan gisulat nako kining mga butanga kanimo 15 kay enkasog malangan ko, mahibalo ka kon unsaon paggawi diha sa panimalay sa Diyos,+ ang kongregasyon sa buhing Diyos, nga usa ka haligi ug tukod sa kamatuoran. 16 Sa pagkatinuod, importante gayod ang sagradong tinago niini nga debosyon sa Diyos: ‘Si Jesus gipadayag ingong tawo,*+ gipahayag nga matarong ingong espiritu,+ nagpakita sa mga anghel,+ gisangyaw diha sa kanasoran,+ gituohan diha sa kalibotan,+ mahimayaong gidawat sa langit.’

4 Apan ang inspiradong pulong* klarong nag-ingon nga sa ulahing mga panahon ang uban mobiya sa pagtuo, nga maminaw sa malimbongon nga inspiradong mga mensahe*+ ug sa mga pagtulon-an sa mga demonyo. 2 Tungod kini sa mga bakak nga gisulti sa mga salingkapaw,+ kansang konsensiya dili na mobati samag panit nga gipaso sa nagbaga nga puthaw. 3 Gidid-an nila ang mga tawo sa pagminyo+ ug sa pagkaon sa pipila ka pagkaon,+ apan kini nga mga pagkaon gibuhat sa Diyos aron kaonon+ uban ang pagpasalamat niadtong dunay pagtuo+ ug tukmang kahibalo sa kamatuoran. 4 Kay ang tanang gibuhat sa Diyos maayo,+ ug walay angayng isalikway+ kon kini gidawat uban ang pagpasalamat, 5 kay kini gibalaan pinaagi sa pulong sa Diyos ug sa pag-ampo.

6 Pinaagi sa paghatag niini nga tambag ngadto sa mga igsoon, ikaw mahimong maayo nga ministro ni Kristo Jesus nga natudloan sa mga pulong sa pagtuo ug sa maayong pagtulon-an nga imong gisunod pag-ayo.+ 7 Apan isalikway ang bakak nga mga estorya nga nagpasipala sa Diyos,+ sama sa ginasulti sa tigulang nga mga babaye. Sa laing bahin, bansaya ang imong kaugalingon nga ang tumong mao ang pagpakitag debosyon sa Diyos. 8 Kay ang pagbansay* sa lawas naay gamayng kaayohan, apan ang debosyon ngadto sa Diyos mapuslanon sa tanang butang, kay nalangkit niini ang saad sa kinabuhi karon ug sa umaabot.+ 9 Kana nga pamulong kasaligan ug angay gyong tuohan. 10 Tungod niini kita naghago ug naningkamot pag-ayo,+ kay kita naglaom sa buhi nga Diyos, ang Manluluwas+ sa tanang matang sa tawo,+ ilabina sa mga matinumanon.

11 Padayon sa paghatag niining mga sugoa ug sa pagtudlo niini. 12 Ayawg tugoti nga may motamay sa imong pagkabatan-on. Hinuon magpakita kag maayong ehemplo sa mga matinumanon diha sa sinultihan, panggawi, gugma, pagtuo, ug moral nga kahinlo.* 13 Padayon sa pagkugi sa publikong pagbasa,+ sa pagpanambag,* sa pagpanudlo, hangtod nga moabot ko. 14 Ayaw pasagdi ang gasa nga naa nimo, nga gihatag pinaagi sa tagna dihang gipatong kanimo sa mga ansiyano ang ilang mga kamot.+ 15 Palandonga kining mga butanga; hatagi kinig bug-os nga pagtagad, aron ang imong pag-uswag klarong makita sa tanan. 16 Tagda kanunay ang imong kaugalingon ug ang imong pagpanudlo.+ Padayon niining mga butanga, kay sa pagbuhat niini maluwas nimo ang imong kaugalingon ug kadtong maminaw nimo.+

5 Ayaw kasab-i ang tigulang nga lalaki.+ Hinuon tambagi siya ingong amahan, ang batan-ong mga lalaki ingong igsoong lalaki, 2 ang tigulang nga mga babaye ingong inahan, ang batan-ong mga babaye ingong igsoong babaye uban ang bug-os nga kaputli.

3 Hatagig konsiderasyon* ang mga biyuda nga tinuod gyong nanginahanglan.*+ 4 Apan kon ang biyuda may mga anak o mga apo, kinahanglang magpakita una silag debosyon sa Diyos sa ila mismong panimalay+ ug ihatag kon unsay angay sa ilang mga ginikanan ug apohan,+ kay makapalipay kini sa Diyos.+ 5 Ang biyuda nga tinuod nga nanginahanglan ug wala nay nagsuportar nagalaom sa Diyos+ ug padayong nangamuyo ug nag-ampo adlaw ug gabii.+ 6 Apan ang biyuda nga nagkinabuhi aron lang tagbawon ang iyang mga tinguha* maoy patay bisan tuod siya buhi. 7 Busa padayong ihatag kini nga mga instruksiyon,* aron dili sila mahimong salawayon. 8 Segurado nga kon dunay dili magtagana sa iyang mga sakop, ilabina sa iyang panimalay, siya naglimod sa pagtuo ug mas daotan pa kay sa tawong walay pagtuo.+

9 Ilista ang biyuda kon siya 60 anyos pataas, nga maunongon kaniadto sa iyang bana,* 10 nga nailhan sa iyang maayong mga buhat,+ kon siya nagmatutog mga anak,+ kon siya maabiabihon,+ kon siya naghugas sa tiil sa mga balaan,+ kon siya nagtabang niadtong naa sa kasakitan,+ kon siya nagkugi sa tanang maayong buhat.

11 Sa laing bahin, ayawg ilista ang batan-ong mga biyuda, kay sa dihang ang ilang seksuwal nga tinguha mobabag sa ilang pag-alagad sa Kristo, sila gustong magminyo. 12 Ug sila mahimong sad-an kay ilang gibiyaan ang ilang unang pagpahayag sa pagtuo.* 13 Gawas pa, sila sab makakat-on sa pagkatapolan ug sa pagpanumbalay; oo, dili lang tapolan, kondili mga tabian sab ug hilabtanon sa kalihokan sa ubang tawo,+ nga manulti sa mga butang nga dili nila angayng isulti. 14 Busa nanghinaot ko nga ang batan-ong mga biyuda magminyo,+ manganak,+ magdumalag panimalay, aron dili mahatagag rason ang magsusupak sa pagpasipala kanato. 15 Gani, ang uban mitipas na ug misunod kang Satanas. 16 Kon dunay magtutuong babaye nga may mga paryenteng biyuda, patabanga siya kanila aron dili mabug-atan ang kongregasyon. Pinaagi niini, ang kongregasyon makatabang sa mga biyuda nga tinuod gyong nanginahanglan.*+

17 Ang mga ansiyano nga nagdumala sa maayong paagi+ kinahanglang isipon nga takos sa dobleng pasidungog,+ ilabina kadtong naghago sa pagpanulti ug pagpanudlo.+ 18 Kay ang kasulatan nag-ingon, “Ayawg busali ang torong baka samtang naggiok kini,”+ ug, “Ang trabahador takos sa iyang suhol.”+ 19 Ayaw paminawa ang akusasyon batok sa tigulang nga lalaki,* gawas lang kon kini gipamatud-an sa duha o tulo ka saksi.+ 20 Badlonga+ atubangan sa tanan kadtong mga nagpakasala,+ ingong pasidaan para sa uban.* 21 Atubangan sa Diyos ug kang Kristo Jesus ug sa piniling mga anghel, ako nagsugo kanimo nga sundon kini nga mga instruksiyon nga dili maghukom daan o magpihigpihig.+

22 Ayaw gayod pagdali sa pagpatong sa imong mga kamot kang bisan kinsa;*+ ayawg ambit sa mga sala sa uban; hupting putli ang imong kaugalingon.

23 Ayaw nag inom ug tubig,* apan inom ug gamayng bino para sa imong tiyan ug tungod kay pirme kang masakit.

24 Ang mga sala sa ubang tawo dayag kaayo mao nga mahukman dayon sila, apan ang sa uban sa ulahi pa madayag.+ 25 Sa samang paagi, ang maayong mga buhat dayag sa tanan+ ug bisan pag kini dili dayag, kini dili magpabiling tinago.+

6 Ang tanang ulipon kinahanglang magpadayon sa pag-isip sa ilang mga agalon nga takos sa bug-os nga pasidungog,+ aron ang ngalan sa Diyos ug ang iyang pagtulon-an dili gayod mapasipalahan.+ 2 Dugang pa, kadtong dunay mga agalon nga Kristohanon kinahanglang dili magpakitag kawalay-pagtahod kanila, kay mga igsoon sila sa pagtuo. Hinuon, kinahanglan nga sila mas andam pang magpaulipon, kay ang makabenepisyo sa ilang maayong pag-alagad maoy mga magtutuo ug minahal nga mga igsoon.

Padayon sa pagtudlo niining mga butanga ug sa paghatag niini nga mga tambag. 3 Kon dunay magtudlog laing doktrina ug dili mouyon sa maayong* instruksiyon+ nga gikan sa atong Ginoong Jesu-Kristo o sa mga pagtulon-an nga nahiuyon sa debosyon ngadto sa Diyos,+ 4 siya garboso ug walay pagsabot.+ Ang iyang hunahuna naa na lang pirme sa mga argumento ug mga debate bahin sa mga pulong.+ Mao ni ang hinungdan sa kasina, panag-away, pagbutangbutang,* daotang mga pagduda, 5 kanunayng panaglalis bahin sa gagmayng butang sa mga tawong hugawg kaisipan+ ug wala na makasabot sa kamatuoran, kay naghunahuna nga ang debosyon sa Diyos maoy paagi aron makakuhag personal nga bentaha.+ 6 Ang tinuod, naay dakong kaayohan kon ang usa dunay debosyon sa Diyos+ ug kontento. 7 Kay dihang natawo ta sa kalibotan wala tay gidala, ug inigkamatay nato wala pod tay madala.+ 8 Busa kon duna tay makaon ug masul-ob,* kita magmakontento na niini.+

9 Apan kadtong determinadong madato mangahulog sa tentasyon ug sa lit-ag+ ug sa daghang binuang ug makadaot nga tinguha, nga moresulta sa ilang ikadaot ug kalaglagan.+ 10 Kay ang gugma sa kuwarta maoy gamot sa tanang klase sa makadaot nga butang, ug sa pagpaningkamot nga tagbawon kini nga gugma, ang uban mibiya sa* pagtuo ug nag-antos* sa daghang kasakitan.+

11 Apan ikaw, Oh tawo sa Diyos, biyai kining mga butanga. Ug paningkamoti pag-ayo nga maugmad ang pagkamatarong, debosyon sa Diyos, pagtuo, gugma, paglahutay, ug kalumo.+ 12 Pakigbugno sa maayong bugno sa pagtuo; pangupot pag-ayo sa kinabuhing walay kataposan, nga para niini gitawag ka ug para niini naghatag kag maayong pamatuod atubangan sa daghang tawo.

13 Atubangan sa Diyos, nga nagtipig sa kinabuhi sa tanan, ug ni Kristo Jesus, nga naghatag ug maayong pamatuod atubangan ni Poncio Pilato,+ ako nagsugo kanimo 14 nga sundon nimo ang sugo ug magpabiling walay buling ug walay ikasaway hangtod sa pagpadayag sa atong Ginoong Jesu-Kristo.+ 15 Sa gitakdang panahon, ipadayag sa malipayon ug bugtong Magmamando ang iyang kaugalingon. Siya ang Hari niadtong nagmando ingong mga hari ug Ginoo niadtong nagmando ingong mga ginoo,+ 16 nga mao lang ang nagbaton sa pagkawalay-kamatayon,+ nga nagpuyo sa dili maduol nga kahayag,+ kinsa walay tawong nakakita o makakita.+ Iya ang dungog ug gahom nga walay kataposan. Amen.

17 Sultihi* ang mga dato niini nga sistema sa mga butang* nga dili mahimong hambogiro,* ug mosalig, dili sa walay kasegurohang bahandi,+ kondili sa Diyos, nga abundang naghatag nato sa tanang butang nga atong gikalipayan.+ 18 Ingna sila nga maghimog maayo, mahimong dato sa maayong mga buhat, magmahinatagon, andam sa pagpaambit,+ 19 nga magtigom ug espirituwal nga bahandi, nga usa ka maayong pundasyon para sa umaabot,+ aron sila makapangupot pag-ayo sa tinuod nga kinabuhi.+

20 Timoteo, bantayi ang gisalig kanimo,+ ug likayi ang way pulos nga mga estorya nga nagpasipala sa Diyos ug ang nagsumpaking mga ideya sa bakak nga “kahibalo.”+ 21 Tungod sa pagsunod nianang mga ideyaha, ang uban mitipas gikan sa pagtuo.

Hinaot maanaa kaninyo ang dili hitupngang pagkamaayo.*