SULAT PARA SA MGA TAGA-FILIPOS

1 Gikan kang Pablo ug Timoteo, mga ulipon ni Kristo Jesus, ngadto sa tanang balaan sa Filipos+ nga nahiusa kang Kristo Jesus, apil ang mga tigdumala ug mga ministeryal nga alagad:+

2 Hinaot maanaa kaninyo ang dili hitupngang pagkamaayo* ug ang kalinaw gikan sa Diyos nga atong Amahan ug ni Ginoong Jesu-Kristo.

3 Nagpasalamat ko kanunay sa akong Diyos dihang hinumdoman mo nako 4 sa matag pangamuyo nako para ninyong tanan.+ Ginahimo nako ni nga malipayon 5 tungod sa inyong naamot para* sa maayong balita sukad sa adlaw nga nadawat ninyo kini hangtod karon. 6 Kay masaligon ko nga ang Diyos nga nagsugod ug maayong buhat kaninyo magtapos niini+ hangtod sa adlaw ni Kristo Jesus.+ 7 Angay lang nga maghunahuna ko niini bahin kaninyong tanan, kay nia man mo sa akong kasingkasing, kamo nga mag-aambit uban kanako sa dili hitupngang pagkamaayo diha sa akong pagkabilanggo+ ug sa pagdepensa ug pagsangyaw sa maayong balita sa legal nga paagi.+

8 Kay ang Diyos maoy akong saksi nga gimingaw gyod ko ninyong tanan, ug gimahal mo nako sama sa pagmahal kaninyo ni Kristo Jesus. 9 Ug kini ang padayon nakong giampo, nga ang inyong gugma modagaya pa+ apil ang tukmang kahibalo+ ug bug-os nga pagsabot;+ 10 aron maseguro ninyo ang mas importanteng mga butang,+ aron walay ikasaway kaninyo ug dili mo makapandol sa uban+ hangtod sa adlaw sa Kristo; 11 ug mapuno mo sa matarong nga bunga, nga pinaagi kang Jesu-Kristo,+ alang sa himaya ug kadayeganan sa Diyos.

12 Mga igsoon, gusto nakong mahibalo mo nga ang akong kahimtang miresulta hinuon sa pag-uswag sa maayong balita, 13 kay ang tanang Praetorianong Guwardiya ug ang uban pa nakadungog nga gibilanggo ko+ tungod sa Kristo.+ 14 Karon ang kadaghanan sa mga igsoon diha sa Ginoo napalig-on tungod sa akong pagkabilanggo, ug sila nagpakitag labaw pa nga kaisog sa pagsulti sa pulong sa Diyos nga walay kahadlok.

15 Tinuod, ang uban nagsangyaw sa Kristo tungod sa kasina ug kompetisyon, apan ang uban maayog motibo. 16 Kadtong maayog motibo nagsangyaw sa Kristo tungod sa gugma, kay nahibalo sila nga gitudlo ko sa pagdepensa sa maayong balita;+ 17 apan kadtong nagsangyaw tungod sa kasina ug kompetisyon naghimo niini tungod sa hakog nga ambisyon, dili tungod sa maayong motibo, kay tuyo nila nga magpahinabog kasakit kanako sa bilanggoan. 18 Unsay resulta? Ang mga tawo nakadungog sa mensahe bahin sa Kristo, maayo mag motibo ang nagsangyaw o dili, ug nalipay ko niana. Ug nalipay pod ko 19 kay nahibalo ko nga moresulta kini sa akong kaluwasan pinaagi sa inyong pangamuyo+ ug sa tabang sa espiritu ni Jesu-Kristo.+ 20 Ako masaligon ug malaomon nga dili gyod ko maulawan. Hinuon, kay wala koy kahadlok nga mosulti, akong himayaon karon ang Kristo, sama sa akong gihimo kaniadto. Akong himayaon siya pinaagi sa akong lawas, buhi man ko o patay.+

21 Kay sa akong bahin, ang pagkahimong buhi mao ang pagsunod sa Kristo,+ ug ang pagkamatay maoy bentaha.+ 22 Karon kon mabuhi pa ko niining kalibotana,* daghan pa kog mahimo para sa Kristo. Hinuon dili ko mosulti kon unsay akong pilion. 23 Naglibog ko kon asa niining duha ang akong pilion, kay gusto kong moadto ug makig-uban sa Kristo,+ nga seguradong mas maayo.+ 24 Apan mas dako ang panginahanglan nga magpabilin kong buhi niining kalibotana* tungod kaninyo. 25 Busa nahibalo ko nga dili pa ko mamatay. Makauban pa ko ninyong tanan aron mouswag mo sa inyong pag-alagad sa Diyos ug malipay mo sa inyong pagtuo, 26 aron inigbalik nako kaninyo mosamot pa ang inyong kalipay kay mga sumusunod mo ni Kristo Jesus.

27 Makaanha man ko diha o dili, ang importante magkinabuhi mo* nga takos sa maayong balita bahin sa Kristo,+ aron mahibaloan nako nga lig-on mo, usa rag hunahuna,* nagkahiusa,*+ nagtinabangay nga mamentinar ang inyong pagtuo sa maayong balita, 28 ug wala gayod mahadlok sa inyong mga kaaway. Kini mismo maoy pamatuod sa ilang kalaglagan,+ apan kaluwasan alang kaninyo;+ ug gikan kini sa Diyos. 29 Kay gihatagan mog pribilehiyo alang sa Kristo, dili lang aron magbaton ug pagtuo kaniya kondili mag-antos sab para kaniya.+ 30 Kay ang inyong pagpakigbisog sama sa akong pagpakigbisog,+ ug nakadungog mo karon nga nakigbisog gihapon ko.

2 Kon duna moy ikadasig pinaagi sa Kristo, kon duna moy ikahupay pinaagi sa inyong gugma, kon duna moy pagtagad,* pagmahal, ug kaluoy sa usag usa, 2 bug-osa ninyo ang akong kalipay pinaagi sa pagpakita nga kamo parehas ug hunahuna, parehas ug gugma, bug-os nga nagkahiusa, ug usa ray gihunahuna.+ 3 Likayi ang hilig nga makig-away+ o ang pagpakaimportante sa kaugalingon,+ apan magpaubos mo ug isipa ang uban nga labaw kay kaninyo,+ 4 nga magtan-aw dili lang sa kaugalingong kaayohan,+ kondili sa kaayohan sab sa uban.+

5 Hupti kini nga panghunahuna ug tinamdan nga naa sab kang Kristo Jesus,+ 6 nga bisan pag siya sama sa Diyos,+ siya wala maghunahuna nga mahimong katumbas sa Diyos.+ 7 Wala, hinuon iyang gihaw-asan ang iyang kaugalingon sa tanan niyang nabatonan ug nahisamag ulipon;+ siya nahimong tawo.*+ 8 Labaw pa niana, dihang mianhi siya ingong tawo, siya nagpaubos ug nagmasinugtanon hangtod sa kamatayon,+ oo, kamatayon sa estaka sa pagsakit.*+ 9 Tungod niini, gibayaw siya sa Diyos ngadto sa mas taas nga posisyon,+ ug sa kaayo sa Diyos gihatagan siyag ngalan nga labaw sa tanang ubang ngalan+ 10 aron nga sa ngalan ni Jesus moluhod ang tanang naa sa langit, sa yuta, ug ilalom sa yuta+ 11 ug ang tanan dayag nga moila nga si Jesu-Kristo maoy Ginoo+ para sa kahimayaan sa Diyos nga Amahan.

12 Mga minahal, kanunay mong nagmasinugtanon, dili lang sa panahon nga naa ko diha kondili labi na gyod karon nga wala ko diha. Hinaot padayon mong maningkamot sa inyong kaugalingong kaluwasan uban ang kahadlok ug pagpangurog. 13 Kay ang Diyos molihok sa paagi nga makalipay kaniya pinaagi sa pagpalig-on sa inyong tinguha* sa pagbuhat sa mga butang nga gusto niya. 14 Padayon sa pagbuhat sa tanang butang nga walay pagbagulbol+ ug panaglalis,+ 15 aron walay ikasaway kaninyo ug mahimo mong putli, mga anak sa Diyos+ nga walay lama taliwala sa daotan kaayong kaliwatan,+ nga taliwala nila kamo nagasidlak nga samag kahayag sa kalibotan+ 16 ug nangupot pag-ayo sa pulong sa kinabuhi.+ Unya naa koy rason nga maglipay sa adlaw sa Kristo, kay nahibalo ko nga wala masayang ang akong pagdagan o paghago. 17 Hinuon, bisag ginabubo ko nga samag halad nga ilimnon+ ibabaw sa inyong halad+ ug sa balaang pag-alagad* nga gihimo ninyo tungod sa inyong pagtuo, ako nalipay ug nagsadya uban ninyong tanan. 18 Sa samang paagi, angay sab mong maglipay ug magsadya uban nako.

19 Kon kabubut-on ni Ginoong Jesus, naglaom ko nga mapadala nako si Timoteo+ kaninyo sa dili madugay aron madasig ko dihang makabalita ko bahin kaninyo. 20 Kay wala koy laing ikapadala nga parehas niyag tinamdan kinsa tinuod nga mag-atiman ninyo. 21 Kay ang uban nagtinguha sa ilang kaugalingong interes, dili ang kang Jesu-Kristo. 22 Apan nahibalo mo sa pamatuod nga iyang gihatag, nga siya nagpaulipon kanako sa pagpauswag sa maayong balita, samag anak+ nga nag-alagad sa iyang amahan. 23 Busa siya ang gilaoman nakong ipadala kaninyo inigkahibalo nako kon unsay mahitabo nako. 24 Ang tinuod, masaligon ko sa Ginoo nga makaanha sab ko sa dili madugay.+

25 Apan karon naghunahuna ko nga kinahanglang ipadala nako kaninyo si Epafrodito, nga akong igsoon ug isigkamagbubuhat ug kaubang sundalo, nga inyong sinugo ug personal nga tig-alagad para sa akong panginahanglan,+ 26 kay nangandoy siya nga makita mong tanan ug naguol siya pag-ayo kay nadunggan ninyo nga nasakit siya. 27 Ang tinuod, hapit siyang mamatay sa iyang sakit; apan ang Diyos naluoy niya, gani, dili lang kaniya, kondili kanako usab, aron dili magpatongpatong ang akong kaguol. 28 Busa gipadala dayon nako siya, aron malipay mo inigkakita ninyo kaniya ug mamenosan sab ang akong kabalaka. 29 Busa abiabiha siya sama sa naandan ninyong pag-abiabi sa mga sumusunod sa Ginoo uban ang bug-os nga kalipay, ug padayong mahala ang mga igsoon nga sama niya,+ 30 kay hapit siyang mamatay tungod sa buluhaton sa Kristo,* nga nagpameligro sa iyang kinabuhi aron hulipan mo kay wala mo dinhi sa pag-alagad kanako.+

3 Busa mga igsoon, padayon sa paglipay diha sa Ginoo.+ Dili ko kapoyan sa pagsulat kaninyo sa samang mga butang, ug para ni sa inyong kaayohan.

2 Pagbantay sa mga iro; pagbantay niadtong nagapahinabog kadaot; pagbantay niadtong nagtudlo bahin sa pagpatuli.*+ 3 Kay kita ang tinuod nga tinuli,+ kita nga naghimog sagradong pag-alagad pinaagi sa espiritu sa Diyos ug nanghambog bahin kang Kristo Jesus+ ug wala magsalig sa tawhanong mga kuwalipikasyon, 4 bisan tuod sa tanang tawo, ako ang naay rason nga magsalig sa tawhanong mga kuwalipikasyon.

Kon naay tawo nga naghunahuna nga naa siyay rason nga magsalig sa tawhanong mga kuwalipikasyon, labaw na ko: 5 gituli sa ikawalong adlaw,+ gikan sa nasod sa Israel, sa tribo ni Benjamin, natawong Hebreohanon sa Hebreohanong mga ginikanan;+ kon bahin sa balaod, Pariseo ko;+ 6 kon bahin sa kadasig, gilutos nako ang kongregasyon;+ kon bahin sa pagkamatarong base sa balaod, napamatud-an nako nga walay ikasaway kanako. 7 Apan ang mga butang nga kaniadto giisip nakong bentaha, giisip na nakong way pulos* tungod sa Kristo.+ 8 Gani, giisip sab nako nga way pulos ang tanang butang tungod sa pagkalabaw ug bili sa kahibalo kang Kristo Jesus nga akong Ginoo. Tungod niya gibiyaan nako ang tanang butang ug giisip kini nga basura, aron akong maangkon ang Kristo 9 ug mapamatud-ang nahiusa kaniya, dili tungod sa kaugalingong pagkamatarong pinaagi sa pagsunod sa Balaod, kondili tungod sa pagkamatarong pinaagi sa pagtuo+ sa Kristo,+ ang pagkamatarong nga gikan sa Diyos nga gibase sa pagtuo.+ 10 Tuyo nako nga mailhan siya ug mahibaloan ang gahom nga nagbanhaw+ kaniya ug makaambit sa iyang mga pag-antos,+ nga andam makaagom ug kamatayon nga sama sa iyaha+ 11 aron makita kon posible ba nga madawat nako ang mas sayo nga pagkabanhaw.+

12 Dili nga nadawat na nako ang ganti o nahingpit na ko, apan naningkamot ko+ aron makuha ang ganti, kay nahibalo ko nga gipili* ko ni Kristo Jesus alang niini.+ 13 Mga igsoon, wala ko maghunahuna nga nakuha na nako kini; apan mao ni ang segurado: Gikalimtan nako ang mga butang sa luyo+ ug nangab-ot ko sa mga butang sa unahan.+ 14 Naningkamot ko pag-ayo nga makab-ot ang akong tumong, ang ganti+ nga kinabuhi sa langit+ nga ihatag sa Diyos niadtong iyang gitawag pinaagi ni Kristo Jesus. 15 Busa kitang mga hamtong+ angay nga magbaton niini nga panghunahuna, apan kon ang inyong panghunahuna sukwahi niini sa bisan unsang paagi, ipadayag sa Diyos kaninyo ang hustong panghunahuna. 16 Apan bisan unsang pag-uswag ang atong nahimo, ipadayon nato kini.

17 Mga igsoon, sundoga ko ninyo+ ug matikdi kadtong nagsunod sa ehemplo nga among gihatag kaninyo. 18 Kay daghan ang nagtamay sa kamatayon sa Kristo diha sa estaka sa pagsakit.* Pirme nako silang hisgotan sa una, apan karon maghilak na ko nga maghisgot nila. 19 Ang ilang dulnganan maoy kalaglagan, ug ang ilang diyos mao ang ilang tiyan, ug gipasigarbo nila ang mga butang nga angay nilang ikaulaw, ug ang ilang hunahuna naa sa mga butang sa kalibotan.+ 20 Apan ang atong puy-anan*+ tua sa langit,+ ug mahinamon kitang naghulat sa manluluwas nga gikan didto, ang Ginoong Jesu-Kristo.+ 21 Usbon niya ang atong huyang nga lawas aron maparehas* sa iyang mahimayaong lawas+ pinaagi sa iyang dakong gahom nga magpaposible nga masakop niya ang tanang butang.+

4 Busa mga igsoon nga akong gihigugma ug gikamingawan, ang akong kalipay ug korona,+ barog mo nga lig-on+ diha sa Ginoo sumala sa ako nang giingon.

2 Gihangyo nako si Euodia ug si Sintique sa pagbaton ug samang panghunahuna diha sa Ginoo.+ 3 Oo, gihangyo sab ti ka, ingong tinuod nga isigkamagbubuhat, nga padayong tabangan kining mga bayhana. Sila uban ni Clemente ug uban pa naghago pag-ayo uban nako para sa maayong balita. Ang ngalan nilang tanan naa sa basahon sa kinabuhi.+

4 Paglipay kanunay diha sa Ginoo. Usbon nako, Paglipay!+ 5 Ipakita sa tanan ang inyong pagkamakataronganon.+ Duol na ang Ginoo. 6 Ayawg kabalaka sa bisan unsa,+ apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat;+ 7 ug ang kalinaw+ nga gikan sa Diyos, nga labaw sa tanang pagsabot, magbantay sa inyong kasingkasing+ ug hunahuna pinaagi ni Kristo Jesus.

8 Busa mga igsoon, bisan unsang butang nga tinuod, bisan unsang butang nga importante, bisan unsang butang nga matarong, bisan unsang butang nga putli, bisan unsang butang nga hiligugmaon, bisan unsang butang nga dungganon, bisan unsang butang nga maayo, ug bisan unsang butang nga dalayegon, padayon kining palandonga.*+ 9 Ang mga butang nga inyong nakat-onan, nadawat, nadungog, ug nakita maylabot kanako, buhata kini,+ ug ang Diyos sa kalinaw magauban kaninyo.

10 Ingong alagad sa Ginoo, nalipay kaayo ko nga gipakita na sab ninyo nga naghunahuna mo nako.+ Wala ko ninyo kalimti, apan wala lang moy kahigayonan sa pagpakita niini. 11 Gisulti nako ni dili tungod kay naa ko sa kawalad-on, kay nakakat-on ko nga magmakontento bisan unsay akong kahimtang.+ 12 Makamao kong magkinabuhi sa kawalad-on+ ug magkinabuhi sa kaabunda. Nakat-onan nako ang sekreto sa pagkakontento sa tanang butang ug sa tanang kahimtang, busog man o gutom, abunda man o dili. 13 Naa koy kusog sa pag-atubang sa tanang butang tungod kaniya nga naghatag nakog gahom.+

14 Bisan pa niana, maayo ang inyong gibuhat sa pagtabang kanako sa akong mga kalisdanan. 15 Gani, kamong mga taga-Filipos nahibalo sab nga human ninyo makat-oni ang maayong balita, dihang mibiya ko sa Macedonia, walay kongregasyon nga mitabang nako o midawat sa akong tabang, gawas ninyo;+ 16 tungod kay samtang didto ko sa Tesalonica, nagpadala mo para sa akong panginahanglan, dili lang kausa kondili kaduha. 17 Dili kay gasa ang akong gipangita, kondili gusto nako nga madugangan ang inyong maayong mga buhat atubangan sa Diyos. 18 Apan karon wala na ko makulangig bisan unsa, sobra pa gani, kay nadawat nako kang Epafrodito+ ang inyong gipadala, nga samag humot+ ug makapalipay nga halad para sa Diyos. 19 Sa baylo, ang akong Diyos bug-os nga magtagana sa tanan ninyong panginahanglan+ sumala sa iyang dagayang bahandi pinaagi ni Kristo Jesus. 20 Iya sa atong Diyos ug Amahan ang himaya hangtod sa kahangtoran. Amen.

21 Ikomosta ko sa tanang balaan nga nahiusa kang Kristo Jesus. Ang mga igsoon nga kauban nako nangomosta ninyo. 22 Ang tanang balaan, ilabina kadtong naa sa panimalay sa Cesar,+ nangomosta ninyo.

23 Hinaot maanaa kaninyo ang dili hitupngang pagkamaayo* ni Ginoong Jesu-Kristo tungod sa espiritu nga inyong gipakita.