SULAT PARA SA MGA TAGA-EFESO

1 Gikan kang Pablo, nga apostol ni Kristo Jesus pinaagi sa kabubut-on sa Diyos, ngadto sa mga balaan sa Efeso+ nga matinumanong mga sumusunod ni Kristo Jesus:

2 Hinaot maanaa kaninyo ang dili hitupngang pagkamaayo* ug ang kalinaw gikan sa Diyos nga atong Amahan ug ni Ginoong Jesu-Kristo.

3 Dalayegon ang Diyos ug Amahan sa atong Ginoong Jesu-Kristo, kay iya tang gipanalanginan sa tanang espirituwal nga panalangin diha sa langitnong mga dapit nga nahiusa sa Kristo,+ 4 kay sa wala pa matukod ang kalibotan iya tang gipili nga mahiusa kaniya,* aron kita mahimong balaan ug walay buling+ sa iyang atubangan tungod sa gugma. 5 Kay iya tang gipili daan+ nga sagopon ingong iyang kaugalingong mga anak+ pinaagi ni Jesu-Kristo, sumala sa kon unsay makalipay niya ug sa iyang kabubut-on,+ 6 aron dayegon ang Diyos kay gigamit niya ang iyang hinigugmang Anak+ aron ipakita kanato ang iyang dili hitupngang pagkamaayo.+ 7 Pinaagi niya kita gilukat ug gihatagag kagawasan. Oo, ang atong mga sala gipasaylo tungod sa iyang dugo.+ Ang pagkamaayo sa Diyos dili gayod hitupngan!

8 Kining dili hitupngang pagkamaayo dagaya niyang gipakita kanato uban ang tanang kaalam ug pagsabot* 9 pinaagi sa pagpahibalo kanato sa sagradong tinago+ sa iyang kabubut-on. Kana nga tinago nahiuyon sa iyang kagustohan ug katuyoan 10 nga magtukod ug administrasyon* inigkahuman sa gitakdang mga panahon, aron tigomon pag-usab ang tanang butang diha sa Kristo, ang mga butang sa langit ug ang mga butang sa yuta.+ Oo, kaniya 11 kang kinsa kami nahiusa ug gitudlo ingong kaubang mga manununod,+ kay kami gipili nang daan sumala sa kabubut-on sa Diyos, ang usa nga nagtuman sa tanang butang nga iyang nadesisyonan sumala sa iyang kabubut-on, 12 aron nga kami nga unang milaom sa Kristo mag-alagad para sa kadayeganan sa iyang himaya. 13 Apan kamo sab milaom kaniya human ninyo madunggi ang pulong sa kamatuoran, ang maayong balita bahin sa inyong kaluwasan. Human mo motuo, kamo, pinaagi kaniya, giselyohan+ sa gisaad nga balaang espiritu, 14 nga maoy garantiya* sa atong panulondon,+ aron ang gipanag-iya sa Diyos mapagawas+ pinaagig lukat,+ alang sa iyang mahimayaong kadayeganan.

15 Kanay hinungdan nga ako sab, kay nakadungog ko sa inyong pagtuo kang Ginoong Jesus ug sa gugma nga inyong gipakita sa tanang balaan, 16 walay hunong nga nagpasalamat alang kaninyo. Padayon mo nakong gihisgotan sa akong mga pag-ampo, 17 nga unta ang Diyos sa atong Ginoong Jesu-Kristo, ang mahimayaong Amahan, maghatag kaninyog gahom aron mahimo mong maalamon ug makasabot sa mga butang nga iyang gipadayag maylabot sa tukmang kahibalo kaniya.+ 18 Iyang gihayagan ang mga mata sa inyong kasingkasing, aron mahibaloan ninyo kon sa unsang paglaom nga kamo iyang gitawag, kon unsang mahimayaong bahandi ang iyang ihatag ingong panulondon para sa mga balaan,+ 19 ug kon unsa ka dakong gahom ang iyang gipakita kanato nga mga magtutuo.+ Ang iyang dakong gahom makita sa iyang mga buhat, 20 nga pinaagi niana iyang gibanhaw ang Kristo ug gipalingkod sa iyang tuong kamot+ sa langitnong mga dapit, 21 nga labaw kaayo sa tanang gobyerno ug awtoridad ug gahom ug pagkaginoo ug sa tanang ngalan,+ dili lamang niini nga sistema sa mga butang* kondili nianang sa umaabot usab. 22 Gipasakop sab sa Diyos ang tanang butang ilalom sa iyang mga tiil+ ug gihimo siyang ulo ibabaw sa tanang butang maylabot sa kongregasyon,+ 23 nga mao ang iyang lawas,+ ang kabug-osan niya nga nagkompleto sa tanang butang sa tanang paagi.

2 Dugang pa, kamo gibuhi sa Diyos bisag kamo mga patay tungod sa inyong kalapasan ug mga sala.+ 2 Kamo kaniadto nagkinabuhi sumala sa sistema sa mga butang* niining kalibotana,+ nga nagsunod sa magmamando sa awtoridad sa hangin,+ ang espiritu+ nga nagalihok karon sa mga anak sa pagkadili-masinugtanon. 3 Oo, kitang tanan kaniadto nagagawi sumala sa mga tinguha sa atong unod+ uban kanila, nga nagbuhat sa mga butang nga gipangandoy sa unod ug sa atong hunahuna,+ ug sukad sa pagkatawo kita takos* sa kasuko sa Diyos+ sama sa uban. 4 Apan ang Diyos maluluy-on kaayo,+ ug tungod sa iyang dakong gugma kanato,+ 5 siya naghatag kanatog kinabuhi uban sa Kristo, bisan niadtong kita mga patay pa tungod sa kalapasan+​—⁠pinaagi sa dili hitupngang pagkamaayo* kamo giluwas. 6 Dugang pa, kita iyang gibuhi ug gipalingkod sa langitnong mga dapit nga nahiusa kang Kristo Jesus,+ 7 aron sa umaabot nga mga sistema sa mga butang* ikapakita niya ang kadagaya sa iyang dili hitupngang pagkamaayo dihang himoon niya ang maayong mga butang para kanato nga nahiusa kang Kristo Jesus.

8 Pinaagi niining dili hitupngang pagkamaayo kamo giluwas tungod sa pagtuo,+ ug kini dili tungod sa inyong binuhatan; kini gasa sa Diyos. 9 Oo, dili kini tungod sa mga buhat,+ aron ang tawo walay rason nga manghambog. 10 Kay kita mga binuhat sa Diyos* ug gilalang+ nga nahiusa kang Kristo Jesus+ para sa maayong mga buhat, nga giandam daan sa Diyos nga atong subayon.

11 Busa hinumdomi nga kaniadto kamo, katawhan sa kanasoran, gitawag nga dili tinuli niadtong mga gituli sa mga tawo. 12 Niadtong panahona wala mo makaila sa Kristo, bulag sa nasod sa Israel, ug dili apil sa mga pakigsaad nga gibase sa saad sa Diyos;+ kamo walay paglaom ug wala makaila sa Diyos.+ 13 Apan karon nga kamo nahiusa kang Kristo Jesus, kamong nahilayo kaniadto nahiduol na pinaagi sa dugo sa Kristo. 14 Kay siya ang nagdala kanatog pakigdait,+ siya nga nag-usa sa duha ka grupo+ ug naglumpag sa paril nga nagbulag kanila.+ 15 Pinaagi sa iyang lawas* iyang giwala ang pagdumtanay, ang Balaod nga gilangkobag mga sugo ug mga mando, aron ang duha ka grupo nga nahiusa kaniya mahimo niyang usa ka bag-ong tawo+ ug aron magpahinabog pakigdait, 16 ug aron bug-os niyang mapasig-uli sa Diyos ang duha ka grupo ingong usa ka lawas pinaagi sa estaka sa pagsakit,*+ tungod kay iya nang giwala ang pagdumtanay+ pinaagi sa iyang kaugalingon. 17 Ug siya mianhi ug iyang gipahayag ang maayong balita sa pakigdait kaninyo nga layo sa Diyos ug niadtong duol Kaniya, 18 tungod kay pinaagi kaniya kita, ang duha ka grupo, makaduol sa Amahan pinaagi sa samang balaang espiritu.

19 Busa dili na mo mga estranyo ug mga langyaw+ kondili mga isigkalungsoranon+ sa mga balaan ug mga sakop sa panimalay sa Diyos,+ 20 ug kamo natukod sa pundasyon sa mga apostoles ug mga propeta,*+ samtang si Kristo Jesus mao ang batong pamag-ang* nga pundasyon.+ 21 Ang tibuok tinukod, nga nahiusa kaniya ug maayo kaayong pagkadugtong ang tanang parte niini,+ nagkadako aron mahimong balaang templo para kang Jehova.*+ 22 Kay nahiusa mo sa Kristo, kamo ug ang uban gihimo sa Diyos ingong balay nga iyang puy-an pinaagi sa iyang espiritu.+

3 Busa ako, si Pablo, nabilanggo+ kay iya ko ni Kristo Jesus ug mitabang ko ninyo, katawhan sa kanasoran. 2 Segurado nga nakadungog mo nga gihatagan kog responsibilidad+ sa pagtabang kaninyo nga makabenepisyo sa dili hitupngang pagkamaayo* sa Diyos. 3 Oo, gipadayag kanako sa Diyos ang iyang sagradong tinago, nga gihisgotan nako sa akong mubong sulat sa miagi. 4 Busa dihang mabasa ninyo kini, masabtan ninyo nga nakasabot ko sa sagradong tinago+ bahin sa Kristo. 5 Sa miaging mga henerasyon, kini nga tinago wala ipahibalo ngadto sa mga tawo sama sa pagpadayag niini karon ngadto sa iyang balaang mga apostoles ug mga propeta pinaagi sa espiritu.+ 6 Mao ni ang tinago: Ang katawhan sa kanasoran nga nahiusa kang Kristo Jesus makapanunod sa napanunod sa Kristo ug mahimong bahin sa iyang lawas.+ Sila makadawat sab sa mga butang nga gisaad sa Diyos kanamo tungod sa maayong balita. 7 Nahimo kong ministro niini sumala sa walay bayad nga gasa sa dili hitupngang pagkamaayo sa Diyos nga gihatag kanako sumala sa paglihok sa iyang gahom.+

8 Ako, nga ubos pa kay sa kinaubsan sa tanang balaan,+ gipakitaan niining dili hitupngang pagkamaayo,+ aron ipahayag nako sa kanasoran ang maayong balita bahin sa dili masukod nga bahandi sa Kristo 9 ug ipakita ngadto sa tanang tawo ang administrasyon sa sagradong tinago+ nga natago sa taas nga panahon diha sa Diyos, nga maoy nagbuhat sa tanang butang. 10 Aron nga karon, pinaagi sa kongregasyon,+ ikapahibalo ngadto sa mga gobyerno ug sa mga awtoridad diha sa langitnong mga dapit ang kaalam sa Diyos+ nga gipadayag sa daghang paagi. 11 Sumala kini sa dumalayong katuyoan maylabot sa Kristo,+ si Jesus nga atong Ginoo, 12 nga pinaagi kaniya kita nakabaton niining kagawasan sa pagsulti ug sa pagduol sa Diyos+ pinaagi sa atong pagtuo kaniya. 13 Busa ako naghangyo kaninyo nga dili maluya tungod sa akong mga kasakitan para kaninyo, kay kini nagkahulogan ug himaya kaninyo.+

14 Tungod niini ako moluhod atubangan sa Amahan, 15 nga gikan kaniya ang matag pamilya sa langit ug sa yuta nakadawat sa ilang ngalan. 16 Nag-ampo ko nga pinaagi sa kadagaya sa iyang himaya, itugot niya nga malig-on ang inyong kasingkasing+ pinaagi sa gahom sa iyang espiritu. 17 Nag-ampo sab ko nga ang Kristo ug ang gugma mopuyo sa inyong mga kasingkasing.+ Hinaot nga makagamot mo+ ug lig-ong matukod diha sa pundasyon,+ 18 aron nga uban sa tanang balaan bug-os ninyong masabtan kon unsa ang gilapdon ug gitas-on ug gihabogon ug giladmon sa kamatuoran, 19 ug mahibaloan ninyo ang gugma sa Kristo+ nga labaw pa sa kahibalo, aron madawat ninyo gikan sa Diyos ang tanan niyang hiyas.

20 Ang Diyos, sumala sa iyang gahom nga nagalihok kanato,+ makahimo gayod ug labaw pa kay sa atong gipangayo o gihunahuna.+ 21 Iya ang himaya pinaagi sa kongregasyon ug pinaagi ni Kristo Jesus sa tanang henerasyon hangtod sa kahangtoran. Amen.

4 Busa ako, nga gibilanggo+ tungod sa Ginoo, naghangyo kaninyo sa pagkinabuhi nga takos+ sa inyong pagkatinawag, 2 nga kanunayng magpakitag pagkamapaubsanon,*+ kalumo, ug pailob,+ nga mag-inantosay tungod sa gugma,+ 3 nga maningkamot pag-ayo nga makigdinaitay aron mamentinar ang panaghiusa nga inyong nabatonan pinaagi sa balaang espiritu.+ 4 Adunay usa ka lawas,+ ug usa ka espiritu,+ sama nga dunay usa ka paglaom+ nga alang niini kamo gitawag; 5 usa ka Ginoo,+ usa ka pagtuo, usa ka bawtismo; 6 usa ka Diyos ug Amahan sa tanan, nga labaw sa tanan ug nagalihok pinaagi sa tanan ug anaa sa tanan.

7 Ang matag usa nato nakadawat sa dili hitupngang pagkamaayo* sa Diyos, ug ang Kristo maoy naghatag niini nga gasa sa matag usa kanato.+ 8 Kay ang kasulatan nag-ingon: “Dihang misaka siya sa kahitas-an siya nagdalag mga binihag; siya naghatag ug gasa nga mga lalaki.”+ 9 Dili ba ang pamulong nga “misaka siya” nagpasabot nga siya usab nanaog sa ubos nga mga dapit, nga mao ang yuta? 10 Ang usa nga nanaog mao usab ang misaka+ saylo pa sa kalangitan,+ aron matuman* ang tanang butang.

11 Ug iyang gihatag ang uban ingong mga apostoles,+ ang uban ingong mga propeta,+ ang uban ingong mga tig-ebanghelyo,*+ ang uban ingong mga magbalantay ug mga magtutudlo,+ 12 aron sa pagbansay* sa mga balaan, para sa buluhaton sa pag-alagad, aron sa pagpalig-on sa lawas sa Kristo,+ 13 hangtod nga kitang tanan magkahiusa sa pagtuo ug sa tukmang kahibalo bahin sa Anak sa Diyos, ug mahimong hamtong nga tawo,+ sama sa pagkahamtong sa Kristo. 14 Busa dili kita angayng magpabiling bata, nga samag gianod-anod sa mga balod ug gidala ngadto-nganhi sa matag hangin sa pagtulon-an+ pinaagi sa paglingla sa mga tawo nga naggamit ug malimbongong mga taktika. 15 Kondili mosulti kita sa kamatuoran ug magpakitag gugma aron bug-os kitang mohamtong agig pagsundog sa Kristo, ang ulo.+ 16 Gikan kaniya, ang tibuok lawas+ takdo nga nagdugtongay ug nagtinabangay pinaagi sa matag lutahan aron kini molihok sumala sa gikinahanglan. Kon ang matag parte sa lawas molihok sa hustong paagi, makatabang kini sa pagtubo sa lawas, mao nga kini molig-on diha sa gugma.+

17 Busa sa ngalan sa Ginoo, sultihan mo nako nga dili na magkinabuhi sama sa mga tawo sa kanasoran,+ diha sa pagkawalay-pulos sa ilang kaisipan.+ 18 Ang ilang kaisipan naa sa kangitngit ug sila nahimulag sa kinabuhi nga naggikan sa Diyos, tungod kay sila walay kahibalo ug ang ilang kasingkasing nakubalan.* 19 Kay dili na makaila kon unsay maayo ug daotan, sila nagpatuyang sa walay kaulaw nga paggawi,*+ nga nagbuhat sa tanang matang sa kahugawan uban ang kahakog.

20 Apan nakat-onan ninyo nga dili ingon niana ang Kristo, 21 kay kamo nakadungog ug natudloan bahin sa kamatuoran nga gitudlo ni Jesus. 22 Kamo gitudloan nga hukason ang daang personalidad+ ug talikdan ang kanhi ninyong binuhatan, kay ang daan ninyong personalidad nadaot tungod sa malimbongong mga tinguha.+ 23 Ug angay nga padayon ninyong bag-ohon ang inyong panghunahuna,*+ 24 ug isul-ob ang bag-ong personalidad+ nga gihimo sumala sa kabubut-on sa Diyos, nga nahiuyon sa tinuod nga pagkamatarong ug pagkamaunongon.

25 Busa karon nga gisalikway na ninyo ang panglimbong, ang matag usa kaninyo magsultig tinuod sa iyang isigkatawo,+ kay kita mga parte sa usa ka lawas.+ 26 Kon masuko mo, ayaw pagpakasala;+ ayaw pasalopi sa adlaw ang inyong kasuko;+ 27 ayaw hatagig higayon* ang Yawa.+ 28 Ang kawatan kinahanglang dili na mangawat; hinuon maghago siya, nga magtrabaho sa matarong nga paagi+ aron duna siyay ikahatag sa nanginahanglan.+ 29 Ang mga pulong nga mogawas sa inyong baba+ kinahanglang dili ngil-ad, kondili kanang makapalig-on sumala sa gikinahanglan aron makahatag ug kaayohan sa mga namati.+ 30 Dugang pa, ayaw paguola ang balaang espiritu sa Diyos,+ nga pinaagi niana kamo giselyohan+ alang sa adlaw sa pagpagawas pinaagi sa lukat.+

31 Wad-a ang tanang klase sa pagdumot,+ kasuko, kapungot, siningkahay, ug sakit nga sinultihan,+ apil na ang bisan unsa nga makapahinabog kadaot.+ 32 Apan magpakita mog kaayo sa usag usa, magmabination,+ kinasingkasing nga magpasaylo sa usag usa sama nga ang Diyos kinasingkasing nga nagpasaylo kaninyo pinaagi sa Kristo.+

5 Busa sundoga ang Diyos,+ ingong minahal nga mga anak, 2 ug padayon sa pagpakitag gugma,+ sama nga ang Kristo nahigugma sab kanato*+ ug naghatag sa iyang kaugalingon para kanato* ingong humot nga halad para sa Diyos.+

3 Ang seksuwal nga imoralidad* ug ang tanang matang sa kahugawan o kahakog dili ninyo angayng hisgotan,+ kay dili kini angay sa mga balaan;+ 4 apil niana ang makauulaw nga paggawi, binuang nga sinultihan, ug law-ay nga komedya+​—⁠mga butang nga dili angay⁠—​hinuon pagsulti mog mga pasalamat sa Diyos.+ 5 Kay kamo nahibalo ug nakasabot pag-ayo nga walay tawong naghimog seksuwal nga imoralidad*+ o tawong hugaw o tawong hakog,+ sa ato pa tigsimbag idolo, ang may panulondon sa Gingharian sa Kristo ug sa Diyos.+

6 Ayaw mog palimbong sa way pulos nga mga pulong, kay tungod sa maong mga butang ang kasuko sa Diyos modangat sa mga anak sa pagkadili-masinugtanon. 7 Busa ayaw ninyo himoa ang ilang ginahimo;* 8 kay kaniadto naa mo sa kangitngit, apan karon naa na mo sa kahayag+ maylabot sa Ginoo.+ Padayon mo sa pagkinabuhi ingong mga anak sa kahayag, 9 kay ang bunga sa kahayag naglangkob sa tanang matang sa pagkamaayo ug pagkamatarong ug kamatuoran.+ 10 Seguroa kanunay kon unsay dalawaton+ sa Ginoo; 11 ug hunong na sa pagpakig-ambit sa way pulos nga mga buhat nga iya sa kangitngit;+ hinuon, iyagyag kini.* 12 Kay ang mga butang nga sekreto nilang ginahimo makauulaw ganing isulti. 13 Karon ang tanang butang nga ginayagyag* nadayag pinaagi sa kahayag, kay ang tanang butang nga ginahimo mahayagan. 14 Mao nga gikaingon: “Mata na, ikaw nga natulog. Bangon gikan sa kamatayon,+ ug ang Kristo mosidlak kanimo.”+

15 Busa pagbantay pag-ayo nga ang inyong paggawi dili sama sa dili maalamon kondili sa maalamong mga tawo, 16 nga gamiton ang inyong panahon sa kinamaayohang paagi,*+ tungod kay nagkinabuhi ta sa daotang mga adlaw. 17 Busa hunong na sa pagkadili-makataronganon, hinuon padayong sabta kon unsa ang kabubut-on ni Jehova.*+ 18 Dugang pa, ayaw mo paghuboghubog*+ kay motultol kini sa daotang mga buhat, hinuon pun-a pirme ang inyong kaugalingon sa balaang espiritu. 19 Awiti ang usag usa* ug mga salmo, mga pagdayeg sa Diyos, ug espirituwal nga mga awit, nga mag-awit+ nga kinasingkasing* kang Jehova,*+ 20 nga magpasalamat kanunay+ sa atong Diyos ug Amahan alang sa tanang butang sa ngalan sa atong Ginoong Jesu-Kristo.+

21 Magpasakop mo sa usag usa+ tungod sa inyong dakong pagtahod sa Kristo. 22 Ang mga asawa kinahanglang magpasakop sa ilang mga bana+ sama sa ilang pagpasakop sa Ginoo, 23 tungod kay ang bana maoy ulo sa iyang asawa+ sama nga ang Kristo maoy ulo sa kongregasyon,+ kay siya ang manluluwas niini nga lawas. 24 Sa pagkatinuod, sama nga ang kongregasyon nagpasakop sa Kristo, ang mga asawa angay sab nga magpasakop sa ilang mga bana sa tanang butang. 25 Mga bana, padayong higugmaa ang inyong mga asawa,+ sama nga ang Kristo nahigugma sa kongregasyon ug naghatag sa iyang kaugalingon alang niini,+ 26 aron iyang mabalaan kini, nga naghinlo niini pinaagi sa paghugas niini sa pulong sa Diyos,+ 27 aron sa iyang atubangan ang kongregasyon maayong tan-awon, walay buling o kunot o bisan unsang daot,+ hinuon kini balaan ug walay lama.+

28 Sa samang paagi angayng higugmaon sa mga bana ang ilang mga asawa sama sa ilang kaugalingong lawas. Siya nga nahigugma sa iyang asawa nahigugma sa iyang kaugalingon, 29 kay wala gyoy tawo nga nagdumot sa iyang lawas,* apan nagpakaon ug nagpangga niini, sama sa ginahimo sa Kristo sa kongregasyon, 30 tungod kay kita mga parte sa iyang lawas.+ 31 “Tungod niini ang lalaki mobiya sa iyang amahan ug inahan ug moipon* sa iyang asawa, ug silang duha mahimong usa ka unod.”+ 32 Importante kini nga sagradong tinago.+ Karon ako nagsulti bahin sa Kristo ug sa kongregasyon.+ 33 Hinuon, kinahanglang higugmaon sa matag usa ang iyang asawa+ sama sa iyang kaugalingon; sa laing bahin, ang asawa angay nga dunay dakong pagtahod sa iyang bana.+

6 Mga anak, magmasinugtanon mo sa inyong ginikanan+ sumala sa kabubut-on sa Diyos, kay kini matarong. 2 “Pasidunggi ang imong amahan ug ang imong inahan,”+ mao ni ang unang sugo nga may saad: 3 “Aron magmauswagon ka ug mabuhig dugay sa yuta.” 4 Ug mga amahan, ayaw palagota ang inyong mga anak,+ kondili padayon silang matutoa pinaagi sa disiplina+ ug tambag* ni Jehova.*+

5 Mga ulipon, magmasinugtanon mo sa inyong mga agalon+ dinhi sa yuta, nga may pagtahod, may kahadlok, ug kinasingkasing, sama sa inyong pagkamasinugtanon sa Kristo, 6 dili lang kon naay nagtan-aw ninyo aron pahimut-an ang mga tawo,+ apan ingong mga ulipon sa Kristo nga nagbuhat sa kabubut-on sa Diyos nga tibuok kalag.*+ 7 Alagari ang inyong agalon nga kinabubut-on, nga samag nag-alagad kang Jehova,*+ ug dili sa mga tawo, 8 kay nahibalo mo nga bisan unsang maayo nga himoon sa matag usa, madawat niya kinig balik gikan kang Jehova,*+ ulipon man siya o gawasnon. 9 Kamo sab nga mga agalon, padayon silang tratara sa samang paagi, nga dili manghulga, kay nahibalo mo nga ang ilang Agalon, nga agalon pod ninyo, tua sa langit+ ug siya walay pagpihig.

10 Sa kataposan, padayon mo sa pagbaton ug kusog+ gikan sa Ginoo pinaagi sa gahom sa iyang kusog. 11 Isul-ob ang kompletong armadura+ gikan sa Diyos aron lig-on mong makabarog batok sa mga lit-ag* sa Yawa; 12 tungod kay kita dunay pakig-away,*+ dili batok sa dugo ug unod, kondili batok sa mga gobyerno, batok sa mga awtoridad, batok sa mga magmamando niining ngitngit nga kalibotan, batok sa daotang espiritung mga puwersa+ sa langit. 13 Busa isul-ob ang kompletong armadura sa Diyos,+ aron makasukol mo inig-abot sa daotang adlaw ug, human ninyo mahimo ang tanan, lig-on mong makabarog.

14 Busa barog nga lig-on, nga binaksan ang inyong hawak sa bakos sa kamatuoran,+ ug nagsul-ob sa pagkamatarong ingong panagang sa dughan,+ 15 ug sinul-oban ang inyong mga tiil sa sandalyas sa maayong balita sa pakigdait, nga andam ninyong isangyaw.+ 16 Gawas niini, dad-a ang dakong taming sa pagtuo,+ nga pinaagi niini mapalong ninyo ang tanang nagdilaab nga pana sa daotan.+ 17 Isul-ob sab ang helmet sa kaluwasan,+ ug dad-a ang espada sa espiritu, nga mao ang pulong sa Diyos,+ 18 samtang padayon mong mag-ampo pinaagi sa espiritu+ sa matag higayon, nga naggamit sa tanang matang sa pag-ampo+ ug pangamuyo. Busa padayon sa pagbantay, nga mangamuyo kanunay para sa tanang balaan. 19 Iampo sab ko, aron mahibalo ko kon unsay angayng isulti dihang mosulti ko, aron may kaisog ko sa pagsangyaw sa sagradong tinago sa maayong balita,+ 20 nga tungod niini ako nahimong embahador+ nga kinadenahan, aron makasulti ko bahin niini nga may kaisog, nga maoy angay nakong himoon.

21 Karon aron mahibalo sab mo bahin nako ug sa akong kahimtang, si Tiquico,+ nga minahal nga igsoon ug matinumanong ministro sa Ginoo, magpahibalo kaninyo sa tanan.+ 22 Gipadala nako siya aron sultihan mo sa among situwasyon ug aron mahupay mo niya.

23 Hinaot ang mga igsoon dunay kalinaw ug gugma ug pagtuo gikan sa Diyos nga Amahan ug ni Ginoong Jesu-Kristo. 24 Hinaot ang dili hitupngang pagkamaayo* maanaa sa tanang tinuod nga nahigugma sa atong Ginoong Jesu-Kristo.