UNANG BASAHON NI SAMUEL

1 Karon may usa ka tawo nga taga-Ramataim-zopim*+ sa kabukiran sa Epraim+ nga ginganlag Elkana,+ nga anak ni Jeroham, nga anak ni Elihu, nga anak ni Tohu, nga anak ni Zup; siya usa ka Epraimnon. 2 Siya may duha ka asawa, si Ana ug si Penina. Si Penina may mga anak, apan si Ana wala. 3 Kada tuig siyang motungas sa Shilo gikan sa iyang siyudad aron sa pagsimba* ug paghalad kang Jehova sa mga panon.*+ Didto nag-alagad ingong mga saserdote ni Jehova+ ang duha ka anak ni Eli nga si Hopni ug Pinehas.+

4 Sa adlaw nga si Elkana maghalad, iyang hatagag mga bahin ang iyang asawa nga si Penina ug ang tanan niyang mga anak nga lalaki ug babaye,+ 5 apan si Ana hatagan niyag linaing bahin kay mas gihigugma niya siya; apan wala hatagi ni Jehova ug mga anak si Ana.* 6 Dugang pa, ang iyang karibal kanunayng magbiaybiay kaniya aron pasakitan siya kay wala siya hatagi ni Jehova ug mga anak. 7 Mao kana ang iyang ginahimo matag tuig; dihang motungas si Ana sa balay ni Jehova,+ biaybiayon siya pag-ayo sa iyang karibal mao nga siya mohilak ug dili mokaon. 8 Apan ang iyang bana nga si Elkana miingon kaniya: “Ana, nganong naghilak ka, ug nganong dili ka mokaon, ug nganong masulub-on kaayo ka?* Dili ba labaw pa man ko kay sa 10 ka anak nga lalaki?”

9 Unya, sa didto sila sa Shilo, si Ana mitindog human sila makapangaon ug makainom. Nianang tungora, si Eli nga saserdote naglingkod sa lingkoranan daplin sa haligi sa pultahan sa templo*+ ni Jehova. 10 Pait kaayo ang gibati ni Ana, ug siya miampo kang Jehova+ ug mihilak pag-ayo. 11 Ug siya nanaad: “Oh Jehova sa mga panon, kon imong hatagag pagtagad ang kasakitan sa imong alagad ug imo kong hinumdoman ug dili nimo kalimtan ang imong alagad ug hatagan nimo ang imong alagad ug anak nga lalaki,+ ako siyang ihatag kanimo, Jehova, sa tibuok niyang kinabuhi, ug walay labaha nga modapat sa iyang ulo.”+

12 Taas ang iyang pag-ampo kang Jehova, ug samtang nag-ampo, gipanid-an ni Eli ang iyang baba. 13 Si Ana nagsulti diha sa iyang kasingkasing; nagkibotkibot lang ang iyang mga ngabil, apan dili madungog ang iyang tingog. Busa nagtuo si Eli nga siya hubog. 14 Si Eli miingon kaniya: “Nganong hubog man ka? Ayawg balik dinhi hangtod dili ka mahuwasan.” 15 Si Ana mitubag: “Dili, akong ginoo! Naguol lang gyod ko pag-ayo.* Wala ko moinom ug bino o bisan unsang alkoholikong ilimnon. Gibubo lang nako kang Jehova ang akong gibati.+ 16 Ayaw isipa ang imong alagad ingong babayeng way silbi, kay nag-ampo ko hangtod karon tungod sa akong grabeng kasakit ug kaguol.” 17 Unya si Eli mitubag: “Lakaw nga malinawon, ug hinaot ihatag sa Diyos sa Israel ang imong gihangyo kaniya.”+ 18 Siya miingon: “Padayon untang mabatonan sa imong alagad ang imong pag-uyon.” Ug si Ana milakaw ug mikaon, ug ang iyang nawong dili na magul-anon.

19 Unya mibangon sila sayo sa buntag ug miyukbo atubangan ni Jehova, ug dayon namauli sila sa ilang balay sa Rama.+ Si Elkana nakigdulog sa iyang asawa nga si Ana, ug si Jehova naghatag ug pagtagad* kang Ana.+ 20 Human sa mga usa ka tuig* si Ana nagmabdos ug nanganak ug lalaki ug ginganlan+ niya siyag Samuel,* kay matod niya, “gipangayo nako siya kang Jehova.”

21 Unya si Elkana mitungas uban sa tibuok niyang panimalay sa paghalad sa tinuig nga halad alang kang Jehova+ ug sa pagtanyag sa iyang halad sa panaad. 22 Apan si Ana wala motungas,+ kay iyang giingnan ang iyang bana: “Dihang malutas na ang bata, ako siyang dad-on sa atubangan ni Jehova ug didto na siya magpuyo.”+ 23 Unya si Elkana nga iyang bana miingon kaniya: “Buhata kon unsay gihunahuna nimo nga labing maayo.* Pabilin dinhi sa balay hangtod nga malutas na nimo siya. Hinaot tumanon ni Jehova ang imong giingon.” Busa ang babaye nagpabilin sa balay ug nagpasuso sa iyang anak hangtod nga nalutas niya siya.

24 Dihang ang bata nalutas na, iyang gidala ang bata sa Shilo. Siya nagdala usab ug torong baka nga tulo ka tuig ang kagulangon, usa ka epah* nga harina, ug usa ka dakong banga sa bino.+ Unya siya misulod sa balay ni Jehova sa Shilo+ kauban ang bata. 25 Unya ilang giihaw ang torong baka ug gidala ang bata ngadto kang Eli. 26 Unya siya miingon: “Tabi, akong ginoo! Ingon nga ikaw buhi, ako kadtong babaye nga nagbarog kauban nimo niining dapita nga nag-ampo kang Jehova.+ 27 Kining bataa ang akong giampo, ug gihatag ni Jehova ang akong gihangyo kaniya.+ 28 Ug sa akong bahin, ako siyang ihatag* kang Jehova. Sa tibuok niyang kinabuhi, siya iya ni Jehova.”

Ug siya* miyukbo kang Jehova didto.

2 Unya si Ana nag-ampo:

11 Unya si Elkana mipauli sa iyang balay sa Rama, apan ang bata nag-alagad kang Jehova+ ubos sa paggiya ni Eli nga saserdote.

12 Karon, ang mga anak nga lalaki ni Eli mga daotan;+ wala sila moila kang Jehova. 13 Imbes kuhaon nila kon unsa ray bahin sa mga saserdote, mao kini ang ilang gihimo:+ Dihang may bisan kinsa nga magtanyag ug halad, ang usa ka tig-alagad sa saserdote moabot nga magdalag dakong tenedor samtang gilat-an ang karne, 14 ug itusok kini diha sa kawa, sa kulon nga duhay gunitanan, sa kaldero, o sa kulon nga usay gunitanan. Ang bisan unsa nga madala sa tenedor kuhaon sa saserdote alang sa iyang kaugalingon. Ingon niana ang ilang gibuhat sa tanang Israelinhon nga moadto sa Shilo. 15 Dugang pa, sa dili pa mapaaso sa tawong naghalad ang tambok,+ ang usa ka tig-alagad sa saserdote moabot ug moingon kaniya: “Hatagig karne nga sugbahonon ang saserdote. Dili linat-an nga karne ang iyang kuhaon gikan nimo, kondili kana lang hilaw.” 16 Kon ang tawo moingon kaniya: “Ipaseguro una nga mapaaso nila ang tambok,+ unya kuhaa bisan unsay gusto nimo,” siya moingon: “Dili, ihatag kini kanako karon; kay kon dili, pugson nako kinig kuha!” 17 Busa ang mga tig-alagad dako kaayog sala kang Jehova,+ kay wala tahora sa maong mga tawo ang halad alang kang Jehova.

18 Ug si Samuel nag-alagad+ sa atubangan ni Jehova bisag bata pa, nga nagsul-ob* ug epod nga lino.+ 19 Unya himoan siya sa iyang inahan ug gamayng besti nga walay bukton, ug dad-on kini sa iyang inahan ngadto kaniya matag tuig dihang ang iyang inahan ug amahan maghalad sa tinuig nga halad.+ 20 Ug gipanalanginan ni Eli si Elkana ug ang iyang asawa ug miingon: “Hinaot si Jehova maghatag kaninyog anak ilis sa anak nga gihatag* ninyo kang Jehova.”+ Unya sila namauli. 21 Tuod man si Jehova naluoy kang Ana, mao nga siya nagmabdos;+ ug siya nanganak ug tulo ka lalaki ug duha ka babaye. Ug ang batang si Samuel nagpadayon sa pagdako sa atubangan ni Jehova.+

22 Karon, si Eli tigulang na kaayo, ug nadungog niya ang tanang ginabuhat sa iyang mga anak+ nganha sa tibuok Israel ug ang ilang pagpakigdulog sa mga babaye nga nag-alagad diha sa entrada sa tolda nga tagboanan.+ 23 Kanunay niya silang ingnan: “Nganong ginabuhat ninyo kining mga butanga? Pulos daotan ang akong nadungog gikan sa mga tawo bahin kaninyo. 24 Ayaw na ninyo kanag himoa, mga anak. Dili maayo ang akong nadungog nga balita nga mikaylap sa katawhan ni Jehova. 25 Kon ang usa ka tawo makasala batok sa laing tawo, dunay mangamuyo kang Jehova* alang kaniya; apan kon ang usa makasala batok kang Jehova,+ kinsay mangamuyo alang kaniya?” Apan wala sila mamati sa ilang amahan, kay si Jehova nakahukom na sa pagpatay kanila.+ 26 Sa kasamtangan, ang batang si Samuel padayong nagdako, ug siya naangayan pag-ayo ni Jehova ug sa mga tawo.+

27 Unya dihay tawo nga gipadala sa Diyos kang Eli kinsa miingon kaniya: “Mao kini ang giingon ni Jehova: ‘Dili ba gipadayag man nako ang akong kaugalingon sa panimalay sa imong katigulangan samtang didto sila sa Ehipto ingong mga ulipon sa Paraon?*+ 28 Ug siya gipili gikan sa tanang tribo sa Israel+ aron mag-alagad ingong akong saserdote ug maghalad diha sa akong halaran,+ maghalad ug insenso,* ug magsul-ob ug epod sa pag-alagad kanako; ug akong gihatag kaniya ug sa iyang kaliwatan ang katungod sa pagkuhag bahin sa karne nga sunogon sa mga Israelinhon* ingong halad alang kanako.+ 29 Nganong gitamay* ninyo ang akong halad ug ang akong tanyag nga akong gisugo diha sa akong puy-anan?+ Nganong padayon nimong gipasidunggan ang imong mga anak labaw kay kanako, nga nagpatambok sa inyong kaugalingon pinaagi sa kinamaayohang mga bahin sa matag halad sa Israel nga akong katawhan?+

30 “‘Tungod niana si Jehova nga Diyos sa Israel miingon: “Sa pagkatinuod ako miingon nga ang imong panimalay ug ang panimalay sa imong katigulangan kanunayng mag-alagad kanako.”+ Apan karon si Jehova nagpahayag: “Dili na kana mahitabo! Kay kadtong nagpasidungog kanako akong pasidunggan,+ apan kadtong nagtamay kanako pagatamayon.” 31 Moabot gayod ang mga adlaw dihang akong hanawon ang imong kusog* ug ang kusog sa panimalay sa imong katigulangan, mao nga walay matigulang sa imong panimalay.+ 32 Ug bisan pa sa tanang maayong butang nga natagamtam sa Israel,+ kaaway lang ang imong makita sa akong puy-anan, ug wala na gayod unyay tigulang sa imong balay. 33 Ang imong kaliwat nga dili nako tangtangon sa pag-alagad diha sa akong halaran magpahalap sa imong mga mata ug magdala kanimog kagul-anan, apan ang kadaghanan sa imong panimalay mangamatay sa espada sa mga tawo.+ 34 Ug ang mahitabo sa imong duha ka anak, si Hopni ug Pinehas, mao unyay imong ilhanan: Sa usa ka adlaw silang duha mamatay.+ 35 Unya magpili kog matinumanong saserdote alang kanako.+ Iyang buhaton ang gitinguha sa akong kasingkasing;* ug akong ipahinabo nga molungtad ang iyang panimalay, ug siya mag-alagad kanunay ingong saserdote alang sa akong dinihogan. 36 Si bisan kinsa nga mahibilin sa imong panimalay moadto ug moyukbo kaniya ug mohangyog trabaho aron makapalit ug tinapay ug moingon: “Palihog, himoa kong saserdote aron duna koy makaon nga tinapay.”’”+

3 Sa kasamtangan, ang batang si Samuel nag-alagad+ kang Jehova ubos sa paggiya ni Eli, apan ang pulong gikan kang Jehova talagsa ra niadtong mga adlawa; wala kaayoy mga panan-awon.+

2 Usa ka adlaw niana, si Eli naghigda sa iyang kuwarto, ug ang iyang mga mata mihalap na; dili na siya makakita.+ 3 Ang lampara sa Diyos+ wala pa mapalong, ug si Samuel naghigda sa templo*+ ni Jehova, diin nahimutang ang Kaban sa Diyos. 4 Unya gitawag ni Jehova si Samuel. Siya mitubag: “Ania ko.” 5 Siya midagan ngadto kang Eli ug miingon: “Ania ko, kay gitawag ko nimo.” Apan siya miingon: “Wala ka nako tawga. Tulog ug balik.” Busa siya natulog ug balik. 6 Si Jehova mitawag na usab: “Samuel!” Ug si Samuel mibangon ug miadto kang Eli ug miingon: “Ania ko, kay gitawag ko nimo.” Apan siya miingon: “Wala ka nako tawga, anak ko. Tulog ug balik.” 7 (Niadtong panahona, si Samuel wala pa bug-os makaila kang Jehova, ug ang pulong ni Jehova wala pa ipadayag kaniya.)+ 8 Busa si Jehova mitawag sa ikatulong higayon: “Samuel!” Dihadiha siya mibangon ug miadto kang Eli ug miingon: “Ania ko, kay gitawag ko nimo.”

Unya si Eli nakaamgo nga si Jehova ang nagtawag sa bata. 9 Busa si Eli miingon kang Samuel: “Balik ug higda, ug kon tawgon ka niya pag-usab, isulti kini, ‘Palihog sulti, Jehova, kay ang imong alagad namati.’” Ug si Samuel mibalik ug higda.

10 Si Jehova miabot ug mibarog didto, ug siya mitawag pag-usab: “Samuel, Samuel!” Busa si Samuel mitubag: “Palihog sulti, kay ang imong alagad namati.” 11 Si Jehova miingon kang Samuel: “Tan-awa! Duna koy buhaton sa Israel ug si bisan kinsang makadungog niini makurat gayod.*+ 12 Nianang adlawa akong ipahamtang kang Eli ang tanan nakong gisulti labot sa iyang panimalay, gikan sa sinugdan hangtod sa kataposan.+ 13 Kinahanglan nimo siyang sultihan nga magpahamtang kog paghukom sa iyang panimalay hangtod sa panahong walay tino tungod sa kasaypanan nga iyang nahibaloan,+ kay gipasipalahan sa iyang mga anak ang Diyos,+ apan wala niya sila badlonga.+ 14 Tungod niana ako nanumpa sa panimalay ni Eli nga wala gayoy halad o tanyag nga makatabon sa kasaypanan sa panimalay ni Eli.”+

15 Si Samuel natulog hangtod sa buntag; unya iyang giablihan ang mga pultahan sa balay ni Jehova. Nahadlok si Samuel nga isulti kang Eli ang panan-awon nga iyang nakita. 16 Apan gitawag ni Eli si Samuel: “Samuel, anak ko!” Siya mitubag: “Ania ko.” 17 Siya nangutana: “Unsang mensahe ang iyang gisulti kanimo? Palihog, ayaw kana ililong kanako. Pahamtangan unta kag silot sa Diyos ug dugangan pa kana kon maglilong kag bisan usa ka pulong sa tanan niyang gisulti kanimo.” 18 Busa gisulti ni Samuel kaniya ang tanan, ug wala siyay gililong. Si Eli miingon: “Gikan kadto kang Jehova. Himoon niya kon unsay maayo sa iyang panan-aw.”

19 Samtang nagtubo si Samuel, si Jehova mismo nag-uban kaniya+ ug wala gayod niya tugoti nga may bisan usa sa iyang mga pulong nga dili matuman.* 20 Ug nahibaloan sa tibuok Israel gikan sa Dan hangtod sa Beer-seba nga si Samuel gipili ingong propeta* ni Jehova. 21 Ug si Jehova padayong nagpakita sa Shilo, kay gipadayag ni Jehova ang iyang kaugalingon kang Samuel didto sa Shilo pinaagi sa pulong ni Jehova.+

4 Ug ang pulong ni Samuel gipahibalo ngadto sa tibuok Israel.

Unya ang Israel migula aron makiggubat sa mga Filistehanon; sila nagkampo duol sa Ebenezer, ug ang mga Filistehanon nagkampo sa Apek. 2 Ang mga Filistehanon naghan-ay aron makiggubat sa Israel, ug ang mga Filistehanon mipatigbabaw mao nga napildi ang Israel ug napatyag mga 4,000 ka tawo diha sa panggubatan. 3 Dihang ang mga sundalo namalik sa kampo, ang mga ansiyano sa Israel miingon: “Nganong gitugot ni Jehova nga mapildi ta* karon sa mga Filistehanon?+ Kuhaon nato sa Shilo ang kaban sa pakigsaad ni Jehova ug dad-on dinhi,+ aron kini magluwas kanato gikan sa kamot sa atong mga kaaway.” 4 Busa ang katawhan nagpadalag mga tawo ngadto sa Shilo, ug ilang gidala gikan didto ang kaban sa pakigsaad ni Jehova sa mga panon, nga naglingkod sa trono ibabaw* sa mga kerubin.+ Ang duha ka anak ni Eli, si Hopni ug Pinehas,+ atua usab uban sa kaban sa pakigsaad sa matuod nga Diyos.

5 Pag-abot gyod sa kaban sa pakigsaad ni Jehova diha sa kampo, ang tanang Israelinhon naninggit ug kusog, mao nga ang yuta miuyog. 6 Dihang nadungog sa mga Filistehanon ang pagpaninggit, sila miingon: “Ngano kahang naninggit ug kusog ang mga Hebreohanon diha sa ilang kampo?” Sa ulahi, ilang nahibaloan nga ang Kaban ni Jehova gidala diay sa kampo. 7 Ang mga Filistehanon nangahadlok, kay matod pa nila: “Ang Diyos anaa na sa kampo!”+ Busa sila miingon: “Alaot kita, kay wala pay ingon niini nga nahitabo sukad! 8 Alaot kita! Kinsay moluwas kanato gikan sa kamot niining gamhanang Diyos? Kini nga Diyos ang nagpahamtang sa Ehipto ug lainlaing hampak didto sa kamingawan.+ 9 Magmaisogon kamo ug magpakalalaki, kamong mga Filistehanon, aron dili kamo mag-alagad sa mga Hebreohanon sama sa ilang pag-alagad kaninyo.+ Magpakalalaki kamo, pakig-away!” 10 Busa ang mga Filistehanon nakig-away ug ang Israel napildi,+ ug ang matag usa miikyas ug mipauli. Grabe kaayo ang pagpamatay; sa Israel, 30,000 ka sundalo nga nagbaktas ang nangamatay. 11 Nailog usab ang Kaban sa Diyos, ug ang duha ka anak nga lalaki ni Eli, si Hopni ug Pinehas, namatay.+

12 Dihay tawong Benjaminhon nga miikyas sa panggubatan ug nakaabot sa Shilo nianang adlawa nga ang iyang besti gisi ug may yuta sa iyang ulo.+ 13 Pag-abot niya, si Eli naglingkod sa lingkoranan daplin sa dalan ug nagpaabot, kay siya nabalaka pag-ayo tungod sa Kaban sa matuod nga Diyos.+ Ang maong tawo misulod sa siyudad aron ibalita ang nahitabo, ug ang tibuok siyudad mitiyabaw. 14 Dihang nadungog ni Eli ang pagtiyabaw, siya miingon: “Nganong dunay kaguliyang?” Ang maong tawo nagdali sa pag-adto kang Eli aron ihatod ang balita. 15 (Si Eli 98 anyos na, ug dili na makakita.)+ 16 Unya ang tawo miingon kang Eli: “Gikan ko sa panggubatan! Karong adlawa lang ko miikyas.” Unya siya nangutana: “Unsa may nahitabo, anak ko?” 17 Busa ang naghatod sa balita miingon: “Ang Israel mikalagiw gikan sa mga Filistehanon, ug daghan ang nangamatay sa katawhan;+ ang duha nimo ka anak, si Hopni ug Pinehas, apil sa nangamatay,+ ug ang Kaban sa matuod nga Diyos nailog.”+

18 Pagsulti gayod niya bahin sa Kaban sa matuod nga Diyos, si Eli natikay-ang gikan sa iyang gilingkoran daplin sa ganghaan,* ug nabali ang iyang liog ug siya namatay, kay siya bug-at ug tigulang na. Siya naghukom sa Israel sulod sa 40 ka tuig. 19 Ang iyang binalaye, ang asawa ni Pinehas, mabdos ug manganakay na. Pagkadungog niya nga ang Kaban sa matuod nga Diyos nailog ug nga ang iyang ugangan ug ang iyang bana namatay, siya mitikubo ug kalit nga nagbati ug nanganak. 20 Dihang siya himalatyon na, ang mga babaye nga nagbarog tapad kaniya miingon: “Ayawg kabalaka kay lalaki ang imong anak.” Siya wala motubag ug wala magtagad niana.* 21 Apan iyang ginganlan ang bata ug Ikabod,*+ ug miingon: “Ang himaya sa Israel ilang gibihag.”+ Ang iyang gipasabot mao ang pag-ilog sa Kaban sa matuod nga Diyos ug ang nahitabo sa iyang ugangan ug sa iyang bana.+ 22 Siya miingon: “Ang himaya sa Israel ilang gibihag, kay ang Kaban sa matuod nga Diyos nailog.”+

5 Dihang nailog sa mga Filistehanon ang Kaban+ sa matuod nga Diyos, ila kining gidala gikan sa Ebenezer ngadto sa Asdod. 2 Unya gidala sa mga Filistehanon ang Kaban sa matuod nga Diyos ngadto sa balay* ni Dagon ug gibutang kini tapad kang Dagon.+ 3 Dihang ang mga Asdodnon namangon ug sayo pagkaugma, ilang nakita nga si Dagon naumod sa yuta atubangan sa Kaban ni Jehova.+ Busa ilang gibalik si Dagon sa dapit niini.+ 4 Pagbangon nilag sayo pagkasunod adlaw, si Dagon naumod na usab sa yuta atubangan sa Kaban ni Jehova. Ang ulo ni Dagon ug ang mga kamot niini nangaputol ug anaa kini sa may pultahan. Ang parte niini nga isda mao lang* ang nabilin. 5 Busa hangtod niining adlawa, ang mga saserdote ni Dagon ug ang tanang manulod sa balay ni Dagon dili motunob sa may pultahan sa balay ni Dagon didto sa Asdod.

6 Gisilotan ni Jehova ang mga Asdodnon, ug iyang gihampak ug almoranas ang Asdod ug ang mga teritoryo niini.+ 7 Dihang nakita sa katawhan sa Asdod ang nagakahitabo, sila miingon: “Dili na angayng magpabilin dinhi ang Kaban sa Diyos sa Israel, kay siya nakigbatok kanato ug kang Dagon nga atong diyos.” 8 Busa ilang gipatawag ang tanang magmamando sa mga Filistehanon ug gipangutana sila: “Unsa may atong buhaton sa Kaban sa Diyos sa Israel?” Sila mitubag: “Dad-on didto sa Gat ang Kaban sa Diyos sa Israel.”+ Busa gidala nila didto ang Kaban sa Diyos sa Israel.

9 Dihang nadala na nila kini didto, gisilotan ni Jehova ang siyudad mao nga grabe ang kaguliyang. Iyang gihampak ang mga tawo sa siyudad, bata man o tigulang, mao nga sila gipang-almoranas.+ 10 Busa gidala nila ang Kaban sa matuod nga Diyos ngadto sa Ekron,+ apan pag-abot gyod sa Kaban sa matuod nga Diyos didto sa Ekron, ang mga Ekronhon mituaw: “Ilang gidala ang Kaban sa Diyos sa Israel kanato aron kita ug ang atong katawhan mangamatay!”+ 11 Unya ilang gipatawag ang tanang magmamando sa mga Filistehanon ug giingnan sila: “Ipahilayo ninyo ang Kaban sa Diyos sa Israel; ibalik kini kon diin kini gikan aron kita ug ang atong katawhan dili mangamatay.” Kay ang tibuok siyudad nahadlok nga sila mangamatay; grabe kaayo ang silot nga gipahamtang sa matuod nga Diyos batok kanila,+ 12 ug ang mga tawo nga wala mangamatay gihampak ug almoranas. Ug ang pagtuaw sa siyudad alang sa tabang miabot sa langit.

6 Ang Kaban+ ni Jehova didto sa yuta sa mga Filistehanon sulod sa pito ka bulan. 2 Gipatawag sa mga Filistehanon ang mga saserdote ug ang mga mananag-an+ ug gipangutana sila: “Unsay among buhaton sa Kaban ni Jehova? Ipahibalo kanamo kon unsaon namo kini pagpadalag balik sa gigikanan niini.” 3 Sila mitubag: “Kon inyong ibalik ang kaban sa pakigsaad ni Jehova nga Diyos sa Israel, ayaw kinig ibalik nga walay halad. Kinahanglan nga maghatag mo ug halad sa pagkasad-an.+ Nianang paagiha lamang nga kamo mangaayo, ug inyong mahibaloan kon nganong siya padayong nagsilot kaninyo.” 4 Busa sila miingon: “Unsa nga halad sa pagkasad-an ang angay namong ihatag kaniya?” Sila mitubag: “Pagpadala mog lima ka bulawang almoranas ug lima ka bulawang ilaga sumala sa gidaghanon sa mga magmamando sa mga Filistehanon,+ kay parehas ra ang hampak nga midangat kaninyo ug sa inyong mga magmamando. 5 Kinahanglan nga maghimo mog mga larawan sa inyong almoranas ug sa mga ilaga+ nga nagdalag kadaot sa yuta, ug kinahanglan ninyong pasidunggan ang Diyos sa Israel. Basin kanay paagi nga dili na niya ipahamtang ang silot batok kaninyo ug sa inyong diyos ug sa inyong yuta.+ 6 Nganong patig-ahon man ninyo ang inyong kasingkasing sama sa gihimo sa Ehipto ug sa Paraon?+ Dihang Iya silang gihampak,+ ilang gitugotan nga mobiya ang Israel, mao nga sila nanglakaw.+ 7 Karon pag-andam ug bag-ong karomata ug duha ka bayeng baka nga dunay mga nati ug wala pa sukad masangoni ug yugo. Unya ang karomata itaod sa mga baka, apan dad-a ninyog balik ang ilang mga nati palayo kanila. 8 Kuhaa ninyo ang Kaban ni Jehova ug ibutang kini diha sa karomata, ug ibutang diha sa usa ka kahon tapad niini ang mga larawan nga bulawan nga inyong ihatag kaniya ingong halad sa pagkasad-an.+ Unya palakwa ang mga baka 9 ug paniid: Kon ang Kaban mopaingon sa Bet-semes,+ nga teritoryo niini, ang ilang Diyos maoy nagpahinabo niining dakong kadaot. Apan kon dili, atong mahibaloan nga dili siya ang nagsilot kanato; sulagma lang nga kadto nahitabo nato.”

10 Gibuhat kana sa mga Filistehanon. Mikuha silag duha ka bayeng baka nga dunay mga nati ug gitaod niini ang karomata, ug ang mga nati ilang gibalik sa koral niini. 11 Unya ilang gibutang ang Kaban ni Jehova sa karomata, ingon man ang kahon nga gibutangan sa bulawang ilaga ug sa mga larawan sa ilang almoranas. 12 Ug ang mga baka milakaw sa dalan paingon sa Bet-semes.+ Kini misubay sa dakong dalan, nga nag-inga samtang naglakaw; kini wala moliko sa tuo o sa wala. Ug gisundan kini sa mga magmamando sa mga Filistehanon hangtod sa utlanan sa Bet-semes. 13 Niadtong higayona, ang katawhan sa Bet-semes nanganig trigo didto sa patag.* Pagkakita nila sa Kaban, nalipay sila pag-ayo. 14 Ang karomata miabot sa yuta ni Josue nga taga-Bet-semes ug mihunong didto, duol sa dakong bato. Busa ilang gibugha ang mga kahoy sa karomata, ug ilang gitanyag ang mga baka+ ingong halad nga sinunog ngadto kang Jehova.

15 Gikanaog sa mga Levihanon+ ang Kaban ni Jehova ug ang kahon nga gisudlan sa mga larawan nga bulawan, ug gibutang nila kini diha sa dakong bato. Ang mga tawo sa Bet-semes+ nagtanyag ug mga halad nga sinunog ug uban pang halad alang kang Jehova nianang adlawa.

16 Dihang nakita kini sa lima ka magmamando sa mga Filistehanon, namalik sila sa Ekron nianang adlawa. 17 Karon kini ang mga bulawang almoranas nga gipadala sa mga Filistehanon ingong halad sa pagkasad-an ngadto kang Jehova:+ usa alang sa Asdod,+ usa alang sa Gaza, usa alang sa Askelon, usa alang sa Gat,+ ug usa alang sa Ekron.+ 18 Ug ang gidaghanon sa mga bulawang ilaga maoy sumala sa gidaghanon sa tanang siyudad sa mga Filistehanon nga sakop sa lima ka magmamando​—⁠ang pinarilang mga siyudad ug walay paril nga mga baryo.

Ug ang dakong bato diin nila gipahimutang ang Kaban ni Jehova nagsilbing saksi hangtod niining adlawa sa yuta ni Josue nga taga-Bet-semes. 19 Apan gihampak sa Diyos ang mga lalaki sa Bet-semes, kay mitan-aw sila sa Kaban ni Jehova. Iyang gipamatay ang 50,070* sa katawhan, ug ang katawhan nagbangotan kay daghan kaayo kanila ang gipamatay ni Jehova.+ 20 Busa ang mga taga-Bet-semes miingon: “Kinsay makaduol kang Jehova, kining balaan nga Diyos?+ Kon makabiya lang unta siya nato ug makaadto sa uban!”+ 21 Busa sila nagpadalag mga mensahero ngadto sa mga molupyo sa Kiriat-jearim,+ nga nag-ingon: “Giuli na sa mga Filistehanon ang Kaban ni Jehova. Lugsong kamo ug kuhaa ninyo kini.”+

7 Busa ang mga tawo sa Kiriat-jearim miadto ug gidala ang Kaban ni Jehova sa balay ni Abinadab+ didto sa bungtod, ug ilang gitudlo ang iyang anak nga si Eleasar aron magbantay sa Kaban ni Jehova.

2 Milabay ang taas nga panahon, nga mikabat ug 20 ka tuig, sukad sa adlaw nga miabot ang Kaban sa Kiriat-jearim, ug ang tibuok banay sa Israel midangop* kang Jehova alang sa tabang.+ 3 Unya giingnan ni Samuel ang tibuok banay sa Israel: “Kon bug-os kasingkasing ang inyong pagbalik kang Jehova,+ isalikway ninyo ang langyawng mga diyos+ ug ang mga larawan ni Astoret.+ Kon bug-os ninyong ihatag kang Jehova ang inyong kasingkasing ug siya lamang ang inyong alagaron,+ iya kamong luwason gikan sa kamot sa mga Filistehanon.”+ 4 Busa gisalikway sa mga Israelinhon ang mga Baal ug ang mga larawan ni Astoret, ug kang Jehova lamang sila mialagad.+

5 Unya si Samuel miingon: “Tigoma didto sa Mizpa+ ang tibuok Israel, ug ako mag-ampo kang Jehova alang kaninyo.”+ 6 Busa sila nagtigom didto sa Mizpa ug nagkalos ug tubig ug gibubo kini sa atubangan ni Jehova, ug sila nagpuasa niadtong adlawa.+ Didto, sila miingon: “Kami nakasala batok kang Jehova.”+ Ug si Samuel nagsugod sa pag-alagad ingong maghuhukom+ sa mga Israelinhon didto sa Mizpa.

7 Pagkadungog sa mga Filistehanon nga ang mga Israelinhon nagtigom didto sa Mizpa, ang mga magmamando sa mga Filistehanon+ mitungas aron makiggubat sa Israel. Dihang nadunggan kini sa mga Israelinhon, sila nangahadlok tungod sa mga Filistehanon. 8 Busa ang mga Israelinhon miingon kang Samuel: “Ayawg hunong sa pagtuaw kang Jehova nga atong Diyos nga tabangan+ ug luwason kita gikan sa kamot sa mga Filistehanon.” 9 Unya si Samuel mikuhag nating karnero nga nagsuso pa ug gihalad kini ingong tibuok halad nga sinunog+ alang kang Jehova; ug si Samuel mituaw kang Jehova nga tabangan ang Israel, ug gitubag siya ni Jehova.+ 10 Samtang naghalad si Samuel sa halad nga sinunog, ang mga Filistehanon miabante aron makiggubat sa Israel. Unya si Jehova nagpadalugdog ug kusog+ niadtong adlawa batok sa mga Filistehanon, ug Iyang gipahinabo nga sila magkaguliyang,+ ug sila napildi sa Israel.+ 11 Unya ang kalalakin-an sa Israel nanggula sa Mizpa ug ilang gigukod ug gipamatay ang mga Filistehanon hangtod sa habagatan sa Bet-car. 12 Unya si Samuel nagkuhag bato+ ug gipahimutang kini taliwala sa Mizpa ug sa Jesana ug ginganlan kinig Ebenezer,* kay siya miingon: “Hangtod karon si Jehova nagtabang kanato.”+ 13 Kay napildi na man ang mga Filistehanon, wala na sila mosulong sa teritoryo sa Israel;+ ug si Jehova padayong nakigbatok sa mga Filistehanon sa tanang adlaw ni Samuel.+ 14 Gibalik usab sa mga Filistehanon ngadto sa Israel ang mga siyudad nga ilang giilog, gikan sa Ekron hangtod sa Gat, ug nakuhag balik sa Israel ang ilang teritoryo gikan sa kamot sa mga Filistehanon.

Dugang pa, dihay pakigdait tali sa Israel ug sa mga Amorihanon.+

15 Si Samuel nag-alagad ingong maghuhukom sa Israel sa tibuok niyang kinabuhi.+ 16 Matag tuig, siya mopanaw aron liboton ang Bethel,+ Gilgal,+ ug Mizpa,+ ug siya nag-alagad ingong maghuhukom sa Israel niining mga dapita. 17 Apan mobalik siya sa Rama+ kay atua didto ang iyang balay, ug nag-alagad usab siya didto ingong maghuhukom sa Israel. Naghimo siya didto ug halaran alang kang Jehova.+

8 Dihang si Samuel tigulang na, iyang gitudlo ang iyang mga anak nga lalaki ingong mga maghuhukom sa Israel. 2 Ang iyang panganay nga anak mao si Joel, ug ang ikaduha mao si Abias;+ sila maoy mga maghuhukom sa Beer-seba. 3 Apan ang iyang mga anak wala mosubay sa iyang mga dalan; sila nanglimbong aron makakuwarta,+ nagdawat ug hiphip,+ ug nagtuis sa hustisya.+

4 Unya ang tanang ansiyano sa Israel nagtigom ug miadto kang Samuel sa Rama. 5 Sila miingon kaniya: “Tigulang na ka, apan ang imong mga anak wala mosubay sa imong mga dalan. Palihog pagtudlo alang kanamo ug usa ka hari sa paghukom kanamo sama sa ubang kanasoran.”+ 6 Apan kini wala magustohi* ni Samuel, sanglit sila miingon: “Hatagi kamig hari nga maghukom kanamo.” Unya si Samuel nag-ampo kang Jehova, 7 ug si Jehova miingon kang Samuel: “Pamatia ang tanang giingon sa katawhan kanimo; kay dili ikaw ang ilang gisalikway, kondili ako. Ila kong gisalikway ingong ilang hari.+ 8 Ingon niana ang ilang ginahimo sukad pa sa adlaw nga gipagawas nako sila gikan sa Ehipto hangtod karon; kanunay silang mobiya kanako+ ug moalagad sa laing mga diyos,+ ug mao usab kanay ilang gihimo kanimo. 9 Karon pamatia sila. Apan kinahanglang pasidan-an nimo sila; sultihi sila nga ang hari nga magmando kanila dunay katungod sa pagpangayo gikan kanila.”

10 Busa gisulti ni Samuel ang tanang pulong ni Jehova ngadto sa katawhan nga nangayo kaniyag hari. 11 Siya miingon: “Mao kini ang pangayoon sa hari nga magmando kaninyo:+ Iyang kuhaon ang inyong mga anak nga lalaki+ aron ibutang diha sa iyang mga karo+ ug himoong iyang mga mangangabayo,+ ug ang uban magdagan nga mag-una sa iyang mga karo. 12 Ug siya magtudlo alang sa iyang kaugalingon ug mga pangulo sa kada 1,000+ ug mga pangulo sa kada 50,+ ug ang uban magdaro sa iyang uma,+ mag-ani sa iyang alanihon,+ ug maggama sa iyang mga hinagiban sa gubat ug mga galamiton sa iyang mga karo.+ 13 Iyang kuhaon ang inyong mga anak nga babaye ingong mga tighimog pahumot, mga kosinera, ug mga tiglutog tinapay.+ 14 Iyang kuhaon ang kinamaayohan sa inyong kaumahan, kaubasan, ug kaolibohan,+ ug ihatag kini sa iyang mga sulugoon. 15 Iyang kuhaon ang ikapulo sa inyong ani sa lugas ug sa ubas, ug iyang ihatag kini sa mga opisyal sa iyang palasyo ug sa iyang mga sulugoon. 16 Ug iyang kuhaon ang inyong mga sulugoong lalaki ug babaye, ang kinamaayohan sa inyong mga baka, ug ang inyong mga asno, ug iyang gamiton kini alang sa iyang buluhaton.+ 17 Iyang kuhaon ang ikapulo sa inyong mga karnero,+ ug kamo mahimong iyang mga sulugoon. 18 Moabot ang adlaw nga kamo motuaw tungod sa hari nga inyong gipili,+ apan si Jehova dili motubag kaninyo nianang adlawa.”

19 Apan ang katawhan wala mamati sa gisulti ni Samuel, ug sila miingon: “Dili, gusto gyod namo nga duna miy hari! 20 Unya mahisama kami sa ubang kanasoran, ug ang among hari maghukom kanamo ug manguna kanamo ug makig-away alang kanamo.” 21 Human madungog ni Samuel ang giingon sa katawhan, iya kining gisulti kang Jehova. 22 Si Jehova miingon kang Samuel: “Pamatia sila, ug pagtudlog hari nga magmando kanila.”+ Unya si Samuel miingon sa katawhan sa Israel: “Pamauli na mo sa inyong siyudad.”

9 Dihay usa ka tawo sa tribo ni Benjamin nga ginganlag Kis,+ nga anak ni Abiel, nga anak ni Zeror, nga anak ni Becorat, nga anak ni Apias. Kini nga Benjaminhon+ dato kaayo. 2 Siya may anak nga ginganlag Saul,+ nga batan-on ug guwapo​—⁠walay Israelinhon nga mas guwapo pa kay kaniya⁠—​ug siya ang kinatas-an* sa tanang tawo.

3 Dihang nangawala ang mga asno* ni Kis, giingnan niya ang iyang anak nga si Saul: “Palihog, pagkuyog ug usa sa mga tig-alagad ug pangitaa ang mga asno.” 4 Sila milatas sa kabukiran sa Epraim ug sa yuta sa Salisa, ug wala nila kini makaplagi. Sila mipadayon paglatas sa yuta sa Saalim, apan ang mga asno wala didto. Ilang gilatas ang tibuok yuta sa mga Benjaminhon, ug wala nila kini makaplagi.

5 Sila nakaabot sa yuta sa Zup, ug si Saul miingon sa iyang tig-alagad nga kuyog niya: “Tana, mamauli na ta, kay basig sa ato na hinuon mabalaka ang akong amahan imbes sa mga asno.”+ 6 Apan ang tig-alagad mitubag: “Dunay tawo sa Diyos sa duol nga siyudad, ug tinamod kaayo siya. Ang tanan niyang isulti matuman gayod.+ Mangadto ta didto karon. Tingali makasulti siya kanato kon asa ta mangadto.” 7 Unya si Saul miingon sa iyang tig-alagad: “Kon moadto ta, unsay atong dad-on alang niya? Wala nay tinapay sa atong mga sudlanan; wala kitay ikagasa sa tawo sa matuod nga Diyos. Unsa may atong ikahatag?” 8 Busa ang tig-alagad mitubag na usab kang Saul: “Tan-awa! Duna pa koy ikaupat nga bahin sa usa ka siklo* nga plata.* Ihatag nako kini sa alagad sa matuod nga Diyos, ug iya tang sultihan kon asa ta mangadto.” 9 (Sa unang panahon sa Israel, ingon niini ang isulti sa tawo kon mokonsulta siya sa Diyos: “Dali, mangadto ta sa tawo nga makakitag panan-awon.”+ Kay ang propeta gitawag man kaniadto ug tawo nga makakitag panan-awon.) 10 Unya si Saul miingon sa iyang tig-alagad: “Maayo ang imong giingon. Tana, mangadto ta.” Busa miadto sila sa siyudad diin didto ang alagad sa matuod nga Diyos.

11 Samtang nanungas sila paingon sa siyudad, ilang nasugatan ang mga babaye nga nanggula sa pagkalos ug tubig. Busa sila miingon kanila: “Ania ba dinhi ang tawo nga makakitag panan-awon?”+ 12 Unya sila mitubag: “Oo. Tan-awa, atua siya nag-una nimo. Pagdali, kay karong adlawa miabot siya sa siyudad kay ang mga tawo maghalad+ karon didto sa taas nga dapit.+ 13 Inigsulod gayod ninyo sa siyudad, inyo dayon siyang makita sa dili pa siya motungas sa taas nga dapit aron mokaon. Ang katawhan dili mokaon hangtod nga dili siya moabot, kay siya ang magpanalangin sa halad. Dayon ang mga dinapit makakaon na. Lakaw na dayon mo aron inyo siyang makita.” 14 Busa miadto sila sa siyudad. Sa nakasulod na sila sa siyudad, gisugat sila ni Samuel aron manungas sila ngadto sa taas nga dapit.

15 Usa ka adlaw una miabot si Saul, giingnan ni Jehova si Samuel: 16 “Ugma sa mga ingon niining orasa, akong ipadala kanimo ang usa ka tawo gikan sa yuta sa Benjamin.+ Dihogan nimo siya ingong pangulo sa Israel nga akong katawhan,+ ug iyang luwason ang akong katawhan gikan sa kamot sa mga Filistehanon. Kay akong nakita ang kasakitan sa akong katawhan, ug ang ilang pagtuaw nakaabot kanako.”+ 17 Pagkakita ni Samuel kang Saul, si Jehova miingon kaniya: “Ania ang tawo nga akong giingon kanimo, ‘Kini siya ang magmando sa akong katawhan.’”+

18 Unya si Saul miduol kang Samuel diha sa ganghaan ug miingon: “Palihog, sultihi ko, asa ang balay sa tawo nga makakitag panan-awon?” 19 Si Samuel mitubag kang Saul: “Ako ang tawo nga makakitag panan-awon. Manungas kita ngadto sa taas nga dapit ug ikaw ang mag-una, ug kamo mokaon uban kanako karong adlawa.+ Ako kang palakton ugma sa buntag, ug akong isulti kanimo ang tanan nga gusto nimong mahibaloan.* 20 Ayaw na kabalak-i ang mga asno nga nangawala tulo ka adlaw ang miagi,+ kay nakaplagan na kini. Ug kinsa bay nanag-iya sa tanang bahandi sa Israel? Dili ba ikaw ug ang tibuok panimalay sa imong amahan?”+ 21 Si Saul mitubag: “Dili ba ako usa man ka Benjaminhon nga kinagamyan sa mga tribo sa Israel,+ ug ang akong banay mao ang labing ubos sa tanang banay sa tribo sa Benjamin? Busa nganong nakaingon ka niana?”

22 Unya gidala ni Samuel si Saul ug ang iyang tig-alagad ngadto sa lawak-kan-anan ug gipalingkod sila sa lingkoranan alang sa labing dungganong mga dinapit; mga 30 sila ka tawo. 23 Si Samuel miingon sa kosinero: “Dad-a dinhi ang karne nga akong gihatag kanimo, nga akong giingon nga imong ilain.” 24 Busa gikuha sa kosinero ang paa ug gibutang kini sa atubangan ni Saul. Ug si Samuel miingon: “Ang gibutang sa imong atubangan gilain alang kanimo. Kaon, kay gilain nila kini alang kanimo niini nga okasyon. Kay giingnan nako sila, ‘Duna koy mga dinapit.’” Busa si Saul mikaon uban kang Samuel niadtong adlawa. 25 Unya milugsong sila gikan sa taas nga dapit+ paingon sa siyudad, ug siya padayong nakigsulti kang Saul didto sa atop sa balay. 26 Sila mibangon ug sayo, ug sa pagkabanagbanag giingnan ni Samuel si Saul didto sa atop sa balay: “Pangandam na kay ako na kang pagikanon.” Busa nangandam si Saul ug silang duha ni Samuel nanggawas. 27 Samtang sila nanglugsong pagawas sa siyudad, si Samuel miingon kang Saul: “Sultihi ang tig-alagad+ nga mouna siya kanato,” busa miuna siya. “Apan ikaw, pabilin una diri kay akong isulti kanimo ang mensahe sa Diyos.”

10 Unya gikuha ni Samuel ang tibod sa lana ug gibubo kini sa ulo ni Saul.+ Iyang gihalokan siya ug giingnan: “Dili ba si Jehova nagdihog kanimo ingong pangulo+ sa iyang katawhan?+ 2 Inigbiya nimo karon, makakita kag duha ka tawo duol sa lubnganan ni Raquel+ sa teritoryo sa Benjamin didto sa Zelza, ug sila moingon kanimo, ‘Ang mga asno nga imong gipangita nakaplagan na mao nga ang imong amahan wala na mabalaka niini,+ apan kamo nay iyang gikabalak-an. Matod pa niya, “Wala pa man makabalik ang akong anak, unsa may akong himoon?”’ 3 Unya lahos didto sa dakong kahoy sa Tabor, ug didto makahibalag kag tulo ka tawo nga motungas ngadto sa Bethel aron mosimba sa matuod nga Diyos,+ ang usa magdalag tulo ka nating kanding, ang usa magdalag tulo ka tinapay, ug ang usa pa magdalag usa ka banga nga bino. 4 Sila mangomosta kanimo ug maghatag kanimog duha ka tinapay, ug kinahanglang dawaton nimo kini gikan kanila. 5 Unya makaabot ka sa bungtod sa matuod nga Diyos, diin dihay nagkampo nga mga Filistehanon. Pag-abot nimo sa siyudad, makasugat kag grupo sa mga propeta nga manglugsong gikan sa taas nga dapit, ug samtang sila managna may mag-una kanila nga magtugtog ug dekuwerdas nga instrumento ug tamborin ug plawta ug alpa. 6 Ang espiritu ni Jehova maghatag kanimog gahom,+ ug ikaw managna uban kanila ug ikaw mausab nga daw lain ka nga tawo.+ 7 Inigkahitabo niini nga mga ilhanan, buhata ang tanan nga mahimong buhaton sa imong kamot, kay ang matuod nga Diyos magauban kanimo. 8 Unya lugsong ug una ngadto sa Gilgal,+ ug moapas ko nimo didto sa paghalad ug mga halad nga sinunog ug mga halad sa panag-ambit. Magpaabot kag pito ka adlaw hangtod nga moabot ko. Unya ako kang sultihan kon unsay angay nimong buhaton.”

9 Pagtalikod niya kang Samuel aron mobiya, giusab sa Diyos ang iyang kasingkasing ug siya nahimo nga daw laing tawo, ug kining tanang ilhanan natuman niadtong adlawa. 10 Busa gikan didto, sila nanglakaw paingon sa bungtod, ug dihay grupo sa mga propeta nga misugat kaniya. Dihadiha ang espiritu sa Diyos naghatag kaniyag gahom,+ ug siya misugod pagpanagna+ uban kanila. 11 Dihang nakita niadtong mga nakaila kaniya nga siya nanagna kauban sa mga propeta, sila nagpangutan-anay: “Unsay nahitabo sa anak ni Kis? Propeta ba diay usab si Saul?” 12 Unya dihay taga-didto nga miingon: “Apan kinsa ba ang ilang amahan?” Mao nga nahimo kining panultihon: “Propeta ba diay usab si Saul?”+

13 Pagkahuman niyag panagna, siya miadto sa taas nga dapit. 14 Sa ulahi, ang igsoong lalaki sa amahan ni Saul miingon kaniya ug sa iyang tig-alagad: “Diin man mo miadto?” Siya mitubag: “Among gipangita ang mga asno,+ apan wala namo kini makaplagi, maong miadto mi kang Samuel.” 15 Ang uyoan ni Saul nangutana: “Palihog sultihi ko, unsay gisulti ni Samuel kaninyo?” 16 Si Saul miingon sa iyang uyoan: “Giingnan mi niya nga ang mga asno nakit-an na.” Apan wala isulti ni Saul ang giingon ni Samuel nga mahimo siyang hari.

17 Unya gitigom ni Samuel ang katawhan sa atubangan ni Jehova didto sa Mizpa+ 18 ug giingnan ang mga Israelinhon: “Kini ang giingon ni Jehova nga Diyos sa Israel: ‘Ako ang nagpagawas sa Israel gikan sa Ehipto ug ang nagluwas kaninyo gikan sa kamot sa Ehipto+ ug gikan sa kamot sa tanang gingharian nga nagdaogdaog kaninyo. 19 Apan karon inyong gisalikway ang inyong Diyos+ nga maoy inyong Manluluwas gikan sa tanan ninyong kalisdanan ug kasakitan, ug kamo miingon: “Kinahanglang hatagan mi nimog hari.” Karon barog mo sa atubangan ni Jehova sumala sa inyong mga tribo ug sumala sa inyong mga banay.’”*

20 Busa gipaduol ni Samuel ang tanang tribo sa Israel,+ ug ang tribo ni Benjamin ang napili.+ 21 Unya iyang gipaduol ang tribo ni Benjamin sumala sa mga banay niini, ug ang banay sa mga Matrihanon ang napili. Sa kataposan si Saul nga anak ni Kis mao ang napili.+ Apan dihang gipangita nila siya, wala nila siya makaplagi. 22 Busa sila nagpakisayod kang Jehova:+ “Ania na ba dinhi ang maong tawo?” Si Jehova miingon: “Atua siya nagtago sa mga bagahe.” 23 Busa sila nanagan ug gikuha siya gikan didto. Pagbarog niya taliwala sa katawhan, siya ang kinatas-an* sa tanan.+ 24 Si Samuel miingon sa katawhan: “Nakita ba ninyo ang gipili ni Jehova,+ nga walay sama kaniya taliwala sa katawhan?” Ug ang katawhan naninggit: “Mabuhi ang hari!”

25 Gisultihan ni Samuel ang katawhan kon unsay pangayoon sa mga hari kanila+ ug gisulat kini sa usa ka basahon ug gibutang kini sa tabernakulo ni Jehova. Unya gipapauli ni Samuel ang katawhan ngadto sa ilang tagsatagsa ka balay. 26 Si Saul usab mipauli sa iyang balay sa Gibea, ug giubanan siya sa mga manggugubat kansang mga kasingkasing gitandog ni Jehova. 27 Apan dihay mga tawong walay pulos nga miingon: “Unsaon man niya pagluwas kanato?”+ Busa gitamay nila siya, ug wala sila magdalag gasa alang kaniya.+ Apan nagpakahilom ra siya.*

11 Unya si Nahas nga Ammonhanon+ mitungas ug nagkampo batok sa Jabes+ sa Gilead. Ang tanang taga-Jabes miingon kang Nahas: “Pakigsaad* uban kanamo, ug kami moalagad kanimo.” 2 Si Nahas nga Ammonhanon miingon kanila: “Makigsaad ko kaninyo sa usa ka kondisyon: nga lugiton ang tanan ninyong tuo nga mata. Himoon nako kini sa pagpakaulaw sa tibuok Israel.” 3 Ang mga ansiyano sa Jabes miingon kaniya: “Hatagi mig pito ka adlaw aron makapadala mig mga mensahero ngadto sa tanang teritoryo sa Israel. Unya kon walay moluwas namo, mosurender mi kanimo.” 4 Unya ang mga mensahero miabot sa Gibea+ diin nagpuyo si Saul* ug gisulti nila ang mensahe ngadto sa katawhan, ug ang tibuok katawhan mitiyabaw.

5 Ug si Saul miabot nga nagsunod sa mga baka gikan sa sibsibanan, ug si Saul miingon: “Unsay nahitabo sa mga tawo? Nganong nanghilak man sila?” Busa ilang gisulti kaniya ang giingon sa mga taga-Jabes. 6 Pagkadungog ni Saul niini, ang espiritu sa Diyos milihok diha kaniya,+ ug misilaob ang iyang kasuko. 7 Busa mikuha siyag duha ka torong baka ug gihiwahiwa kini, ug iyang gipadala kini ngadto sa tanang teritoryo sa Israel pinaagi sa mga mensahero, nga nag-ingon: “Ingon niini ang buhaton ngadto sa baka ni bisan kinsa nga dili mosunod kang Saul ug kang Samuel!” Ug gipahinabo ni Jehova nga ang katawhan mobatig kahadlok ug pagtahod, mao nga sila nanggula nga usa ray tumong.* 8 Unya iyang giihap sila didto sa Bezek, ug dihay 300,000 ka Israelinhon ug 30,000 ka lalaki sa Juda. 9 Karon ilang giingnan ang mga mensahero nga gikan sa Jabes: “Isulti kini ngadto sa mga taga-Jabes sa Gilead, ‘Ugma dihang taas na ang adlaw, kamo maluwas.’” Ug ang mga mensahero nangabot ug gisultihan ang mga taga-Jabes, ug sila nalipay pag-ayo. 10 Busa ang mga taga-Jabes miingon: “Mosurender mi kaninyo ugma, ug buhata ang bisan unsa nga buot ninyong buhaton kanamo.”+

11 Pagkasunod adlaw, gibahin ni Saul ang katawhan sa tulo ka pundok, ug pagkakadlawon* sila miadto sa taliwala sa kampo ug ilang gipamatay ang mga Ammonhanon+ hangtod mitaas na ang adlaw. Kadtong nakalingkawas nangatibulaag ug nag-iyaiyag pangikyas. 12 Unya ang katawhan miingon kang Samuel: “Kinsa man kadtong nag-ingon, ‘Si Saul ba ang maghari kanato?’+ Itugyan kanamo ang maong mga tawo, ug amo silang patyon.” 13 Apan si Saul miingon: “Walay tawo nga patyon niining adlawa,+ kay giluwas ni Jehova ang Israel karon.”

14 Sa ulahi si Samuel miingon sa katawhan: “Mangadto ta sa Gilgal+ aron iproklamar pag-usab ang pagkahari ni Saul.”+ 15 Busa ang tibuok katawhan miadto sa Gilgal, ug didto ilang gihimong hari si Saul sa atubangan ni Jehova. Unya sila naghalad didto ug mga halad sa panag-ambit sa atubangan ni Jehova,+ ug si Saul ug ang tanang Israelinhon sadya kaayong nagsaulog sa maong okasyon.+

12 Sa kataposan, giingnan ni Samuel ang tibuok Israel: “Ako nang gihimo ang* tanan ninyong gipangayo kanako, ug nagtudlo kog hari nga magmando kaninyo.+ 2 Karon, ania ang hari nga nanguna kaninyo!*+ Sa akong bahin, ako tigulang ug ubanon na, ug ang akong mga anak nga lalaki ania uban kaninyo,+ ug ako nag-alagad sa Diyos ug naggiya kaninyo sukad pa sa akong pagkabatan-on hangtod niining adlawa.+ 3 Ania ko. Kon duna moy reklamo batok kanako, isulti kana sa atubangan ni Jehova ug sa iyang dinihogan:*+ Kang kinsang baka o asno ang akong gikuha?+ O kinsay akong gitikasan o gidaogdaog? Kang kinsa ko midawat ug hiphip aron akong tuison ang hustisya?+ Sulti, ug iuli nako kini kaninyo.”+ 4 Sila mitubag: “Wala ka manikas o magdaogdaog kanamo o modawat ug bisan unsa gikan ni bisan kinsa.” 5 Busa siya miingon kanila: “Saksi si Jehova batok kaninyo, ug saksi usab ang iyang dinihogan karong adlawa nga wala moy nakitang ikaakusar batok kanako.”* Sila mitubag: “Saksi siya.”

6 Busa si Samuel miingon sa katawhan: “Saksi si Jehova, kinsa nagpili kang Moises ug kang Aaron ug nagpagula sa inyong mga katigulangan gikan sa yuta sa Ehipto.+ 7 Ug karon, panuol mo, ug hukman mo nako sa atubangan ni Jehova maylabot sa tanang matarong nga mga buhat ni Jehova nga iyang gibuhat kaninyo ug sa inyong mga katigulangan.

8 “Sa dihang si Jacob miabot sa Ehipto+ ug ang inyong mga katigulangan nangayog tabang kang Jehova,+ si Jehova nagpadala kang Moises+ ug Aaron aron manguna sa inyong mga katigulangan sa paggawas sa Ehipto ug aron papuy-on sila niining dapita.+ 9 Apan nalimot sila kang Jehova nga ilang Diyos, ug gitugyan niya sila+ ngadto sa kamot ni Sisera+ nga pangulo sa kasundalohan sa Hazor ug sa kamot sa mga Filistehanon+ ug sa hari sa Moab,+ kinsa nakig-away batok kanila. 10 Ug sila nangayog tabang kang Jehova+ ug miingon, ‘Nakasala mi,+ kay kami mibiya kang Jehova aron moalagad sa mga Baal+ ug sa mga larawan ni Astoret;+ ug karon luwasa kami gikan sa kamot sa among mga kaaway aron kami mag-alagad kanimo.’ 11 Unya gipadala ni Jehova si Jerubaal,+ si Bedan, si Jepte,+ ug ako*+ ug iya mong giluwas gikan sa kamot sa inyong mga kaaway, aron kamo magpuyo sa kasegurohan.+ 12 Pagkakita ninyo nga si Nahas+ nga hari sa mga Ammonhanon miabot sa pagpakig-away kaninyo, kamo nagsigeg ingon kanako, ‘Gusto namo nga duna miy hari!’+ bisan tuod si Jehova nga inyong Diyos mao ang inyong Hari.+ 13 Karon ania ang hari nga inyong gipili ug gipangayo. Tan-awa! Si Jehova nagtudlo ug hari nga magmando kaninyo.+ 14 Kon kamo mahadlok kang Jehova+ ug mag-alagad kaniya+ ug mamati sa iyang tingog+ ug kon dili ninyo supakon ang sugo ni Jehova ug kon kamo ug ang hari nga magmando kaninyo mosunod kang Jehova nga inyong Diyos, maayo. 15 Apan kon kamo dili mamati sa tingog ni Jehova ug mosupak sa sugo ni Jehova, ang kamot ni Jehova magsilot kaninyo ug sa inyong mga amahan.+ 16 Karon, panuol mo ug tan-awa kining kahibulongang butang nga himoon ni Jehova sa inyong atubangan. 17 Dili ba ting-ani sa trigo karon? Motawag ko kang Jehova aron siya magpadalugdog ug magpaulan; ug kamo mahibalo ug makasabot kon unsa ka daotan ang inyong gibuhat sa atubangan ni Jehova tungod sa inyong pagpangayog hari.”+

18 Busa si Samuel mitawag kang Jehova, ug si Jehova nagpadalugdog ug nagpaulan niadtong adlawa, mao nga ang tibuok katawhan nahadlok pag-ayo kang Jehova ug kang Samuel. 19 Ug ang tibuok katawhan miingon kang Samuel: “Palihog, pag-ampo kang Jehova nga imong Diyos alang kanamo,+ kay dili mi gustong mamatay, kay gidugangan namo ang among mga sala ug laing pagkadaotan pinaagi sa pagpangayog hari.”

20 Busa si Samuel miingon sa katawhan: “Ayawg kahadlok. Tinuod, nabuhat ninyo kining tanang pagkadaotan. Apan ayaw lang gyod mog tipas gikan sa pagsunod kang Jehova,+ ug alagara si Jehova sa bug-os ninyong kasingkasing.+ 21 Ayaw mog tipas aron mosunod sa mga butang nga walay pulos,*+ nga dili makahatag ug kaayohan+ ug dili makaluwas, kay kini mga walay pulos.* 22 Kay dili biyaan ni Jehova ang iyang katawhan+ tungod sa iyang halangdong ngalan,+ kay si Jehova ang nagpili kaninyo ingong iyang katawhan.+ 23 Sa akong bahin, dili gayod nako mahimo nga magpakasala batok kang Jehova pinaagi sa pag-undang sa pag-ampo alang kaninyo, ug padayon mo nakong tudloan sa maayo ug matarong nga dalan. 24 Basta kahadloki lang ninyo si Jehova,+ ug alagara siya nga matinumanon* sa bug-os ninyong kasingkasing, kay hunahunaa kon unsa ka kahibulongan ang iyang gipangbuhat alang kaninyo.+ 25 Apan kon tinuyo mong magbuhat sa daotan, kamo ug ang inyong hari mangalaglag.”+

13 Si Saul nag-edad ug . . .* dihang nahimo siyang hari,+ ug nagmando siya sa Israel sulod sa duha ka tuig. 2 Si Saul nagpilig 3,000 ka tawo gikan sa Israel; ang 2,000 niini kauban ni Saul sa Mikmas ug sa kabukiran sa Bethel ug ang 1,000 kauban ni Jonatan+ sa Gibea+ sa Benjamin. Ang uban iyang gipapauli sa ilang tagsatagsa ka tolda. 3 Unya gipukan ni Jonatan ang nagkampo nga mga Filistehanon+ didto sa Geba,+ ug ang mga Filistehanon nakadungog bahin niini. Ug gipahuyop ni Saul ang budyong+ sa tibuok yuta ug miingon: “Padungga ang mga Hebreohanon!” 4 Ang tibuok Israel nakadungog sa balita: “Gipukan ni Saul ang nagkampo nga mga Filistehanon, ug karon ang Israel gidumtan na sa mga Filistehanon.” Busa ang katawhan gipaadto kang Saul didto sa Gilgal.+

5 Ang mga Filistehanon nagtigom usab aron makig-away sa Israel. Sila may 30,000 ka karong panggubat ug 6,000 ka mangangabayo ug kasundalohan nga sama ka daghan sa balas sa baybayon;+ ug sila mitungas ug nagkampo sa Mikmas sa sidlakan sa Bet-aven.+ 6 Ug nakita sa mga Israelinhon nga lisod kaayo ang ilang kahimtang kay sila anaa sa kapeligrohan; busa ang katawhan nanago sa mga langob,+ sa mga lungib, sa mga dagkong bato, sa mga lawak ilalom sa yuta, ug sa mga gahong nga pondohanag tubig. 7 Ang ubang Hebreohanon mitabok pa gani sa Jordan ngadto sa yuta sa Gad ug sa Gilead.+ Apan si Saul didto pa sa Gilgal, ug ang tibuok katawhan nga nagsunod kaniya nangurog sa kahadlok. 8 Siya nagpaabot ug pito ka adlaw hangtod sa panahon nga gitakda ni Samuel, apan si Samuel wala moabot sa Gilgal, ug ang katawhan namiya na kaniya. 9 Busa si Saul miingon: “Dad-a ngari kanako ang halad nga sinunog ug ang mga halad sa panag-ambit.” Ug iyang gihalad ang halad nga sinunog.+

10 Apan paghuman gyod niyag halad sa halad nga sinunog, si Samuel miabot. Busa gisugat siya ni Saul ug gitimbaya. 11 Unya si Samuel miingon: “Unsa kining imong gihimo?” Si Saul mitubag: “Nakita nako nga ang katawhan nag-anam-anam nag biya kanako,+ ug wala ka moabot sa gitakdang panahon, ug ang mga Filistehanon nagtigom na didto sa Mikmas.+ 12 Busa naghunahuna ko, ‘Molugsong na gyod karon sa Gilgal ang mga Filistehanon aron makig-away kanako, ug wala pa nako makuha ang pag-uyon* ni Jehova.’ Busa napugos ko sa paghalad sa halad nga sinunog.”

13 Si Samuel miingon kang Saul: “Binuang ang imong gihimo. Wala nimo tumana ang sugo nga gihatag kanimo ni Jehova nga imong Diyos.+ Kon imo pa kadtong gituman, lig-onon unta ni Jehova ang imong gingharian ibabaw sa Israel hangtod sa hangtod. 14 Apan karon ang imong gingharian dili mohangtod.+ Si Jehova mangitag tawo nga gikahimut-an sa iyang kasingkasing,+ ug itudlo siya ni Jehova ingong pangulo sa iyang katawhan,+ kay wala nimo tumana ang gisugo ni Jehova kanimo.”+

15 Unya gikan sa Gilgal si Samuel mitungas paingon sa Gibea sa Benjamin, ug giihap ni Saul ang katawhan; kadtong kauban pa niya maoy mga 600 ka tawo.+ 16 Si Saul, si Jonatan nga iyang anak, ug ang katawhan nga kauban pa nila miestar sa Geba+ sa Benjamin, ug ang mga Filistehanon nagkampo sa Mikmas.+ 17 Ug ang mga mosulong gikan sa kampo sa mga Filistehanon gibahin sa tulo ka grupo. Ang usa ka grupo mosubay sa dalan paingon sa Opra, ngadto sa yuta sa Sual; 18 ang laing grupo mosubay sa dalan sa Bet-horon;+ ug ang ikatulong grupo mosubay sa dalan paingon sa utlanan nga nag-umbaw sa walog sa Zeboim, paingon sa kamingawan.

19 Karon walay tigpanday ug metal nga makaplagan sa tibuok yuta sa Israel, kay ang mga Filistehanon miingon: “Aron ang mga Hebreohanon dili makahimog espada o bangkaw.” 20 Ug ang tanang Israelinhon kinahanglang molugsong ngadto sa mga Filistehanon aron magpabaid sa ilang mga punta sa daro, piko, atsa, o mga galab. 21 Ang bayad sa pagpabaid maoy usa ka pim* alang sa mga punta sa daro, alang sa mga piko, alang sa tuloy tusok nga mga galamiton, alang sa mga atsa, ug alang sa pag-ayo sa mga pangtugsok sa baka. 22 Ug panahon sa gubat, ang tanang kauban ni Saul ug Jonatan walay espada o bangkaw; si Saul lang ug ang iyang anak nga si Jonatan+ ang dunay mga hinagiban.

23 Karon dihay laing grupo sa mga sundalo sa mga Filistehanon nga miadto sa pagbantay sa lugot nga agianan sa Mikmas.+

14 Usa ka adlaw niana, si Jonatan+ nga anak ni Saul miingon sa tig-alagad nga nagdala sa iyang mga hinagiban: “Dali, manabok kita ngadto sa mga Filistehanon nga nagbantay sa pikas nga bahin.” Apan wala niya kini isulti sa iyang amahan. 2 Si Saul didto sa may utlanan sa Gibea+ ilalom sa kahoyng granada didto sa Migron, ug kauban niya ang mga 600 ka lalaki.+ 3 (Ug ang epod+ gidala ni Ahias nga anak ni Ahitub,+ nga igsoon ni Ikabod,+ nga anak ni Pinehas,+ nga anak ni Eli,+ nga saserdote ni Jehova sa Shilo.)+ Ug ang katawhan wala mahibalo nga milakaw si Jonatan. 4 Karon ang mga agianan nga gipaningkamotang tabokon ni Jonatan aron makaabot sa nagbantay nga mga Filistehanon anaa taliwala sa duha ka dagkong bato nga pormag ngipon; ang ngalan sa usa maoy Bozez ug ang lain maoy Sene. 5 Ang usa ka bato maoy samag haligi sa amihanan nga nag-atubang sa Mikmas, ug ang lain anaa sa habagatan nga nag-atubang sa Geba.+

6 Busa si Jonatan miingon sa tigdala sa iyang hinagiban: “Dali, manabok ta ngadto niining dili tinuli nga mga tawo.+ Tingali si Jehova molihok alang kanato, kay daghan man o diyutay ang iyang gamiton, walay makababag kang Jehova sa pagluwas.”+ 7 Ang tigdala sa iyang hinagiban miingon: “Buhata kon unsay gidiktar sa imong kasingkasing. Adto kon asa nimo buot moadto, ug ako mosunod kanimo bisan asa, sumala sa gidiktar sa imong kasingkasing.” 8 Unya si Jonatan miingon: “Manabok ta paingon sa maong mga lalaki, ug magpakita kita kanila. 9 Kon moingon sila kanato, ‘Barog mo hangtod nga moabot mi dinha!’ kita mobarog sa atong nahimutangan ug dili kita motungas ngadto kanila. 10 Apan kon moingon sila, ‘Tungas mo batok kanamo!’ nan manungas kita, kay sila itugyan ni Jehova sa atong kamot. Kini mao ang atong ilhanan.”+

11 Unya silang duha nagpakita sa nagbantay nga mga Filistehanon. Ang mga Filistehanon miingon: “Tan-awa! Ang mga Hebreohanon nanggula na sa mga lungag nga ilang gitagoan.”+ 12 Busa si Jonatan ug ang tigdala sa iyang hinagiban giingnan sa nagbantayng mga lalaki: “Tungas diri kanamo, ug tudloan mo namog leksiyon!”+ Dihadiha giingnan ni Jonatan ang tigdala sa iyang hinagiban: “Sunod nako, kay itugyan sila ni Jehova ngadto sa kamot sa Israel.”+ 13 Ug si Jonatan mikatkat pinaagi sa iyang mga kamot ug mga tiil, ug ang tigdala sa iyang hinagiban nagsunod kaniya; ug ang mga Filistehanon gipukan ni Jonatan, ug ang tigdala sa iyang hinagiban nga anaa sa iyang luyo nagpatay kanila. 14 Sa unang pag-atake ni Jonatan ug sa tigdala sa iyang hinagiban, nakapatay silag mga 20 ka tawo sulod sa luna nga katunga sa gitas-on sa tudling diha sa medya ektarya nga uma.*

15 Unya ang mga tawo diha sa kampo ug kadtong mga nagbantay nangalisang, ug bisan ang mga nanulong+ nangalisang. Gipahinabo sa Diyos nga maglinog ug ang mga Filistehanon nangalisang. 16 Ang mga tigbantay ni Saul didto sa Gibea+ sa Benjamin nakakita nga ang kaguliyang mikaylap sa kampo sa kaaway.+

17 Si Saul miingon sa katawhan nga kauban niya: “Palihog ipha ang katawhan, ug tan-awa kon kinsa ang mibiya kanato.” Pag-ihap nila, ilang nakita nga wala didto si Jonatan ug ang tigdala sa iyang hinagiban. 18 Karon si Saul miingon kang Ahias:+ “Dad-a diri ang Kaban sa matuod nga Diyos!” (Kay ang Kaban sa matuod nga Diyos didto sa mga Israelinhon niadtong panahona.*) 19 Ug samtang nakigsulti si Saul sa saserdote, misamot pa ka grabe ang kaguliyang sa kampo sa mga Filistehanon. Unya si Saul miingon sa saserdote: “Hunonga kanang imong ginahimo.”* 20 Busa si Saul ug ang tibuok katawhan nga kauban niya nagtigom ug miasdang sa gubat. Unya ilang nakita nga ang mga Filistehanon nagpinatyanay pinaagig espada, ug grabe kaayo ang kaguliyang. 21 Ug ang mga Hebreohanon nga midapig kaniadto sa mga Filistehanon ug mitungas uban kanila sa ilang kampo midapig na sa Israel ubos ni Saul ug Jonatan. 22 Ang tanang Israelinhon nga nanago+ sa kabukiran sa Epraim nakadungog nga nangalagiw ang mga Filistehanon, ug sila usab miapil sa gubat ug migukod kanila. 23 Busa giluwas ni Jehova ang Israel niadtong adlawa,+ ug ang gubat miabot hangtod sa Bet-aven.+

24 Apan ang mga Israelinhon nangaluya pag-ayo niadtong adlawa, kay si Saul nanumpa maylabot sa katawhan: “Tinunglo ang tawo nga mokaon ug bisan unsang pagkaon* sa dili pa ang kagabhion ug hangtod nga makapanimalos ko sa akong mga kaaway!” Busa walay usa kanila ang mikaon ug bisan unsang pagkaon.+

25 Ug ang tibuok katawhan* miadto sa lasang, ug dihay daghang dugos didto. 26 Pag-abot sa katawhan didto sa lasang, ilang nakita ang dugos nga nagtulo, apan walay bisan kinsa nga mitilaw niini kay nahadlok sila sa panumpa. 27 Apan si Jonatan wala makadungog sa gipanumpa sa iyang amahan maylabot sa katawhan,+ mao nga gituy-od niya ang iyang sungkod ug gituslob ang tumoy niini sa udlan. Dihang gihungit niya kini sa iyang baba, midan-ag ang iyang mga mata. 28 Ang usa sa mga sundalo miingon: “Ang imong amahan hugot nga nanumpa maylabot sa katawhan, ‘Tinunglo ang tawo nga mokaon karong adlawa!’+ Mao nga ang katawhan nangaluya.” 29 Apan si Jonatan miingon: “Ang akong amahan maoy hinungdan nga nag-antos ang katawhan. Tan-awa! Midan-ag ang akong mga mata kay mitilaw kog diyutay niining dugos. 30 Mas maayo gyod unta kon ang katawhan nakakaon+ karong adlawa gikan sa nakuha nila sa ilang mga kaaway! Mas daghan pa untang Filistehanon ang napatay.”

31 Niadtong adlawa ilang gipamatay ang mga Filistehanon gikan sa Mikmas hangtod sa Aijalon,+ ug ang katawhan nangaluya pag-ayo. 32 Busa ang katawhan midasmag nga hinakog sa ilang mga nakuha. Ilang gikuha ang mga karnero ug mga baka ug mga nating baka ug gipang-ihaw kini diha sa yuta, ug ilang gipangaon kini nga dunay dugo.+ 33 Busa gipahibalo kini kang Saul: “Ang katawhan nagpakasala batok kang Jehova kay gikaon nila ang karne nga dunay dugo.”+ Siya miingon: “Kamo wala magmatinumanon. Pagligid ngari ug dakong bato, karon dayon.” 34 Unya si Saul miingon: “Adtoa ninyo ang katawhan ug ingna sila, ‘Ang tagsatagsa kaninyo kinahanglang magdala dinhi sa iyang torong baka ug sa iyang karnero ug ihawa kana dinhi ug unya kan-a. Ayaw kamo pagpakasala kang Jehova pinaagi sa pagkaon sa karne nga dunay dugo.’”+ Busa ang tagsatagsa kanila nagdala sa iyang torong baka niadtong gabhiona ug nag-ihaw niini didto. 35 Ug si Saul naghimog halaran alang kang Jehova.+ Kini ang unang halaran nga iyang gihimo alang kang Jehova.

36 Sa ulahi si Saul miingon: “Atong gukdon ang mga Filistehanon panahon sa kagabhion ug kuhaon ang ilang kabtangan hangtod sa pagdan-ag sa kabuntagon. Wala kitay ibilin nga buhi.” Sila miingon: “Himoa kon unsay maayo sa imong panan-aw.” Unya ang saserdote miingon: “Moduol kita dinhi sa matuod nga Diyos.”+ 37 Ug si Saul nagpakisayod sa Diyos: “Gukdon ba nako ang mga Filistehanon?+ Imo ba silang itugyan sa kamot sa Israel?” Apan ang Diyos wala motubag kaniya niadtong adlawa. 38 Busa si Saul miingon: “Duol ngari, kamong tanang pangulo sa katawhan, ug sayra kon unsa nga sala ang nahimo karong adlawa. 39 Kay ingon nga si Jehova buhi, kinsa nagluwas sa Israel, bisan pag ang akong anak nga si Jonatan ang naghimo niini, siya mamatay gayod.” Apan walay bisan usa sa katawhan ang mitubag kaniya. 40 Unya siya miingon sa tibuok Israel: “Diha mo sa pikas, ug kami sa akong anak nga si Jonatan dinhi.” Ang katawhan miingon kang Saul: “Buhata kon unsay maayo sa imong panan-aw.”

41 Unya si Saul miingon kang Jehova: “Oh Diyos sa Israel, tubaga kami pinaagi sa Tumim!”+ Unya si Jonatan ug si Saul ang gipili, ug ang katawhan nahigawas. 42 Karon si Saul miingon: “Pagripa*+ aron mahibaloan kon ako ba o ang akong anak nga si Jonatan ang nakasala.” Ug si Jonatan ang gipili. 43 Unya si Saul miingon kang Jonatan: “Tug-an, unsay imong gihimo?” Busa giingnan siya ni Jonatan: “Mitilaw lang kog gamayng dugos nga diha sa tumoy sa akong sungkod.+ Ania, andam kong mamatay!”

44 Busa si Saul miingon: “Pahamtangan unta kog silot sa Diyos ug dugangan pa kana kon dili ka mamatay, Jonatan.”+ 45 Apan ang katawhan miingon kang Saul: “Angay bang mamatay si Jonatan, kinsa nakahatag niining dakong kadaogan*+ sa Israel? Dili gayod! Ingon nga si Jehova buhi, walay bisan usa ka buhok sa iyang ulo ang angayng mahulog sa yuta, kay gitabangan siya sa Diyos sa iyang gihimo niining adlawa.”+ Tungod niana si Jonatan giluwas* sa katawhan, ug siya wala mamatay.

46 Busa wala na gukda ni Saul ang mga Filistehanon, ug ang mga Filistehanon namauli sa ilang dapit.

47 Gipalig-on ni Saul ang iyang pagkahari sa Israel ug siya nakig-away sa tanan niyang kaaway sa palibot, batok sa mga Moabihanon,+ sa mga Ammonhanon,+ sa mga Edomhanon,+ sa mga hari sa Zoba,+ ug sa mga Filistehanon;+ ug bisan diin siya moadto, iyang gipildi sila. 48 Ug siya maisogong nakig-away ug nagmadaogon batok sa mga Amalekanhon+ ug nagluwas sa Israel gikan sa kamot sa ilang mga kaaway.

49 Ang mga anak nga lalaki ni Saul mao si Jonatan, Isvi, ug si Malki-sua.+ Ug siya may duha ka anak nga babaye; ang magulang mao si Merab,+ ug ang manghod mao si Mikal.+ 50 Ang asawa ni Saul mao si Ahinoam nga anak ni Ahimaaz. Ang pangulo sa iyang kasundalohan mao si Abner+ nga anak ni Ner, nga uyoan ni Saul. 51 Si Kis+ mao ang amahan ni Saul, ug si Ner+ nga amahan ni Abner maoy anak ni Abiel.

52 Panahon sa paghari ni Saul, kanunayng dunay grabeng paggubatay tali kaniya ug sa mga Filistehanon.+ Kon dunay makita si Saul nga tawong kusgan o isog, kuhaon niya siya aron himoong sundalo.+

15 Unya si Samuel miingon kang Saul: “Gipadala ko ni Jehova sa pagdihog kanimo ingong hari sa iyang katawhang Israel;+ karon pamatia ang isulti ni Jehova.+ 2 Kini ang giingon ni Jehova sa mga panon: ‘Akong papanubagon ang mga Amalekanhon sa ilang gibuhat sa Israel dihang sila nakigbatok kanila samtang sila nagpanaw gikan sa Ehipto.+ 3 Karon lakaw, ug pamatya ang mga Amalekanhon,+ ug laglaga sila+ lakip ang tanan nilang nabatonan. Kinahanglang walay mabilin nila;* pamatya sila,+ lalaki man o babaye, bata man o masuso, baka man o karnero, kamelyo man o asno.’”+ 4 Busa gipatawag ni Saul ang katawhan ug giihap sila didto sa Telaim: Dihay 200,000 ka sundalo nga nagbaktas ug 10,000 ka lalaki sa Juda.+

5 Si Saul nakaabot hangtod sa siyudad sa Amalek ug nangatang diha sa walog* sa pag-atake. 6 Unya si Saul miingon sa mga Kenihanon:+ “Lakaw, biyai ninyo ang mga Amalekanhon, aron dili mo nako paphaon uban kanila.+ Kay nagpakita mog maunongong gugma sa tibuok katawhan sa Israel+ dihang mibiya sila sa Ehipto.” Busa ang mga Kenihanon mibiya sa mga Amalekanhon. 7 Human niana gipamatay ni Saul ang mga Amalekanhon+ gikan sa Havila+ hangtod sa Sur,+ nga sunod sa Ehipto. 8 Iyang nadakpang buhi si Agag+ nga hari sa Amalek, apan ang tanang ubang katawhan iyang gilaglag pinaagig espada.+ 9 Apan wala patya* ni Saul ug sa katawhan si Agag ug ang kinamaayohan sa mga karnero, ang mga baka, ang tambok nga mga hayop, ang mga laking karnero, ug ang tanan nga maayo.+ Dili nila buot nga laglagon sila. Apan ang tanang walay pulos ug wala nila magustohi ilang gilaglag.

10 Unya ang pulong ni Jehova nadawat ni Samuel: 11 “Nagbasol* ko nga gihimo nakong hari si Saul, kay mitipas siya gikan sa pagsunod kanako, ug wala niya tumana ang akong mga pulong.”+ Si Samuel naguol pag-ayo, ug tibuok gabii siyang mituaw kang Jehova.+ 12 Dihang si Samuel mibangon sayo sa buntag aron makigkita kang Saul, si Samuel giingnan: “Si Saul miadto sa Carmelo,+ ug naghimo siya didto ug monyumento alang sa iyang kaugalingon.+ Dayon milugsong siya sa Gilgal.” 13 Sa pag-abot ni Samuel kaniya, si Saul miingon: “Hinaot panalanginan ka ni Jehova. Akong gituman ang pulong ni Jehova.” 14 Apan si Samuel miingon: “Nan unsa man kanang akong nadunggan nga tingog sa mga karnero ug tingog sa mga baka?”+ 15 Si Saul miingon: “Gikuha kana gikan sa mga Amalekanhon, kay wala patya* sa katawhan ang kinamaayohan sa mga karnero ug sa mga baka aron ikahalad kang Jehova nga imong Diyos; apan ang nahibilin among gilaglag.” 16 Si Samuel miingon kang Saul: “Husto na! Akong isulti nimo ang giingon ni Jehova kanako kagabii.”+ Busa siya miingon kaniya: “Sulti!”

17 Si Samuel miingon: “Dili ba ubos ang pagtan-aw nimo sa imong kaugalingon+ dihang gihimo kang pangulo sa mga tribo sa Israel ug dihang gidihogan ka ni Jehova ingong hari sa Israel?+ 18 Unya si Jehova naghatag kanimog tahas nga nag-ingon, ‘Lakaw, laglaga ang makasasalang mga Amalekanhon.+ Pakig-away kanila hangtod nga mapuo nimo sila.’+ 19 Busa nganong wala nimo sunda ang tingog ni Jehova? Hinakog hinuon kang midasmag sa ilang mga gipanag-iya+ ug mihimog daotan sa mga mata ni Jehova!”

20 Ug si Saul miingon kang Samuel: “Apan akong gisunod ang tingog ni Jehova! Akong gituman ang tahas nga gihatag kanako ni Jehova, ug akong gidala si Agag nga hari sa Amalek, ug akong gilaglag ang mga Amalekanhon.+ 21 Apan gikuha sa katawhan ang kinamaayohang mga karnero ug mga baka gikan sa mga butang nga angayng laglagon aron ihalad kang Jehova nga imong Diyos sa Gilgal.”+

22 Unya si Samuel miingon: “Unsa may mas makapalipay kang Jehova, ang pagtanyag ug mga halad nga sinunog+ o ang pagsunod sa tingog ni Jehova? Sa pagkatinuod, ang pagsunod mas maayo pa kay sa halad,+ ug ang pagpamati kay sa tambok+ sa mga laking karnero; 23 kay ang pagkamasinupakon+ sama ra sa sala sa pagpanag-an,+ ug ang pagkamapangahason sama ra sa paggamit ug salamangka ug sa idolatriya.* Kay imong gisalikway ang pulong ni Jehova,+ gisalikway usab ka niya ingong hari.”+

24 Unya si Saul miingon kang Samuel: “Nakasala ko, kay akong gilapas ang sugo ni Jehova ug ang imong mga pulong. Nahadlok ko sa katawhan mao nga namati ko sa ilang giingon. 25 Ug karon, palihog, pasayloa ang akong sala, ug balik uban kanako aron ako moyukbo kang Jehova.”+ 26 Apan si Samuel miingon kang Saul: “Dili ko mobalik uban kanimo, kay imong gisalikway ang pulong ni Jehova, ug gisalikway ka ni Jehova ug dili na ka magpadayon sa paghari sa Israel.”+ 27 Pagtalikod ni Samuel aron molakaw, gihawiran ni Saul ang sidsid sa iyang besti nga walay bukton, apan kini nagisi. 28 Si Samuel miingon kaniya: “Mao usab kini ang mahitabo kanimo. Kuhaon* ni Jehova karong adlawa ang gingharian sa Israel gikan kanimo, ug iyang ihatag kini sa usa sa imong mga isigkatawo nga mas maayo kay kanimo.+ 29 Dugang pa, ang Halangdon sa Israel+ dili mamakak+ ug dili magbag-o sa iyang hunahuna,* kay Siya dili tawo nga magbag-o sa iyang hunahuna.”*+

30 Niini siya miingon: “Nakasala ko. Apan palihog pasidunggi ko atubangan sa mga ansiyano sa akong katawhan ug atubangan sa Israel. Balik uban kanako, ug ako moyukbo kang Jehova nga imong Diyos.”+ 31 Busa si Samuel mibalik uban kang Saul, ug si Saul miyukbo kang Jehova. 32 Ug si Samuel miingon: “Dad-a ninyo kanako si Agag nga hari sa Amalek.” Unya miduol kaniya si Agag nga nagpanuko,* kay si Agag naghunahuna: ‘Seguradong ang hulga nga patyon ko* wala na.’ 33 Apan si Samuel miingon: “Ang mga babaye namatyag mga anak tungod sa imong espada, busa ang imong inahan mamatyan usab ug mga anak.” Ug gitagudtagod ni Samuel si Agag sa atubangan ni Jehova sa Gilgal.+

34 Ug si Samuel mipauli sa Rama, ug si Saul mipauli sa iyang kaugalingong balay didto sa Gibea. 35 Si Samuel wala na makigkita pag-usab kang Saul hangtod sa adlaw sa iyang kamatayon, kay si Samuel nagbangotan tungod kang Saul.+ Ug si Jehova nagbasol nga gihimo niyang hari sa Israel si Saul.+

16 Sa ulahi si Jehova miingon kang Samuel: “Hangtod kanus-a ka magbangotan tungod kang Saul,+ nga ako na man siyang gisalikway ingong hari sa Israel?+ Sudlig lana ang sungay+ ug lakaw. Ako kang paadtoon kang Jese+ nga taga-Betlehem, kay ako mismo nagpili sa usa sa iyang mga anak aron mahimong hari.”+ 2 Apan si Samuel miingon: “Unsaon nako pag-adto? Kon mahibaloan kini ni Saul, iya gyod kong patyon.”+ Si Jehova miingon: “Pagdalag dumalagang baka ug moingon ka, ‘Mianhi ko sa paghalad kang Jehova.’ 3 Dapita si Jese kon asa ka maghalad; unya akong ipahibalo kanimo kon unsay imong buhaton. Dihogi alang kanako kadtong akong itudlo kanimo.”+

4 Gibuhat ni Samuel ang giingon ni Jehova. Pag-abot niya sa Betlehem,+ ang mga ansiyano sa siyudad nangurog sa pagtagbo kaniya, ug sila miingon: “Kalinaw ba ang imong tuyo?” 5 Siya mitubag: “Kalinaw ang akong tuyo. Mianhi ko sa paghalad kang Jehova. Balaana ang inyong kaugalingon, ug kuyog kanako kon asa ko maghalad.” Unya iyang gibalaan si Jese ug ang iyang mga anak nga lalaki, dayon iyang gipaadto sila sa paghalad. 6 Dihang nangabot sila ug iyang nakita si Eliab,+ siya miingon: “Seguradong siya ang dinihogan* ni Jehova.” 7 Apan si Jehova miingon kang Samuel: “Ayaw pagtan-aw sa iyang panagway ug sa iyang gitas-on,+ kay dili siya ang akong gipili. Kay ang pagtan-aw sa tawo dili sama sa pagtan-aw sa Diyos; ang tawo nagatan-aw kon unsay makita sa mga mata, apan si Jehova nagatan-aw sa kasingkasing.”+ 8 Unya gitawag ni Jese si Abinadab+ ug gidala siya kang Samuel, apan si Samuel miingon: “Wala usab siya pilia ni Jehova.” 9 Dayon gipaatubang ni Jese si Sammah,+ apan si Samuel miingon: “Wala usab siya pilia ni Jehova.” 10 Busa gidala ni Jese kang Samuel ang pito sa iyang mga anak nga lalaki, apan si Samuel miingon kang Jese: “Walay usa kanila ang gipili ni Jehova.”

11 Sa kataposan si Samuel miingon kang Jese: “Mao na ba kini ang tanan nimong anak nga lalaki?” Siya mitubag: “Wala dinhi ang kamanghoran;+ atua siya nagpasibsib sa mga karnero.”+ Unya si Samuel miingon kang Jese: “Ipakuha siya, kay dili ta mangaon hangtod moabot siya.” 12 Busa gipakuha siya ug gidala kang Samuel. Siya mapulapula, nindot ug mga mata, ug guwapo.+ Unya si Jehova miingon: “Barog, dihogi siya, kay mao kini siya!”+ 13 Busa gikuha ni Samuel ang sungay nga may lana+ ug gidihogan siya atubangan sa iyang mga igsoon. Ug ang espiritu ni Jehova milihok kang David sukad niadtong adlawa.+ Unya si Samuel mibarog ug mipauli sa Rama.+

14 Karon, gikuha na ni Jehova ang iyang espiritu gikan kang Saul,+ ug siya gisamok sa daotang espiritu* gikan kang Jehova.+ 15 Ang mga sulugoon ni Saul miingon kaniya: “Nakita nimo nga gisamok ka sa daotang espiritu gikan sa Diyos. 16 Palihog among ginoo, sugoa ang imong mga sulugoon nga ania sa imong atubangan sa pagpangitag tawo nga hanas magpatokar ug alpa.+ Dihang samokon ka sa daotang espiritu gikan sa Diyos, iyang patokaron kini, ug moarang-arang ang imong pamati.” 17 Busa si Saul miingon sa iyang mga sulugoon: “Palihog pangitai kog hanas nga motugtog, ug dad-a siya kanako.”

18 Ang usa sa mga tig-alagad miingon: “Nakita nako kon unsa ka hanas magpatokar ug alpa ang usa sa mga anak ni Jese nga taga-Betlehem. Siya isog ug banggiitang manggugubat,+ maayong manulti, ug guwapo.+ Ug si Jehova nagauban kaniya.”+ 19 Unya si Saul nagpadalag mga mensahero ngadto kang Jese ug miingon: “Ipadala kanako ang imong anak nga si David, nga atua uban sa mga karnero.”+ 20 Busa gikargahan ni Jese ang asno ug tinapay, usa ka panit nga sudlanag bino, ug usa ka nating kanding ug gipadala kini sa iyang anak nga si David ngadto kang Saul. 21 Busa si David miadto kang Saul ug mialagad kaniya.+ Si Saul nahigugma kaniya pag-ayo, ug gihimo niya siyang tigdala sa iyang mga hinagiban. 22 Si Saul nagpadalag mensahe kang Jese: “Palihog tugoti si David nga magpadayon sa pag-alagad kanako, kay ako nakauyon kaniya.” 23 Dihang samokon si Saul sa daotang espiritu gikan sa Diyos, kuhaon ni David ang alpa ug patokaron kini, ug moarang-arang ang pamati ni Saul, ug ang daotang espiritu mobiya kaniya.+

17 Ug ang mga Filistehanon+ nagtigom sa ilang kasundalohan* aron makiggubat. Sila nagtigom sa Socoh,+ nga sakop sa Juda, ug sila nagkampo taliwala sa Socoh ug sa Azeka,+ sa Epes-damim.+ 2 Si Saul ug ang mga lalaki sa Israel nagtigom ug nagkampo sa Walog* sa Elah,+ ug sila mihan-ay aron makiggubat sa mga Filistehanon. 3 Ang mga Filistehanon anaa sa usa ka bukid, ug ang mga Israelinhon anaa sa pikas bukid, ug may walog nga nag-ulang kanila.

4 Unya migula gikan sa mga kampo sa mga Filistehanon ang banggiitan kaayong manggugubat nga ginganlag Goliat.+ Siya taga-Gat+ ug may gitas-ong unom ka maniko ug usa ka dangaw.* 5 Siya nagsul-ob ug helmet nga tumbaga* ug kotamaya nga daw may himbishimbis. Ang gibug-aton sa kotamaya nga tumbaga+ maoy 5,000 ka siklo.* 6 Siya dunay panagang sa bitiis nga gama sa tumbaga ug nagkabiba siyag salapang+ nga tumbaga. 7 Ang kahoy nga kuptanan sa iyang bangkaw sama sa likisan sa mga tighablon,+ ug ang puthaw nga ohas sa iyang bangkaw motimbang ug 600 ka siklo;* ug ang tigdala sa iyang taming nag-una kaniya. 8 Unya si Goliat mibarog ug gisinggitan ang naghan-ay nga kasundalohan sa Israel:+ “Nganong naghan-ay man mo sa pagpakiggubat? Dili ba ako ang banggiitang manggugubat sa mga Filistehanon, ug kamo mga sulugoon ni Saul? Busa pagpilig usa ka tawo nga makig-away kanako. 9 Kon makig-away siya kanako ug mapatay ko niya, kami mahimo ninyong mga sulugoon. Apan kon ako ang makadaog ug mapatay nako siya, kamo mahimo namong mga sulugoon.” 10 Unya ang Filistehanon miingon: “Gitamay* nako karon ang kasundalohan sa Israel.+ Paatubanga kanako ang inyong napili, ug mag-away mi!”

11 Pagkadungog ni Saul ug sa tibuok Israel sa giingon sa Filistehanon, sila nangalisang ug nangahadlok pag-ayo.

12 Si David maoy anak sa Epratahanon+ nga taga-Betlehem+ sa Juda nga ginganlag Jese,+ kinsa may walo ka anak nga lalaki+ ug tigulang na dihang naghari si Saul. 13 Ang tulo ka magulang nga anak ni Jese misunod kang Saul ngadto sa gubat.+ Ang panganay mao si Eliab,+ ang ikaduha mao si Abinadab,+ ug ang ikatulo mao si Sammah.+ 14 Si David mao ang kamanghoran,+ ug ang tulo ka magulang misunod kang Saul.

15 Samtang nag-alagad kang Saul, si David mag-ulian sa Betlehem sa pag-atiman sa mga karnero+ sa iyang amahan. 16 Sa kasamtangan, ang Filistehanon moduol ug mobarog atubangan kanila buntag ug gabii sulod sa 40 ka adlaw.

17 Unya si Jese miingon sa iyang anak nga si David: “Palihog, kuhaa kining epah* sa sinangag nga lugas ug kining 10 ka tinapay, ug pagdali, dad-a kini ngadto sa imong mga igsoon didto sa kampo. 18 Ug dad-a kining 10 ka keso* ngadto sa pangulo sa kasundalohan;* susiha usab ang kahimtang sa imong mga igsoon, ug pagdalag pamatuod nga maayo ra ang ilang kahimtang.” 19 Sila kauban ni Saul ug sa tanang kalalakin-an sa Israel didto sa Walog* sa Elah+ aron makig-away sa mga Filistehanon.+

20 Busa si David mibangon sayo sa buntag ug gipabantayan niya sa laing tawo ang mga karnero; unya giandam niya ang iyang mga dad-onon ug milakaw sumala sa gisugo kaniya ni Jese. Pag-abot niya sa kampo, ang kasundalohan nagpaingon na sa panggubatan, nga naninggit sa singgit sa pagpakiggubat. 21 Ang Israel ug ang mga Filistehanon nag-atbangay diha sa panggubatan. 22 Dihadiha gibilin ni David ang iyang mga dala sa tigbantay sa mga bagahe ug midagan paingon sa panggubatan. Pag-abot niya didto, iyang gipangomosta ang iyang mga igsoon.+

23 Samtang nakigsulti siya, miabot ang banggiitang manggugubat nga si Goliat,+ ang Filistehanon nga taga-Gat. Siya migula gikan sa naghan-ay nga mga Filistehanon ug misulti sa mao gihapong mga pulong,+ ug nadunggan siya ni David. 24 Dihang nakita siya sa kalalakin-an sa Israel, sila nangahadlok pag-ayo ug nanagan.+ 25 Ug ang kalalakin-an sa Israel miingon: “Nakita ba ninyo kanang tawhana nga migula? Siya nagpaduol aron tamayon* ang Israel.+ Ang tawo nga makapatay kaniya hatagan sa hari ug daghang bahandi, ug ihatag usab sa hari kaniya ang iyang anak nga babaye.+ Ug ang panimalay sa iyang amahan ipahigawas sa hari gikan sa mga obligasyon sa mga Israelinhon.”

26 Si David nangutana sa mga lalaki nga nagtindog duol kaniya: “Unsay iganti alang sa tawo nga makapatay niana nga Filistehanon ug makakuha sa kaulawan gikan sa Israel? Kay kinsa ba kining dili tinuling Filistehanon nga iya mang gitamay* ang naghan-ay nga kasundalohan sa buhi nga Diyos?”+ 27 Unya ang mga tawo misulti kaniya kon unsay gikasaad, ug sila miingon: “Mao kanay iganti alang sa tawo nga makapatay kaniya.” 28 Pagkadungog sa iyang kamagulangang igsoong si Eliab+ nga nakigsulti siya sa mga lalaki, siya nasuko kang David ug miingon: “Nganong milugsong ka dinhi? Ug kinsay imong gibinlan sa pipila ka karnero didto sa kamingawan?+ Nahibalo ko nga mapangahason ka ug daotan ang tinguha sa imong kasingkasing; milugsong ka aron lang motan-aw sa gubat.” 29 Si David miingon: “Unsa may akong nabuhat? Nangutana ra man ko.” 30 Busa siya mibiya kaniya ug miadto sa lain, ug mao ra gihapon ang iyang gipangutana+ ug mao ra usab ang gitubag kaniya sa mga tawo.+

31 Dihay nakadungog sa gisulti ni David, ug ila kadtong gisulti kang Saul. Busa iyang gipakuha siya. 32 Si David miingon kang Saul: “Ayawg tugoti nga mawad-ag kaisog si* bisan kinsa tungod kaniya. Ang imong sulugoon moadto ug makig-away niini nga Filistehanon.”+ 33 Apan si Saul miingon kang David: “Dili ka makahimo sa pagpakig-away niini nga Filistehanon kay bata pa ka,+ ug siya sundalo* na sukad pa sa iyang pagkabatan-on.” 34 Si David miingon kang Saul: “Dihang ang imong sulugoon nagbantay sa mga karnero sa iyang amahan, dihay miabot nga leyon,+ ug sa laing higayon dihay miabot nga oso, ug midagit kinig karnero gikan sa panon. 35 Akong gigukod ug gihampak kini ug giluwas ang karnero gikan sa baba niini. Sa dihang kini miatake kanako, akong gikuptan ang balhibo* niini ug gihampak kini ug gipatay. 36 Gipatay sa imong sulugoon ang leyon ug ang oso, ug kining dili tinuli nga Filistehanon mahisama sa usa niini, kay iyang gitamay* ang naghan-ay nga kasundalohan sa buhi nga Diyos.”+ 37 Unya si David midugang: “Si Jehova, nga nagluwas kanako gikan sa kuyamas sa leyon ug sa oso, mao ang magluwas kanako gikan sa kamot niini nga Filistehanon.”+ Busa si Saul miingon kang David: “Lakaw, ug hinaot si Jehova magauban kanimo.”

38 Unya gisul-oban ni Saul si David sa iyang mga besti. Iyang gisul-oban siya ug helmet nga tumbaga ug dayon gisul-oban ug kotamaya. 39 Unya gitakin ni David ang iyang espada ug misulay paglakaw, apan naglisod siya kay wala siya maanad niini. Si David miingon kang Saul: “Maglisod kog lakaw kon magsul-ob ko niini kay wala ko maanad.” Busa gipanghubo kini ni David. 40 Unya iyang gikuha ang iyang sungkod ug mipilig lima ka hamis nga bato diha sa sapa* ug gisulod kini sa bulsa sa iyang puntil sa magbalantay, ug diha sa iyang kamot ang iyang lambuyog.+ Ug iyang giadto ang Filistehanon.

41 Ang Filistehanon nag-anam ka duol kang David, ug ang tigdala sa iyang taming nag-una kaniya. 42 Dihang mitan-aw ang Filistehanon ug iyang nakita si David, iyang gitamay siya kay siya bata pa nga mapulapula ug guwapo.+ 43 Busa ang Filistehanon miingon kang David: “Iro ba ko+ nga sugaton nimog bunal?” Ug gitunglo sa Filistehanon si David sa ngalan sa iyang mga diyos. 44 Ang Filistehanon miingon kang David: “Dali ngari, ug ako kang ipakaon sa mga langgam ug sa ihalas nga mga mananap.”

45 Si David miingon sa Filistehanon: “Mianhi ka kanako nga nagdalag espada ug bangkaw ug salapang,+ apan ako mianhi kanimo sa ngalan ni Jehova sa mga panon,+ ang Diyos sa naghan-ay nga kasundalohan sa Israel, nga imong gitamay.*+ 46 Niining adlawa mismo itugyan ka ni Jehova sa akong kamot,+ ug ako kang patyon ug punggotan; ug niining adlawa akong ipakaon sa mga langgam ug sa ihalas nga mga mananap ang mga patayng lawas sa kampo sa mga Filistehanon; ug ang katawhan sa tibuok yuta mahibalo nga dunay matuod nga Diyos sa Israel.+ 47 Ug ang tanang nagtigom dinhi* mahibalo nga dili pinaagi sa espada o sa bangkaw nga si Jehova magluwas,+ kay iya ni Jehova ang gubat,+ ug kamong tanan iyang itugyan sa among kamot.”+

48 Unya ang Filistehanon nagpadayon sa pagduol aron makigharong kang David, ug si David kusog nga midagan paingon sa panggubatan aron makigharong sa Filistehanon. 49 Si David mikuot sa iyang puntil ug nagkuhag usa ka bato ug naglambuyog niini. Iyang naigo ang Filistehanon sa agtang, ug ang bato milubong sa iyang agtang ug siya naumod sa yuta.+ 50 Busa si David midaog batok sa Filistehanon pinaagig lambuyog ug usa ka bato; napatay ni David ang Filistehanon bisag wala siyay dalang espada.+ 51 Si David nagpadayon sa pagdagan ug siya mitindog sa iyang kiliran. Unya iyang gigunitan ang espada sa Filistehanon+ ug giibot kini sa sakoban ug gipunggotan niya siya aron maseguro nga patay na siya. Dihang nakita sa mga Filistehanon nga namatay ang ilang banggiitang manggugubat, sila nangalagiw.+

52 Unya ang kalalakin-an sa Israel ug sa Juda naninggit ug ilang gigukod ang mga Filistehanon gikan sa walog+ hangtod sa mga ganghaan sa Ekron,+ ug ang napatay nga mga Filistehanon nangbuy-od sa dalan gikan sa Saaraim+ hangtod sa Gat ug Ekron. 53 Dihang namauli na ang mga Israelinhon gikan sa paggukod sa mga Filistehanon, ilang gipanguha ang mga butang diha sa mga kampo sa mga Filistehanon.

54 Unya gikuha ni David ang ulo sa Filistehanon ug gidala kini sa Jerusalem, apan ang mga hinagiban sa Filistehanon gibutang niya sa iyang tolda.+

55 Dihang nakita ni Saul si David nga migula sa pagpakigharong sa Filistehanon, siya miingon kang Abner+ nga pangulo sa kasundalohan: “Kinsang anak kadtong bataa,+ Abner?” Si Abner mitubag: “Ingon nga ikaw buhi, Oh hari, ako wala masayod!” 56 Ang hari miingon: “Sayra kon kang kinsang anak ang maong batan-on.” 57 Busa dihang mipauli si David human mapatay ang Filistehanon, siya gidala ni Abner sa atubangan ni Saul nga bitbit ang ulo sa Filistehanon.+ 58 Unya si Saul miingon kaniya: “Kinsang anak man ka, Dong?” Si David mitubag: “Anak ko sa imong sulugoon nga si Jese+ nga taga-Betlehem.”+

18 Pagkahuman sa panagsultihanay ni David ug Saul, si Jonatan+ ug David nahimong suod nga managhigala,* ug si Jonatan nahigugma kaniya sama sa iyang kaugalingon.+ 2 Sukad niadtong adlawa, si David gikuha ni Saul ingong sulugoon ug wala na siya papaulia sa balay sa iyang amahan.+ 3 Ug si Jonatan ug David naghimog usa ka pakigsaad,+ kay iyang gihigugma siya sama sa iyang kaugalingon.+ 4 Gihukas ni Jonatan ang iyang besti nga walay bukton ug gihatag kini kang David, lakip ang uban pa niyang besti, ang iyang espada, pana, ug bakos. 5 Sukad niadto si David mouban na sa pagpakiggubat ug bisan asa siya ipadala ni Saul, siya nagmalamposon.*+ Busa gipadumala ni Saul kaniya ang mga manggugubat,+ ug kini nakapahimuot sa tibuok katawhan ug sa mga sulugoon ni Saul.

6 Dihang si David ug ang uban mouli gikan sa pagpamatay sa mga Filistehanon, ang mga babaye gikan sa tanang siyudad sa Israel manggula nga nag-awit+ ug nagsayaw sa pagsugat kang Haring Saul uban ang mga tamborin,+ uban ang pagsadya, ug uban ang tuloy-kuwerdas nga mga instrumento. 7 Ang mga babaye nga nagsaulog nag-awit:

8 Si Saul nasuko pag-ayo,+ ug wala niya maangayi kini nga awit, kay siya miingon: “Gipasidungog nila kang David ang tinagpulo ka libo, apan linibo lang ang ilang gipasidungog kanako. Ang pagkahari na lang ang wala pa ihatag kaniya!”+ 9 Sukad niadtong adlawa, gibantayan kanunay ni Saul ang mga lihok ni David.

10 Pagkasunod adlaw, ang daotang espiritu* gikan sa Diyos migahom kang Saul,+ ug daw katingad-an ang iyang mga lihok* sulod sa balay, samtang si David nagpatugtog ug alpa+ sama sa iyang ginahimo. Si Saul dunay gikuptang bangkaw,+ 11 ug iyang gibangkaw si David+ sa duha ka higayon, nga nag-ingon sa iyang kaugalingon: ‘Akong ipaod si David sa bungbong!’ Apan si David nakaikyas. 12 Unya si Saul nahadlok kang David kay si Jehova nag-uban kaniya+ apan mibiya na kang Saul.+ 13 Busa gipalakaw siya ni Saul ug gitudlo siya ingong pangulo sa 1,000, ug si David manguna sa kasundalohan sa pagpakiggubat.*+ 14 Si David padayong nagmalamposon*+ sa tanan niyang gihimo, ug si Jehova nag-uban kaniya.+ 15 Ug dihang nakita ni Saul nga siya malamposon gayod, siya nahadlok kaniya. 16 Apan si David gimahal sa tibuok Israel ug Juda, kay siya ang nagapanguna kanila sa ilang mga pagpakig-away.

17 Sa ulahi si Saul miingon kang David: “Ania ang akong kamagulangang anak nga si Merab.+ Ako siyang ipaasawa kanimo.+ Apan kinahanglan nga padayon kang magmaisogon alang kanako ug pakig-away sa mga gubat ni Jehova.”+ Kay si Saul miingon sa iyang kaugalingon: ‘Dili nako idapat ang akong kamot batok kaniya. Ang mga Filistehanon maoy mopatay kaniya.’+ 18 Si David miingon kang Saul: “Kinsa ba ko ug kinsa ba ang akong mga paryente, ang banay sa akong amahan diha sa Israel, nga mahimo kong umagad sa hari?”+ 19 Apan pag-abot sa panahon nga si Merab nga anak ni Saul ihatag na unta kang David, siya gihatag na aron maasawa ni Adriel+ nga Meholahanon.

20 Karon si Mikal nga anak ni Saul+ nahigugma kang David. Gisultihan si Saul bahin niini, ug kini nakapahimuot kaniya. 21 Busa si Saul miingon: “Ipaasawa nako kaniya ang akong anak aron magsilbi siyang lit-ag kaniya ug siya mapatay sa mga Filistehanon.”+ Unya si Saul miingon kang David sa ikaduhang higayon: “Karong adlawa, ikaw mahimong akong umagad.”* 22 Dugang pa, gisugo ni Saul ang iyang mga sulugoon: “Sekretoha pag-ingon si David, ‘Gikahimut-an ka sa hari ug sa tanan niyang sulugoon. Busa karon pakig-alyansa sa hari pinaagig kaminyoon.’” 23 Dihang gisulti kini sa mga sulugoon ni Saul ngadto kang David, si David miingon: “Nagtuo ba mo nga sayon ra alang nako nga makig-alyansa sa hari pinaagig kaminyoon nga pobre ra man ko ug dili kaayo tinamod?”+ 24 Unya ang mga sulugoon ni Saul misulti kaniya: “Ingon niini ang gisulti ni David.”

25 Busa si Saul miingon: “Kini ang inyong isulti kang David, ‘Wala magkinahanglan ug bugay ang hari.+ Ang iyang gipangayo mao ang 100 ka yamis+ sa mga Filistehanon aron mapanimaslan ang mga kaaway sa hari.’” Kay giplano ni Saul nga mapatay si David sa mga Filistehanon. 26 Unya gisulti kini sa iyang mga sulugoon ngadto kang David, ug nalipay si David nga makig-alyansa sa hari pinaagig kaminyoon.+ Sa wala pa moabot ang gitakdang panahon, 27 si David miadto uban sa iyang mga tawo ug ilang gipamatay ang 200 ka Filistehanon, ug gidala ni David ang ilang yamis ug gihatag kining tanan sa hari aron makig-alyansa sa hari pinaagig kaminyoon. Busa gihatag ni Saul kaniya ingong asawa si Mikal nga iyang anak.+ 28 Nakita ni Saul nga si Jehova nag-uban kang David+ ug nga si Mikal nga iyang anak nahigugma kang David.+ 29 Tungod niini, misamot pa ang kahadlok ni Saul kang David, ug si Saul nahimong kaaway ni David hangtod sa iyang kamatayon.+

30 Sa matag higayon nga ang mga prinsipe sa mga Filistehanon manggula sa pagpakiggubat, si David mas nagmalamposon* kay sa tanang sulugoon ni Saul;+ ug ang iyang ngalan nabantog pag-ayo.+

19 Sa ulahi, si Saul nakigsulti sa iyang anak nga si Jonatan ug sa tanan niyang sulugoon bahin sa iyang plano nga patyon si David.+ 2 Kay si David gimahal pag-ayo sa anak ni Saul nga si Jonatan,+ giingnan ni Jonatan si David: “Gusto kang patyon sa akong amahan nga si Saul. Palihog, pagbantay ugma sa buntag, ug adto sa dapit nga makatago ka ug pabilin didto. 3 Adtoon nako ang akong amahan ug mangadto mi sa dapit duol sa imong tagoan. Makigsulti ko sa akong amahan bahin kanimo, ug kon duna koy mahibaloan, isulti gyod nako kini kanimo.”+

4 Busa si Jonatan nagsulti ug maayo bahin kang David+ ngadto kang Saul nga iyang amahan. Siya miingon: “Dili angayng magpakasala ang hari batok sa iyang sulugoon nga si David, kay wala siya makasala kanimo ug ang iyang mga gihimo nakahatag kanimog kaayohan. 5 Gipameligro niya ang iyang kinabuhi sa pagpatay sa Filistehanon,+ mao nga si Jehova naghatag ug dakong kadaogan* sa tibuok Israel. Nakita nimo kadto, ug nalipay ka pag-ayo. Busa nganong magpakasala ka batok sa inosenteng dugo pinaagi sa pagpapatay kang David sa wala lamay hinungdan?”+ 6 Si Saul namati kang Jonatan ug nanumpa: “Ingon nga si Jehova buhi, siya dili pagapatyon.” 7 Human niadto, gitawag ni Jonatan si David ug gisultihan siya sa tanang naestoryahan nila ni Saul. Busa gidala ni Jonatan si David ngadto kang Saul, ug siya nagpadayon sa pag-alagad kaniya sama kaniadto.+

8 Ug miulbo na usab ang gubat ug si David miasdang ug nakig-away batok sa mga Filistehanon ug daghan kaayo ang iyang napatay, ug sila nangalagiw.

9 Ug ang daotang espiritu* gikan kang Jehova midangat kang Saul+ dihang naglingkod siya sa iyang balay nga naggunit sa iyang bangkaw, samtang si David nagpatugtog ug alpa.+ 10 Gitinguha ni Saul nga ipaod si David sa bungbong pinaagi sa bangkaw, apan nakalihay siya sa pagbangkaw ni Saul kaniya ug ang bungbong maoy naigo. Niadtong gabhiona, si David miikyas. 11 Unya si Saul nagpadalag mga tawo aron maniid sa balay ni David ug patyon siya pagkabuntag,+ apan giingnan si David sa iyang asawa nga si Mikal: “Kon dili ka moikyas karong gabhiona, ugma patay na ka.” 12 Dihadiha, gipakanaog ni Mikal si David agi sa bentana aron siya makaikyas. 13 Gikuha ni Mikal ang terapim nga estatuwa* ug gibutang kini sa higdaanan, ug gibutangan niya ang ulohan niini ug panapton nga gama sa balhibo sa kanding, ug gihabolan kini.

14 Si Saul nagpadalag mga tawo sa pagkuha kang David, apan si Mikal miingon: “Duna siyay sakit.” 15 Busa gipadalag balik ni Saul ang mga tawo sa pagtan-aw kang David ug giingnan sila: “Dad-a siya kanako uban ang iyang higdaanan aron patyon siya.”+ 16 Pagsulod sa iyang gipadala nga mga tawo, ang ilang nakita sa higdaanan mao ang terapim nga estatuwa* ug ang panapton nga gama sa balhibo sa kanding sa ulohan niini. 17 Si Saul miingon kang Mikal: “Nganong imo kong gilimbongan ug imong gipaikyas ang akong kaaway?”+ Si Mikal mitubag: “Iya man god kong giingnan, ‘Palakwa ko! Kay kon dili, patyon ka nako!’”

18 Busa si David nakaikyas, ug siya miadto kang Samuel sa Rama.+ Iyang gisultihan siya sa tanan nga gibuhat ni Saul kaniya. Unya siya ug si Samuel mibiya, ug sila miestar sa Naiot.+ 19 Sa ulahi, dihay mibalita kang Saul: “Si David atua sa Naiot sa Rama.” 20 Dihadiha, si Saul nagpadalag mga tawo sa pagdakop kang David. Dihang ilang nakita ang tigulang nga mga propeta nga nanagna ug si Samuel nagtindog nga nanguna kanila, ang espiritu sa Diyos milihok sa mga tawo ni Saul, ug sila milihok usab ingong mga propeta.

21 Dihang ila kining gisulti kang Saul, siya nagpadala dayon ug laing mga tawo, ug sila milihok usab ingong mga propeta. Busa si Saul nagpadalag ikatulong grupo sa mga tawo, ug sila usab milihok ingong mga propeta. 22 Sa kataposan, siya na gyod ang miadto sa Rama. Pag-abot niya sa dakong gahong nga pondohanag tubig sa Secu, siya nangutana: “Asa man si Samuel ug si David?” Sila mitubag: “Atua sa Naiot+ sa Rama.” 23 Samtang si Saul nagpaingon sa Naiot sa Rama gikan didto, ang espiritu sa Diyos milihok usab kaniya. Samtang naglakaw, siya milihok ingong propeta hangtod nga nakaabot siya sa Naiot sa Rama. 24 Gihukas usab niya ang iyang mga besti, ug siya milihok usab ingong propeta sa atubangan ni Samuel, ug siya mihigda didto nga hubo* sa tibuok adlaw ug tibuok gabii. Mao nga sila miingon: “Si Saul ba usa usab ka propeta?”+

20 Unya si David miikyas gikan sa Naiot sa Rama. Apan siya miadto kang Jonatan ug miingon: “Unsay akong nabuhat?+ Unsay akong sayop, ug unsay akong sala sa imong amahan nga gusto man ko niyang patyon?” 2 Si Jonatan miingon kaniya: “Imposible kana!+ Walay mopatay nimo. Ang akong amahan dili mobuhat ug bisan unsa, dako man kana o gamay nga butang, nga dili niya isulti kanako. Nganong itago man kini kanako sa akong amahan? Dili kini mahitabo.” 3 Apan si David miingon: “Nahibalo gayod ang imong amahan nga managhigala ta,+ ug seguradong moingon siya, ‘Ayaw pahibaloa niini si Jonatan kay basin masakitan siya.’ Apan ingon nga si Jehova buhi ug ikaw buhi, usa na lang ka lakang ang kulang, mamatay na gyod ko!”+

4 Unya si Jonatan miingon kang David: “Bisan unsay isulti nimo, buhaton nako alang kanimo.” 5 Si David miingon kang Jonatan: “Pista sa bag-ong bulan ugma,+ ug seguradong gidahom nga modungan kog kaon sa hari; palakwa ko, ug magtago ko sa gawas sa siyudad hangtod sa pagkagabii sa ikatulo ka adlaw. 6 Kon pangitaon ko sa imong amahan, ingna siya, ‘Si David nananghid kanako nga kinahanglang moadto dayon siya sa iyang siyudad sa Betlehem+ aron moduyog sa iyang pamilya alang sa tinuig nga paghalad didto.’+ 7 Kon siya moingon, ‘Walay problema,’ nagkahulogan kanag kalinaw alang sa imong sulugoon. Apan kon masuko siya, nagpakita kana nga duna gyod siyay daotang himoon kanako. 8 Pakitaig maunongong gugma ang imong sulugoon,+ kay ikaw nakigsaad sa imong sulugoon sa atubangan ni Jehova.+ Apan kon sad-an ko,+ ikaw na lang ang mopatay nako. Nganong imo pa man kong itugyan sa imong amahan?”

9 Si Jonatan miingon: “Ayaw pagsultig ingon niana! Kon masayran nako nga dunay himoong daotan ang akong amahan kanimo, ako gyod kining isulti kanimo.”+ 10 Unya si David miingon kang Jonatan: “Kinsa may mosulti kanako kon nasuko ba ang imong amahan kanako?” 11 Si Jonatan miingon kang David: “Uban kanako, ug mangadto ta sa gawas sa siyudad.” Busa silang duha nangadto sa gawas sa siyudad. 12 Ug si Jonatan miingon kang David: “Saksi si Jehova nga Diyos sa Israel nga ugma o sa sunod adlaw, akong tinoon kon maayo ba ang buot sa akong amahan kanimo.* Kon maayo, ako gyod kang pahibaloon. 13 Apan kon dunay daotang himoon ang akong amahan kanimo, pahamtangan unta ko* ni Jehova ug silot ug dugangan pa kana kon dili nako kana isulti kanimo ug dili ka nako palakwon nga malinawon. Hinaot si Jehova mag-uban kanimo,+ ingon nga siya nag-uban sa akong amahan.+ 14 Ug hinaot nga pakitaan ko nimo sa maunongong gugma ni Jehova samtang ako buhi ug bisag mamatay ko.+ 15 Hinaot nga pakitaan nimog maunongong gugma ang akong panimalay hangtod sa hangtod,+ bisan pag laglagon ni Jehova ang tanang kaaway ni David.” 16 Busa si Jonatan mihimog pakigsaad uban sa panimalay ni David ug miingon, “Papanubagon ni Jehova ang mga kaaway ni David.” 17 Busa gipapanumpa pag-usab ni Jonatan si David tungod sa iyang gugma kaniya, kay iyang gihigugma siya sama sa paghigugma niya sa iyang kaugalingon.+

18 Unya si Jonatan miingon kaniya: “Pista sa bag-ong bulan ugma,+ ug pangitaon ka kay mabakante ang imong lingkoranan. 19 Sa ikatulong adlaw mas pangitaon na gyod ka, ug kinahanglang moanhi ka niining dapita diin ka nagtago sa miaging adlaw* ug pabilin dinhi duol sa bato. 20 Unya magpana kog tulo ka udyong sa kilid niini nga daw duna koy ig-onon. 21 Dayon sultihan nako ang tig-alagad, ‘Lakaw, pangitaa ang mga udyong.’ Kon moingon ko sa tig-alagad, ‘Tan-awa! Ang mga udyong anaa sa imong kiliran, kuhaa kini,’ mahimo kang mobalik, kay ingon nga si Jehova buhi, nagkahulogan kanag kalinaw alang kanimo ug walay kapeligrohan. 22 Apan kon moingon ko sa tig-alagad, ‘Tan-awa! Ang mga udyong atua pa sa unahan,’ lakaw, kay kabubut-on ni Jehova nga mobiya ka. 23 Kon bahin sa panaad nga atong gihimo sa usag usa,+ si Jehova mao ang atong saksi hangtod sa hangtod.”+

24 Busa si David mitago sa gawas sa siyudad. Pag-abot sa pista sa bag-ong bulan, ang hari milingkod sa kan-anan aron mokaon.+ 25 Ang hari naglingkod sa iyang lingkoranan duol sa bungbong. Atbang niya si Jonatan, ug si Abner+ naglingkod sa tapad ni Saul, apan bakante ang lingkoranan ni David. 26 Walay gisulti si Saul niadtong adlawa, kay siya miingon sa iyang kaugalingon: ‘Dunay nahitabo mao nga dili siya hinlo.+ Oo, dili gyod siya hinlo.’ 27 Ug pagkaugma human sa pista sa bag-ong bulan, sa ikaduhang adlaw, ang lingkoranan ni David bakante gihapon. Busa si Saul miingon kang Jonatan nga iyang anak: “Nganong wala man moanhi ang anak ni Jese+ gahapon o karong adlawa alang sa pagpangaon?” 28 Si Jonatan mitubag kang Saul: “Si David nananghid kanako nga moadto sa Betlehem.+ 29 Giingnan ko niya, ‘Palihog tugoti ko nga moadto, kay ang among banay dunay himoong paghalad didto sa siyudad, ug gipaadto ko sa akong igsoon. Busa kon imong itugot, palihog palakwa ko aron makigkita sa akong mga igsoon.’ Kanay hinungdan nga wala siya makaanhi sa lamesa sa hari.” 30 Unya si Saul nasuko pag-ayo kang Jonatan, ug siya miingon: “Ikaw nga anak sa usa ka rebelyosong babaye, abi nimog wala ko masayod nga midapig ka sa anak ni Jese? Nagpakaulaw lang ka sa imong kaugalingon ug sa imong inahan.* 31 Hangtod nga buhi ang anak ni Jese, ikaw ug ang imong pagkahari dili unya magpabilin.+ Busa karon ipakuha siya ug dad-a ngari kanako, kay siya takos sa kamatayon.”*+

32 Apan si Jonatan miingon kang Saul nga iyang amahan: “Nganong patyon man siya?+ Unsay iyang nabuhat?” 33 Tungod niana, siya gibangkaw ni Saul.+ Busa nasayran ni Jonatan nga gusto gyong patyon sa iyang amahan si David.+ 34 Dihadiha, si Jonatan mibiya sa kan-anan nga nanginit sa kasuko. Wala siya mokaon ug bisan unsa sa ikaduhang adlaw human sa bag-ong bulan, kay siya nasakitan maylabot kang David+ ug ang iyang kaugalingong amahan nagpakaulaw kaniya.

35 Pagkabuntag, si Jonatan miadto sa gawas sa siyudad sumala sa ilang gikasabotan ni David, ug kuyog niya ang usa ka batan-ong tig-alagad.+ 36 Ug giingnan niya ang iyang tig-alagad: “Dagan, palihog, ug pangitaa ang mga udyong nga akong ipana.” Ang tig-alagad midagan, ug gipana ni Jonatan ang udyong ngadto sa unahan sa tig-alagad. 37 Dihang nakaabot ang tig-alagad sa gitugdonan sa udyong nga gipana ni Jonatan, si Jonatan misinggit sa tig-alagad: “Ang udyong atua pa sa unahan nimo.” 38 Si Jonatan misinggit sa tig-alagad: “Pagdali! Kuhaa dayon ang mga udyong! Ayaw paglangan!” Ug gipunit sa tig-alagad ni Jonatan ang mga udyong ug mibalik sa iyang agalon. 39 Ang tig-alagad walay kalibotan bahin niini; si Jonatan ug si David lang ang nakasabot niini. 40 Unya gihatag ni Jonatan ang iyang mga hinagiban ngadto sa iyang tig-alagad ug giingnan siya: “Lakaw, dad-a kini sa siyudad.”

41 Pagbiya sa tig-alagad, si David mitindog gikan sa iyang gitagoan nga anaa lang sa duol, sa may habagatan. Unya siya mihapa ug miyukbo sa makatulo, ug sila naghinagkanay ug naghinilakay, apan mas grabe ang paghilak ni David. 42 Si Jonatan miingon kang David: “Lakaw nga malinawon, kay kitang duha nanumpa+ sa ngalan ni Jehova, ‘Hinaot si Jehova mahimong saksi tali natong duha ug tali sa imong kaliwat* ug sa akong kaliwat* hangtod sa hangtod.’”+

Unya si David mitindog ug milakaw, ug si Jonatan mibalik sa siyudad.

21 Sa ulahi, si David nakaabot sa Nob+ ngadto kang Ahimelek nga saserdote. Pagkakita ni Ahimelek kang David, siya nangurog sa kahadlok ug miingon kaniya: “Nganong nag-inusara ka ug wala kay kauban?”+ 2 Si David mitubag kang Ahimelek nga saserdote: “Dihay gisugo ang hari kanako, apan siya miingon, ‘Kinahanglang walay mahibalo sa akong gisugo kanimo ug sa mga instruksiyon nga akong gihatag kanimo.’ Nakigsabot ko sa akong mga tawo nga magkita mi sa usa ka dapit. 3 Karon kon duna ka dihay lima ka tinapay o bisan unsa nga makaon, ihatag kini kanako.” 4 Apan ang saserdote miingon kang David: “Walay ordinaryong tinapay karon, apan balaang tinapay lang ang anaa.+ Makakaon niini ang imong mga tawo, basta wala sila makigdulog* sa mga babaye sa milabayng mga adlaw.”+ 5 Si David miingon sa saserdote: “Dili gyod mi puwedeng makigdulog ug mga babaye sama kaniadto dihang migula ko sa pagpakiggubat.+ Kon ang akong mga tawo nagpabiling balaan bisag ordinaryo lang ang tahas, unsa pa kaha karong adlawa nga espesyal ang among tahas!” 6 Busa gihatag sa saserdote kaniya ang balaang tinapay,+ kay walay laing tinapay didto gawas sa halad nga tinapay nga gikuha gikan sa presensiya ni Jehova aron ilisan ug bag-ong tinapay sa samang adlaw nga gikuha kini.

7 Niadtong adlawa, ang usa sa mga sulugoon ni Saul nagpabilin sa atubangan ni Jehova. Siya mao si Doeg+ nga Edomhanon,+ ang pangulo sa mga magbalantay sa kahayopan ni Saul.

8 Unya si David miingon kang Ahimelek: “Duna ba kay bangkaw o espada diha? Wala nako madala ang akong espada o ang akong mga hinagiban kay dinalian ang tahas nga gihatag sa hari.” 9 Ang saserdote miingon: “Ania dinhi ang espada ni Goliat+ nga Filistehanon, nga imong gipatay sa Walog* sa Elah.+ Giputos kinig panapton ug gibutang luyo sa epod.+ Kon gusto nimo kining dad-on, kuhaa kini, kay kini lang ang ania dinhi.” Si David miingon: “Walay laing espada nga sama niini. Ihatag kini kanako.”

12 Gihunahuna ni David ang ilang gisulti, ug nahadlok siya pag-ayo+ kang Haring Akis sa Gat. 13 Busa siya nagpakaaron-ingnong nalisoan+ ug nagpabuangbuang sa ilang atubangan.* Iyang gikuriskurisan ang mga pultahan sa ganghaan ug gipatabisay ang iyang laway diha sa iyang bungot. 14 Busa si Akis miingon sa iyang mga sulugoon: “Nakita ninyo nga nabuang kining tawhana! Nganong gidala pa man ninyo siya kanako? 15 Nakulangan ba kog buang nga mga tawo nga gidad-an man ko ninyog usa pa? Angay bang pasudlon kining tawhana sa akong balay?”

22 Busa si David mibiya didto+ ug miikyas ngadto sa langob sa Adulam.+ Dihang nabalitaan kini sa iyang mga igsoon ug sa tibuok panimalay sa iyang amahan, sila nangadto kaniya. 2 Ug ang tanan nga anaa sa kalisdanan, utangan, ug dunay reklamo sa kinabuhi nangadto kaniya, ug siya nahimong ilang pangulo. Dihay mga 400 ka tawo nga uban kaniya.

3 Gikan didto, si David miadto sa Mizpe sa Moab ug miingon sa hari sa Moab:+ “Palihog papuy-a ang akong amahan ug inahan uban kaninyo hangtod nga akong mahibaloan kon unsay buhaton sa Diyos alang kanako.” 4 Busa iyang gibilin sila sa hari sa Moab, ug sila mipuyo uban kaniya sa tanang panahon nga si David didto sa dangpanan.+

5 Unya si Gad+ nga propeta miingon kang David: “Ayaw pagpabilin diha sa dangpanan. Biya diha ug adto sa yuta sa Juda.”+ Busa si David mibiya ug miadto sa lasang sa Heret.

6 Nadunggan ni Saul nga nakit-an na si David ug ang mga tawo nga uban kaniya. Niadtong tungora si Saul naglingkod ilalom sa kahoyng tamarisko sa bungtod sa Gibea+ nga nagkupot sa iyang bangkaw, ug nagtindog libot niya ang tanan niyang alagad. 7 Unya si Saul miingon sa iyang mga alagad nga nagtindog libot kaniya: “Palihog pamati, kamong mga Benjaminhon. Hatagan ba usab mo sa anak ni Jese+ ug mga uma ug kaubasan? Itudlo ba mo niyang tanan ingong pangulo sa kada 1,000 ug pangulo sa kada 100?+ 8 Kamong tanan nagkunsabo batok kanako! Walay misulti kanako dihang ang akong kaugalingong anak nakigsaad uban sa anak ni Jese!+ Walay usa kaninyo nga misimpatiya kanako ug misulti kanako nga ang akong kaugalingong anak nag-aghat sa akong alagad nga mobatok kanako, sama sa iyang ginahimo karon.”

9 Unya si Doeg+ nga Edomhanon, nga nagdumala sa mga sulugoon ni Saul, miingon:+ “Akong nakita ang anak ni Jese nga miadto sa Nob kang Ahimelek nga anak ni Ahitub.+ 10 Ug si Ahimelek nagpakisayod kang Jehova alang kaniya ug naghatag kaniyag pagkaon. Iya pa ganing gihatag kaniya ang espada ni Goliat nga Filistehanon.”+ 11 Dihadiha gipatawag sa hari si Ahimelek nga anak ni Ahitub nga saserdote ug ang tanang saserdote sa panimalay sa iyang amahan, nga anaa sa Nob. Busa silang tanan miadto sa hari.

12 Si Saul miingon: “Palihog pamati, ikaw nga anak ni Ahitub!” Siya mitubag: “Oo, akong ginoo.” 13 Si Saul miingon kaniya: “Nganong ikaw ug ang anak ni Jese nagkunsabo man batok kanako? Nganong gihatagan nimo siyag tinapay ug espada, ug nagpakisayod ka sa Diyos alang kaniya? Siya misukol kanako ug nakigkunsabo batok kanako, sama sa iyang ginahimo karon.” 14 Si Ahimelek mitubag sa hari: “Kinsa sa tanan nimong alagad ang sama ka kasaligan* kang David?+ Umagad siya sa hari+ ug pangulo sa imong mga bantay ug pinasidunggan sa imong panimalay.+ 15 Karon ba ang unang higayon nga nagpakisayod ko sa Diyos alang kaniya?+ Dili nako mahimo ang imong giingon! Dili unta pakasad-on sa hari ang iyang alagad ug ang tibuok panimalay sa akong amahan, kay wala gayoy nahibaloan ang imong alagad bahin niini.”+

16 Apan ang hari miingon: “Mamatay ka gayod,+ Ahimelek, ikaw ug ang tibuok panimalay sa imong amahan.”+ 17 Ug ang hari miingon sa mga bantay* nga nagtindog libot kaniya: “Lakaw ug pamatya ang mga saserdote ni Jehova, kay sila midapig kang David! Sila nahibalo nga siya usa ka kagiw, ug wala ko nila sultihi!” Apan ang mga bantay sa hari dili buot mobakyaw sa ilang kamot sa pagpatay sa mga saserdote ni Jehova. 18 Unya ang hari miingon kang Doeg:+ “Lakaw ug patya ang mga saserdote!” Dihadiha si Doeg nga Edomhanon+ milakaw ug iyang gipatay ang mga saserdote. Niadtong adlawa, gipatay niya ang 85 ka lalaki nga nagsul-ob ug epod nga lino.+ 19 Gihampak usab niya pinaagig espada ang Nob,+ ang siyudad sa mga saserdote; gipamatay niya pinaagig espada ang mga lalaki ug babaye, mga bata ug masuso, mga torong baka, mga asno, ug mga karnero.

20 Apan si Abiatar,+ usa sa mga anak ni Ahimelek nga anak ni Ahitub, nakaikyas ug miadto kang David. 21 Giingnan ni Abiatar si David: “Gipatay ni Saul ang mga saserdote ni Jehova.” 22 Si David miingon kang Abiatar: “Dihang nakita nako didto si Doeg nga Edomhanon, nahibalo na gyod ko niadtong adlawa+ nga iya gyong sultihan si Saul. Ako ang nakaingon sa kamatayon sa tanan* sa panimalay sa imong amahan. 23 Uban kanako. Ayawg kahadlok, kay ang gustong mopatay nimo gusto usab mopatay kanako; ako kang panalipdan.”+

23 Unya si David giingnan: “Ang mga Filistehanon nakig-away sa Keila,+ ug ilang gipanguha ang mga lugas diha sa mga giokanan.” 2 Busa si David nagpakisayod kang Jehova:+ “Moadto ba ko ug pamatyon kining mga Filistehanon?” Si Jehova miingon kang David: “Lakaw, pamatya ang mga Filistehanon ug luwasa ang Keila.” 3 Apan ang mga tawo ni David miingon kaniya: “Nangahadlok na gani ta nga ania ta sa Juda,+ unsa pa kaha kon moadto ta sa Keila aron makig-away sa kasundalohan sa mga Filistehanon!”+ 4 Busa si David nagpakisayod pag-usab kang Jehova.+ Si Jehova mitubag kaniya: “Lakaw, lugsong sa Keila, kay akong itugyan sa imong kamot ang mga Filistehanon.”+ 5 Busa si David ug ang iyang mga tawo miadto sa Keila ug nakig-away batok sa mga Filistehanon; iyang gipanguha ang ilang kahayopan ug daghan kaayo kanila ang iyang napatay, ug giluwas ni David ang mga molupyo sa Keila.+

6 Karon, dihang si Abiatar+ nga anak ni Ahimelek miikyas ug miadto kang David sa Keila, siya nagdalag epod. 7 Si Saul giingnan: “Si David miadto sa Keila.” Unya si Saul miingon: “Gitugyan siya sa Diyos kanako,*+ kay siya ray nagbitik sa iyang kaugalingon pinaagi sa pagsulod sa siyudad nga may mga ganghaan ug mga trangka.” 8 Busa gipatawag ni Saul ang tibuok katawhan ngadto sa gubat aron molugsong ngadto sa Keila ug likosan si David ug ang iyang mga tawo. 9 Dihang nahibaloan ni David nga dihay giplano si Saul batok kaniya, iyang giingnan si Abiatar nga saserdote: “Dad-a dinhi ang epod.”+ 10 Unya si David miingon: “Oh Jehova nga Diyos sa Israel, ang imong alagad nakadungog nga si Saul nagtinguha sa pag-anhi sa Keila aron sa paglaglag sa siyudad tungod kanako.+ 11 Itugyan ba ko sa mga pangulo* sa Keila ngadto sa iyang kamot? Molugsong ba si Saul dinhi sumala sa nadungog sa imong alagad? Oh Jehova nga Diyos sa Israel, palihog sultihi ang imong alagad.” Si Jehova miingon: “Siya molugsong.” 12 Si David nangutana: “Ako ug ang akong mga tawo itugyan ba sa mga pangulo sa Keila ngadto sa kamot ni Saul?” Si Jehova mitubag: “Itugyan nila kamo.”

13 Dihadiha si David ug ang iyang mga tawo, nga mga 600 ang gidaghanon,+ mibiya sa Keila ug nagbalhinbalhin ug dapit nga kaestaran. Dihang si Saul giingnan nga si David miikyas gikan sa Keila, wala na siya moadto didto. 14 Si David miestar sa kamingawan sa mga dapit nga lisod adtoon, sa kabukiran sa kamingawan sa Zip.+ Nagpadayon si Saul sa pagpangita kaniya,+ apan wala siya itugyan ni Jehova sa kamot ni Saul. 15 Samtang si David atua sa kamingawan sa Zip sa Hores, siya nahibalo nga* si Saul migula aron pangitaon ug patyon siya.

16 Karon, si Jonatan nga anak ni Saul miadto kang David sa Hores, ug gipalig-on niya ang pagsalig ni David* kang Jehova.+ 17 Siya miingon kaniya: “Ayawg kahadlok, kay dili ka makaplagan sa akong amahan nga si Saul; ikaw mahimong hari sa Israel,+ ug ako mahimong ikaduha kanimo; ang akong amahan nga si Saul nahibalo usab niini.”+ 18 Unya silang duha naghimog pakigsaad+ sa atubangan ni Jehova, ug si David nagpabilin sa Hores, ug si Jonatan mipauli sa iyang balay.

19 Sa ulahi, ang mga tawo sa Zip miadto kang Saul sa Gibea+ ug miingon: “Dili ba si David nagtago man duol kanamo+ sa mga dapit nga lisod adtoon didto sa Hores,+ sa bungtod sa Hakila,+ nga atua sa habagatan* sa Jesimon?*+ 20 Kon kanus-a nimo gustong molugsong, Oh hari, lugsong, ug amo siyang itugyan sa kamot sa hari.”+ 21 Si Saul miingon: “Hinaot panalanginan mo ni Jehova, kay kamo naluoy kanako. 22 Palihog lakaw ug tinoa kon asa siya ug kon kinsay nakakita kaniya didto, kay giingnan ko nga siya igmat kaayo. 23 Tinoa pag-ayo kon haing mga dapita siya nagtago ug balik kanako nga may ebidensiya. Unya mouban ko ninyo, ug pangitaon gayod nako siya bisan pag anaa siya taliwala sa mga linibo* sa Juda.”

24 Busa sila mibiya ug nangadto sa Zip+ una kang Saul, samtang si David ug ang iyang mga tawo didto sa kamingawan sa Maon,+ sa Araba+ sa habagatan sa Jesimon. 25 Unya si Saul ug ang iyang mga tawo miadto sa pagpangita kaniya.+ Dihang gisulti kini kang David, siya mipalayo dayon ngadto sa dakong bato+ ug miestar sa kamingawan sa Maon. Dihang nahibaloan kini ni Saul, iyang gigukod si David ngadto sa kamingawan sa Maon. 26 Sa nakaabot si Saul sa usa ka kilid sa bukid, si David ug ang iyang mga tawo didto sa pikas kilid sa bukid. Si David nagdali sa pagpahilayo+ kang Saul, apan si Saul ug ang iyang mga tawo nagkaduol kang David ug sa iyang mga tawo sa pagdakop kanila.+ 27 Apan dihay mensahero nga miabot ug miingon kang Saul: “Pagdali, balik, kay ang mga Filistehanon misulong sa atong yuta!” 28 Busa si Saul mihunong sa paggukod kang David+ ug miadto sa pagpakigharong sa mga Filistehanon. Kanay hinungdan nga kadtong dapita gitawag ug Bato nga Nag-ulang.

29 Unya si David mitungas gikan didto ug miestar sa mga dapit sa En-gedi+ nga lisod adtoon.

24 Pagbalik gayod ni Saul gikan sa paggukod sa mga Filistehanon, siya giingnan: “Si David atua sa kamingawan sa En-gedi.”+

2 Busa si Saul mikuhag 3,000 ka piniling mga tawo gikan sa tibuok Israel ug milakaw sa pagpangita kang David ug sa iyang mga tawo didto sa batoong mga pangpang sa mga kanding sa bukid. 3 Nakaabot si Saul sa mga toril sa karnero* diha daplin sa dalan, diin didto may usa ka langob. Ug si Saul misulod didto tungod sa sugo sa lawas* samtang si David ug ang iyang mga tawo nanglingkod sa kinasulorang mga bahin sa langob.+ 4 Ang mga tawo ni David miingon kaniya: “Mao na kining adlawa nga si Jehova nagaingon kanimo, ‘Tan-awa! Akong itugyan sa imong kamot ang imong kaaway,+ ug buhata kaniya bisan unsay maayo sa imong panan-aw.’” Busa si David mihinayhinay ug duol, ug iyang giputlan ang sidsid sa walay bukton nga besti ni Saul. 5 Apan human niadto, gihasol si David sa iyang konsensiya*+ kay iyang giputlan ang sidsid sa walay bukton nga besti ni Saul. 6 Giingnan niya ang iyang mga tawo: “Dili nako kini angayng buhaton sa akong ginoo kay siya ang dinihogan* ni Jehova. Dili gyod mouyon si Jehova kon himoan nakog daotan ang dinihogan ni Jehova.”+ 7 Busa pinaagi niini, gipugngan* ni David ang iyang mga tawo, ug wala niya sila tugoti sa pag-atake kang Saul. Kon bahin kang Saul, siya migawas sa langob ug nagpadayon sa paglakaw.

8 Unya si David migawas sa langob ug iyang gitawag si Saul: “Akong ginoong hari!”+ Paglingi ni Saul sa iyang luyo, si David miyukbo ug mihapa. 9 Si David miingon kang Saul: “Nganong namati ka sa mga tawo nga nag-ingon, ‘Dunay daotang tuyo si David kanimo’?+ 10 Niining adlawa, nakita nimo nga gitugyan ka ni Jehova sa akong kamot didto sa langob. Apan dihang may miingon nga patyon ka,+ ako naluoy kanimo ug miingon, ‘Dili nako himoan ug daotan ang akong ginoo, kay siya ang dinihogan ni Jehova.’+ 11 Ug tan-awa, amahan ko, tan-awa ang sidsid sa imong walay bukton nga besti nga ania sa akong kamot; kay sa dihang giputlan nako ang sidsid sa imong besti, wala ka nako patya. Imong nakita karon ug nasabtan nga wala koy tuyo nga himoan kag daotan o morebelde kanimo, ug wala ko makasala kanimo,+ samtang ikaw nagsigeg pangita nako aron patyon ko.+ 12 Hinaot si Jehova maghukom tali kanimo ug kanako,+ ug hinaot si Jehova manimalos kanimo alang kanako,+ apan ang akong kamot dili mobatok kanimo.+ 13 Dunay karaang panultihon nga nag-ingon, ‘Gikan sa mga daotan mogula ang pagkadaotan,’ apan ang akong kamot dili mobatok kanimo. 14 Kinsa bay gipangita sa hari sa Israel? Kinsa bay imong gigukod? Patayng iro? Pulgas?+ 15 Hinaot si Jehova ang maghukom, ug siya maghukom tali kanimo ug kanako, ug iyang susihon ug depensahan ang akong kaso.+ Siya maghukom kanako ug luwason ko niya gikan sa imong kamot.”

16 Pagkahuman ni David ug sulti niining mga pulonga kaniya, si Saul miingon: “Ikaw ba na, David, anak ko?”+ Ug si Saul mitiyabaw. 17 Siya miingon kang David: “Mas matarong pa ka kay kanako, kay maayo ang imong pagtratar kanako apan daotan ang akong gibalos kanimo.+ 18 Gani, imong gipakita karong adlawa nga maayo ka kanako kay wala ko nimo patya dihang gitugyan ko ni Jehova sa imong kamot.+ 19 Kay kinsa bang tawhana nga kon makaplagan niya ang iyang kaaway, iyang palakwon siya nga wala unsaa? Maayo ang iganti ni Jehova kanimo+ tungod sa imong gibuhat kanako karong adlawa. 20 Ug karon, nahibalo ko nga ikaw magmando gayod ingong hari+ ug ang gingharian sa Israel magpabilin diha sa imong kamot. 21 Karon panumpa kanako sa ngalan ni Jehova+ nga dili nimo puohon ang akong mga kaliwat* ug nga dili nimo papason ang akong ngalan gikan sa panimalay sa akong amahan.”+ 22 Busa si David nanumpa kang Saul, ug human niini mipauli si Saul.+ Apan si David ug ang iyang mga tawo nangadto sa ilang dangpanan.+

25 Sa ulahi si Samuel+ namatay; ug ang tibuok Israel nagtigom ug nagbangotan tungod kaniya. Ug ilang gilubong siya duol sa iyang balay sa Rama.+ Unya si David milugsong ngadto sa kamingawan sa Paran.

2 Karon, dihay usa ka tawo sa Maon+ kansang trabaho didto sa Carmelo.*+ Kining tawhana dato kaayo; duna siyay 3,000 ka karnero ug 1,000 ka kanding, ug niadtong higayona siya nag-alot sa iyang mga karnero didto sa Carmelo. 3 Siya mao si Nabal,+ ug ang iyang asawa mao si Abigail.+ Ang asawa maalamon ug guwapa, apan ang bana, nga kaliwat ni Caleb,+ maot ug batasan ug dili maayog panggawi.+ 4 Si David nakadungog didto sa kamingawan nga si Nabal nag-alot sa iyang mga karnero. 5 Busa gisugo ni David ang 10 niya ka tawo sa pag-adto kaniya ug giingnan sila: “Tungas mo ngadto sa Carmelo. Inig-abot ninyo kang Nabal, ipangomosta ko niya. 6 Unya isulti kini, ‘Hinaot nga molungtad ang imong kinabuhi ug hinaot nga maayo ang imong kahimtang,* ug hinaot nga maayo ang imong panimalay ug ang tanan nga anaa kanimo. 7 Nakadungog ko nga nag-alot kag karnero. Dihang kauban namo ang imong mga magbalantay, wala namo sila unsaa+ ug wala gayod sila mawad-ig bisan unsa dihang sila didto sa Carmelo. 8 Pangutan-a ang imong mga tawo, ug sila mosulti kanimo. Hinaot nga pakitaan nimog kaayo ang akong mga tawo, kay nanganhi mi sa malipayong panahon.* Palihog, hatagi ang imong mga sulugoon ug ang imong anak nga si David ug bisan unsa nga imong ikahatag.’”+

9 Busa ang mga tawo ni David miadto kang Nabal ug ilang gisultihan siya sa tanang giingon ni David. Human nila kini masulti, 10 si Nabal miingon sa mga sulugoon ni David: “Kinsa ba si David, ug kinsa ba ang anak ni Jese? Karong mga adlawa daghang sulugoon ang namiya sa ilang mga agalon.+ 11 Ihatag ba diay nako ang akong tinapay ug ang akong tubig ug ang karne sa hayop nga akong giihaw alang sa akong mga tig-alot ngadto sa mga tawo nga wala gani nako mahibaloi kon taga-diin?”

12 Busa ang mga tawo ni David namauli ug ilang gisulti kining mga pulonga ngadto kaniya. 13 Dihadiha si David miingon sa iyang mga tawo: “Itakin ang inyong mga espada!”+ Busa ilang gitakin ang ilang mga espada, ug gitakin usab ni David ang iyang espada, ug mga 400 ka tawo ang mitungas uban kang David, samtang 200 ka tawo ang nagpabilin aron magbantay sa mga bagahe.

14 Karon, ang usa sa mga sulugoon miingon kang Abigail nga asawa ni Nabal: “Si David nagpadalag mga tawo gikan sa kamingawan aron manghinaot ug kaayohan sa atong agalon, apan iyang giinsulto sila.+ 15 Maayo kaayo kanamo kadtong mga tawhana. Wala mi nila unsaa, ug wala mi mawad-ig bisan unsa samtang kauban namo sila didto sa kapatagan.+ 16 Sama silag paril nga nanalipod kanamo adlaw ug gabii sa tanang panahon nga kauban namo sila dihang nagbantay mi sa kahayopan. 17 Karon, pagdesisyon kon unsay imong buhaton, kay dako gayong katalagman ang nagpaabot sa atong agalon ug sa tibuok niyang panimalay.+ Wala siyay pulos nga tawo+ mao nga dili siya maayong ikasulti.”

18 Busa si Abigail+ nagdalidalig kuha ug 200 ka tinapay, duha ka dagkong banga sa bino, lima ka naihaw nga karnero, lima ka seah* nga sinangag nga lugas, 100 ka tinapay nga pasas, ug 200 ka tinapay nga pinisa nga mga igos ug gisakay kining tanan diha sa mga asno.+ 19 Unya giingnan niya ang iyang mga sulugoon: “Pag-una mo. Magsunod lang ko ninyo.” Apan wala siyay gisulti sa iyang bana nga si Nabal.

20 Samtang nagsakay siya sa asno, nasalipdan siya sa bukid mao nga wala siya makita ni David ug sa iyang mga tawo nga nanglugsong paingon kaniya. Unya nagkatagbo sila. 21 Una pa niini, si David miingon: “Walay kapuslanan ang akong pagbantay sa tanang gipanag-iya niining tawhana didto sa kamingawan. Walay bisan usa sa iyang mga gipanag-iya ang nawala,+ apan gibalosan niyag daotan ang akong kaayo.+ 22 Pahamtangan unta sa Diyos ug silot ang mga kaaway ni David* ug dugangan pa kana kon duna koy ipabiling buhi sa iyang mga tawo* hangtod sa pagkabuntag.”

23 Pagkakita ni Abigail kang David, siya nagdalidalig naog sa asno ug miluhod ug miyukbo sa atubangan ni David. 24 Unya miluhod siya sa iyang tiilan ug miingon: “Akong ginoo, ako na lay papanubaga. Ug palihog, pasultiha ang imong sulugoong babaye, ug pamatia ang mga pulong sa imong sulugoong babaye. 25 Palihog akong ginoo, ayaw tagda kining walay pulos nga si Nabal,+ kay haom kaniya ang iyang ngalan. Nabal* ang iyang ngalan, ug siya buangbuang. Apan akong ginoo, ang imong sulugoong babaye wala makakita sa mga tawo nga imong gipadala. 26 Ug karon, akong ginoo, ingon nga si Jehova buhi ug ingon nga ikaw buhi, si Jehova ang nagpugong kanimo+ sa pagkahimong sad-an sa dugo+ ug sa pagpanimalos.* Hinaot nga ang imong mga kaaway ug kadtong gustong mohimog kadaot sa akong ginoo mahisama kang Nabal. 27 Karon, tugoti nga kini nga gasa*+ nga gidala sa imong sulugoong babaye ngadto sa akong ginoo igahatag ngadto sa mga tawo sa akong ginoo.+ 28 Palihog, pasayloa ang kalapasan sa imong sulugoong babaye, kay ipahinabo gayod ni Jehova nga molungtad ang panimalay sa akong ginoo,+ kay ang akong ginoo nakiggubat alang kang Jehova,+ ug walay pagkadaotan nga nakaplagan diha kanimo sa tanan nimong mga adlaw.+ 29 Dihang may mogukod kanimo ug magtinguha sa pagpatay kanimo, akong ginoo, panalipdan gayod ni Jehova nga Diyos ang imong kinabuhi sama nga panalipdan sa usa ka tawo ang bililhong butang diha sa usa ka sudlanan, apan ang kinabuhi sa imong mga kaaway iyang isalibay samag mga bato nga gilambuyog. 30 Ug dihang tumanon na ni Jehova ang tanang maayong butang nga iyang gisaad sa akong ginoo ug iya kang itudlo ingong pangulo sa Israel,+ 31 ang akong ginoo dili mobati diha sa iyang kasingkasing ug pagmahay o pagbasol* tungod sa pag-ulag dugo sa wala lamay hinungdan ug sa iyang pagpanimalos.*+ Dihang si Jehova magbuhat ug maayo sa akong ginoo, hinumdomi ang imong sulugoong babaye.”

32 Tungod niini, si David miingon kang Abigail: “Dalayegon si Jehova nga Diyos sa Israel nga nagpadala kanimo niining adlawa sa pagsugat kanako! 33 Ug dalayegon ang imong pagkamaalamon! Hinaot panalanginan ka kay niining adlawa imo kong gipugngan sa pagkahimong sad-an sa dugo+ ug sa pagpanimalos.* 34 Kay ingon nga si Jehova nga Diyos sa Israel buhi, kinsa nagpugong kanako sa pagbuhat ug kadaot kanimo,+ kon wala pa dayon ko nimo sugata,+ pagkabuntag wala na gayod untay mahibilin bisag usa sa mga tawo* ni Nabal.”+ 35 Busa gidawat ni David ang iyang gidala kaniya, ug siya miingon kaniya: “Pauli nga malinawon sa inyong balay. Ako namati kanimo, ug buhaton nako ang imong gihangyo.”

36 Sa ulahi si Abigail mibalik kang Nabal, nga nagkombira samag hari diha sa iyang balay, ug si Nabal* nagmalipayon ug siya nahubog pag-ayo. Si Abigail wala magsulti kaniyag bisan unsa hangtod sa paghayag sa kabuntagon. 37 Pagkabuntag, sa nahuwasan na si Nabal, gisuginlan siya sa iyang asawa sa nahitabo. Ug ang iyang kasingkasing nahisama nianang sa patay nga tawo, ug siya naparalisar samag bato. 38 Paglabay sa mga 10 ka adlaw, gihampak ni Jehova si Nabal ug siya namatay.

39 Pagkadungog ni David nga namatay si Nabal, siya miingon: “Dalayegon si Jehova, nga naghusay sa akong kaso+ ug nagpalingkawas kanako gikan sa pagpakaulaw ni Nabal+ ug nagpugong sa iyang alagad sa pagbuhat ug daotan,+ ug gisilotan ni Jehova si Nabal tungod sa iyang pagkadaotan!”* Unya si David nagpadalag mensahe sa pagsakna kang Abigail aron iyang maasawa. 40 Busa ang mga sulugoon ni David miadto kang Abigail sa Carmelo ug miingon kaniya: “Si David nagpadala kanamo nganhi kanimo aron kuhaon ka ingong iyang asawa.” 41 Dihadiha siya mitindog ug miyukbo ug miingon: “Ania ang imong ulipon, andam moalagad aron sa paghugas sa mga tiil+ sa mga sulugoon sa akong ginoo.” 42 Unya si Abigail+ nagdalidalig tindog ug misakay sa iyang asno ug lima sa iyang mga sulugoong babaye milakaw sunod kaniya; siya mikuyog sa mga mensahero ni David ug nahimong iyang asawa.

43 Gipangasawa usab ni David si Ahinoam+ nga taga-Jezreel,+ ug kining duha ka babaye nahimong iyang mga asawa.+

44 Apan gipaasawa ni Saul ang iyang anak nga si Mikal,+ nga asawa ni David, ngadto kang Palti+ nga anak ni Lais, nga taga-Galim.

26 Unya ang mga tawo sa Zip+ miadto kang Saul sa Gibea+ ug miingon: “Si David nagtago sa bungtod sa Hakila nga nag-atubang sa Jesimon.”*+ 2 Busa si Saul milugsong ngadto sa kamingawan sa Zip uban ang 3,000 ka piniling mga lalaki sa Israel aron pangitaon si David sa kamingawan sa Zip.+ 3 Si Saul nagkampo duol sa dalan diha sa bungtod sa Hakila, nga nag-atubang sa Jesimon. Niadtong panahona, si David nagpuyo sa kamingawan, ug iyang nahibaloan nga si Saul miadto sa kamingawan aron pangitaon siya. 4 Busa si David nagpadalag mga espiya aron matino kon miadto ba gyod si Saul. 5 Unya si David miadto sa dapit nga gikampohan ni Saul, ug nakita ni David kon diin natulog si Saul ug si Abner+ nga anak ni Ner nga pangulo sa iyang kasundalohan. Si Saul naghigda sa kampo nga gilibotan sa iyang kasundalohan. 6 Unya si David miingon kang Ahimelek nga Hitihanon+ ug kang Abisai+ nga anak ni Zeruia,+ nga igsoon ni Joab: “Kinsay mouban kanako sa paglugsong ngadto sa kampo aron adtoon si Saul?” Si Abisai mitubag: “Mouban ko kanimo.” 7 Busa si David ug si Abisai miadto sa kampo ni Saul panahon sa kagabhion, ug ilang nakita si Saul nga naghigda sa kampo. Ang iyang bangkaw giugbok sa yuta diha sa iyang ulohan; si Abner ug ang mga sundalo naghigda libot kaniya.

8 Unya si Abisai miingon kang David: “Gitugyan sa Diyos karon ang imong kaaway nganha sa imong kamot.+ Ug palihog, tugoti ko sa pagpaod kaniya sa yuta pinaagi sa bangkaw sa makausa lang, ug dili na nako kini kinahanglang himoon sa makaduha.” 9 Apan si David miingon kang Abisai: “Ayaw siyag unsaa, kay kinsa ba ang mobakyaw sa iyang kamot batok sa dinihogan* ni Jehova+ nga dili makasala?”+ 10 Si David mipadayon sa pagsulti: “Ingon nga si Jehova buhi, si Jehova mismo ang maghampak kaniya,+ o moabot ang adlaw nga siya mamatay,+ o moadto siya sa gubat ug mamatay.+ 11 Isip pagtahod kang Jehova, dili gyod ko makaako sa pagbakyaw sa akong kamot batok sa dinihogan ni Jehova!+ Busa palihog kuhaa ang bangkaw diha sa iyang ulohan ug ang tibod sa tubig, ug manglakaw kita.” 12 Busa gikuha ni David ang bangkaw ug ang tibod sa tubig diha sa ulohan ni Saul, ug sila nanglakaw. Walay nakakita+ o nakamatikod kanila o nakamata, kay ang tanan nangatulog, kay sila gipahinanok ni Jehova. 13 Unya si David mitabok ngadto sa pikas bahin ug mibarog sa tumoy sa bukid nga layo sa nahimutangan ni Saul.

14 Si David misinggit ngadto sa mga sundalo ug kang Abner+ nga anak ni Ner: “Abner, tubag!” Si Abner mitubag: “Kinsa ka nga nagtugaw sa pagkatulog sa hari?” 15 Si David miingon kang Abner: “Dili ba isog ka? Walay sama kanimo sa Israel. Busa nganong wala man nimo bantayi ang imong ginoo nga hari? Kay usa sa mga sundalo misulod aron patyon ang imong ginoo nga hari.+ 16 Dili maayo ang imong gihimo. Ingon nga si Jehova buhi, kamo takos nga mamatay, kay wala ninyo bantayi ang inyong ginoo, ang dinihogan ni Jehova.+ Ug tan-awa! Asa ang bangkaw sa hari ug ang tibod sa tubig+ nga diha sa iyang ulohan?”

17 Unya nailhan ni Saul ang tingog ni David ug siya miingon: “Ikaw ba kana, David, anak ko?”+ Si David mitubag: “Ako kini, ginoo kong hari.” 18 Siya midugang: “Nganong gigukod man sa akong ginoo ang iyang sulugoon?+ Unsa bay akong nabuhat, ug unsa ba ang akong sala?+ 19 Palihog, akong ginoo nga hari, pamatia ang mga pulong sa imong sulugoon: Kon si Jehova ang nag-aghat kanimo batok kanako, magtanyag kog halad nga lugas alang kaniya aron iya kong pasayloon.* Apan kon mga tawo ang nag-aghat kanimo,+ tinunglo sila sa atubangan ni Jehova, kay ila kong giabog karon aron dili ko mahiusa sa katigayonan ni Jehova,+ nga daw ila kong giingnan, ‘Lakaw, pag-alagad sa ubang mga diyos!’ 20 Ug karon ayaw itugot nga motulo ang akong dugo sa yuta nga layo sa presensiya ni Jehova, kay ang hari sa Israel migula sa pagpangitag usa lang ka pulgas,+ nga daw naggukod siyag langgam nga perdis diha sa kabukiran.”

21 Ug si Saul miingon: “Nakasala ko.+ Pauli na, David, anak ko, kay dili ko na ikaw buhatan ug kadaot, kay karong adlawa giisip nimo nga bililhon ang akong kinabuhi.+ Migawi ko nga binuangbuang ug dako kaayong sayop ang akong nahimo.” 22 Si David mitubag: “Ania ang bangkaw sa hari. Paanhia ang usa sa imong mga tawo ug ipakuha kini. 23 Si Jehova mao ang magabalos sa matag usa sa iyang pagkamatarong+ ug sa iyang pagkamatinumanon, sa pagkaagi nga gitugyan ka ni Jehova karon sa akong kamot, apan dili ko buot nga mobakyaw sa akong kamot batok sa dinihogan ni Jehova.+ 24 Sama nga giisip nako nga bililhon ang imong kinabuhi niining adlawa, hinaot nga isipon ni Jehova nga bililhon ang akong kinabuhi, ug hinaot nga luwason ko niya sa tanang kalisdanan.”+ 25 Si Saul mitubag kang David: “Hinaot panalanginan ka David, anak ko. Segurado nga ikaw mohimog dagkong mga butang, ug ikaw magmalamposon gayod.”+ Unya si David milakaw, ug si Saul mipauli sa iyang dapit.+

27 Apan si David miingon sa iyang kaugalingon: “Moabot gyod ang adlaw nga mamatay ko sa kamot ni Saul. Maayo pag moikyas ko+ ngadto sa yuta sa mga Filistehanon; ug si Saul mohunong na sa pagpangita kanako sa tibuok teritoryo sa Israel,+ ug ako makaikyas gikan sa iyang kamot.” 2 Busa si David ug ang 600 ka tawo+ nga kauban niya miadto kang Akis+ nga anak ni Maok, ang hari sa Gat. 3 Si David ug ang iyang mga tawo mipuyo uban kang Akis sa Gat, kauban ang ilang tagsatagsa ka pamilya. Kauban ni David ang iyang duha ka asawa, si Ahinoam+ nga taga-Jezreel ug si Abigail+ nga Carmelohanon, nga balo ni Nabal. 4 Dihang gibalita kang Saul nga si David miikyas ngadto sa Gat, siya mihunong sa pagpangita kaniya.+

5 Unya si David miingon kang Akis: “Kon mouyon ka, palihog hatagi kog dapit sa usa sa gagmayng mga siyudad aron didto ko magpuyo. Dili ko takos mopuyo sa harianong siyudad uban kanimo.” 6 Busa gihatag ni Akis kaniya ang Ziklag+ niadtong adlawa. Tungod niini, ang Ziklag napanag-iya sa mga hari sa Juda hangtod niining adlawa.

7 Ang gitas-on sa panahon* nga si David nagpuyo sa yuta sa mga Filistehanon maoy usa ka tuig ug upat ka bulan.+ 8 Ginasulong ni David ug sa iyang mga tawo ang mga Gesurihanon,+ mga Girzihanon, ug mga Amalekanhon,+ kay sila nagpuyo sa kayutaan gikan sa Telam hangtod sa Sur+ ug hangtod sa yuta sa Ehipto. 9 Dihang mosulong si David, wala siyay ipabiling buhi, lalaki man o babaye.+ Apan iyang kuhaon ang mga karnero, mga baka, mga asno, mga kamelyo, ug mga besti, ug unya mobalik siya kang Akis. 10 Unya si Akis mangutana: “Diin man mo misulong niining adlawa?” Si David motubag: “Sa habagatan* sa Juda”+ o “Sa habagatan sa mga Jerameelinhon”+ o “Sa habagatan sa mga Kenihanon.”+ 11 Patyon ni David ang tanan, lalaki man o babaye, aron wala siyay dad-on sa Gat, kay matod pa niya: “Basin ila ming isumbong kanila ug moingon, ‘Ingon niini ang gibuhat ni David.’” (Ug mao kanay iyang ginabuhat samtang nagpuyo siya sa yuta sa mga Filistehanon.) 12 Busa si Akis mituo kang David, nga nag-ingon sa iyang kaugalingon: ‘Gidumtan na gayod siya sa iyang katawhan, ang mga Israelinhon, mao nga magpabilin siya nga akong alagad.’

28 Niadtong mga adlawa gitigom sa mga Filistehanon ang ilang kasundalohan aron makiggubat sa Israel.+ Busa si Akis miingon kang David: “Kinahanglan nga ikaw ug ang imong mga tawo mouban kanako sa gubat.”+ 2 Si David miingon kang Akis: “Nahibalo gyod ka kon unsay buhaton sa imong alagad.” Busa si Akis miingon kang David: “Busa ako kang itudlo ingong permanente nakong bantay.”*+

3 Karon, si Samuel patay na, ug ang tibuok Israel nagbangotan tungod kaniya ug ilang gilubong siya sa Rama, ang siyudad diin siya nagpuyo kaniadto.+ Kon bahin kang Saul, iyang giwagtang sa Israel ang mga espiritista ug mga mananag-an.+

4 Ang mga Filistehanon nagtigom ug nagkampo sa Sunem.+ Busa gitigom ni Saul ang tibuok Israel, ug sila nagkampo sa Gilboa.+ 5 Pagkakita ni Saul sa kampo sa mga Filistehanon, siya nahadlok, ug ang iyang kasingkasing nangurog sa hilabihan.+ 6 Bisag nagpakisayod si Saul kang Jehova,+ si Jehova wala na gayod motubag kaniya, pinaagi man sa mga damgo o sa Urim+ o sa mga propeta. 7 Sa ulahi, si Saul miingon sa iyang mga alagad: “Pangitai kog babayeng espiritista,+ ug moadto ko aron mokonsulta kaniya.” Ang iyang mga alagad miingon: “Dunay babayeng espiritista didto sa En-dor.”+

8 Busa si Saul nagtakoban ug nagsul-ob ug laing besti ug miadto sa babaye panahon sa kagabhion uban ang duha niya ka tawo. Siya miingon: “Palihog, gamita ang imong pagkaespiritista+ ug pahibaloa ko sa mahitabo sa umaabot, ug tawga ang usa nga akong nganlan.” 9 Apan ang babaye miingon kaniya: “Nasayod ka gayod kon unsay gibuhat ni Saul, kon giunsa niya pagwagtang sa Israel ang mga espiritista ug mga mananag-an.+ Nan, nganong imo kong bitkon aron mamatay ko?”+ 10 Unya si Saul nanumpa kaniya sa ngalan ni Jehova, nga nag-ingon: “Ingon nga si Jehova buhi, dili ka gayod mahimong sad-an tungod niini!” 11 Ang babaye miingon: “Kinsay akong tawgon alang kanimo?” Siya mitubag: “Tawga si Samuel alang kanako.” 12 Pagkakita sa babaye kang “Samuel,”*+ siya misinggit ug kusog ug miingon kang Saul: “Nganong imo kong gilingla? Ikaw si Saul!” 13 Ang hari miingon kaniya: “Ayawg kahadlok, apan unsa may imong nakita?” Ang babaye mitubag kang Saul: “Akong nakita ang usa nga samag diyos nga migula gikan sa yuta.” 14 Dihadiha siya miingon kaniya: “Unsa may iyang dagway?” Siya mitubag: “Usa siya ka tigulang nga lalaki nga nagsul-ob ug besti nga walay bukton.”+ Ug si Saul nakaamgo nga si “Samuel” kadto, ug siya miyukbo sa yuta ug mihapa.

15 Unya si “Samuel” miingon kang Saul: “Nganong imo kong gipatawag ug gitugaw?” Si Saul mitubag: “Dako kaayo kog problema. Ang mga Filistehanon nakig-away kanako, ug gibiyaan na ko sa Diyos ug wala na siya motubag kanako, pinaagi man sa mga propeta o sa mga damgo.+ Busa gipatawag ka nako aron imo kong sultihan kon unsay akong buhaton.”+

16 Ug si “Samuel” miingon: “Nganong nagpakisayod ka kanako nga si Jehova mibiya na man kanimo+ ug nahimo na nimong kaaway? 17 Buhaton mismo ni Jehova ang iyang gitagna pinaagi kanako: Kuhaon ni Jehova ang gingharian gikan kanimo ug ihatag kini ngadto sa imong isigkatawo nga si David.+ 18 Kay wala nimo tumana ang tingog ni Jehova ug wala nimo ipahamtang ang iyang nagsilaob nga kasuko batok sa mga Amalekanhon,+ ginahimo kini ni Jehova kanimo niining adlawa. 19 Ikaw ug ang Israel itugyan usab ni Jehova ngadto sa kamot sa mga Filistehanon,+ ug ugma ikaw+ ug ang imong mga anak nga lalaki+ mahiuban kanako. Itugyan usab ni Jehova ang kasundalohan sa Israel ngadto sa kamot sa mga Filistehanon.”+

20 Dihadiha si Saul natumba nga nagbuy-od sa yuta ug nahadlok pag-ayo tungod sa giingon ni “Samuel.” Ug wala na siyay kusog, kay wala siya mokaon sa tibuok adlaw ug sa tibuok gabii. 21 Dihang miduol ang babaye kang Saul ug nakita niya nga siya nalisang pag-ayo, siya miingon kaniya: “Gituman sa imong sulugoon ang imong giingon, ug akong gipameligro ang akong kinabuhi+ ug gibuhat nako ang imong gisulti nga akong buhaton. 22 Karon, palihog, pamatia ang isulti sa imong sulugoon. Tugoti nga dalitan ka nakog tinapay; ug kaon aron duna kay kusog sa imong pagpanaw.” 23 Apan midumili siya ug miingon: “Dili ko mokaon.” Apan ang iyang mga alagad ug ang babaye nagsigeg agda kaniya. Sa kataposan siya namati kanila ug mibangon gikan sa yuta ug milingkod sa higdaanan. 24 Ang babaye may tambok nga nating baka sa iyang balay, mao nga siya nagdali sa pag-ihaw* niini ug siya nagkuhag harina ug nagmasa ug nagluto niini ingong mga tinapay nga walay pangpatubo.* 25 Iyang gidalit kini kang Saul ug sa iyang mga alagad, ug sila nangaon. Human niana sila nanindog ug nanglakaw nianang gabhiona.+

29 Gitigom sa mga Filistehanon+ ang tanan nilang kasundalohan didto sa Apek, samtang ang mga Israelinhon nagkampo duol sa tubod sa Jezreel.+ 2 Ug ang mga magmamando sa mga Filistehanon nangagi uban ang ilang tinaggatos ug tinaglibo ka sundalo, ug si David ug ang iyang mga tawo nagmartsa sunod kanila uban kang Akis.+ 3 Apan ang mga prinsipe sa mga Filistehanon miingon: “Nganong ania kining mga Hebreohanon?” Si Akis mitubag sa mga prinsipe sa mga Filistehanon: “Siya si David, ang sulugoon ni Haring Saul sa Israel, nga akong nakauban kapin na sa usa ka tuig.+ Wala koy nakitang bisan unsang sayop kaniya sukad sa adlaw nga siya midangop kanako hangtod niining adlawa.” 4 Apan ang mga prinsipe sa mga Filistehanon nangasuko kaniya, ug sila miingon kaniya: “Papaulia ang maong tawo.+ Pabalika siya sa dapit nga imong gihatag kaniya. Ayaw siyag paubana sa gubat kay basig unayon unya ta niya.+ Duna pa bay mas maayong paagi nga maangkon niya ang pabor sa iyang ginoo kay sa pagpatay sa atong mga tawo? 5 Dili ba kini mao si David nga bahin kaniya sila misayaw ug miawit:

6 Busa gipatawag ni Akis+ si David ug giingnan siya: “Ingon nga si Jehova buhi, ikaw matul-id, ug malipay ko nga iuban ka sa gubat uban sa akong kasundalohan,+ kay wala koy nakitang bisan unsang sayop kanimo sukad sa adlaw nga ikaw midangop kanako hangtod niining adlawa.+ Apan ang ubang magmamando walay pagsalig nimo.+ 7 Busa pauli nga malinawon, ug ayaw pagbuhat ug bisan unsa nga makapasuko sa mga magmamando sa mga Filistehanon.” 8 Apan si David miingon kang Akis: “Ngano man, unsa bay akong nabuhat? Unsang sayop ang imong nakita sa imong sulugoon sukad sa adlaw nga midangop ko nimo hangtod karon? Nganong dili ko makauban nimo sa pagpakiggubat sa mga kaaway sa akong ginoo nga hari?” 9 Si Akis mitubag kang David: “Sa akong tan-aw, maayo gyod ka samag anghel sa Diyos.+ Apan ang mga prinsipe sa mga Filistehanon miingon, ‘Ayaw siyag patungasa uban kanato sa gubat.’ 10 Busa bangon sayo sa buntag, ikaw ug ang mga tawo nga kauban nimo; pamangon mog sayo ug panglakaw mo dihang hayag na.”

11 Busa si David ug ang iyang mga tawo mibangon sayo sa buntag aron mopauli ngadto sa yuta sa mga Filistehanon, ug ang mga Filistehanon mitungas ngadto sa Jezreel.+

30 Sa ikatulong adlaw, dihang si David ug ang iyang mga tawo miabot sa Ziklag,+ ila kining naabtan nga napukan na ug nasunog. Gisulong diay sa mga Amalekanhon+ ang habagatan* ug ang Ziklag, 2 ug gibihag nila ang mga babaye+ ug ang tanan nga atua didto. Walay bisan usa nga ilang gipatay, apan ilang gidala sila ug nagpadayon sa ilang panaw. 3 Pag-abot ni David ug sa iyang mga tawo didto sa siyudad, ilang nakita nga kini gisunog, ug ang ilang mga asawa ug ang ilang mga anak nga lalaki ug babaye gibihag. 4 Busa si David ug ang iyang mga tawo mitiyabaw hangtod nga nahutdan na silag kusog sa paghilak. 5 Ang duha ka asawa ni David gibihag usab, si Ahinoam nga taga-Jezreel ug si Abigail nga balo ni Nabal nga Carmelohanon.+ 6 Si David naguol pag-ayo, sanglit ang mga tawo nag-ingon nga ila siyang batoon, kay ang tanang tawo nasuko pag-ayo sa nahitabo sa ilang mga anak nga lalaki ug babaye. Apan gipalig-on ni David ang iyang kaugalingon pinaagi sa tabang ni Jehova nga iyang Diyos.+

7 Unya si David miingon kang Abiatar+ nga saserdote, ang anak ni Ahimelek: “Palihog dad-a dinhi ang epod.”+ Busa gidala ni Abiatar ang epod kang David. 8 Si David nagpakisayod kang Jehova:+ “Gukdon ba nako kini nga mga bandido? Maapsan ba nako sila?” Ug Siya mitubag kaniya: “Gukda, kay imo gyod silang maapsan, ug imong mabawi ang tanan.”+

9 Milakaw dayon si David kauban ang iyang 600 ka tawo,+ ug sila nakaabot sa Walog* sa Besor, diin nagpabilin ang uban niyang mga tawo. 10 Si David nagpadayon sa paggukod uban sa iyang 400 ka tawo, apan nagpabilin ang 200 nga wala na makatabok sa Walog* sa Besor tungod sa kakapoy.+

11 Dihay Ehiptohanon nga ilang nakaplagan didto sa kapatagan ug gidala nila siya kang David. Gihatagan nila siyag pagkaon ug tubig, 12 ug usab usa ka hiwa nga tinapay sa pinisa nga mga igos ug duha ka tinapay nga pasas. Paghuman niyag kaon, mibalik ang iyang kusog,* kay wala siya makakaon o makainom ug tubig sulod sa tulo ka adlaw ug tulo ka gabii. 13 Si David nangutana kaniya: “Kinsa ang imong agalon, ug taga-diin man ka?” Ug siya mitubag: “Usa ko ka Ehiptohanon ug ulipon ko sa usa ka Amalekanhon, apan gibiyaan ko sa akong agalon kay nasakit ko tulo na ka adlaw ang milabay. 14 Gisulong namo ang habagatan* sa mga Keretnon+ ug ang teritoryo sa Juda ug ang habagatan* sa Caleb,+ ug gisunog namo ang Ziklag.” 15 Si David miingon kaniya: “Tultolan ba ko nimo ngadto niini nga mga bandido?” Siya mitubag: “Kon manumpa ka nako sa ngalan sa Diyos nga dili ko nimo patyon ug dili ko nimo itugyan sa akong agalon, ako kang tultolan ngadto niini nga mga bandido.”

16 Busa iyang gitultolan siya sa dapit diin sila nagkatag, nga nangaon ug nanginom ug nagkombira tungod sa kadaghan sa ilang nakuha gikan sa yuta sa mga Filistehanon ug sa yuta sa Juda. 17 Unya gipamatay sila ni David gikan sa pagbanagbanag hangtod sa sunod gabii; walay tawong nakaikyas+ gawas sa 400 ka lalaki nga misakay sa mga kamelyo. 18 Nabawi ni David ang tanang nakuha sa mga Amalekanhon,+ ug giluwas ni David ang iyang duha ka asawa. 19 Walay usa nga wala nila mabawi. Ilang nabawi ang ilang mga anak nga lalaki ug babaye ug ang mga butang nga nakuha gikan kanila.+ Nabawi ni David ang tanang gikuha kanila. 20 Busa gikuha ni David ang tanan nilang karnero ug baka, ug gipauna kini sa kahayopan nga ilang nabawi. Sila miingon: “Kini maoy mga inilog ni David.”

21 Unya giadto ni David ang 200 ka tawo nga gikapoy pag-ayo sa pag-uban kang David ug nga nagpabilin sa Walog* sa Besor,+ ug ilang gisugat si David ug ang mga tawo nga kauban niya. Si David miduol kanila ug gipangomosta sila. 22 Apan ang tanang daotan ug walay pulos nga tawo nga nanguban kang David miingon: “Kay wala man sila mouban kanato, dili nato sila hatagan sa bisan unsa nga atong nabawi. Ang ato lang ihatag kanila mao ang ilang mga asawa ug mga anak, ug mahimo na silang manglakaw.” 23 Apan si David miingon: “Mga igsoon ko, ayaw ninyo kanag buhata sa mga gihatag ni Jehova kanato. Iya kitang gipanalipdan ug gitugyan niya kanato ang mga bandido nga misulong kanato.+ 24 Duna kahay mouyon sa inyong gipanulti? Ang usa nga miadto sa gubat ug ang usa nga nagpabilin ug nagbantay sa mga bagahe makadawat ug samang bahin.+ Ang tanan makabaton ug bahin.”+ 25 Ug sukad niadtong adlawa, iya kadtong gihimong regulasyon ug lagda alang sa Israel hangtod niining adlawa.

26 Pagbalik ni David sa Ziklag, ang pipila sa iyang mga nakuha gikan sa iyang mga kaaway iyang gipadala ngadto sa iyang mga higala nga mga ansiyano sa Juda, ug siya miingon: “Aniay gasa* alang kaninyo gikan sa mga inagaw nga nakuha gikan sa mga kaaway ni Jehova.” 27 Iya kining gipadala ngadto kanila nga didto sa Bethel,+ sa Ramot sa Negeb,* sa Jatir,+ 28 sa Aroer, sa Sipmot, sa Estemoa,+ 29 sa Racal, sa mga siyudad sa mga Jerameelinhon,+ sa mga siyudad sa mga Kenihanon,+ 30 sa Horma,+ sa Borasan, sa Atak, 31 sa Hebron,+ ug ngadto sa tanang dapit nga ginaadtoan sa una ni David ug sa iyang mga tawo.

31 Karon ang mga Filistehanon nakig-away sa Israel.+ Ug ang mga lalaki sa Israel nangalagiw gikan sa mga Filistehanon, ug daghan ang napatay didto sa Bukid sa Gilboa.+ 2 Gigukod sa mga Filistehanon si Saul ug ang iyang mga anak, ug gipatay sa mga Filistehanon si Jonatan,+ Abinadab, ug Malki-sua, nga mga anak ni Saul.+ 3 Migrabe ang pagpakig-away batok kang Saul ug nakit-an siya sa mga magpapana, ug siya grabeng gisamdan nila.+ 4 Unya si Saul miingon sa tigdala sa iyang hinagiban: “Ibta ang imong espada ug duslaka ko, aron dili moanhi kining mga dili tinuli+ ug paantoson ko ug patyon.” Apan midumili ang tigdala sa iyang hinagiban kay nahadlok siya pag-ayo. Busa gikuha ni Saul ang espada ug giunay ang iyang kaugalingon.+ 5 Pagkakita sa tigdala sa hinagiban ni Saul nga siya patay na,+ siya usab nag-unay sa iyang kaugalingon gamit ang iyang espada ug namatay uban kaniya. 6 Busa si Saul, ang iyang tulo ka anak, ang tigdala sa iyang hinagiban, ug ang tanan niyang tawo nangamatay niadtong adlawa.+ 7 Pagkahibalo sa katawhan sa Israel nga didto sa walog* ug sa rehiyon sa Jordan nga ang kasundalohan sa Israel nangalagiw ug nga si Saul ug ang iyang mga anak namatay, sila mibiya sa mga siyudad ug nangalagiw;+ unya ang mga Filistehanon miabot ug mipuyo niini.

8 Pagkaugma, dihang ang mga Filistehanon miabot aron panguhaan ug mga butang ang nangamatay, ilang nakaplagan si Saul ug ang iyang tulo ka anak nga nagbuy-od sa Bukid sa Gilboa.+ 9 Busa ila siyang gipunggotan ug gikuha ang iyang armadura* ug sila nagpadalag mensahe sa tibuok yuta sa mga Filistehanon aron ibalita kini+ ngadto sa mga templo* sa ilang mga idolo+ ug ngadto sa katawhan. 10 Unya ilang gibutang ang iyang armadura* sa templo ni Astoret ug gilansang ang iyang patayng lawas sa paril sa Bet-san.+ 11 Pagkadungog sa mga molupyo sa Jabes-gilead+ sa gibuhat sa mga Filistehanon kang Saul, 12 ang tanang manggugubat migikan ug mipanaw sa tibuok gabii ug ilang gikuha sa paril sa Bet-san ang lawas ni Saul ug sa iyang mga anak. Sila mibalik sa Jabes ug gisunog nila didto ang mga lawas. 13 Unya ilang gikuha ang mga bukog+ ug gilubong kini sa ilalom sa kahoyng tamarisko sa Jabes,+ ug sila nagpuasa sulod sa pito ka adlaw.