JOSUE

1 Pagkamatay ni Moises nga alagad ni Jehova, giingnan ni Jehova si Josue*+ nga anak ni Nun ug alagad+ ni Moises: 2 “Patay na si Moises nga akong alagad.+ Pangandam, ug tabok sa Jordan, ikaw ug ang tibuok katawhan sa Israel, ug adto sa yuta nga akong ihatag kanila.+ 3 Ihatag nako kaninyo ang matag lugar nga tumban sa inyong tiil, sumala sa akong gisaad kang Moises.+ 4 Ang inyong teritoryo magsugod sa kamingawan hangtod sa Lebanon ug sa dakong suba, ang Euprates—ang tibuok yuta sa mga Hitihanon+⁠—​paingon sa Dakong Dagat* sa kasadpan.*+ 5 Samtang buhi ka walay makapildi nimo.+ Ubanan ka nako+ parehas sa akong pag-uban kang Moises. Dili ka nako pasagdan o biyaan.+ 6 Magmaisogon ka ug magmalig-on,+ kay ikaw ang manguna niini nga katawhan aron mapanag-iya nila ang yuta nga akong gipanumpa sa ilang mga katigulangan nga akong ihatag kanila.+

7 “Basta magmaisogon ka lang ug magmalig-on, ug tumana gayod ang tibuok Balaod nga gihatag kanimo ni Moises. Ayawg tipas niini,+ aron magmaalamon ka sa imong buhaton bisag asa ka moadto.+ 8 Kining basahon sa Balaod kinahanglang dili mahilayo sa imong baba.+ Angay nimo kining basahon ug palandongon* adlaw ug gabii aron matuman nimo ang tanang nasulat niini;+ unya magmalamposon ka ug molihok nga maalamon.+ 9 Busa usbon nako ang akong sugo, ‘Magmaisogon ka ug magmalig-on. Ayawg kalisang o kahadlok, kay si Jehova nga imong Diyos magauban kanimo bisan asa ka moadto.’”+

10 Dayon gisugo ni Josue ang mga opisyal sa katawhan: 11 “Libota ninyo ang kampo ug sultihi ang katawhan, ‘Pag-andam mog mga balon, kay tulo ka adlaw gikan karon motabok mo sa Jordan aron panag-iyahon ang yuta nga ihatag kaninyo ni Jehova nga inyong Diyos.’”+

12 Unya giingnan ni Josue ang mga Rubenhon, Gadhanon, ug ang katunga sa tribo ni Manases: 13 “Hinumdomi ang gisugo kaninyo ni Moises nga alagad ni Jehova:+ ‘Si Jehova nga inyong Diyos naghatag ninyog pahulay ug naghatag kaninyo niining yutaa. 14 Ang inyong mga asawa, mga anak, ug mga hayop mopuyo sa yuta nga gihatag kaninyo ni Moises sa sidlakan sa Jordan.+ Apan kamong tanang banggiitang manggugubat,+ mag-una mo sa inyong mga igsoon ug motabok nga nahan-ay para sa gubat.+ Kinahanglang tabangan ninyo sila 15 hangtod nga mahatagan ni Jehova ug pahulay ang inyong mga igsoon sama kaninyo, ug sila sab makapanag-iya sa yuta nga ihatag kanila ni Jehova nga inyong Diyos. Unya balik mo sa yuta nga gihatag kaninyo ug magpuyo mo didto, ang yuta sa sidlakan sa Jordan+ nga gihatag kaninyo ni Moises nga alagad ni Jehova.’”

16 Sila mitubag kang Josue: “Buhaton namo ang tanan nimong gisugo, ug moadto mi bisan asa mi nimo paadtoon.+ 17 Maminaw mi nimo sama nga naminaw mi sa tanang gisugo ni Moises. Ubanan lang unta ka ni Jehova nga imong Diyos parehas sa iyang pag-uban kang Moises.+ 18 Bisan kinsa nga morebelde nimo ug dili motuman sa imong sugo patyon.+ Magmaisogon ka lang ug magmalig-on.”+

2 Unya si Josue nga anak ni Nun sekretong nagpadala ug duha ka lalaking espiya gikan sa Sitim.+ Giingnan niya sila: “Susiha ninyo ang yuta, ilabina ang Jerico.” Busa sila milakaw ug nakaabot sa balay sa pampam* nga si Rahab,+ ug didto sila midayon. 2 Ang hari sa Jerico gisultihan: “Naay mga lalaking Israelinhon nga mianhi niining gabhiona aron mangespiya sa yuta.” 3 Busa ang hari sa Jerico nagpadalag mensahe kang Rahab: “Pagawsa ang mga lalaki nga midayon sa imong balay, kay mianhi sila aron mangespiya sa tibuok yuta.”

4 Apan gitago sa babaye ang duha ka lalaki. Ug siya miingon: “Oo, may mianhi nga mga lalaki, pero wala ko mahibalo kon taga-diin sila. 5 Nanglakaw sila pagkagabii, dihang hapit nang sirhan ang ganghaan.* Ambot kon asa to sila paingon, pero kon gukdon dayon ninyo sila, maapsan pa to ninyo.” 6 (Apan gidala diay niya sila sa atop ug gitagoan diha sa mga lindog sa tanom nga lino nga gipayl sa atop.) 7 Busa gigukod sila sa mga tawo sa hari paingon sa mga tabokanan sa Jordan,+ ug gisirhan dayon ang ganghaan sa siyudad paggawas sa mga naggukod.

8 Sa wala pa matulog ang mga lalaki, siya miadto kanila sa atop. 9 Miingon siya sa mga lalaki: “Nahibalo ko nga ihatag ni Jehova kaninyo ang yuta+ ug nahadlok mi ninyo.+ Ang tanang nagpuyo sa yuta nangaluya tungod ninyo,+ 10 kay nakabalita mi kon giunsa pagpahubas ni Jehova ang tubig sa Pulang Dagat gikan sa inyong atubangan dihang migawas mo sa Ehipto,+ ug kon unsay inyong gibuhat sa duha ka hari sa mga Amorihanon nga si Sihon+ ug si Og,+ nga inyong gilaglag sa sidlakan sa Jordan. 11 Pagkadungog namo niini, nahadlok mi* ug walay bisan usa ang may kaisog nga mokontra ninyo, kay si Jehova nga inyong Diyos mao ang Diyos sa langit ug sa yuta.+ 12 Karon palihog, panumpa mo kanako sa ngalan ni Jehova nga pakitaan sab ninyog maunongong gugma ang panimalay sa akong amahan kay nagpakita kog maunongong gugma kaninyo; ug hatagi kog kasaligang ilhanan nga tumanon ninyo ang inyong isulti. 13 Luwasa ang akong amahan ug inahan, ang akong mga igsoong lalaki ug babaye, ug ang tanan nilang sakop, ug luwasa mi* gikan sa kamatayon.”+

14 Busa giingnan siya sa mga lalaki: “Among igarantiya ang among kinabuhi para ninyo!* Kon dili mi ninyo isumbong, pakitaan mo namog maunongong gugma ug tumanon namo ang among gisulti dihang ihatag na ni Jehova kanamo ang yuta.” 15 Human niana gipakanaog niya sila sa bentana pinaagig pisi, kay ang iyang balay naa sa kilid sa paril sa siyudad. Gani, sa paril siya nagpuyo.+ 16 Unya siya miingon kanila: “Adto mo sa kabukiran ug tago mo didto sa tulo ka adlaw aron dili mo makit-an sa mga naggukod ninyo. Kon makabalik na ang mga naggukod ninyo, makalakaw na mo.”

17 Ang mga lalaki miingon kaniya: “Dili mi makasala niining imong gipapanumpa kanamo+ 18 basta, dihang mosulod na mi sa yuta, imong ihigot sa bentana nga imong gipakanaogan kanamo kining hayag-pula nga pisi. Tapoka sa imong balay ang imong amahan, inahan, mga igsoon, ug ang tibuok panimalay sa imong amahan.+ 19 Bisan kinsa nga mogawas sa imong balay, siya ray manubag sa iyang kinabuhi, ug wala miy sala. Apan kon may daotang mahitabo* kang bisan kinsa nga naa sa imong balay, kami ang manubag sa iyang kinabuhi. 20 Pero kon imo ming isumbong,+ dili mi makasala sa imong gipapanumpa kanamo.” 21 Siya mitubag: “Uyon ko sa inyong gisulti.”

Ug iyang gipalakaw sila. Human niana, iyang gihigot sa bentana ang pisi nga hayag-pula. 22 Busa miadto sila sa kabukiran ug nagpabilin didto sa tulo ka adlaw, hangtod nga nanguli ang mga naggukod nila. Gipangita sila sa mga naggukod nila diha sa tanang dalan pero wala nila sila makit-i. 23 Unya ang duha ka lalaki milugsong sa kabukiran ug mitabok sa suba ug miadto kang Josue nga anak ni Nun. Ilang gisulti kaniya ang tanang nahitabo kanila. 24 Miingon sila kang Josue: “Gihatag na kanato ni Jehova ang tibuok yuta.+ Gani, ang tanang nagpuyo didto nahadlok nato.”+

3 Unya si Josue mibangon sayo sa buntag, ug siya ug ang tanang Israelinhon* mibiya sa Sitim+ ug nangadto sa Jordan. Didto sila nagpalabay sa kagabhion sa wala pa manabok.

2 Human sa tulo ka adlaw, ang mga opisyal+ milibot sa kampo 3 ug gisugo nila ang katawhan: “Inigkakita ninyo sa kaban sa pakigsaad ni Jehova nga inyong Diyos nga gidayongan sa mga Levihanong saserdote,+ biya mo sa inyong dapit ug sunod mo niini. 4 Apan kinahanglang magpadistansiya mog mga 2,000 ka maniko* gikan niini; ayaw mo paduol niini aron mahibalo mo sa dalan nga inyong agian, kay wala pa mo sukad makaagi niining dalana.”

5 Karon si Josue miingon sa katawhan: “Balaana ang inyong kaugalingon,+ kay ugma si Jehova mobuhat ug katingalahang mga butang sa inyong taliwala.”+

6 Dayon giingnan ni Josue ang mga saserdote: “Dad-a ang kaban+ sa pakigsaad ug pag-una mo sa katawhan.” Busa gidala nila ang kaban sa pakigsaad ug nag-una sila paglakaw sa katawhan.

7 Ug si Jehova miingon kang Josue: “Sugod niining adlawa, pasidunggan ka nako atubangan sa tibuok Israel,+ aron mahibalo sila nga ako nagauban kanimo+ sama sa akong pag-uban kang Moises.+ 8 Sugoa ang mga saserdote nga nagdala sa kaban sa pakigsaad: ‘Inig-abot ninyo sa daplin sa suba sa Jordan, pabilin mong magtindog sa Jordan.’”+

9 Ug si Josue miingon sa mga Israelinhon: “Duol mo diri ug paminaw sa gisulti ni Jehova nga inyong Diyos.” 10 Dayon si Josue miingon: “Pinaagi niini kamo mahibalo nga nagauban kaninyo ang buhing Diyos,+ ug abogon gayod niya sa inyong atubangan ang mga Canaanhon, Hitihanon, Hivihanon, Perizihanon, Girgasihanon, Amorihanon, ug mga Jebusihanon.+ 11 Ang kaban sa pakigsaad sa Ginoo sa tibuok yuta mag-una kaninyo sa Jordan. 12 Karon pagkuha mog 12 ka lalaki gikan sa mga tribo sa Israel, usa sa matag tribo.+ 13 Ug kon makatunob na sa tubig sa Jordan ang mga saserdote nga nagdala sa Kaban ni Jehova, ang Ginoo sa tibuok yuta, ang tubig sa Jordan moundang pag-agos gikan sa ibabaw ug mahisamag paril.”*+

14 Busa dihang ang katawhan mibiya sa ilang kampo aron motabok sa Jordan, ang mga saserdote nga nagdala sa kaban+ sa pakigsaad nag-una sa katawhan. 15 Dihang nakaabot na sa Jordan ang mga saserdote nga nagdala sa Kaban ug gitunob nila ang ilang tiil sa daplin sa tubig (ang Jordan nagaawas sa mga tampi niini+ sa tanang adlaw sa ting-ani), 16 ang tubig nga nagaagos gikan sa ibabaw mipondo. Kini nahisamag paril* sa layo kaayo nga lugar, sa siyudad sa Adan nga duol sa Zaretan. Ug wala nay tubig nga miagos paingon sa Dagat sa Araba, ang Dagat sa Asin.* Kini gipahunong, ug ang katawhan mitabok sa dapit nga atbang sa Jerico. 17 Samtang ang tibuok Israel nanabok sa ugang yuta+ sa Jordan, ang mga saserdote nga nagdala sa kaban sa pakigsaad ni Jehova pabiling nagtindog sa ugang yuta+ sa tunga sa Jordan hangtod nga nakatabok ang tibuok nasod.

4 Sa nakatabok na sa Jordan ang tibuok nasod, si Jehova miingon kang Josue: 2 “Pagkuhag 12 ka lalaki gikan sa katawhan, usa sa matag tribo,+ 3 ug sugoa sila: ‘Pagkuha mog 12 ka bato sa tunga sa Jordan, sa dapit nga gitindogan sa mga saserdote,+ ug dad-a kini ug ibutang sa dapit nga inyong katulgan karong gabii.’”+

4 Busa gitawag ni Josue ang 12 ka lalaki nga iyang gipili gikan sa mga Israelinhon, usa sa matag tribo, 5 ug si Josue miingon kanila: “Adto mo sa tunga sa Jordan didto sa tungod sa Kaban ni Jehova nga inyong Diyos, ug ang matag usa ninyo magkuhag usa ka bato ug magpas-an niini, sumala sa gidaghanon sa mga tribo sa mga Israelinhon, 6 aron magsilbing ilhanan sa inyong taliwala. Kon sa umaabot pangutan-on mo sa inyong mga anak,* ‘Nganong nagbutang man mog mga bato dinhi?’+ 7 ingna sila, ‘Kining mga batoha magsilbing pahinumdom* sa mga Israelinhon hangtod sa panahong walay tino,+ kay ang tubig sa Jordan mihunong atubangan sa kaban+ sa pakigsaad ni Jehova dihang gitabok kini sa Jordan.’”

8 Busa gibuhat sa mga Israelinhon ang gisugo ni Josue. Nagkuha silag 12 ka bato sa tunga sa Jordan, sumala sa gisugo ni Jehova kang Josue, nga katumbas sa gidaghanon sa mga tribo sa mga Israelinhon. Gidala nila kini ug gibutang sa dapit nga ilang katulgan nianang gabhiona.

9 Si Josue nagbutang sab ug 12 ka bato sa tunga sa Jordan diin nagtindog ang mga saserdote nga nagdala sa kaban sa pakigsaad,+ ug naa didto ang mga bato hangtod karon.

10 Ang mga saserdote nga nagdala sa Kaban nagtindog sa tunga sa Jordan hangtod nga natapos sa katawhan ang tanang gisugo ni Jehova kang Josue nga ilang himoon, sumala sa tanan nga gisugo ni Moises kang Josue. Ug ang katawhan nagdali sa pagtabok. 11 Sa nakatabok na ang tanang katawhan, ang mga saserdote mitabok dala ang Kaban ni Jehova samtang nagtan-aw ang katawhan.+ 12 Ug ang mga Rubenhon, Gadhanon, ug ang katunga sa tribo ni Manases mitabok nga nahan-ay para sa gubat+ sa unahan sa ubang Israelinhon, sumala sa gisugo ni Moises kanila.+ 13 Mga 40,000 ka sundalo nga armado para sa gubat ang mitabok paingon sa desyertong kapatagan sa Jerico ug si Jehova nag-uban kanila.

14 Niadtong adlawa gipasidunggan ni Jehova si Josue atubangan sa tibuok Israel,+ ug ilang gitahod siya pag-ayo* sa tibuok niyang kinabuhi, sama nga ilang gitahod pag-ayo si Moises.+

15 Unya si Jehova miingon kang Josue: 16 “Sugoa ang mga saserdote nga nagdala sa kaban+ sa Pamatuod nga mohawa na sa Jordan.” 17 Busa gisugo ni Josue ang mga saserdote: “Hawa na mo sa Jordan.” 18 Dihang ang mga saserdote nga nagdala sa kaban+ sa pakigsaad ni Jehova nakahawa na sa tunga sa Jordan ug nakaabot na sa tampi, ang tubig sa Jordan miagos pag-usab ug miawas sa mga tampi+ sama sa una.

19 Ang katawhan nakatabok sa Jordan sa ika-10 nga adlaw sa unang bulan ug nagkampo sa Gilgal+ sa sidlakang utlanan sa Jerico.

20 Bahin sa 12 ka bato nga ilang gikuha sa Jordan, gibutang kini ni Josue sa Gilgal.+ 21 Ug siya miingon sa mga Israelinhon: “Kon sa umaabot pangutan-on mo sa inyong mga anak, ‘Unsay buot ipasabot aning mga batoha?’+ 22 ingna ang inyong mga anak, ‘Ang Israel mitabok sa naugang suba sa Jordan+ 23 dihang gipahubas ni Jehova nga inyong Diyos ang tubig sa Jordan sa among atubangan hangtod nga nakatabok mi, sama sa gibuhat ni Jehova nga inyong Diyos sa Pulang Dagat dihang iya kining gipahubas sa among atubangan hangtod nga nakatabok mi.+ 24 Gihimo niya kini aron ang tanang katawhan sa yuta mahibalo kon unsa ka gamhanan ang kamot ni Jehova+ ug aron kanunay ninyong kahadlokan si Jehova nga inyong Diyos.’”

5 Dihang ang tanang hari sa mga Amorihanon+ sa kasadpan sa Jordan* ug ang tanang hari sa mga Canaanhon+ nga duol sa dagat nakadungog nga gipahubas ni Jehova ang tubig sa Jordan atubangan sa mga Israelinhon hangtod nga sila nakatabok, sila nangahadlok*+ ug nawad-ag kaisog tungod sa mga Israelinhon.+

2 Niadtong panahona si Jehova miingon kang Josue: “Paghimog mga kutsilyong bato ug tulia+ ang mga lalaki sa Israel.”* 3 Busa si Josue naghimog mga kutsilyong bato ug gituli ang mga lalaki sa Israel didto sa Gibeat-haaralot.*+ 4 Kini ang hinungdan nga gituli sila ni Josue: Ang tanang lalaki sa katawhan nga migawas sa Ehipto, ang tanang lalaking manggugubat,* namatay sa kamingawan human sa ilang paggawas sa Ehipto.+ 5 Ang tanang Israelinhon nga migawas sa Ehipto natuli, apan ang tanang lalaki nga natawo sa kamingawan human sa ilang pagbiya sa Ehipto wala matuli. 6 Ang mga Israelinhon nagpanaw sa kamingawan sa 40 ka tuig+ hangtod nga nangamatay ang tibuok nasod, nga mao, ang mga manggugubat nga migawas sa Ehipto nga wala maminaw sa tingog ni Jehova.+ Nanumpa si Jehova kanila nga dili gyod niya itugot nga makakita sila sa yuta+ nga gipanumpa ni Jehova sa ilang mga katigulangan nga ihatag kanato,+ yuta nga abunda sa gatas ug dugos.+ 7 Busa ang ilang mga anak maoy iyang gipuli nila.+ Gituli sila ni Josue kay wala man sila matuli panahon sa panaw.

8 Dihang natuli na nila ang tibuok nasod, nagpabilin sila sa kampo hangtod nga nangaayo sila.

9 Unya si Jehova miingon kang Josue: “Karong adlawa akong gikuha ang kaulawan nga gihimo sa Ehipto kaninyo.” Busa ang maong dapit gitawag ug Gilgal*+ hangtod karon.

10 Ang mga Israelinhon padayong nagkampo sa Gilgal sa desyertong kapatagan sa Jerico, ug gisaulog nila ang Paskuwa sa gabii sa ika-14 nga adlaw sa bulan.+ 11 Sa adlaw human sa Paskuwa, nangaon silag abot sa yuta. Nangaon silag tinapay nga walay pangpatubo*+ ug sinangag nga lugas sa maong adlaw. 12 Wala nay mitungha nga mana sa adlaw nga nangaon silag abot sa yuta; wala nay mana para sa mga Israelinhon,+ ug nianang tuiga nangaon na silag abot sa yuta sa Canaan.+

13 Dihang si Josue duol sa Jerico, nakakita siyag lalaki+ nga nagtindog sa iyang atubangan nga naggunit ug espada.+ Busa si Josue miduol niya ug nangutana: “Dapig ba ka namo o dapig ka sa kaaway?” 14 Siya mitubag: “Dili, pero mianhi ko ingong prinsipe* sa kasundalohan ni Jehova.”+ Niana si Josue mihapa ug miingon: “Akong ginoo, unsay imong isulti sa imong alagad?” 15 Ang prinsipe sa kasundalohan ni Jehova miingon kang Josue: “Huboa ang imong sandalyas kay ang dapit nga imong gitindogan balaan.” Gibuhat dayon kana ni Josue.+

6 Karon ang Jerico gisirhan pag-ayo tungod sa mga Israelinhon; walay makagawas ug walay makasulod.+

2 Si Jehova miingon kang Josue: “Akong gitugyan kanimo ang Jerico, ang hari niini, ug ang banggiitang mga manggugubat niini.+ 3 Kamong tanang sundalo magmartsa libot sa siyudad kas-a sa usa ka adlaw. Himoon ninyo kini sa unom ka adlaw. 4 Pito ka saserdote ang mag-una sa Kaban ug ang matag usa magdalag usa ka budyong nga sungay sa laking karnero. Apan sa ikapitong adlaw, pito ka beses mong magmartsa libot sa siyudad ug huypon sa mga saserdote ang mga budyong.+ 5 Kon patingogon na ang budyong ug madungog ninyo ang tingog* niini, ang tanang sundalo kinahanglang mosinggit ug singgit sa pakiggubat. Unya ang paril sa siyudad malumpag,+ ug ang matag sundalo kinahanglang deretsong mosulod.”

6 Busa gitawag ni Josue nga anak ni Nun ang mga saserdote ug giingnan sila: “Dalha ninyo ang kaban sa pakigsaad, ug pito ka saserdote ang mag-una sa Kaban ni Jehova nga magdalag pito ka budyong nga sungay sa laking karnero.”+ 7 Dayon giingnan niya ang mga sundalo: “Lakaw, pagmartsa mo libot sa siyudad, ug ang armadong mga sundalo+ mag-una sa Kaban ni Jehova.” 8 Busa sumala sa gisulti ni Josue sa mga sundalo, ang pito ka saserdote nga nagdalag tagsa ka budyong sa atubangan ni Jehova milakaw ug mihuyop sa mga budyong, ug ang kaban sa pakigsaad ni Jehova nagsunod kanila. 9 Ug ang armadong mga sundalo nag-una sa mga saserdote nga naghuyop sa mga budyong, ug ang ubang sundalo nagsunod sa Kaban samtang gihuyop ang mga budyong.

10 Karon gisugo ni Josue ang mga sundalo: “Dili mo mosinggit o mosulti. Ayaw mog tingog hangtod nga moingon kog, ‘Singgit!’ Unya singgit na mo.” 11 Gipalibot niyag kausa sa siyudad ang Kaban ni Jehova, ug human niana mibalik sila sa kampo ug nagpalabay sa kagabhion didto.

12 Pagkabuntag sayong mibangon si Josue, ug gidala sa mga saserdote ang Kaban+ ni Jehova, 13 ug ang pito ka saserdote nga nagdalag tagsa ka budyong nag-una sa Kaban ni Jehova ug padayong naghuyop sa mga budyong. Ang armadong mga sundalo naglakaw una kanila ug ang ubang sundalo nagsunod sa Kaban ni Jehova samtang padayong gihuyop ang mga budyong. 14 Sa ikaduhang adlaw sila nagmartsag kausa libot sa siyudad, unya mibalik sila sa kampo. Kini ang ilang gihimo sulod sa unom ka adlaw.+

15 Sa ikapitong adlaw sayo silang mibangon, sa pagbanagbanag, unya mimartsa sila libot sa siyudad sa mao ra gihapong paagi sa pito ka beses. Nianang adlawa lang sila nagmartsag kapito libot sa siyudad.+ 16 Ug sa ikapitong paglibot nila, gipatingog sa mga saserdote ang mga budyong ug giingnan ni Josue ang mga sundalo: “Singgit,+ kay gihatag ni Jehova kaninyo ang siyudad! 17 Ang siyudad ug ang tanang naa niini kinahanglang laglagon;+ iya ni Jehova kining tanan. Si Rahab+ nga pampam* ug ang tanang naa sa iyang balay mao lang ang ibiling buhi, kay gitagoan niya ang mga espiya nga atong gipadala.+ 18 Apan palayo mo sa mga butang nga kinahanglang laglagon,+ aron dili mo maibog ug mokuha niini,+ nga tungod niana ang Israel malaglag kay nagdala mog ikadaot* niini.+ 19 Apan ang tanang plata,* bulawan, ug mga gamit nga tumbaga* ug puthaw balaan para kang Jehova.+ Angay kining ibutang sa tipiganag bahandi ni Jehova.”+

20 Dihang gihuyop ang mga budyong, ang mga sundalo misinggit.+ Dihang nadungog sa mga sundalo ang tingog sa budyong ug misinggit silag singgit sa pakiggubat, ang paril nalumpag.+ Unya ang mga sundalo misulod deretso sa siyudad ug gisakop kini. 21 Ilang gilaglag pinaagig espada ang tanang naa sa siyudad, mga lalaki ug babaye, mga batan-on ug tigulang, mga torong baka, karnero, ug asno.+

22 Giingnan ni Josue ang duha ka lalaki nga nangespiya sa yuta: “Sulod mo sa balay sa pampam ug pagawsa ang babaye ug ang tanan sa iyang panimalay, sumala sa inyong gipanumpa kaniya.”+ 23 Busa misulod ang batan-ong mga espiya ug gipagawas nila si Rahab apil ang iyang amahan, inahan, mga igsoon, ug ang tanan sa iyang panimalay;+ oo, gipagawas nila ang tibuok niyang pamilya, ug gidala sila sa gawas sa kampo sa Israel.

24 Dayon gisunog nila ang siyudad ug ang tanang naa niini. Apan ang mga plata, bulawan, ug mga gamit nga tumbaga ug puthaw ilang gidala sa tipiganag bahandi sa balay ni Jehova.+ 25 Si Rahab nga pampam ug ang tanan sa iyang panimalay ug ang panimalay sa iyang amahan mao lang ang giluwas ni Josue.+ Si Rahab nagpuyo sa Israel hangtod karon,+ kay gitagoan niya ang mga lalaki nga gisugo ni Josue nga mangespiya sa Jerico.+

26 Niadtong higayona nanumpa si Josue:* “Tinunglo sa atubangan ni Jehova ang tawo nga mosulay pagtukod pag-usab niining siyudad sa Jerico. Kon magpahimutang siyag pundasyon niini mamatay ang iyang panganayng anak, ug kon magtaod siyag mga pultahan niini mamatay ang iyang kamanghoran.”+

27 Busa si Jehova nag-uban kang Josue,+ ug nailado siya sa tibuok yuta.+

7 Apan ang mga Israelinhon wala magmatinumanon bahin sa mga butang nga angayng laglagon, kay si Acan+ nga anak ni Carmi, nga anak ni Zabdi, nga anak ni Zera sa tribo ni Juda, nagkuhag pipila ka butang nga angayng laglagon.+ Tungod niini misilaob ang kasuko ni Jehova sa mga Israelinhon.+

2 Gikan sa Jerico, si Josue nagpadalag mga lalaki sa Ai,+ nga duol sa Bet-aven ug sidlakan sa Bethel,+ ug gisugo sila: “Tungas mo ug pangespiya sa yuta.” Busa ang mga lalaki mitungas ug nangespiya sa Ai. 3 Pagbalik nila kang Josue, sila miingon: “Dili kinahanglang motungas ang tanang sundalo. Mga duha o tulo ka libo ka sundalo ra ang gikinahanglan aron mapildi ang Ai. Ayaw nag hagoa ang tanang sundalo sa pag-adto didto, kay gamay ra ang namuyo sa Ai.”

4 Busa mga 3,000 ka sundalo ang mitungas didto, apan nangatras sila gikan sa mga lalaki sa Ai.+ 5 Ang mga lalaki sa Ai nakapatay ug 36 ka Israelinhon. Gigukod sila sa mga taga-Ai gikan sa gawas sa ganghaan sa siyudad hangtod sa Sebarim,* ug gipamatay sila samtang nanglugsong. Busa ang katawhan nahadlok ug nawad-ag kaisog.*

6 Tungod niini, gigisi ni Josue ang iyang besti ug mihapa atubangan sa Kaban ni Jehova hangtod sa gabii, siya ug ang mga ansiyano sa Israel, ug padayon silang nagbutang ug abog sa ilang mga ulo. 7 Si Josue miingon: “Oh Soberanong Ginoong Jehova, nganong gipatabok pa man nimo sa Jordan kining katawhan? Aron lang ba ipapatay mi sa mga Amorihanon? Unta nagpabilin na lang mi sa sidlakan sa Jordan! 8 Pasayloa ko, Oh Jehova, unsa may akong isulti karon nga miatras* ang Israel sa iyang mga kaaway? 9 Kon makadungog niini ang mga taga-Canaan ug ang ubang katawhan nga nagpuyo niini, seguradong palibotan mi nila ug hanawon ang among ngalan sa yuta, ug unsay buhaton nimo para sa imong halangdong ngalan?”+

10 Si Jehova mitubag kang Josue: “Tindog! Nganong naghapa ka? 11 Ang Israel nakasala. Gilapas nila ang akong pakigsaad+ nga akong gisugo nga tumanon nila. Nanguha silag pipila sa mga butang nga angayng laglagon,+ gikawat+ kini, ug gitagoan uban sa ilang mga butang.+ 12 Busa dili makadaog ang mga Israelinhon sa ilang mga kaaway. Sila moatras ug moikyas sa ilang mga kaaway kay sila nahimong butang nga angayng laglagon. Dili ko mouban ninyo pag-usab gawas kon laglagon ninyo sa inyong taliwala ang angayng laglagon.+ 13 Tindog ug balaana ang katawhan!+ Ingna sila, ‘Balaana ang inyong kaugalingon para ugma, kay kini ang giingon ni Jehova nga Diyos sa Israel: “Dunay angayng laglagon sa inyong taliwala, Oh Israel. Dili mo makadaog sa inyong mga kaaway hangtod nga dili ninyo makuha sa inyong taliwala ang butang nga angayng laglagon. 14 Ugma sa buntag moatubang sa Diyos ang matag tribo. Gikan sa tribo nga pilion ni Jehova+ moduol ang matag banay. Ug gikan sa banay nga pilion ni Jehova moduol ang matag panimalay. Unya gikan sa panimalay nga pilion ni Jehova moduol ang matag lalaki. 15 Dihang masakpan ang tawo nga nagkuha sa butang nga angayng laglagon, siya ug ang tanan nga iyaha sunogon,+ kay gilapas niya ang pakigsaad+ ni Jehova ug nakahimo siyag makauulaw nga buhat diha sa Israel.”’”

16 Unya si Josue mibangon sayo sa buntag ug gipaduol ang matag tribo sa Israel, ug ang tribo ni Juda ang napili. 17 Iyang gipaduol ang mga banay ni Juda ug ang banay sa mga Zerahanon+ ang napili. Dayon iyang gipaduol ang banay sa mga Zerahanon ug si Zabdi ang napili. 18 Sa kataposan iyang gipaduol ang matag lalaki sa panimalay ni Zabdi, ug si Acan nga anak ni Carmi, nga anak ni Zabdi, nga anak ni Zera, sa tribo ni Juda, mao ang napili.+ 19 Unya giingnan ni Josue si Acan: “Anak ko, palihog pasidunggi si Jehova nga Diyos sa Israel ug tug-an niya. Palihog sultihi ko kon unsay imong nabuhat. Ayaw kinig itago kanako.”

20 Si Acan mitubag kang Josue: “Tinuod nga ako ang nakasala kang Jehova nga Diyos sa Israel, ug mao ni ang akong nahimo. 21 Dihang nakita nako sa mga nailog sa gubat ang nindot ug mahalong besti gikan sa Sinar+ ug ang 200 ka siklong* plata ug usa ka baretang bulawan nga 50 ka siklo ang timbang, nagustohan nako ni maong gikuha nako. Gitagoan nako ni sa yuta diha sa akong tolda, ug ang kuwarta naa ilalom sa besti.”

22 Dihadiha si Josue nagpadalag mga tawo ug nanagan sila paingon sa tolda, ug nakita nila didto ang gitagoang besti ug ang kuwarta nga naa sa ilalom niini. 23 Busa ila kining gikuha sa tolda ug gidala kang Josue ug sa tanang Israelinhon. Gibutang nila kini sa atubangan ni Jehova. 24 Unya gidala ni Josue ug sa tibuok Israel si Acan+ nga anak ni Zera, ang plata, ang mahalong besti, ug ang usa ka baretang bulawan,+ apil ang iyang mga anak nga lalaki ug babaye, ang iyang mga torong baka, asno, karnero, kanding, ang iyang tolda, ug ang tanan niyang gipanag-iya ngadto sa Walog* sa Akor.+ 25 Si Josue miingon: “Nganong nagdala kag katalagman* kanamo?+ Si Jehova magpahamtang kanimog katalagman karong adlawa.” Unya gibato siya sa tibuok Israel+ ug ilang gisunog sila.+ Busa ilang gipatay sila pinaagig pagbato. 26 Ug nagtapok silag daghang bato ibabaw niya, nga naa pa hangtod karon. Busa nawala ang kasuko ni Jehova.+ Mao nga kining lugara gitawag nga Walog sa Akor* hangtod karon.

8 Unya giingnan ni Jehova si Josue: “Ayawg kahadlok o kalisang.+ Dad-a ang tanang sundalo ug tungas sa Ai. Akong gitugyan nimo ang hari sa Ai, ang iyang katawhan, siyudad, ug yuta.+ 2 Buhata sa Ai ug sa hari niini ang imong gihimo sa Jerico ug sa hari niini.+ Apan puwede ninyong kuhaon ang mga ilogonon ug ang ilang mga binuhing hayop. Pagbutang ug mga sundalo nga moatake sa luyo sa siyudad.”

3 Busa si Josue ug ang tanang sundalo mitungas sa Ai. Si Josue nagpilig 30,000 ka banggiitang manggugubat ug gipalakaw sila sa gabii. 4 Gisugo niya sila: “Paghulat mo sa luyo sa siyudad ug pangandam sa pag-atake. Ayaw kaayog palayo sa siyudad, ug kinahanglang andam mong tanan. 5 Ako ug ang tanang sundalo nga kauban nako mopaduol sa siyudad, ug dihang mogawas sila aron makig-away namo parehas sa miagi,+ moatras mi. 6 Iniggawas nila magpagukod mi aron mapalayo sila sa siyudad, kay moingon sila, ‘Nangatras sila parehas sa una.’+ Ug moatras mi. 7 Unya atakeha ug iloga ang siyudad; itugyan kini kaninyo ni Jehova nga inyong Diyos. 8 Dihang mailog na ninyo ang siyudad, sunoga kini.+ Buhata gayod ang gisulti ni Jehova. Mao nay akong sugo.”

9 Unya gipalakaw sila ni Josue, ug nangadto sila sa dapit diin sila maghulat sa pag-atake; mipuwesto sila taliwala sa Bethel ug Ai, sa kasadpan sa Ai, samtang si Josue nagpalabay sa kagabhion uban sa mga sundalo.

10 Unya si Josue mibangon sayo sa buntag ug gitigom ang mga sundalo. Siya ug ang mga ansiyano sa Israel nanguna kanila paingon sa Ai. 11 Ang tanang sundalo+ nga kauban niya mitungas ug miadto atbang sa siyudad. Sila nagkampo sa amihanan sa Ai, ug may walog taliwala nila ug sa Ai. 12 Sa kasamtangan, mga 5,000 ka sundalo ang nagpuwesto+ taliwala sa Bethel+ ug Ai, sa kasadpan sa siyudad, nga andam moatake sumala sa sugo ni Josue. 13 Busa ang kadaghanang sundalo nagkampo sa amihanan sa siyudad+ ug ang ubang sundalo nagpuwesto sa kasadpan sa siyudad,+ ug niadtong gabhiona si Josue miadto sa tunga sa walog.*

14 Pagkakita niini sa hari sa Ai, siya ug ang mga lalaki sa siyudad migawas dayon sayo sa buntag aron makiggubat sa Israel sa dapit nga nag-umbaw sa desyertong kapatagan. Apan wala siya mahibalo nga naay moatake nila sa luyo sa siyudad. 15 Pag-atake sa mga lalaki sa Ai, si Josue ug ang tibuok Israel nanagan subay sa dalan paingon sa kamingawan.+ 16 Unya gipatawag ang tanang lalaki sa siyudad aron gukdon sila; ug paggukod nila kang Josue napalayo sila sa siyudad. 17 Ang tanang lalaki sa Ai ug Bethel migukod sa Israel. Gibiyaan nila nga walay depensa ang siyudad ug gigukod ang Israel.

18 Unya giingnan ni Jehova si Josue: “Iisa ang bangkaw nga imong gigunitan patunong sa Ai,+ kay itugyan nako kini kanimo.”+ Busa giisa ni Josue ang bangkaw nga iyang gigunitan patunong sa Ai. 19 Pag-isa niya sa iyang kamot, kadtong mipuwesto sa luyo sa siyudad miatake dayon ug giilog kini. Gisunog dayon nila ang siyudad.+

20 Paglingi sa mga lalaki sa Ai, nakita nila ang baga kaayong aso sa siyudad, ug dili na sila makaikyas bisan asa. Ug ang mga sundalo nga ilang gigukod paingon sa kamingawan mibalik aron atakehon sila. 21 Pagkakita ni Josue ug sa tibuok Israel nga ang siyudad nailog na sa kauban nilang mga sundalo ug ang aso sa siyudad miutbo, sila namalik ug giatake ang mga lalaki sa Ai. 22 Ug kadtong miilog sa siyudad migawas aron tagboon sila, mao nga ang mga lalaki sa Ai naipit sa tunga kay natung-an sila sa mga Israelinhon, ug ilang gipamatay sila hangtod nga sila nahurot.+ 23 Apan ilang gidakop nga buhi ang hari sa Ai+ ug gidala siya kang Josue.

24 Dihang napatay na sa mga Israelinhon pinaagig espada ang tanang molupyo sa Ai diha sa kapatagan, sa kamingawan diin gigukod sa mga molupyo sa Ai ang mga Israelinhon, ang tanang Israelinhon namalik sa Ai ug gipatay ang tanang nahibilin pinaagig espada. 25 Ang namatay niadtong adlawa maoy 12,000 ka lalaki ug babaye, ang tanang tawo sa Ai. 26 Wala ipaubos ni Josue ang iyang kamot nga naggunit sa bangkaw+ hangtod nga napatay* ang tanang molupyo sa Ai.+ 27 Apan ang mga binuhing hayop ug mga inilog gikan sa siyudad gipanguha sa mga Israelinhon, sumala sa gisugo ni Jehova kang Josue.+

28 Unya gisunog ni Josue ang Ai ug kini nahimong gun-ob nga siyudad.+ Nagpabilin kining gun-ob hangtod karon. 29 Gibitay niya sa estaka* ang hari sa Ai hangtod sa hapon, ug dihang mosalopay na ang adlaw, gipakuha ni Josue sa estaka ang iyang patayng lawas.+ Unya gilabay nila kini sa entrada sa ganghaan sa siyudad ug nagtapok silag daghang bato ibabaw niya, nga naa pa hangtod karon.

30 Niadtong panahona si Josue naghimog halaran sa Bukid sa Ebal+ para kang Jehova nga Diyos sa Israel, 31 sumala sa gisugo ni Moises nga alagad ni Jehova ngadto sa mga Israelinhon ug sumala sa nasulat sa basahon sa Balaod+ ni Moises: “Usa ka halaran nga hinimo sa tibuok nga mga bato nga wala gamitig puthawng galamiton.”+ Sila nagtanyag ibabaw niini ug mga halad nga sinunog para kang Jehova ug mga halad sa panag-ambit.+

32 Dayon gisulat niya sa mga bato ang kopya sa Balaod+ nga gisulat ni Moises atubangan sa mga Israelinhon.+ 33 Ang tibuok Israel, ang ilang mga ansiyano, mga opisyal, ug mga maghuhukom, apil ang mga langyaw,+ nagtindog atbang sa mga saserdote nga Levihanon nga nagdala sa kaban sa pakigsaad ni Jehova. Ang katunga sa katawhan nagtindog sa tiilan sa Bukid sa Gerizim ug ang katunga nagtindog sa tiilan sa Bukid sa Ebal,+ (sumala sa gisugo ni Moises nga alagad ni Jehova),+ aron panalanginan ang katawhan sa Israel. 34 Human niini gibasa niyag kusog ang tibuok Balaod,+ ang mga panalangin+ ug mga tunglo,+ sumala sa tanang nasulat sa basahon sa Balaod. 35 Walay usa ka pulong sa tanang gisugo ni Moises nga wala basahag kusog ni Josue atubangan sa tibuok katawhan* sa Israel,+ apil ang mga babaye, mga bata, ug mga langyaw+ nga nagpuyo* uban nila.+

9 Dihang nabalitaan sa tanang hari sa kasadpan sa Jordan+ ang nahitabo, kadtong naa sa kabukiran, sa Sepela, sa tibuok baybayon sa Dakong Dagat,*+ ug sa atbang sa Lebanon—ang mga Hitihanon, Amorihanon, Canaanhon, Perizihanon, Hivihanon, ug Jebusihanon+— 2 sila nag-alyansa aron makiggubat kang Josue ug sa Israel.+

3 Ang mga taga-Gabaon+ nakadungog sab sa gibuhat ni Josue sa Jerico+ ug Ai.+ 4 Busa sila milihok nga maalamon ug gibutang nila ang ilang mga balon sa dunot nga mga sako ug gikarga kini sa ilang mga asno, apil ang mga panit nga sudlanag bino nga dunot na, gisi, ug tinapakan; 5 nagsul-ob sab silag daan ug tinapakan nga mga sandalyas ug dunot nga mga sinina. Ang tanan nilang balon nga tinapay uga ug daling madugmok. 6 Dayon sila miadto kang Josue sa kampo sa Gilgal+ ug miingon kaniya ug sa mga lalaki sa Israel: “Gikan mi sa layong yuta. Palihog, pakigsaad mo namo.” 7 Apan ang mga lalaki sa Israel miingon sa mga Hivihanon:*+ “Basig sa duol ra mo nagpuyo. Nganong makigsaad man mi ninyo?”+ 8 Sila mitubag kang Josue: “Mga alagad* mi ninyo.”

Unya si Josue miingon kanila: “Kinsa mo, ug diin mo gikan?” 9 Sila miingon kaniya: “Ang imong mga alagad gikan sa layo kaayong yuta+ ug nanganhi mi tungod sa ngalan ni Jehova nga imong Diyos, kay nakadungog mi sa iyang kabantog ug sa tanan niyang gihimo sa Ehipto+ 10 ug sa iyang gihimo sa duha ka hari sa mga Amorihanon sa tabok* sa Jordan, nga mao si Haring Sihon+ sa Hesbon ug si Haring Og+ sa Basan, didto sa Astarot. 11 Mao nga giingnan mi sa mga ansiyano ug sa tanang nagpuyo sa among yuta, ‘Pagdala mog mga balon sa inyong panaw ug pakigkita nila. Ingna sila: “Andam mi nga mahimong inyong sulugoon;+ palihog pakigsaad mo namo.”’+ 12 Kining among balon nga tinapay init pa sa adlaw nga mibiya mi sa among mga balay aron moanhi dinhi. Karon nakita ninyo nga kini uga na ug daling madugmok.+ 13 Ug kining mga panit nga sudlanan bag-o pa dihang gipuno namo kinig bino, apan karon kini gisi na.+ Ug ang among mga sinina ug mga sandalyas nadunot kay layo kaayo ang among gipanaw.”

14 Unya gikuha* sa mga lalaki sa Israel ang pipila sa ilang mga balon, apan wala sila mokonsulta kang Jehova.+ 15 Busa si Josue nakigdait kanila+ ug nakigsaad kanila nga dili nila sila patyon, ug ang mga pangulo sa katawhan* nanumpa kanila.+

16 Sa ikatulong adlaw human sila makigsaad kanila, nabalitaan nila nga sa duol ra diay sila nagpuyo, silingan ra sila. 17 Unya ang mga Israelinhon milakaw ug nakaabot sa ilang mga siyudad sa ikatulong adlaw; ang ilang mga siyudad mao ang Gabaon,+ Kepira, Beerot, ug Kiriat-jearim.+ 18 Apan wala sila atakeha sa mga Israelinhon, kay ang mga pangulo sa katawhan nanumpa man kanila sa ngalan ni Jehova+ nga Diyos sa Israel. Busa ang katawhan nagbagulbol batok sa mga pangulo. 19 Ang tanang pangulo miingon sa tibuok katawhan: “Dili nato sila puwedeng buhatag kadaot kay nanumpa mi nila sa ngalan ni Jehova nga Diyos sa Israel. 20 Kini ang atong himoon: Dili nato sila patyon aron dili masuko nato ang Diyos tungod sa gipanumpa namo kanila.”+ 21 Ang mga pangulo dugang miingon: “Ayaw silag patya, apan himoa silang mga tigpangahoy ug mga tigkalos ug tubig para sa tibuok katawhan.” Kini ang gisaad kanila sa mga pangulo.

22 Karon gipatawag sila ni Josue ug giingnan: “Nganong gilimbongan mi ninyo ug miingon nga gikan mo sa layo kaayong lugar, nga silingan ra man diay ta?+ 23 Sukad karon tinunglo mo+ ug mahimo mong mga ulipon hangtod sa hangtod, mga tigpangahoy ug tigkalos ug tubig para sa balay sa akong Diyos.” 24 Sila mitubag kang Josue: “Tungod to kay ang imong mga alagad giingnan nga si Jehova nga imong Diyos nagsugo kang Moises nga iyang alagad sa paghatag kaninyo sa tanang yuta ug sa paglaglag sa tanang namuyo niini gikan sa inyong atubangan.+ Busa nahadlok mi nga inyo ming patyon*+ mao nga amo tong gihimo.+ 25 Karon among gitugyan ang among kaugalingon sa imong kamot. Himoa kanamo kon unsay maayo ug husto para nimo.” 26 Kanay iyang gibuhat kanila; giprotektahan niya sila ug wala niya tugoti nga patyon sila sa mga Israelinhon. 27 Apan nianang adlawa, gihimo sila ni Josue nga mga tigpangahoy ug tigkalos ug tubig para sa tibuok katawhan+ ug sa halaran ni Jehova sa dapit nga Iyang pilion,+ ug mao gihapon ang ilang ginahimo hangtod karon.+

10 Pagkadungog ni Haring Adoni-zedek sa Jerusalem nga nailog ug gilaglag ni Josue ang Ai, nga iyang gibuhat sa Ai ug sa hari niini+ ang sama sa iyang gibuhat sa Jerico ug sa hari niini,+ ug nga ang mga taga-Gabaon nakigdait sa Israel+ ug gitugotan nga mopuyo uban nila, 2 siya nahadlok pag-ayo+ kay ang Gabaon dako man nga siyudad, sama sa mga siyudad nga gimandoan ug hari. Mas dako kini sa Ai,+ ug ang tanang lalaki niini mga manggugubat. 3 Busa si Adoni-zedek nga hari sa Jerusalem nagpadalag mensahe kang Hoham nga hari sa Hebron,+ kang Piram nga hari sa Jarmut, kang Japia nga hari sa Lakis, ug kang Debir nga hari sa Eglon:+ 4 “Anhi mo ug tabangi ko. Atong sulongon ang Gabaon kay kini nakigdait kang Josue ug sa mga Israelinhon.”+ 5 Busa ang lima ka hari sa mga Amorihanon+—ang hari sa Jerusalem, hari sa Hebron, hari sa Jarmut, hari sa Lakis, ug ang hari sa Eglon⁠—​nagtigom uban ang ilang kasundalohan, ug sila milakaw ug nagkampo batok sa Gabaon aron makiggubat.

6 Unya ang mga kadagkoan sa Gabaon nagpadalag mensahe kang Josue sa kampo sa Gilgal:+ “Ayaw pasagdi ang* imong mga ulipon.+ Anhi dayon! Luwasa mi ug tabangi mi! Ang tanang hari sa mga Amorihanon gikan sa kabukiran nagtigom batok kanamo.” 7 Busa si Josue mitungas gikan sa Gilgal uban ang tanang sundalo ug banggiitang manggugubat.+

8 Unya giingnan ni Jehova si Josue: “Ayawg kahadlok nila,+ kay gitugyan nako sila kanimo.+ Walay usa nila nga makapildi nimo.”+ 9 Si Josue kalit nga miatake kanila human sa tibuok gabii nga pagmartsa gikan sa Gilgal. 10 Gipahinabo ni Jehova nga magkaguliyang sila atubangan sa Israel.+ Daghan nila ang napatay sa mga Israelinhon didto sa Gabaon ug gigukod sila agi sa tungasanan sa Bet-horon ug gipamatay hangtod sa Azeka ug Makeda. 11 Samtang nangikyas sila gikan sa Israel ug naa sila sa lugsongong dapit sa Bet-horon, gipaulanan sila ni Jehova ug dagkong yelo hangtod sa Azeka ug sila nangamatay. Mas daghan pa gani ang namatay sa ulan nga yelo kay sa napatay sa mga Israelinhon pinaagig espada.

12 Niadtong higayona, sa adlaw nga gitugyan ni Jehova ang mga Amorihanon atubangan sa mga Israelinhon, si Josue miingon kang Jehova atubangan sa Israel:

13 Busa ang adlaw mipondo ug ang bulan wala moirog hangtod nga nakapanimalos ang nasod sa iyang mga kaaway. Wala ba kini masulat sa basahon ni Jasar?+ Ang adlaw nagpondo sa tunga sa langit ug wala mosalop sa tibuok adlaw. 14 Wala pa sukad mahitabo ug wala na mahitabo pag-usab nga si Jehova namati sa tingog sa tawo+ sa maong paagi, kay si Jehova nakig-away para sa Israel.+

15 Human niana si Josue ug ang tibuok Israel mibalik sa kampo sa Gilgal.+

16 Sa kasamtangan, ang lima ka hari nangikyas ug nanago sa langob sa Makeda.+ 17 Unya dunay mireport kang Josue: “Ang lima ka hari nanago sa langob sa Makeda.”+ 18 Si Josue miingon: “Pagligid mog dagkong bato sa baba sa langob ug pagbutang ug mga lalaki nga magbantay nila. 19 Apan ang uban ninyo dili angayng mohunong. Gukda ang inyong mga kaaway ug atakeha sila.+ Ayaw silag pasudla sa ilang mga siyudad kay gitugyan na sila kaninyo ni Jehova nga inyong Diyos.”

20 Daghan kaayog napatay si Josue ug ang mga Israelinhon ug halos nahurot ang ilang mga kaaway, gawas sa pipila nga nakaikyas ug nanulod sa pinarilang mga siyudad. 21 Dayon ang tanang sundalo luwas nga namalik kang Josue sa kampo sa Makeda. Wala gyoy nangahas sa pagsultig daotan batok sa mga Israelinhon. 22 Unya si Josue miingon: “Ablihi ninyo ang baba sa langob ug dad-a kanako ang lima ka hari.” 23 Busa gikuha nila sa langob ang lima ka hari ug gidala kaniya: ang hari sa Jerusalem, hari sa Hebron, hari sa Jarmut, hari sa Lakis, ug ang hari sa Eglon.+ 24 Dihang nadala na nila kang Josue ang mga hari, iyang gipatawag ang tanang sundalo sa Israel ug giingnan ang mga komandante sa mga sundalo nga miuban niya: “Duol mo. Tamaki ang tangkugo niining mga haria.” Busa sila miduol ug gitamakan ang ilang tangkugo.+ 25 Unya giingnan sila ni Josue: “Ayawg kahadlok o kalisang.+ Magmaisogon mo ug magmalig-on, kay mao ni ang buhaton ni Jehova sa tanan ninyong kaaway nga inyong gubaton.”+

26 Dayon gipatay sila ni Josue ug gibitay diha sa lima ka estaka* hangtod sa hapon. 27 Pagsalop sa adlaw, gipakuha ni Josue sa estaka+ ang ilang lawas ug gipalabay kini sa langob diin sila nanago. Unya ang baba sa langob gibutangag dagkong bato, ug naa pa kini hangtod karon.

28 Nailog ni Josue ang Makeda+ niadtong adlawa ug gipamatay ang katawhan niini pinaagig espada. Gipatay niya ang hari ug ang tanang tawo* niini, ug wala siyay gibiling buhi.+ Kon unsay iyang gihimo sa hari sa Jerico mao poy iyang gihimo sa hari sa Makeda.+

29 Gikan sa Makeda, si Josue ug ang tibuok Israel miadto sa Libna ug nakiggubat niini.+ 30 Gitugyan sab ni Jehova sa Israel ang Libna ug ang hari niini,+ ug giatake nila kini ug ang tanang tawo niini pinaagig espada. Wala silay gibiling buhi. Kon unsay ilang gihimo sa hari sa Jerico mao poy ilang gihimo sa hari sa Libna.+

31 Gikan sa Libna, si Josue ug ang tibuok Israel nagkampo sa Lakis+ ug nakiggubat niini. 32 Gitugyan ni Jehova sa Israel ang Lakis, ug nailog nila kini sa ikaduhang adlaw. Giatake nila kini ug ang tanang tawo niini pinaagig espada,+ parehas sa ilang gihimo sa Libna.

33 Unya si Horam nga hari sa Gezer+ mitungas aron tabangan ang Lakis, apan siya ug ang iyang katawhan gipatay ni Josue. Walay bisan usa nga nakaikyas.

34 Gikan sa Lakis, si Josue ug ang tibuok Israel nagkampo sa Eglon+ ug nakiggubat niini. 35 Nailog nila kini niadtong adlawa ug giatake pinaagig espada. Gilaglag nila ang tanang tawo niini parehas sa ilang gihimo sa Lakis.+

36 Gikan sa Eglon, si Josue ug ang tibuok Israel mitungas sa Hebron+ ug nakiggubat niini. 37 Ila kining giilog ug ilang giatake pinaagig espada ang hari niini, ang tanang lungsod niini, ug ang tanang tawo niini. Wala silay gibiling buhi. Gilaglag nila kini ug ang tanang tawo niini, parehas sa ilang gihimo sa Eglon.

38 Sa kataposan si Josue ug ang tibuok Israel mipaingon sa Debir+ ug nakiggubat niini. 39 Nailog niya kini ug ang tanang lungsod niini. Gipatay nila ang hari ug ang tanang tawo niini pinaagig espada.+ Wala silay gibiling buhi.+ Kon unsay iyang gihimo sa Hebron ug sa Libna ug sa hari niini, mao poy iyang gihimo sa Debir ug sa hari niini.

40 Gipildi ni Josue ang tanang yuta sa kabukiran, ang Negeb, Sepela,+ ug ang mga bakilid ug ang mga hari niini. Wala siyay gibiling buhi. Gilaglag niya ang tanang tawo+ sumala sa gisugo ni Jehova nga Diyos sa Israel.+ 41 Nailog kini ni Josue gikan sa Kades-barnea+ hangtod sa Gaza+ ug ang tanang yuta sa Gosen+ hangtod sa Gabaon.+ 42 Napildi ni Josue kining tanang hari ug ang ilang yuta sa usa lang ka pag-atake, kay si Jehova nga Diyos sa Israel mao ang nakig-away para sa Israel.+ 43 Human niana si Josue ug ang tibuok Israel mibalik sa kampo sa Gilgal.+

11 Pagkadungog niini ni Jabin nga hari sa Hazor, nagpadala siyag mensahe kang Jobab nga hari sa Madon,+ ug sa hari sa Simron, sa hari sa Aksap,+ 2 sa mga hari sa kabukiran sa amihanan, sa mga hari sa kapatagan* sa habagatan sa Kineret, sa mga hari sa Sepela, ug sa mga hari sa mga bakilid sa Dor+ sa kasadpan, 3 sa mga Canaanhon+ sa sidlakan ug kasadpan, sa mga Amorihanon,+ Hitihanon, Perizihanon, sa mga Jebusihanon sa kabukiran, ug sa mga Hivihanon+ sa tiilan sa Hermon+ sa yuta sa Mizpa. 4 Busa kining tanang hari nanglakaw uban ang ilang kasundalohan, nga sama ka daghan sa balas sa baybayon, apil ang daghan kaayong kabayo ug mga karong panggubat. 5 Kining mga haria nagkauyon nga magtagbo, ug sila nangabot ug nagkampo nga tingob duol sa katubigan sa Merom aron makiggubat sa Israel.

6 Busa si Jehova miingon kang Josue: “Ayawg kahadlok tungod nila,+ kay ugma niining mga orasa, akong itugyan sila sa Israel ug pamatyon silang tanan. Imong piangan ang ilang mga kabayo+ ug sunogon ang ilang mga karo.” 7 Unya si Josue ug ang tanang sundalo kalit nga misulong kanila ubay sa katubigan sa Merom. 8 Gitugyan sila ni Jehova ngadto sa Israel,+ ug ilang gipildi sila ug gigukod hangtod sa Dakong Sidon+ ug sa Misrepot-maim+ ug sa Walog sa Mizpe sa sidlakan, ug ilang gipamatay sila hangtod wala nay nabiling buhi.+ 9 Gibuhat ni Josue kanila ang gisulti ni Jehova kaniya; iyang gipiangan ang ilang mga kabayo ug gisunog ang ilang mga karo.+

10 Unya si Josue mibalik ug gipildi ang Hazor ug gipatay ang hari niini pinaagig espada,+ kay ang Hazor mao ang pangulo niining tanang gingharian kaniadto. 11 Ilang gipamatay ang tanang tawo niini pinaagig espada.+ Wala silay gibiling buhi.+ Dayon iyang gisunog ang Hazor. 12 Gipatay ni Josue kining mga haria pinaagig espada ug giilog ang tanan nilang siyudad.+ Iyang gilaglag sila+ sumala sa gisugo ni Moises nga alagad ni Jehova. 13 Apan wala sunoga sa Israel ang mga siyudad nga naa sa bungtod, gawas lang sa Hazor; kini lang ang gisunog ni Josue. 14 Ang tanang inilog ug binuhing hayop gikan niining mga siyudara gipanguha sa mga Israelinhon.+ Apan ilang gitigbas ang tanang katawhan hangtod nga nangamatay tanan.+ Wala silay gibiling buhi.+ 15 Kon unsay gisugo ni Jehova kang Moises nga iyang alagad, mao poy gisugo ni Moises kang Josue,+ ug gibuhat kana ni Josue. Gituman gyod niya ang tanang sugo ni Jehova kang Moises.+

16 Nailog ni Josue kining tanang yuta, ang kabukiran, ang tibuok Negeb,+ ang tanang yuta sa Gosen, ang Sepela,+ Araba,+ ug ang kabukiran sa Israel apil ang ubos nga bahin* niini, 17 gikan sa Bukid sa Halak nga paingon sa Seir, ug hangtod sa Baal-gad+ sa Walog sa Lebanon sa tiilan sa Bukid sa Hermon,+ ug iyang gibihag ang tanang hari niini ug gipatay. 18 Si Josue nakiggubat niining mga haria sa taas nga panahon. 19 Wala gyoy siyudad nga nakigdait sa mga Israelinhon gawas sa mga Hivihanon nga nagpuyo sa Gabaon.+ Ilang nailog ang ubang siyudad pinaagig gubat.+ 20 Gitugotan ni Jehova nga mogahi ang ilang kasingkasing+ aron makiggubat sila sa Israel, aron iyang malaglag sila ug dili kaluy-an.+ Kinahanglan silang puohon, sumala sa gisugo ni Jehova kang Moises.+

21 Niadtong panahona gilaglag ni Josue ang mga Anakim+ sa kabukiran, sa Hebron, Debir, Anab, ug sa tanang kabukiran sa Juda ug tanang kabukiran sa Israel. Gilaglag sila ni Josue apil ang ilang mga siyudad.+ 22 Wala nay Anakim nga nabilin sa yuta sa mga Israelinhon; kadto na lang+ naa sa Gaza,+ Gat,+ ug Asdod.+ 23 Busa nakuha ni Josue ang tanang yuta, sumala sa gisaad ni Jehova kang Moises.+ Unya gihatag kini ni Josue sa Israel ingong ilang panulondon ug gibahin kini sumala sa ilang mga tribo.+ Ug ang yuta nakapahulay sa gubat.+

12 Kini ang mga hari sa yuta nga gipildi sa mga Israelinhon, kansang yuta ilang gipanag-iya sa sidlakan sa Jordan, gikan sa Walog* sa Arnon+ hangtod sa Bukid sa Hermon+ ug sa tibuok sidlakang bahin sa Araba:+ 2 si Haring Sihon+ sa mga Amorihanon nga nagpuyo sa Hesbon. Nagmando siya gikan sa Aroer,+ nga naa sa tampi sa Walog* sa Arnon,+ ug gikan sa tunga sa walog, ug sa katunga sa Gilead hangtod sa Walog* sa Jabok, ang utlanan sa mga Ammonhanon. 3 Sakop sab niya ang sidlakang bahin sa Araba gikan sa Dagat sa Kineret*+ sa sidlakan hangtod sa Dagat sa Araba, ang Dagat sa Asin,* padulong sa Bet-jesimot sa sidlakan, ug paingon sa mga bakilid sa Pisga+ sa habagatan.

4 Ang lain pa mao si Haring Og+ sa Basan, nga usa sa kataposang nahibilin sa mga Repaim+ ug nagpuyo sa Astarot ug Edrei. 5 Nagmando siya sa Bukid sa Hermon, sa Saleca, ug sa tibuok Basan,+ hangtod sa utlanan sa mga Gesurihanon ug mga Maacatnon,+ ug sa katunga sa Gilead, hangtod sa utlanan sa teritoryo ni Haring Sihon sa Hesbon.+

6 Gipildi sila ni Moises nga alagad ni Jehova ug sa mga Israelinhon.+ Ang ilang yuta gihatag ni Moises nga alagad ni Jehova ngadto sa mga Rubenhon, mga Gadhanon, ug sa katunga sa tribo ni Manases aron panag-iyahon.+

7 Kini ang mga hari sa yuta nga gipildi ni Josue ug sa mga Israelinhon sa kasadpan sa Jordan, gikan sa Baal-gad+ sa Walog sa Lebanon+ hangtod sa Bukid sa Halak,+ nga paingon sa Seir,+ ug unya ang ilang yuta gihatag ni Josue sa mga tribo sa Israel sumala sa ilang bahin,+ 8 sa kabukiran, sa Sepela, sa Araba, sa mga bakilid, sa kamingawan, ug sa Negeb+—ang yuta sa mga Hitihanon, mga Amorihanon,+ mga Canaanhon, mga Perizihanon, mga Hivihanon, ug mga Jebusihanon:+

13 Karon si Josue tigulang na kaayo.+ Busa si Jehova miingon niya: “Ikaw tigulang na kaayo, ug dako pa ang yuta nga inyong ilogon.* 2 Mao ni ang yuta nga ilogonon pa:+ ang tibuok rehiyon sa mga Filistehanon ug sa mga Gesurihanon+ 3 (gikan sa sanga sa Nilo* sa sidlakan* sa Ehipto hangtod sa utlanan sa Ekron sa amihanan, nga giisip kanhi nga teritoryo sa mga Canaanhon)+ apil ang yuta sa lima ka magmamando sa mga Filistehanon+—ang mga Gazahanon, Asdodnon,+ Askelonhon,+ Gitihanon,+ ug Ekronhon;+ ang yuta sa mga Avim+ 4 sa habagatan; ang tanang yuta sa mga Canaanhon; ang Meara, nga iya sa mga taga-Sidon,+ hangtod sa Apek, nga naa sa utlanan sa mga Amorihanon; 5 ang yuta sa mga Gebalnon+ ug ang tibuok Lebanon sa sidlakan, gikan sa Baal-gad sa tiilan sa Bukid sa Hermon hangtod sa Lebo-hamat;*+ 6 ang tanang molupyo sa kabukiran gikan sa Lebanon+ hangtod sa Misrepot-maim;+ ug ang tanang taga-Sidon.+ Abogon* nako sila gikan sa atubangan sa mga Israelinhon.+ Ang imo lang himoon mao ang pagbahinbahin niini sa Israel ingong panulondon sumala sa akong gisugo nimo.+ 7 Karon bahinbahina kining yutaa ingong panulondon sa siyam ka tribo ug sa katunga sa tribo ni Manases.”+

8 Ang mga Rubenhon ug ang mga Gadhanon apil ang laing katunga sa tribo ni Manases nakakuha na sa ilang panulondon nga gihatag ni Moises kanila sa sidlakan sa Jordan, sumala sa gihatag kanila ni Moises nga alagad ni Jehova:+ 9 gikan sa Aroer,+ nga naa sa tampi sa Walog* sa Arnon,+ ug ang siyudad nga naa sa tunga sa walog, ug ang tibuok habog nga kapatagan sa Medeba hangtod sa Dibon; 10 ug ang tanang siyudad ni Haring Sihon sa mga Amorihanon, nga naghari sa Hesbon, hangtod sa utlanan sa mga Ammonhanon;+ 11 apil sab ang Gilead ug ang teritoryo sa mga Gesurihanon ug mga Maacatnon+ ug ang tibuok Bukid sa Hermon ug ang tibuok Basan+ hangtod sa Saleca;+ 12 ang tibuok gingharian ni Og sa Basan, nga naghari sa Astarot ug sa Edrei. (Usa siya sa kataposang mga nahibilin sa mga Repaim.)+ Gipildi sila ni Moises ug giabog.*+ 13 Apan wala aboga* sa mga Israelinhon+ ang mga Gesurihanon ug mga Maacatnon, kay ang Gesur ug ang Maacat nagpuyo uban sa Israel hangtod karon.

14 Ang tribo lang sa mga Levihanon ang wala niya hatagig panulondon.+ Ang mga halad nga ginasunog para kang Jehova nga Diyos sa Israel mao ang ilang panulondon,+ sumala sa iyang gisaad kanila.+

15 Unya gihatagan ni Moises ug panulondon ang mga Rubenhon sumala sa ilang mga banay, 16 ug ang ilang teritoryo maoy gikan sa Aroer, nga naa sa tampi sa Walog* sa Arnon, ug ang siyudad nga naa sa tunga sa walog, ug ang tibuok habog nga kapatagan sa Medeba; 17 ang Hesbon ug ang tanang lungsod+ nga naa sa habog nga kapatagan, ang Dibon, Bamot-baal, Bet-baal-meon,+ 18 Jahaz,+ Kedemot,+ Mepaat,+ 19 Kiriataim, Sibma,+ ug ang Zeret-sahar sa bukid sa walog,* 20 ang Bet-peor, ang mga bakilid sa Pisga,+ Bet-jesimot,+ 21 ang tanang siyudad sa habog nga kapatagan, ug ang tibuok gingharian ni Haring Sihon sa mga Amorihanon, nga naghari sa Hesbon.+ Siya ug ang mga pangulo nga Midianhon nga si Evi, Rekem, Zur, Hur, ug Reba,+ mga hari nga sakop ni Sihon nga nagpuyo nianang dapita, gipildi ni Moises.+ 22 Si Balaam+ nga anak ni Beor, nga mananag-an,+ maoy apil sa mga gipamatay sa mga Israelinhon pinaagig espada. 23 Ang utlanan sa mga Rubenhon mao ang Jordan; ug kini nga teritoryo mao ang panulondon sa mga Rubenhon sumala sa ilang mga banay, apil ang mga siyudad ug mga komunidad niini.

24 Dugang pa, gihatagan ni Moises ug panulondon ang tribo ni Gad, ang mga Gadhanon sumala sa ilang mga banay, 25 ug apil sa ilang teritoryo ang Jazer+ ug ang tanang siyudad sa Gilead ug ang katunga sa yuta sa mga Ammonhanon+ hangtod sa Aroer, nga atbang sa Raba;+ 26 ug gikan sa Hesbon+ hangtod sa Ramat-mizpe ug sa Betonim, ug gikan sa Mahanaim+ hangtod sa utlanan sa Debir; 27 ug sa walog,* ang Bet-haram, Bet-nimra,+ Sucot,+ ug Zapon, ang uban pang bahin sa gingharian ni Haring Sihon sa Hesbon,+ nga ang utlanan mao ang Jordan gikan sa habagatang bahin sa Dagat sa Kineret*+ sa sidlakan sa Jordan. 28 Mao ni ang panulondon sa mga Gadhanon sumala sa ilang mga banay, apil ang mga siyudad ug mga komunidad niini.

29 Dugang pa, gihatagan ni Moises ug panulondon ang katunga sa tribo ni Manases sumala sa ilang mga banay.+ 30 Ug ang ilang teritoryo maoy gikan sa Mahanaim+ ug tibuok Basan, tibuok gingharian ni Haring Og sa Basan, ug ang tanang kampo* sa Jair+ sa Basan, 60 ka lungsod. 31 Ug ang katunga sa Gilead, ug ang Astarot ug ang Edrei,+ ang mga siyudad sa gingharian ni Og sa Basan, naiya sa mga anak ni Makir+ nga anak ni Manases, sa katunga sa mga anak ni Makir sumala sa ilang mga banay.

32 Mao ni ang panulondon nga gihatag ni Moises kanila sa desyertong kapatagan sa Moab sa sidlakan sa Jordan, atbang sa Jerico.+

33 Apan wala hatagi ni Moises ug panulondon ang tribo sa mga Levihanon.+ Si Jehova nga Diyos sa Israel mao ang ilang panulondon, sumala sa iyang gisaad kanila.+

14 Mao ni ang nakuha sa mga Israelinhon nga panulondon sa yuta sa Canaan, nga gihatag kanila ni Eleasar nga saserdote ug ni Josue nga anak ni Nun ug sa mga pangulo sa mga banay* sa mga tribo sa Israel.+ 2 Ang ilang panulondon gipaagig ripa,*+ sumala sa gisugo ni Jehova pinaagi kang Moises para sa siyam ug tunga ka tribo.+ 3 Gihatagan ni Moises ug panulondon ang duha ug tunga ka tribo sa sidlakan sa Jordan,+ ug ang mga Levihanon wala niya hatagig panulondon taliwala sa ubang tribo.+ 4 Ang mga kaliwat ni Jose giisip nga duha ka tribo,+ ang Manases ug Epraim;+ ug wala nila hatagig bahin nga yuta ang mga Levihanon, gawas sa mga siyudad+ nga ilang puy-an ug ang mga sibsibanan niini para sa ilang mga baka ug mga karnero.+ 5 Busa gibahinbahin sa mga Israelinhon ang yuta sumala sa gisugo ni Jehova kang Moises.

6 Unya ang mga lalaki sa Juda miduol kang Josue sa Gilgal,+ ug si Caleb+ nga anak ni Jepune nga Kenizihanon miingon kaniya: “Nahibalo ka pag-ayo kon unsay giingon ni Jehova+ kang Moises nga tawo sa matuod nga Diyos+ bahin kanimo ug kanako didto sa Kades-barnea.+ 7 Ako 40 anyos dihang gipadala ko ni Moises nga alagad ni Jehova gikan sa Kades-barnea aron mangespiya sa yuta,+ ug matinud-anon nakong gireport kaniya ang tanan nakong nakita.+ 8 Bug-os kasingkasing kong misunod kang Jehova nga akong Diyos+ bisag ang katawhan gipaluya* sa akong mga igsoon nga kauban nakong mitungas. 9 Si Moises nanumpa niadtong adlawa, ‘Ang yuta nga imong giagian mapanag-iya nimo ug sa imong mga anak ingong panulondon hangtod sa panahong walay tino, kay bug-os kasingkasing nimong gisunod si Jehova nga akong Diyos.’+ 10 Sumala sa iyang gisaad,+ gipanalipdan ni Jehova ang akong kinabuhi+ sulod niining 45 ka tuig sukad nga gisaad kini ni Jehova kang Moises dihang ang Israel naglakaw sa kamingawan.+ Buhi pa gihapon ko ug 85 anyos na. 11 Kusgan pa ko parehas niadtong gipadala ko ni Moises. Ang akong kusog kaniadto mao ra gihapon karon, para sa gubat ug sa ubang buluhaton. 12 Busa ihatag kanako kining kabukiran nga gisaad ni Jehova niadtong adlawa. Bisag nakadungog ka niadtong adlawa nga naay mga Anakim+ ug pinarilang mga siyudad didto,+ segurado* nga si Jehova magauban kanako,+ ug abogon* nako sila, sumala sa gisaad ni Jehova.”+

13 Busa gipanalanginan siya ni Josue ug gihatag ang Hebron kang Caleb nga anak ni Jepune ingong panulondon.+ 14 Mao nga ang Hebron naiya ni Caleb nga anak ni Jepune nga Kenizihanon ingong panulondon hangtod karon, kay siya bug-os kasingkasing nga misunod kang Jehova nga Diyos sa Israel.+ 15 Sa una, ang ngalan sa Hebron maoy Kiriat-arba+ (si Arba bantogan kaayo sa mga Anakim). Ug ang yuta nakapahulay sa gubat.+

15 Ang yuta nga gihatag*+ ngadto sa tribo ni Juda para sa ilang mga banay maoy hangtod sa utlanan sa Edom,+ sa kamingawan sa Zin, hangtod sa Negeb sa tumoy niini sa habagatan. 2 Ang ilang utlanan sa habagatan maoy gikan sa tumoy sa Dagat sa Asin,*+ sa habagatang baybayon niini. 3 Ug milahos kini pahabagatan hangtod sa tungasanan sa Akrabim,+ latas sa Zin, dayon gikan sa habagatan misaka kini ngadto sa Kades-barnea,+ ngadto sa Hesron hangtod sa Addar ug miliko paingon sa Karka. 4 Unya kini mipaingon sa Azmon+ ngadto sa Walog* sa Ehipto,+ ug ang utlanan misangko sa Dagat.* Mao ni ang ilang utlanan sa habagatan.

5 Ang utlanan sa sidlakan mao ang Dagat sa Asin* hangtod sa tumoy sa Jordan, ug ang utlanan sa amihanan magsugod sa baybayon sa dagat, sa tumoy sa Jordan.+ 6 Ang utlanan misaka paingon sa Bet-hogla+ latas sa amihanan sa Bet-araba+ ug misaka paingon sa bato ni Bohan+ nga anak ni Ruben. 7 Ang utlanan misaka paingon sa Debir sa Walog* sa Akor+ ug miliko paamihanan sa Gilgal,+ nga atbang sa tungasanan sa Adumim, nga habagatan sa walog,* ug ang utlanan milatas sa katubigan sa En-semes+ ug misangko sa En-rogel.+ 8 Ang utlanan misaka paingon sa Walog sa Anak ni Hinnom+ ngadto sa bakilid sa mga Jebusihanon+ sa habagatan, nga mao ang Jerusalem,+ ug ang utlanan misaka paingon sa tumoy sa bukid nga atbang sa Walog sa Hinnom pakasadpan, nga naa sa tumoy sa Walog* sa Repaim paamihanan. 9 Gikan sa tumoy sa bukid ang utlanan milahos sa tuboran sa mga tubig sa Neptoa+ ngadto sa mga siyudad sa Bukid sa Epron; ug ang utlanan milahos ngadto sa Baala, nga mao ang Kiriat-jearim.+ 10 Ang utlanan miliko gikan sa Baala pakasadpan ngadto sa Bukid sa Seir ug milahos ngadto sa bakilid sa Bukid sa Jearim sa amihanan, nga mao ang Kesalon, ug kini minaog ngadto sa Bet-semes+ ug milahos ngadto sa Timnah.+ 11 Ug ang utlanan milahos ngadto sa bakilid sa Ekron+ paamihanan ngadto sa Sikeron latas sa Bukid sa Baala lahos ngadto sa Jabneel, ug ang utlanan misangko sa dagat.

12 Ang utlanan sa kasadpan mao ang baybayon sa Dakong Dagat.*+ Mao ni ang mga utlanan palibot sa teritoryo sa mga kaliwat ni Juda sumala sa ilang mga banay.

13 Ug si Caleb+ nga anak ni Jepune gibahinan ni Josue ug yuta gikan sa mga kaliwat ni Juda sumala sa gisugo ni Jehova kaniya, nga mao ang Kiriat-arba (si Arba ang amahan ni Anak), nga mao ang Hebron.+ 14 Busa giabog ni Caleb gikan didto ang tulo ka anak ni Anak:+ si Sesai, Ahiman, ug Talmai,+ mga kaliwat ni Anak. 15 Unya gikan didto siya mitungas ug nakig-away sa mga molupyo sa Debir.+ (Kaniadto ang ngalan sa Debir maoy Kiriat-seper.) 16 Si Caleb miingon: “Kon kinsay moatake sa Kiriat-seper ug makailog niini, akong ipaasawa kaniya ang akong anak nga si Aksa.” 17 Ug nailog kini ni Otniel+ nga anak ni Kenaz,+ nga igsoon ni Caleb. Busa iyang gipaasawa kaniya si Aksa+ nga iyang anak. 18 Sa molakaway na si Aksa paingon sa balay sa iyang bana, iyang gikombinsir si Otniel nga mangayog uma sa iyang amahan. Unya si Aksa minaog sa iyang asno.* Gipangutana siya ni Caleb: “Unsay imong gusto?”+ 19 Siya mitubag: “Palihog panalangini ko, kay ang imong gihatag kanako mao lang ang umaw nga yuta sa habagatan;* ihatag pod kanako ang Gulot-maim.”* Busa iyang gihatag kaniya ang Ibabaw nga Gulot ug ang Ubos nga Gulot.

20 Mao ni ang panulondon sa tribo ni Juda sumala sa ilang mga banay.

21 Ang mga siyudad sa kinatumyang bahin sa teritoryo sa tribo ni Juda paingon sa utlanan sa Edom+ sa habagatan mao kini: ang Kabzeel, Eder, Jagur, 22 Kina, Dimona, Adada, 23 Kedes, Hazor, Itnan, 24 Zip, Telem, Bealot, 25 Hazor-hadata, ug Keriot-hezron, nga mao ang Hazor, 26 Amam, Sema, Molada,+ 27 Hazar-gada, Hesmon, Bet-pelet,+ 28 Hazar-sual, Beer-seba,+ Biziotias, 29 Baala, Iim, Ezem, 30 Eltolad, Kesil, Horma,+ 31 Ziklag,+ Madmana, Sansana, 32 Lebaot, Silhim, Ain, ug Rimon+—29 ka siyudad, apil ang mga komunidad niini.

33 Kini ang mga siyudad sa Sepela:+ ang Estaol, Zora,+ Ashna, 34 Zanoa, En-ganim, Tapua, Enam, 35 Jarmut, Adulam,+ Socoh, Azeka,+ 36 Saaraim,+ Aditaim, ug Gedera ug Gederotaim*—14 ka siyudad, apil ang mga komunidad niini.

37 Ang Zenan, Hadasa, Migdal-gad, 38 Dilean, Mizpe, Jokteel, 39 Lakis,+ Bozkat, Eglon, 40 Cabon, Lamam, Kitlis, 41 Gederot, Bet-dagon, Naama, ug Makeda+—16 ka siyudad, apil ang mga komunidad niini.

42 Ang Libna,+ Eter, Asan,+ 43 Ipta, Ashna, Nezib, 44 Keila, Akzib, ug Maresah—siyam ka siyudad, apil ang mga komunidad niini.

45 Ang Ekron ug ang mga lungsod nga sakop* niini ug ang mga komunidad niini; 46 gikan sa Ekron pakasadpan, ang tanang lugar tapad sa Asdod ug ang mga komunidad niini.

47 Ang Asdod,+ ang mga lungsod nga sakop* niini ug ang mga komunidad niini; ang Gaza,+ ang mga lungsod nga sakop niini ug ang mga komunidad niini, hangtod sa Walog* sa Ehipto, sa Dakong Dagat,* ug ang rehiyon duol sa dagat.+

48 Ug sa kabukiran, ang Samir, Jatir,+ Socoh, 49 Dana, Kiriat-sana, nga mao ang Debir, 50 Anab, Estemo,+ Anim, 51 Gosen,+ Holon, ug Gilo+—11 ka siyudad, apil ang mga komunidad niini.

52 Ang Arab, Duma, Esan, 53 Janim, Bet-tapua, Apeka, 54 Humta, Kiriat-arba, nga mao ang Hebron,+ ug Zior—siyam ka siyudad, apil ang mga komunidad niini.

55 Ang Maon,+ Carmelo, Zip,+ Juta, 56 Jezreel, Jokdeam, Zanoa, 57 Kain, Gibea, ug Timnah+—10 ka siyudad, apil ang mga komunidad niini.

58 Ang Halhul, Bet-zur, Gedor, 59 Maarat, Bet-anot, ug Eltekon—unom ka siyudad, apil ang mga komunidad niini.

60 Ang Kiriat-baal, nga mao ang Kiriat-jearim,+ ug Raba—duha ka siyudad, apil ang mga komunidad niini.

61 Sa kamingawan, ang Bet-araba,+ Midin, Secaca, 62 Nibsan, ang Siyudad sa Asin, ug En-gedi+—unom ka siyudad, apil ang mga komunidad niini.

63 Kon bahin sa mga Jebusihanon+ nga namuyo sa Jerusalem,+ ang mga lalaki sa Juda wala makahimo sa pag-abog kanila,+ busa ang mga Jebusihanon nagpuyo gihapon sa Jerusalem uban sa katawhan sa Juda hangtod karon.

16 Ug ang yuta nga nadawat sa mga kaliwat ni Jose+ pinaagig ripa*+ maoy gikan sa Jordan sa Jerico paingon sa katubigan sa sidlakan sa Jerico, latas sa kamingawan pasaka gikan sa Jerico ngadto sa kabukiran sa Bethel.+ 2 Kini milahos gikan sa Bethel nga duol sa Luz ngadto sa Atarot nga utlanan sa mga Arkihanon, 3 unya kini minaog pakasadpan paingon sa utlanan sa mga Japletnon hangtod sa utlanan sa Ubos nga Bet-horon+ ug Gezer,+ ug kini misangko sa dagat.

4 Busa ang yuta gipanag-iya sa mga kaliwat ni Jose,+ si Manases ug Epraim.+ 5 Mao ni ang utlanan sa mga kaliwat ni Epraim sumala sa ilang mga banay: Ang utlanan sa ilang panulondon sa sidlakan mao ang Atarot-adar,+ hangtod sa Ibabaw nga Bet-horon,+ 6 ug ang utlanan misangko sa dagat. Ang Mikmetat+ naa sa amihanan, ug ang utlanan miliko pasidlakan paingon sa Taanat-shilo, ug kini mipadayon pasidlakan ngadto sa Janoa. 7 Unya gikan sa Janoa minaog kini sa Atarot ug Naara hangtod sa Jerico+ ug misangko sa Jordan. 8 Gikan sa Tapua+ ang utlanan milahos pakasadpan sa Walog* sa Kana, ug kini misangko sa dagat.+ Mao ni ang panulondon sa tribo ni Epraim sumala sa ilang mga banay; 9 ang mga kaliwat ni Epraim may gipanag-iya sab nga mga siyudad, apil ang mga komunidad niini, diha sa panulondon ni Manases.+

10 Apan wala nila aboga ang mga Canaanhon nga nagpuyo sa Gezer,+ ug ang mga Canaanhon nagpadayog puyo uban sa Epraim hangtod karon+ ug gipailalom sa pinugos nga pagtrabaho.+

17 Unya ang ripa*+ natunong sa tribo ni Manases,+ kay siya ang panganay ni Jose.+ Kay manggugubat man si Makir,+ nga panganay ni Manases ug amahan ni Gilead, nadawat niya ang Gilead ug ang Basan.+ 2 Ang ubang kaliwat ni Manases nakadawat ug yuta pinaagig ripa sumala sa ilang mga banay: ang mga anak ni Abi-ezer,+ mga anak ni Helek, mga anak ni Asriel, mga anak ni Sekem, mga anak ni Heper, ug mga anak ni Semida. Sila ang mga kaliwat ni Manases nga anak ni Jose, ang mga lalaki sumala sa ilang mga banay.+ 3 Apan si Zelopehad+ nga anak ni Heper, nga anak ni Gilead, nga anak ni Makir, nga anak ni Manases, walay mga anak nga lalaki kondili mga anak lang nga babaye, ug mao ni ang ilang ngalan: Mala, Noa, Hogla, Milca, ug Tirza. 4 Busa sila miatubang kang Eleasar+ nga saserdote, kang Josue nga anak ni Nun, ug sa mga pangulo, nga nag-ingon: “Si Jehova ang nagsugo kang Moises nga hatagan mig panulondon taliwala sa among paryenteng mga lalaki.”+ Busa gihatagan niya silag panulondon taliwala sa mga paryenteng lalaki sa ilang amahan sumala sa sugo ni Jehova.+

5 Diha poy 10 ka bahin sa yuta nga naadto kang Manases gawas pa sa yuta sa Gilead ug Basan, nga naa sa tabok* sa Jordan,+ 6 kay ang mga anak nga babaye ni Manases nakadawat ug panulondon uban sa iyang mga anak nga lalaki, ug ang yuta sa Gilead napanag-iya sa ubang kaliwat ni Manases.

7 Ang utlanan ni Manases maoy gikan sa Aser hangtod sa Mikmetat,+ nga atbang sa Sekem,+ ug ang utlanan milahos pahabagatan* sa yuta sa mga molupyo sa En-Tapua. 8 Ang yuta sa Tapua+ naiya ni Manases, apan ang siyudad sa Tapua sa utlanan ni Manases iya sa mga kaliwat ni Epraim. 9 Ug ang utlanan minaog ngadto sa Walog* sa Kana, sa habagatan sa walog. Naay mga siyudad si Epraim diha sa mga siyudad ni Manases,+ ug ang utlanan ni Manases naa sa amihanan sa walog, ug sangko kini sa dagat.+ 10 Ang sa habagatan iya ni Epraim, ug ang sa amihanan iya ni Manases, ug ang dagat mao ang iyang utlanan.+ Sa amihanan, ang teritoryo ni Manases* nakaabot sa utlanan ni Aser, ug sa sidlakan nakaabot kini sa utlanan ni Isacar.

11 Sa mga teritoryo ni Isacar ug Aser, kini ang mga siyudad nga gihatag kang Manases apil ang mga molupyo ug mga lungsod nga sakop* niini: ang Bet-sean, Ibleam,+ Dor,+ En-dor,+ Taanak,+ ug Megido. Iyaha ang tulo sa habog nga mga dapit.

12 Apan kining mga siyudara wala mapanag-iya sa mga kaliwat ni Manases, kay ang mga Canaanhon determinadong magpabilin niining yutaa.+ 13 Dihang ang mga Israelinhon nahimong gamhanan, ilang gipailalom ang mga Canaanhon sa pinugos nga pagtrabaho,+ apan wala nila pahawaa tanan.+

14 Ang mga kaliwat ni Jose miingon kang Josue: “Nganong usa ra man ka bahin sa yuta* ang imong gihatag namo* ingong panulondon?+ Daghan kaayo mi, kay gipanalanginan mi ni Jehova hangtod karon.”+ 15 Si Josue mitubag: “Kon ingon ana gyod mo ka daghan ug dili igo ninyo ang kabukiran sa Epraim,+ tungas mo sa lasang, ug paghawan mo didto ug dapit nga kapuy-an sa yuta sa mga Perizihanon+ ug mga Repaim.”+ 16 Unya ang mga kaliwat ni Jose miingon: “Ang kabukiran kulang ra para namo, ug ang tanang Canaanhon nga nagpuyo sa walog* dunay mga karong panggubat+ nga naay nagsiwil nga mga espada,* kadtong tua sa Bet-sean+ ug sa mga lungsod nga sakop* niini ug kadtong tua sa Walog* sa Jezreel.”+ 17 Busa giingnan ni Josue ang mga kaliwat ni Jose, ang Epraim ug Manases: “Daghan kaayo mo ug gamhanan. Dili lang usa ka bahin sa yuta ang inyong madawat,+ 18 apan mainyo sab ang kabukiran.+ Bisag lasang kini, inyo ning hawanan, ug mahimo kining utlanan sa inyong teritoryo. Kay abogon ninyo ang mga Canaanhon bisag gamhanan sila ug dunay mga karong panggubat nga naay nagsiwil nga mga espada.”*+

18 Unya ang tibuok Israel nagtigom sa Shilo,+ ug ilang gipatindog didto ang tolda nga tagboanan+ kay nasakop na nila ang yuta.+ 2 Apan naa pay pito ka tribo sa mga Israelinhon nga wala pa magbahinbahin sa ilang panulondon. 3 Busa giingnan ni Josue ang mga Israelinhon: “Kanus-a pa man ninyo panag-iyahon ang yuta nga gihatag kaninyo ni Jehova nga Diyos sa inyong mga katigulangan?+ 4 Hatagi kog tulo ka lalaki sa matag tribo kay sugoon nako sila; ilang surbihon ang yuta ug maghimog mapa niini sumala sa ilang panulondon. Dayon mobalik sila nako. 5 Bahinon nila kini sa pito ka bahin.+ Ang tribo ni Juda magpabilin sa iyang teritoryo sa habagatan,+ ug ang mga kaliwat ni Jose magpabilin sa ilang teritoryo sa amihanan.+ 6 Himoi ninyog mapa ang yuta ug bahina kini sa pito ka bahin ug dad-a kini kanako. Magripa*+ ko dinhi para kaninyo sa atubangan ni Jehova nga atong Diyos. 7 Apan ang mga Levihanon wala hatagig bahin nga yuta+ kay ang ilang panulondon mao ang pag-alagad ingong mga saserdote ni Jehova.+ Ang tribo ni Gad ug Ruben ug ang katunga sa tribo ni Manases+ nakakuha nag panulondon sa sidlakan sa Jordan, nga gihatag kanila ni Moises nga alagad ni Jehova.”

8 Ang mga lalaki nangandam sa paglakaw, ug gisugo ni Josue kadtong mohimog mapa sa yuta: “Lakaw ug surbiha ang yuta ug himoi kinig mapa ug balik mo nako. Magripa ko dinhi para kaninyo sa atubangan ni Jehova sa Shilo.”+ 9 Busa ang mga lalaki nanglakaw ug gisurbi nila ang yuta. Gihimoan nilag mapa ang mga siyudad niini ug gibahin kini sa pito ka bahin ug girekord sa usa ka basahon. Human niana sila mibalik kang Josue sa kampo sa Shilo. 10 Dayon si Josue nagripa para kanila sa Shilo sa atubangan ni Jehova.+ Didto gibahinbahin ni Josue ang yuta ngadto sa mga Israelinhon, usa ka bahin kada tribo.+

11 Ang unang ripa naadto sa tribo ni Benjamin sumala sa ilang mga banay, ug ang ilang teritoryo natung-an sa teritoryo ni Juda+ ug teritoryo ni Jose.+ 12 Sa amihanan, ang ilang utlanan magsugod sa Jordan, ug kini mosaka paingon sa bakilid sa Jerico+ sa amihanan ug mosaka paingon sa bukid pakasadpan, ug kini molahos sa kamingawan sa Bet-aven.+ 13 Gikan didto ang utlanan mopaingon sa Luz, sa habagatang bakilid sa Luz, nga mao ang Bethel;+ kini monaog paingon sa Atarot-adar+ sa bukid nga naa sa habagatan sa Ubos nga Bet-horon.+ 14 Gikan didto, magsugod ang kasadpan nga utlanan. Gikan sa bukid sa habagatan sa Bet-horon kini molibot pahabagatan ug mosangko sa Kiriat-baal, nga mao ang Kiriat-jearim,+ usa ka siyudad sa Juda. Kini ang utlanan sa kasadpan.

15 Ang utlanan sa habagatan magsugod sa tumoy sa Kiriat-jearim paingon sa kasadpan. Kini molahos sa tuboran sa mga tubig sa Neptoa.+ 16 Ang utlanan monaog paingon sa tiilan sa bukid nga atbang sa Walog sa Anak ni Hinnom,+ nga naa sa amihanan sa Walog* sa Repaim,+ ug kini monaog ngadto sa Walog sa Hinnom, ngadto sa bakilid sa mga Jebusihanon+ sa habagatan, ug monaog paingon sa En-rogel.+ 17 Ang utlanan mosaka paamihanan ngadto sa En-semes dayon ngadto sa Gelilot, nga atbang sa tungasanan sa Adumim,+ ug kini monaog paingon sa bato+ ni Bohan+ nga anak ni Ruben. 18 Kini molahos ngadto sa amihanang bakilid atbang sa Araba ug monaog paingon sa Araba. 19 Ug ang utlanan molahos sa amihanang bakilid sa Bet-hogla,+ ug ang utlanan mosangko sa amihanang baybayon sa Dagat sa Asin*+ sa tumoy sa Jordan sa habagatan. Kini ang utlanan sa habagatan. 20 Ug ang utlanan sa sidlakan mao ang Jordan. Mao ni ang mga utlanan sa panulondon sa mga kaliwat ni Benjamin sumala sa ilang mga banay.

21 Kini ang mga siyudad sa tribo ni Benjamin sumala sa ilang mga banay: ang Jerico, Bet-hogla, Emek-keziz, 22 Bet-araba,+ Zemaraim, Bethel,+ 23 Avim, Para, Opra, 24 Kepar-amoni, Op-​ni, ug Geba+—12 ka siyudad, apil ang mga komunidad niini.

25 Ang Gabaon,+ Rama, Beerot, 26 Mizpe, Kepira, Mozah, 27 Rekem, Irpeel, Tarala, 28 Zelah,+ Ha-elep, Jebusi nga mao ang Jerusalem,+ Gibea+ ug Kiriat—14 ka siyudad, apil ang mga komunidad niini.

Mao ni ang panulondon sa mga kaliwat ni Benjamin sumala sa ilang mga banay.

19 Unya ang ikaduhang ripa*+ naadto sa tribo ni Simeon+ sumala sa ilang mga banay. Ug ang ilang panulondon naa sulod sa panulondon ni Juda.+ 2 Ang ilang panulondon mao ang Beer-seba+ apil ang Sheba, Molada,+ 3 Hazar-sual,+ Bala, Ezem,+ 4 Eltolad,+ Betul, Horma, 5 Ziklag,+ Bet-marcabot, Hazar-susa, 6 Bet-lebaot,+ ug Saruhen—13 ka siyudad, apil ang mga komunidad niini; 7 ang Ain, Rimon, Eter, ug Asan+⁠—​upat ka siyudad, apil ang mga komunidad niini; 8 ug ang tanang komunidad palibot niini nga mga siyudad hangtod sa Baalat-beer, ang Rama sa habagatan. Mao ni ang panulondon sa tribo ni Simeon sumala sa ilang mga banay. 9 Ang panulondon sa mga kaliwat ni Simeon gikuha gikan sa yuta ni Juda, kay ang bahin ni Juda dako kaayo para nila. Busa ang mga kaliwat ni Simeon nakapanag-iyag yuta sa panulondon ni Juda.+

10 Ang ikatulong ripa+ naadto sa mga kaliwat ni Zabulon+ sumala sa ilang mga banay, ug ang utlanan sa ilang panulondon nakaabot sa Sarid. 11 Ang ilang utlanan mosaka pakasadpan ngadto sa Mareal lahos sa Dabeset, unya ngadto sa walog* atbang sa Jokneam. 12 Gikan sa Sarid, kini mopaingon sa sidlakan ngadto sa utlanan sa Kislot-tabor ug ngadto sa Daberat,+ unya kini mosaka paingon sa Japia. 13 Gikan didto, kini molahos pasidlakan ngadto sa Gat-heper,+ ngadto sa Et-kazin, ug ngadto sa Rimon hangtod sa Nea. 14 Sa amihanan, ang utlanan moliko paingon sa Hanaton, ug kini mosangko sa Walog sa Ipta-el, 15 ug sa Katat, Nahalal, Simron,+ Idala, ug Betlehem+—12 ka siyudad, apil ang mga komunidad niini. 16 Mao ni ang panulondon sa mga kaliwat ni Zabulon sumala sa ilang mga banay.+ Mao ni ang ilang mga siyudad, apil ang mga komunidad niini.

17 Ang ikaupat nga ripa+ naadto sa mga kaliwat ni Isacar+ sumala sa ilang mga banay. 18 Ang ilang utlanan nakaabot sa Jezreel,+ Kesulot, Sunem,+ 19 Haparaim, Shion, Anaharat, 20 Rabit, Kision, Ebez, 21 Remet, En-ganim,+ En-hada, ug Bet-pazez. 22 Ang ilang utlanan nakaabot sa Tabor,+ Sahazuma, ug Bet-semes, ug kini mosangko sa Jordan—16 ka siyudad, apil ang mga komunidad niini. 23 Mao ni ang panulondon sa tribo ni Isacar sumala sa ilang mga banay,+ ang mga siyudad ug mga komunidad niini.

24 Ang ikalimang ripa+ naadto sa tribo ni Aser+ sumala sa ilang mga banay. 25 Ang ilang utlanan mao ang Helkat,+ Hali, Beten, Aksap, 26 Alamelek, Amad, ug Misal. Kini nakaabot sa Carmelo+ ug sa Sihor-libnat sa kasadpan, 27 ug kini mobalik pasidlakan ngadto sa Bet-dagon hangtod sa Zabulon ug sa Walog sa Ipta-el sa amihanan, sa Bet-emek ug Neiel, ug kini mopaingon sa Cabul sa wala, 28 ug sa Ebron, Rehob, Hamon, ug Kana hangtod sa Dakong Sidon.+ 29 Ug ang utlanan mobalik sa Rama hangtod sa pinarilang siyudad sa Tiro.+ Unya kini mobalik sa Hosa ug mosangko sa dagat sa rehiyon sa Akzib, 30 Uma, Apek,+ ug Rehob+—22 ka siyudad, apil ang mga komunidad niini. 31 Mao ni ang panulondon sa tribo ni Aser sumala sa ilang mga banay.+ Mao ni ang ilang mga siyudad, apil ang mga komunidad niini.

32 Ang ikaunom nga ripa+ naadto sa mga kaliwat ni Neptali sumala sa ilang mga banay. 33 Ang ilang utlanan magsugod sa Helep, gikan sa dakong kahoy sa Zaananim,+ ug sa Adami-nekeb ug Jabneel hangtod sa Lakum; kini mosangko sa Jordan. 34 Ang utlanan mobalik pakasadpan ngadto sa Aznot-tabor, ug gikan didto kini mopaingon sa Hukkok ug moabot sa Zabulon sa habagatan ug sa Aser sa kasadpan ug sa yuta ni Juda* sa Jordan sa sidlakan. 35 Ang pinarilang mga siyudad mao ang Zidim, Zer, Hammat,+ Rakat, Kineret, 36 Adama, Rama, Hazor,+ 37 Kedes,+ Edrei, En-hazor, 38 Yiron, Migdal-el, Horem, Bet-anat, ug Bet-semes+—19 ka siyudad, apil ang mga komunidad niini. 39 Mao ni ang panulondon sa tribo ni Neptali sumala sa ilang mga banay,+ ang mga siyudad ug mga komunidad niini.

40 Ang ikapitong ripa+ naadto sa tribo ni Dan+ sumala sa ilang mga banay. 41 Ang utlanan sa ilang panulondon mao ang Zora,+ Estaol, Ir-semes, 42 Saalabin,+ Aijalon,+ Itla, 43 Elon, Timnah,+ Ekron,+ 44 Eltekeh, Gibeton,+ Baalat, 45 Jehud, Bene-berak, Gat-rimon,+ 46 Me-jarkon, ug Rakon, apil ang utlanan atbang sa Jope.+ 47 Apan ang teritoryo sa tribo ni Dan gamay kaayo para nila.+ Busa mitungas sila ug nakiggubat sa Lesem+ ug nailog kini ug gipamatay ang katawhan niini pinaagig espada. Unya ilang gipanag-iya ug gipuy-an kini. Ang Lesem ginganlan nilag Dan, sumala sa ngalan ni Dan nga ilang katigulangan.+ 48 Mao ni ang panulondon sa tribo ni Dan sumala sa ilang mga banay. Mao ni ang ilang mga siyudad, apil ang mga komunidad niini.

49 Busa nahuman nilag bahin ang ilang panulondon nga yuta sumala sa mga teritoryo niini. Unya gihatagan sa mga Israelinhon si Josue nga anak ni Nun ug panulondon gikan sa ilang yuta. 50 Sa sugo ni Jehova, gihatag nila kaniya ang siyudad nga iyang gipangayo, ang Timnat-sera,+ sa kabukiran sa Epraim, ug gitukod niya ang siyudad ug mipuyo niini.

51 Mao ni ang mga panulondon nga giapod-apod ni Eleasar nga saserdote, ni Josue nga anak ni Nun, ug sa mga pangulo sa mga banay* sa mga tribo sa Israel+ pinaagig ripa didto sa Shilo+ sa atubangan ni Jehova, sa entrada sa tolda nga tagboanan.+ Busa natapos nila ang pagbahinbahin sa yuta.

20 Unya si Jehova miingon kang Josue: 2 “Sultihi ang mga Israelinhon, ‘Pagpili mog mga siyudad nga dangpanan+ nga akong giingon kaninyo pinaagi kang Moises, 3 aron didto modangop kadtong dili tinuyo o aksidenteng makapatay ug tawo. Kini ang inyong dangpanan gikan sa tigpanimalos sa dugo.+ 4 Siya kinahanglang modangop sa usa niining mga siyudara+ ug motindog sa ganghaan sa siyudad+ ug isulti niya sa mga ansiyano sa siyudad ang nahitabo. Unya ilang pasudlon siya sa siyudad ug hatagag dapit nga kapuy-an ug magpuyo siya uban nila. 5 Kon gukdon siya sa tigpanimalos sa dugo, dili nila itugyan ang nakapatay ngadto kaniya, kay aksidente lang nga napatay niya ang iyang isigkatawo ug wala siyay pagdumot kaniya.+ 6 Siya kinahanglang mopuyo nianang siyudara hangtod nga siya moatubang sa kongregasyon+ ug magpabilin siya didto hangtod nga mamatay ang hataas nga saserdote+ nga nag-alagad nianang panahona. Unya ang nakapatay makauli na sa iyang balay sa siyudad nga iyang gigikanan.’”+

7 Busa ilang gihimong sagrado* ang Kedes+ sa Galilea sa kabukiran sa Neptali, ang Sekem+ sa kabukiran sa Epraim, ug ang Kiriat-arba,+ nga mao ang Hebron, sa kabukiran sa Juda. 8 Sa rehiyon sa Jordan, sa sidlakan sa Jerico, gipili nila ang Bezer+ sa kamingawan nga naa sa habog nga kapatagan gikan sa tribo ni Ruben, ang Ramot+ sa Gilead gikan sa tribo ni Gad, ug ang Golan+ sa Basan gikan sa tribo ni Manases.+

9 Kini ang mga siyudad nga gipili para sa tanang Israelinhon ug sa mga langyaw nga residente nga nagpuyo uban nila, aron kadtong makapatay nga wala tuyoa makadangop didto+ ug dili siya mapatay sa tigpanimalos sa dugo una pa siya moatubang sa kongregasyon.+

21 Unya ang mga pangulo sa mga banay* sa mga Levihanon miduol kang Eleasar+ nga saserdote, kang Josue nga anak ni Nun, ug sa mga pangulo sa mga banay* sa mga tribo sa Israel. 2 Sila miingon kanila sa Shilo+ sa yuta sa Canaan: “Si Jehova nagsugo pinaagi kang Moises nga hatagan mig mga siyudad nga kapuy-an, apil ang mga sibsibanan niini para sa among mga hayop.”+ 3 Busa sumala sa sugo ni Jehova, gihatagan sa mga Israelinhon ang mga Levihanon ug mga siyudad+ apil ang mga sibsibanan niini gikan sa ilang panulondon.+

4 Ang unang ripa* naadto sa mga banay sa mga Kohatnon,+ ug ang mga Levihanon nga kaliwat ni Aaron nga saserdote gihatagag 13 ka siyudad pinaagig ripa gikan sa tribo ni Juda,+ tribo ni Simeon,+ ug tribo ni Benjamin.+

5 Ang ubang Kohatnon gihatagan* ug 10 ka siyudad gikan sa mga banay sa tribo ni Epraim,+ tribo ni Dan, ug katunga sa tribo ni Manases.+

6 Ang mga Gersonhon+ gihatagag 13 ka siyudad gikan sa mga banay sa tribo ni Isacar, tribo ni Aser, tribo ni Neptali, ug katunga sa tribo ni Manases sa Basan.+

7 Ang mga Merarihanon+ gihatagag 12 ka siyudad sumala sa ilang mga banay gikan sa tribo ni Ruben, tribo ni Gad, ug tribo ni Zabulon.+

8 Busa pinaagig ripa gihatag sa mga Israelinhon ngadto sa mga Levihanon kining mga siyudara apil ang mga sibsibanan niini, sumala sa gisugo ni Jehova pinaagi kang Moises.+

9 Busa gikan sa tribo ni Juda ug tribo ni Simeon, ang mga siyudad nga ginganlan dinhi ilang gihatag+ 10 sa mga anak ni Aaron, nga gikan sa mga banay sa mga Kohatnon nga mga Levihanon, kay sila ang nakadawat sa unang ripa. 11 Ilang gihatag kanila ang Kiriat-arba+ (si Arba ang amahan ni Anak), nga mao ang Hebron+ sa kabukiran sa Juda, apil ang mga sibsibanan sa palibot niini. 12 Apan ang yuta sa siyudad ug ang mga komunidad niini ilang gihatag kang Caleb nga anak ni Jepune ug iya kining napanag-iya.+

13 Ilang gihatag sa mga anak ni Aaron nga saserdote ang Hebron+ nga siyudad nga dangpanan para sa tawong nakapatay+ apil ang mga sibsibanan niini, ang Libna+ ug ang mga sibsibanan niini, 14 ang Jatir+ ug ang mga sibsibanan niini, ang Estemoa+ ug ang mga sibsibanan niini, 15 ang Holon+ ug ang mga sibsibanan niini, ang Debir+ ug ang mga sibsibanan niini, 16 ang Ain+ ug ang mga sibsibanan niini, ang Juta+ ug ang mga sibsibanan niini, ug ang Bet-semes ug ang mga sibsibanan niini—siyam ka siyudad gikan niining duha ka tribo.

17 Ug gikan sa tribo ni Benjamin: ang Gabaon+ ug ang mga sibsibanan niini, ang Geba ug ang mga sibsibanan niini,+ 18 ang Anatot+ ug ang mga sibsibanan niini, ug ang Almon ug ang mga sibsibanan niini—upat ka siyudad.

19 Ang tanang siyudad nga gihatag ngadto sa mga kaliwat ni Aaron nga mga saserdote maoy 13 ka siyudad, apil ang mga sibsibanan niini.+

20 Ang ubang banay sa mga Kohatnon nga mga Levihanon gihatagag mga siyudad gikan sa tribo ni Epraim pinaagig ripa. 21 Ilang gihatag kanila ang Sekem+ nga siyudad nga dangpanan para sa tawong nakapatay+ apil ang mga sibsibanan niini sa kabukiran sa Epraim, ang Gezer+ ug ang mga sibsibanan niini, 22 ang Kibzaim ug ang mga sibsibanan niini, ug ang Bet-horon+ ug ang mga sibsibanan niini—upat ka siyudad.

23 Ug gikan sa tribo ni Dan: ang Elteke ug ang mga sibsibanan niini, ang Gibeton ug ang mga sibsibanan niini, 24 ang Aijalon+ ug ang mga sibsibanan niini, ug ang Gat-rimon ug ang mga sibsibanan niini—upat ka siyudad.

25 Ug gikan sa katunga sa tribo ni Manases: ang Taanak+ ug ang mga sibsibanan niini ug ang Gat-rimon ug ang mga sibsibanan niini—duha ka siyudad.

26 Ang tanang siyudad nga nadawat sa ubang banay sa mga Kohatnon maoy 10 ka siyudad, apil ang mga sibsibanan niini.

27 Ang mga Gersonhon+ sa mga banay sa mga Levihanon nakadawat gikan sa katunga sa tribo ni Manases ug siyudad nga dangpanan para sa tawong nakapatay nga mao ang Golan+ sa Basan apil ang mga sibsibanan niini ug nadawat sab nila ang Beestera ug ang mga sibsibanan niini—duha ka siyudad.

28 Ug gikan sa tribo ni Isacar:+ ang Kision ug ang mga sibsibanan niini, ang Daberat+ ug ang mga sibsibanan niini, 29 ang Jarmut ug ang mga sibsibanan niini, ug ang En-ganim ug ang mga sibsibanan niini—upat ka siyudad.

30 Ug gikan sa tribo ni Aser:+ ang Misal ug ang mga sibsibanan niini, ang Abdon ug ang mga sibsibanan niini, 31 ang Helkat+ ug ang mga sibsibanan niini, ug ang Rehob+ ug ang mga sibsibanan niini—upat ka siyudad.

32 Ug gikan sa tribo ni Neptali: ang Kedes+ sa Galilea nga siyudad nga dangpanan+ para sa tawong nakapatay apil ang mga sibsibanan niini, ang Hamot-dor ug ang mga sibsibanan niini, ug ang Kartan ug ang mga sibsibanan niini—tulo ka siyudad.

33 Ang tanang siyudad sa mga Gersonhon sumala sa ilang mga banay maoy 13 ka siyudad, apil ang mga sibsibanan niini.

34 Ang mga banay sa mga Merarihanon,+ ang nahibilin sa mga Levihanon, nakadawat niini gikan sa tribo ni Zabulon:+ ang Jokneam+ ug ang mga sibsibanan niini, ang Karta ug ang mga sibsibanan niini, 35 ang Dimna ug ang mga sibsibanan niini, ug ang Nahalal+ ug ang mga sibsibanan niini—upat ka siyudad.

36 Ug gikan sa tribo ni Ruben: ang Bezer+ ug ang mga sibsibanan niini, ang Jahaz ug ang mga sibsibanan niini,+ 37 ang Kedemot ug ang mga sibsibanan niini, ug ang Mepaat ug ang mga sibsibanan niini—upat ka siyudad.

38 Ug gikan sa tribo ni Gad:+ ang Ramot sa Gilead+ nga siyudad nga dangpanan para sa tawong nakapatay apil ang mga sibsibanan niini, ang Mahanaim+ ug ang mga sibsibanan niini, 39 ang Hesbon+ ug ang mga sibsibanan niini, ug ang Jazer+ ug ang mga sibsibanan niini—upat ka siyudad.

40 Ang tanang siyudad nga gihatag ngadto sa mga Merarihanon, ang nahibilin sa mga Levihanon, maoy 12 ka siyudad sumala sa ilang mga banay.

41 Ang tanang siyudad sa mga Levihanon diha sa yuta sa mga Israelinhon maoy 48 ka siyudad, apil ang mga sibsibanan niini.+ 42 Ang matag usa niining mga siyudara dunay mga sibsibanan sa palibot niini.

43 Busa gihatag ni Jehova sa Israel ang tanang yuta nga iyang gipanumpa nga ihatag sa ilang mga katigulangan,+ ug gipanag-iya nila kini ug mipuyo niini.+ 44 Dugang pa, gihatagan silag pahulay ni Jehova gikan sa tanan nilang kaaway sa palibot, sumala sa iyang gipanumpa sa ilang mga katigulangan,+ ug walay bisan usa sa ilang mga kaaway ang nakapildi nila.+ Gitugyan ni Jehova sa ilang kamot ang tanan nilang kaaway.+ 45 Sa tanang maayong saad nga gisaad ni Jehova sa panimalay ni Israel, walay bisan usa ka saad* nga napakyas; natuman kining tanan.+

22 Unya gipatawag ni Josue ang mga Rubenhon, Gadhanon, ug ang katunga sa tribo ni Manases 2 ug giingnan sila: “Gibuhat ninyo ang tanang gisugo kaninyo ni Moises nga alagad ni Jehova,+ ug inyong gisunod ang tanan nakong gisugo kaninyo.+ 3 Wala gyod ninyo biyai ang inyong mga igsoon hangtod karon;+ ug gituman ninyo ang sugo ni Jehova nga inyong Diyos.+ 4 Karon gihatagan nag pahulay ni Jehova nga inyong Diyos ang inyong mga igsoon, sumala sa iyang gisaad kanila.+ Busa puwede na mong manguli sa yuta nga inyong gipanag-iya, nga gihatag kaninyo ni Moises nga alagad ni Jehova didto sa tabok* sa Jordan.+ 5 Apan paneguroa nga inyo gyong matuman ang sugo ug Balaod nga gihatag kaninyo ni Moises nga alagad ni Jehova,+ pinaagi sa paghigugma kang Jehova nga inyong Diyos,+ pinaagi sa pagsubay sa tanan niyang dalan,+ pinaagi sa pagtuman sa iyang mga sugo,+ pinaagi sa pag-unong kaniya,+ ug pinaagi sa pag-alagad kaniya+ sa bug-os ninyong kasingkasing ug sa bug-os ninyong kalag.”*+

6 Unya gipanalanginan sila ni Josue ug gipalakaw, ug nanguli sila sa ilang mga puy-anan. 7 Ang katunga sa tribo ni Manases gihatagan ni Moises ug panulondon sa Basan,+ ug ang laing katunga sa tribo gihatagan ni Josue ug yuta sa kasadpan sa Jordan+ uban sa ilang mga igsoon. Dugang pa, dihang gipapauli sila ni Josue, iya silang gipanalanginan 8 ug giingnan: “Pauli mo dala ang daghang bahandi ug ang daghan kaayong kahayopan, plata ug bulawan, tumbaga ug puthaw, ug daghan kaayong besti.+ Kuhaa ang mga inilog+ gikan sa mga kaaway ug bahini ang inyong mga igsoon.”

9 Unya ang mga Rubenhon, Gadhanon, ug ang katunga sa tribo ni Manases mibiya sa ubang Israelinhon sa Shilo sa yuta sa Canaan ug nanguli sa Gilead,+ ang yuta nga ilang gipanag-iya diin sila gipapuyo sumala sa sugo ni Jehova pinaagi kang Moises.+ 10 Pag-abot nila sa mga rehiyon sa Jordan sa yuta sa Canaan, ang mga Rubenhon, Gadhanon, ug ang katunga sa tribo ni Manases naghimog dako kaayong halaran duol sa Jordan. 11 Sa ulahi ang ubang Israelinhon nakabalita niini+ ug miingon: “Tan-awa! Ang mga Rubenhon, Gadhanon, ug ang katunga sa tribo ni Manases naghimog halaran sa utlanan sa yuta sa Canaan duol sa Jordan sa yuta nga atong gipanag-iya.” 12 Pagkadungog niini sa mga Israelinhon, ang tibuok Israel nagtigom sa Shilo+ aron makiggubat nila.

13 Unya gipaadto sa mga Israelinhon si Pinehas+ nga anak ni Eleasar nga saserdote ngadto sa mga Rubenhon, Gadhanon, ug sa katunga sa tribo ni Manases sa yuta sa Gilead, 14 ug kauban niya ang 10 ka lalaki, usa ka pangulo sa matag tribo sa Israel, nga ang matag usa pangulo sa iyang banay* taliwala sa linibo* sa Israel.+ 15 Pag-abot nila sa Gilead, giingnan nila ang mga Rubenhon, Gadhanon, ug ang katunga sa tribo ni Manases:

16 “Kini ang giingon sa tibuok katawhan ni Jehova, ‘Nganong nagluib+ man mo sa Diyos sa Israel? Miundang mo karon sa pagsunod kang Jehova kay naghimo mog halaran ug mirebelde kang Jehova.+ 17 Dili pa ba igo ang sala nga atong gihimo sa Peor? Nalimot na ba mo sa hampak nga midangat sa katawhan ni Jehova? Wala pa gihapon nato mahinloi ang atong kaugalingon sa maong sala.+ 18 Unya karon mohunong mo sa pagsunod kang Jehova! Kon morebelde mo karon kang Jehova, ugma masuko siya sa tibuok katawhan sa Israel.+ 19 Karon kon hugaw ang yuta nga inyong gipanag-iya, tabok mo sa yuta nga gipanag-iya ni Jehova+ diin nahimutang ang tabernakulo ni Jehova,+ ug puyo uban namo. Ayaw mog rebelde kang Jehova ug ayaw mi himoang rebelde tungod sa inyong paghimog kaugalingong halaran, nga dugang sa halaran ni Jehova nga atong Diyos.+ 20 Dihang si Acan+ nga anak ni Zera wala magmatinumanon labot sa butang nga angayng laglagon, dili ba ang Diyos nasuko sa tibuok katawhan sa Israel?+ Ug dili lang siya ang namatay sa iyang sayop.’”+

21 Niana ang mga Rubenhon, Gadhanon, ug ang katunga sa tribo ni Manases mitubag sa mga pangulo sa linibo* sa Israel:+ 22 “Ang Diyos sa mga diyos, si Jehova!* Ang Diyos sa mga diyos, si Jehova!+ Siya nahibalo, ug ang Israel sab mahibalo. Kon mirebelde mi ug wala magmatinumanon kang Jehova, ayaw mig luwasa niining adlawa. 23 Kon naghimo mig among halaran aron mohunong sa pagsunod kang Jehova ug magtanyag niinig mga halad nga sinunog, mga halad nga lugas, ug mga halad sa panag-ambit, si Jehova mopahamtang sa silot.+ 24 Apan gihimo namo ni nga halaran kay nabalaka mi nga basin sa umaabot ang inyong mga anak moingon sa among mga anak: ‘Unsay labot ninyo kang Jehova nga Diyos sa Israel? 25 Ang Jordan gihimo ni Jehova nga utlanan tali kanamo ug kaninyo nga mga Rubenhon ug Gadhanon. Wala moy bahin kang Jehova.’ Ug pugngan sa inyong mga anak ang among mga anak sa pagsimba* kang Jehova.

26 “Busa miingon mi nga maghimo mig among halaran, dili para sa mga halad nga sinunog o mga halad, 27 kondili aron mahimong saksi tali kaninyo ug kanamo+ ug sa atong mga kaliwat* sa umaabot nga kami mag-alagad sa atubangan ni Jehova pinaagi sa among mga halad nga sinunog ug sa among mga halad ug sa among mga halad sa panag-ambit,+ aron sa umaabot ang inyong mga anak dili moingon sa among mga anak: ‘Wala moy bahin kang Jehova.’ 28 Busa miingon mi, ‘Kon isulti nila kini kanato ug sa atong mga kaliwat* sa umaabot, sultihan nato sila: “Tan-awa ang halaran nga gihimo sa among mga katigulangan nga parehas sa halaran ni Jehova. Dili kini para sa mga halad nga sinunog o mga halad, kondili ingong saksi tali kaninyo ug kanamo.”’ 29 Dili gyod mi makaako sa pagrebelde kang Jehova ug mohunong sa pagsunod kang Jehova+ karon pinaagi sa paghimog halaran para sa mga halad nga sinunog, mga halad nga lugas, ug mga halad, gawas sa halaran ni Jehova nga atong Diyos nga naa atubangan sa iyang tabernakulo!”+

30 Dihang si Pinehas nga saserdote, ang mga pangulo sa katawhan,* ug ang mga pangulo sa linibo* sa Israel nga kauban niya nakadungog sa giingon sa mga kaliwat ni Ruben, Gad, ug Manases, natin-awan sila.+ 31 Busa giingnan ni Pinehas nga anak ni Eleasar nga saserdote ang mga kaliwat ni Ruben, Gad, ug Manases: “Karon nahibalo mi nga si Jehova nagauban nato, kay wala mo morebelde kang Jehova. Busa dili ta silotan ni Jehova.”

32 Unya si Pinehas nga anak ni Eleasar nga saserdote ug ang mga pangulo namalik sa yuta sa Gilead gikan sa mga Rubenhon ug mga Gadhanon sa yuta sa Canaan, ug mireport sila sa ubang Israelinhon. 33 Ug ang mga Israelinhon natin-awan sa report. Gidayeg sa mga Israelinhon ang Diyos, ug wala na sila maghisgot nga makiggubat sa mga Rubenhon ug mga Gadhanon aron laglagon ang yuta nga ilang gipuy-an.

34 Busa ginganlan sa mga Rubenhon ug mga Gadhanon ang halaran,* kay “kini maoy saksi tali kanato nga si Jehova ang matuod nga Diyos.”

23 Paglabay sa daghang tuig human hatagi ni Jehova ug kalinaw ang Israel+ gikan sa tanan nilang kaaway sa palibot, dihang si Josue tigulang na kaayo,+ 2 gipatawag ni Josue ang tibuok Israel,+ ang mga ansiyano, mga pangulo, mga maghuhukom, ug mga opisyal,+ ug miingon: “Tigulang na kaayo ko. 3 Ug nakita ninyo ang tanang gibuhat ni Jehova nga inyong Diyos niining tanang kanasoran para kaninyo, kay si Jehova nga inyong Diyos ang nakig-away para ninyo.+ 4 Akong gihatag kaninyo pinaagig ripa*+ ang nahibiling yuta sa mga nasod ingong panulondon sa inyong mga tribo,+ apil ang yuta sa tanang nasod nga akong gilaglag,+ gikan sa Jordan hangtod sa Dakong Dagat* sa kasadpan. 5 Si Jehova nga inyong Diyos mao ang nag-abog kanila gikan sa inyong atubangan,+ ug iyang gipapahawa* sila para kaninyo, ug gipanag-iya ninyo ang ilang yuta, sumala sa gisaad kaninyo ni Jehova nga inyong Diyos.+

6 “Karon kinahanglang magmaisogon gyod mo sa pagtuman sa tanang nasulat sa basahon sa Balaod+ ni Moises pinaagi sa dili pagtipas niini,+ 7 pinaagi sa dili pagpakig-uban sa mga nasod+ nga naa pa uban ninyo. Ayaw gyod himoa bisan ang paghisgot sa ngalan sa ilang mga diyos+ o ang pagpanumpa pinaagi kanila, ug ayaw gyod mo pag-alagad o pagyukbo kanila.+ 8 Apan kinahanglan mong mounong kang Jehova nga inyong Diyos,+ sama sa inyong gihimo hangtod karon. 9 Abogon ni Jehova ang dagko ug gamhanang mga nasod gikan sa inyong atubangan,+ kay wala pay tawo nga nakapildi ninyo hangtod karon.+ 10 Usa lang ka tawo ninyo ang mogukod sa usa ka libo,+ kay si Jehova nga inyong Diyos ang nakig-away para ninyo,+ sumala sa iyang gisaad kaninyo.+ 11 Busa pagbantay mo kanunay+ pinaagi sa paghigugma kang Jehova nga inyong Diyos.+

12 “Apan kon mobiya mo sa Diyos ug motapot sa mga nahibilin niining mga nasora nga naa pa+ uban ninyo ug makig-alyansa mo nila pinaagig kaminyoon+ ug makig-uban nila, 13 timan-i nga dili na ipadayon ni Jehova nga inyong Diyos ang pag-abog* niining mga nasora para kaninyo.+ Sila mahimong lit-ag ug latigo sa inyong mga kilid+ ug mga tunok sa inyong mga mata hangtod nga malaglag mo gikan niining maayong yuta nga gihatag kaninyo ni Jehova nga inyong Diyos.

14 “Hapit na kong mamatay, ug nahibalo mo pag-ayo sa bug-os ninyong kasingkasing ug sa bug-os ninyong kalag* nga walay usa ka pulong gikan sa tanang maayong saad nga gisaad kaninyo ni Jehova nga inyong Diyos ang napakyas. Kining tanan natuman para kaninyo. Walay usa ka pulong niini ang napakyas.+ 15 Apan sama nga nahitabo kaninyo ang tanang maayong saad nga gisulti ni Jehova nga inyong Diyos,+ ipahinabo sab ni Jehova kaninyo ang tanang kadaot* nga iyang gisulti ug laglagon mo niya gikan niining maayong yuta nga gihatag kaninyo ni Jehova nga inyong Diyos.+ 16 Kon lapason ninyo ang pakigsaad ni Jehova nga inyong Diyos nga iyang gisugo nga inyong tumanon ug mosimba mo sa laing mga diyos ug moyukbo nila, mosilaob gayod ang kasuko ni Jehova batok kaninyo,+ ug kamo malaglag dayon gikan sa maayong yuta nga iyang gihatag kaninyo.”+

24 Unya gitigom ni Josue ang tanang tribo sa Israel didto sa Sekem ug gipatawag ang mga ansiyano sa Israel, mga pangulo, mga maghuhukom, ug mga opisyal,+ ug sila mitindog atubangan sa matuod nga Diyos. 2 Si Josue miingon sa tibuok katawhan: “Kini ang giingon ni Jehova nga Diyos sa Israel, ‘Ang inyong mga katigulangan,+ apil si Tera nga amahan ni Abraham ug Nahor, nagpuyo kaniadto+ sa tabok sa Suba* ug nag-alagad kaniadto sa ubang mga diyos.+

3 “‘Sa ulahi, akong gikuha sa tabok sa Suba* si Abraham+ nga inyong katigulangan ug gipalakaw siya sa tibuok yuta sa Canaan ug gipadaghan ang iyang kaliwat.*+ Akong gihatag kaniya si Isaac.+ 4 Unya akong gihatag kang Isaac si Jacob ug Esau.+ Sa ulahi akong gihatag kang Esau ang Bukid sa Seir aron iyang mapanag-iya;+ ug si Jacob ug ang iyang mga anak miadto sa Ehipto.+ 5 Sa ulahi akong gipadala si Moises ug Aaron,+ ug akong gihampak ang Ehipto,+ dayon gipagawas mo nako. 6 Dihang gipagawas nako sa Ehipto+ ang inyong mga amahan ug nakaabot mo sa dagat, ang inyong mga amahan gigukod sa mga Ehiptohanon, nga may mga karong panggubat ug sundalong mangangabayo, hangtod sa Pulang Dagat.+ 7 Sila nagpakitabang kang Jehova,+ maong nagbutang siyag itom nga panganod taliwala ninyo ug sa mga Ehiptohanon ug iyang gibalik ang dagat ug gitabonan sila,+ ug nakita ninyo mismo ang akong gibuhat sa Ehipto.+ Unya kamo nagpuyo sa kamingawan sa daghang katuigan.*+

8 “‘Ug gidala mo nako sa yuta sa mga Amorihanon nga nagpuyo sa tabok* sa Jordan, ug nakiggubat sila ninyo.+ Apan gitugyan nako sila sa inyong kamot aron inyong mapanag-iya ang ilang yuta, ug akong gilaglag sila sa inyong atubangan.+ 9 Unya ang hari sa Moab nga si Balak nga anak ni Zipor nakiggubat sa Israel. Busa iyang gipatawag si Balaam nga anak ni Beor sa pagtunglo kaninyo.+ 10 Apan wala ko maminaw kang Balaam.+ Busa balikbalik mo niyang gipanalanginan,+ ug giluwas mo nako gikan kaniya.+

11 “‘Unya mitabok mo sa Jordan+ ug nakaabot sa Jerico.+ Ang mga lider* sa Jerico, ang mga Amorihanon, Perizihanon, Canaanhon, Hitihanon, Girgasihanon, Hivihanon, ug Jebusihanon nakiggubat ninyo, apan gitugyan nako sila sa inyong kamot.+ 12 Sa wala pa mo makaabot nila, akong gipahinabo nga mawad-an silag paglaom* maong nangikyas sila sa inyong atubangan+—ang duha ka hari sa mga Amorihanon. Nahitabo kini dili tungod sa inyong espada ug pana.+ 13 Busa gihatagan mo nakog yuta nga wala ninyo hagoi ug mga siyudad nga wala ninyo tukora.+ Nagkaon mo gikan sa mga ubasan ug mga kaolibohan nga dili kamoy nagtanom.’+

14 “Busa kahadloki ninyo si Jehova ug alagara siya uban ang integridad* ug pagkamatinumanon,*+ ug wagtanga ang mga diyos nga gialagaran sa inyong mga katigulangan sa tabok sa Suba* ug sa Ehipto,+ ug alagara si Jehova. 15 Karon kon daotan para ninyo nga moalagad kang Jehova, pagpili karong adlawa kon kinsay inyong alagaran,+ ang mga diyos ba nga gialagaran sa inyong mga katigulangan sa tabok sa Suba*+ o ang mga diyos sa mga Amorihanon sa yuta nga inyong gipuy-an.+ Apan para nako ug sa akong panimalay, kami mag-alagad kang Jehova.”

16 Niana ang katawhan mitubag: “Dili mi makaako nga mobiya kang Jehova ug moalagad sa laing mga diyos. 17 Si Jehova nga atong Diyos ang nagpagawas kanato ug sa atong mga amahan gikan sa Ehipto+ diin kita giulipon,+ ug siya ang naghimo niining dagkong ilhanan nga ato mismong nakita.+ Gibantayan ta niya sa tibuok natong panaw ug batok sa tanang katawhan nga atong naagian.+ 18 Giabog ni Jehova ang tanang katawhan, apil ang mga Amorihanon, nga nagpuyo kaniadto niining yutaa. Busa mag-alagad sab mi kang Jehova kay siya ang among Diyos.”

19 Unya si Josue miingon sa katawhan: “Dili mo makahimo sa pag-alagad kang Jehova kay balaan siya nga Diyos;+ siya maoy Diyos nga nangayog eksklusibong debosyon.+ Dili niya pasayloon ang inyong kalapasan* ug mga sala.+ 20 Kon mobiya mo kang Jehova ug moalagad sa ubang mga diyos, siya usab motalikod kaninyo, ug laglagon mo niya bisag gihimoan mo niyag maayo sa una.”+

21 Apan ang katawhan miingon kang Josue: “Dili. Moalagad gyod mi kang Jehova!”+ 22 Busa si Josue miingon sa katawhan: “Saksi mo sa inyong kaugalingon nga kinabubut-on mong mipili nga moalagad kang Jehova.”+ Niini sila miingon: “Mga saksi mi.”

23 “Busa wagtanga ang ubang mga diyos nga naa ninyo, ug alagara si Jehova nga Diyos sa Israel sa tibuok ninyong kasingkasing.” 24 Ang katawhan miingon kang Josue: “Moalagad mi kang Jehova, ug mamati mi sa iyang tingog!”

25 Busa si Josue nakigsaad uban sa katawhan niadtong adlawa ug mihimog regulasyon ug balaod para kanila didto sa Sekem. 26 Unya gisulat kini ni Josue sa basahon sa Balaod sa Diyos+ ug mikuhag dakong bato+ ug gibutang kini ilalom sa dakong kahoy duol sa sangtuwaryo ni Jehova.

27 Si Josue dugang miingon sa tibuok katawhan: “Tan-awa! Kining batoha magsilbing saksi batok kanato,+ kay nakadungog kini sa tanang gisulti ni Jehova kanato, ug magsilbi kining saksi batok kaninyo, aron dili ninyo ilimod ang inyong Diyos.” 28 Dayon gipalakaw ni Josue ang katawhan, ang matag usa ngadto sa iyang yuta.+

29 Unya si Josue nga anak ni Nun, ang alagad ni Jehova, namatay sa edad nga 110.+ 30 Busa ilang gilubong siya sa teritoryo nga iyang napanag-iya sa Timnat-sera,+ nga naa sa kabukiran sa Epraim, amihanan sa Bukid sa Gaas. 31 Ang Israel padayong nag-alagad kang Jehova sa tanang adlaw ni Josue ug sa tanang adlaw sa mga ansiyano nga buhi pa human mamatay si Josue ug kinsa nahibalo sa tanang gibuhat ni Jehova para sa Israel.+

32 Ang mga bukog ni Jose,+ nga gidala sa mga Israelinhon gikan sa Ehipto, ilang gilubong sa Sekem sa usa ka luna sa yuta nga gipalit ni Jacob sa mga anak ni Hamor,+ nga amahan ni Sekem, sa kantidad nga 100 ka pirasong salapi;+ ug nahimo kining panulondon sa mga anak ni Jose.+

33 Namatay sab si Eleasar nga anak ni Aaron.+ Busa ilang gilubong siya sa Bungtod ni Pinehas nga iyang anak,+ nga gihatag kaniya sa kabukiran sa Epraim.