Deuteronomio

34 Unya si Moises mitungas gikan sa desyertong kapatagan sa Moab ngadto sa Bukid sa Nebo,+ ngadto sa tumoy sa Pisga,+ nga nag-atubang sa Jerico.+ Ug gipakita kaniya ni Jehova ang tibuok yuta, sa Gilead hangtod sa Dan,+ 2 ug ang tibuok Neptali ug ang yuta sa Epraim ug sa Manases ug ang tibuok yuta sa Juda hangtod sa dagat sa kasadpan,+ 3 ug ang Negeb+ ug ang Distrito,+ ang patag sa walog sa Jerico, ang siyudad sa mga kahoy nga palma,+ hangtod sa Zoar.+

4 Ug si Jehova miingon kaniya: “Mao kini ang yuta nga bahin niini ako nanumpa kang Abraham, Isaac ug Jacob, nga nag-ingon, ‘Ihatag ko kini sa imong binhi.’+ Kini akong gipakita sa imong mga mata, sanglit dili ka makatabok didto.”+

5 Unya si Moises nga alagad ni Jehova+ namatay didto sa yuta sa Moab sumala sa pulong ni Jehova.+ 6 Ug iyang gilubong siya sa walog didto sa yuta sa Moab atbang sa Bet-peor,+ ug walay nahibalo sa iyang lubnganan hangtod niining adlawa.+ 7 Ug si Moises usa ka gatos ug kawhaan ka tuig ang panuigon sa iyang pagkamatay.+ Ang iyang mata wala mohalap,+ ug ang iyang kusog wala mobiya.+ 8 Ug gihilakan sa mga anak sa Israel si Moises didto sa desyertong kapatagan sa Moab sulod sa katloan ka adlaw.+ Unya natapos ang mga adlaw sa paghilak sa yugto sa pagbangotan alang kang Moises.

9 Ug si Josue nga anak ni Nun napuno sa espiritu sa kaalam,+ kay si Moises nagtapion man sa iyang kamot diha kaniya;+ ug ang mga anak sa Israel namati kaniya ug sila nagbuhat sumala sa gisugo ni Jehova kang Moises.+ 10 Apan wala pa gayoy mitindog nga manalagna sa Israel nga sama kang Moises,+ nga nailhan ni Jehova nawong sa nawong,+ 11 mahitungod sa tanang ilhanan ug milagro nga gipadala ni Jehova kaniya aron buhaton sa yuta sa Ehipto kang Paraon ug sa tanan niyang mga alagad ug sa tibuok niyang yuta,+ 12 ug mahitungod sa tanang kamot nga kusgan ug sa tanang dakong pagkamakalilisang nga gibuhat ni Moises atubangan sa mga mata sa tibuok Israel.+