Awit ni Solomon

3 “Sa akong higdaanan panahon sa kagabhion gipangita ko ang gihigugma sa akong kalag.+ Gipangita ko siya, apan wala ko siya makaplagi. 2 Pasagding mobangon ako, palihog, ug molibot sa siyudad;+ sa kadalanan ug sa mga plasa+ pangitaon ko ang gihigugma sa akong kalag. Gipangita ko siya, apan wala ko siya makaplagi. 3 Ang mga tigbantay+ nga nagsuroy sa siyudad nakakaplag kanako, ‘Nakita ba ninyo ang gihigugma sa akong kalag?’ 4 Halos wala pa ako makalabay kanila sa diha nga nakaplagan ko ang gihigugma sa akong kalag. Gihawiran ko siya, ug wala ko buhii, hangtod nga nadala ko siya sa balay sa akong inahan ug ngadto sa sulod nga lawak niya nga nanamkon kanako. 5 Gipapanumpa ko kamo,+ Oh mga anak nga babaye sa Jerusalem, pinaagi sa mga bayeng gasela o pinaagi sa mga bayeng osa sa kapatagan,+ nga dili ninyo palihokon o pukawon ang gugma sa sulod nako hangtod nga kini buot na.”+

6 “Unsa kining nagasingabot gikan sa kamingawan nga samag mga haliging aso, nga gipahumotan sa mira ug sa kamangyan,+ bisan sa tanan nga matang sa humot nga polbos sa magpapatigayon?”+

7 “Tan-awa! Kini ang iyang lingkoranan, ang iya ni Solomon. Kan-uman ka tawong gamhanan ang nagalibot niini, gikan sa mga tawong gamhanan sa Israel,+ 8 silang tanan adunay espada, nga natudloan sa pagpakiggubat, ang tagsatagsa nagtakin ug espada tungod sa kalisang panahon sa kagabhion.”+

9 “Kini mao ang lingkoranan nga gipahimo ni Haring Solomon alang sa iyang kaugalingon gikan sa mga kahoy sa Lebanon.+ 10 Ang mga haligi niini iyang gihimo gikan sa plata, ang mga sangga niini sa bulawan. Ang lingkoranan niini maoy sa balhibo sa karnero nga tininag morado, ang sulod niini mahigugmaong gisangkapan sa mga anak nga babaye sa Jerusalem.”

11 “Panggula ug tan-awa ninyo, Oh mga anak nga babaye sa Zion, si Haring Solomon uban ang purongpurong+ nga gihimo sa iyang inahan+ alang kaniya sa adlaw sa iyang kaminyoon ug sa adlaw sa pagmaya sa iyang kasingkasing.”+