Proverbio

5 Oh anak ko, hatagig pagtagad ang akong kaalam.+ Ikiling ang imong igdulungog sa akong katakos sa pag-ila,+ 2 aron sa pagbantay sa katakos sa panghunahuna;+ ug hinaot ang imong mga ngabil magaamping sa kahibalo.+

3 Kay ang mga ngabil sa usa ka estranyong babaye nagatulo ingon sa udlan,+ ug ang iyang alingagngag mas tanglas pa kay sa lana.+ 4 Apan ang sangpotanan gumikan kaniya ingon ka pait sa ajenjo;+ ingon ka hait sa espada nga duhay-sulab.+ 5 Ang iyang mga tiil nagakanaog ngadto sa kamatayon.+ Ang iyang mga lakang nagapaingon sa Sheol.+ 6 Wala siya mamalandong sa dalan sa kinabuhi.+ Nangawala ang iyang mga agianan, wala siya mahibalo kon hain na kini.+ 7 Busa karon, Oh mga anak, patalinghog kanako+ ug ayaw pagpahilayo gikan sa mga pulong sa akong baba.+ 8 Ipahilayo ang imong dalan gikan kaniya, ug ayaw pagpaduol sa pultahan sa iyang balay,+ 9 aron dili mo ikahatag ang imong dignidad ngadto sa uban,+ ni ang imong mga tuig ngadto sa kon unsay mabangis;+ 10 aron ang mga estranyo dili magtagbaw sa ilang kaugalingon pinaagi sa imong kusog,+ ni ang mga butang nga imong gihagoan mahiadto sa balay sa usa ka langyaw,+ 11 ni ikaw mag-agulo sa imong ugma-damlag+ sa dihang maut-ot ang imong unod ug ang imong lawas.+ 12 Ug ikaw magaingon: “Gidumtan ko gayod ang disiplina+ ug ang akong kasingkasing nagtamay sa pagbadlong!+ 13 Ug wala ko patalinghogi ang tingog sa akong mga instruktor,+ ug wala ko ikiling ang akong igdulungog sa akong mga magtutudlo.+ 14 Ako dali rang malangkit sa tanang matang sa pagkadaotan+ sa taliwala sa kongregasyon ug sa katigoman.”+

15 Inom ug tubig gikan sa imong kaugalingong biawan, ug sa dinagayday gikan sa imong kaugalingong atabay.+ 16 Patibulaagon mo ba sa gawas ang imong mga tubod,+ ang imong nagaagos nga tubig diha sa mga plasa? 17 Himoa sila nga imo lamang, ug dili alang sa mga estranyo uban kanimo.+ 18 Himoang mapanalanginan ang imong tinubdan sa tubig,+ ug pagmaya uban sa asawa sa imong pagkabatan-on,+ 19 usa ka hiligugmaon nga bayeng osa ug usa ka makabibihag nga kanding sa bukid.+ Tugoting ang iyang mga dughan magtagbaw kanimo sa kalipay sa tanang panahon.+ Sa iyang gugma maanaa ka unta kanunay sa hilabihang kalipay.+ 20 Busa nganong ikaw, anak ko, magkalipay man sa hilabihan uban sa usa ka estranyong babaye o mogakos sa sabakan sa usa ka langyaw nga babaye?+ 21 Kay ang mga dalan sa usa ka tawo anaa sa atubangan sa mga mata ni Jehova,+ ug siya nagapamalandong sa tanan niyang mga alagianan.+ 22 Ang iyang kaugalingong mga sayop modakop sa daotan,+ ug siya magapos sa mga higot sa iyang kaugalingong sala.+ 23 Siya mao ang mamatay tungod sa pagkawalay-disiplina,+ ug tungod sa kadaghan sa iyang binuang siya mahisalaag.+