Proverbio
21 Ang kasingkasing sa usa ka hari sama sa mga sapa sa tubig diha sa kamot ni Jehova.+ Iyang iliso kini sa bisan diin nga iyang kahimut-an.+
2 Ang tagsatagsa ka dalan sa usa ka tawo matul-id sa iyang kaugalingong mga mata,+ apan si Jehova nagatimbang sa mga kasingkasing.+
3 Ang pagbuhat sa pagkamatarong ug hustisya labi pang dalawaton ni Jehova kay sa halad.+
4 Ang mapahitas-ong mga mata ug ang mapasigarbohong kasingkasing,+ ang lampara sa mga daotan, maoy sala.+
5 Ang mga plano sa kugihan mosangpot gayod sa kaayohan,+ apan ang matag usa nga madalidalion mosangko lamang sa kawalad-on.+
6 Ang pagbaton ug mga bahandi pinaagi sa bakakong dila maoy inalisngaw nga ginapadpad,+ alang niadtong nagapangita sa kamatayon.+
7 Ang pagpangagaw sa mga daotan magaguyod kanila sa halayo,+ kay sila nagdumili sa pagbuhat ug hustisya.+
8 Ang usa ka tawo, bisan usa ka estranyo, baliko sa iyang dalan;+ apan ang tawong putli matul-id sa iyang kalihokan.+
9 Maayo pang mopuyo sa usa ka suok sa atop+ kay sa makig-ipon sa usa ka malalison nga asawa, bisan anaa sa usa ra ka balay.+
10 Ang kalag sa daotan nangandoy sa butang nga daotan;+ ang iyang isigkatawo dili pagapakitaan ug kaluoy diha sa iyang mga mata.+
11 Pinaagi sa pagpahamtang ug multa sa mabiaybiayon ang walay kasinatian mahimong maalamon;+ ug pinaagi sa paghatag ug hait nga salabotan ngadto sa tawong maalamon siya makabaton ug kahibalo.+
12 Ang Usa nga Matarong nagahatag ug pagtagad sa balay sa daotan,+ nga nagapukan sa mga daotan ngadto sa ilang katalagman.+
13 Si bisan kinsa nga magasampong sa iyang igdulungog sa pagtuaw sa timawa,+ siya usab magatawag ra ug dili pagatubagon.+
14 Ang gasa nga gihimo sa tago magapuypoy sa kasuko;+ ug ang hiphip diha sa sabakan,+ sa hilabihang kaaligutgot.
15 Kalipay sa matarong ang pagbuhat sa hustisya,+ apan adunay makalilisang nga butang alang sa mga nagabuhat sa butang nga makadaot.+
16 Kon mahitungod sa usa ka tawo nga nahisalaag gikan sa dalan sa hait nga salabotan,+ mopahulay siya sa kongregasyon niadtong mga walay gahom sa kamatayon.+
17 Siya nga nahigugma sa paglipaylipay maoy modangat sa kawalad-on;+ siya nga nahigugma sa bino ug lana dili makabaton ug bahandi.+
18 Ang daotan maoy lukat alang sa matarong;+ ug ang nagmaluibon mopuli sa mga matul-id.+
19 Maayo pang mopuyo sa usa ka yuta nga kamingawan kay sa makig-ipon sa usa ka malalison nga asawa nga may kasamok.+
20 Ang tilinguhaong bahandi ug lana anaa sa puloy-anan sa maalamon,+ apan ang tawong hungog magalamoy niana.+
21 Siya nga nagatinguha sa pagkamatarong+ ug sa mahigugmaong-kalulot makakaplag ug kinabuhi, pagkamatarong ug himaya.+
22 Ang maalamon nakakatkat bisan sa siyudad sa mga tawong gamhanan, aron mapukan niya ang kusog nga gisaligan niana.+
23 Siya nga nagabantay sa iyang baba ug sa iyang dila nagabantay sa iyang kalag gikan sa mga kasakit.+
24 Mapangahason, mapagawalon nga hambogiro mao ang ngalan sa usa nga nagalihok sa hilabihang pagkamapangahason.+
25 Ang pangandoy sa tapolan mopatay kaniya, kay ang iyang mga kamot nagdumili man sa pagtrabaho.+ 26 Sa tibuok adlaw siya maikagong nagapangandoy, apan ang matarong nagahatag ug walay ginahikaw.+
27 Ang halad sa mga daotan maoy dulumtanan.+ Ilabina gayod kon iya kining dad-on uban ang malaw-ayng panggawi.+
28 Ang usa ka bakakong saksi malaglag,+ apan ang tawo nga nagapamati magasulti bisan hangtod sa kahangtoran.+
29 Ang tawong daotan nagpabaga sa iyang nawong,+ apan ang matul-id magalig-on sa iyang mga dalan.+
30 Walay kaalam, ni katakos sa pag-ila, ni tambag nga makabarog batok kang Jehova.+
31 Ang kabayo ginaandam alang sa adlaw sa gubat,+ apan ang kaluwasan iya ni Jehova.+