Job

32 Busa kining tulo ka tawo mihunong sa pagtubag kang Job, kay siya matarong sa iyang kaugalingong mga mata.+ 2 Apan miinit ang kasuko ni Elihu nga anak nga lalaki ni Barakel nga Buzihanon+ sa banay ni Ram. Misilaob ang iyang kasuko batok kang Job tungod sa iyang pagpahayag sa iyang kalag nga matarong inay sa Diyos.+ 3 Usab, misilaob ang iyang kasuko batok sa iyang tulo ka higala tungod kay sila wala makakaplag ug tubag, hinuon ilang gipahayag nga daotan ang Diyos.+ 4 Ug si Elihu nga may igsusulti naghulat kang Job, tungod kay sila mas magulang kay kaniya.+ 5 Ug unya nakita ni Elihu nga walay tubag sa baba+ sa tulo ka lalaki, ug ang iyang kasuko misamot pag-init. 6 Ug si Elihu nga anak nga lalaki ni Barakel nga Buzihanon mitubag ug miingon:

“Ako batan-on

Ug kamo mga tigulang na.+

Mao nga ako miatras ug nahadlok

Sa pagpahayag kaninyo sa akong kahibalo.

 7 Ako miingon, ‘Ang mga adlaw maoy mosulti,

Ug ang gidaghanon sa mga tuig maoy magpaila sa kaalam.’+

 8 Tataw nga ang espiritu sa mga may-kamatayong tawo

Ug ang gininhawa sa Labing Gamhanan mao ang nagahatag kanila ug pagsabot.+

 9 Dili lamang kadtong dagaya sa mga adlaw ang maalamon,+

Ni kadtong mga tigulang lamang ang makasabot sa paghukom.+

10 Busa ako miingon, ‘Pamati kanako.

Ipahayag ko gayod ang akong kahibalo.’

11 Tan-awa! Ako naghulat sa inyong mga pulong,

Ako nagpadayon pagpaminaw sa inyong mga pangatarongan,+

Hangtod nga makakita kamo ug mga pulong nga ikasulti.

12 Ug nagpadayon ako sa paghatag ug pagtagad kaninyo,

Ug ania, walay usa nga nagbadlong kang Job,

Wala kaninyoy nagtubag sa iyang mga pulong,

13 Aron kamo dili makaingon, ‘Nakaplagan namo ang kaalam;+

Ang Diyos mao ang nagaabog kaniya, dili usa ka tawo.’

14 Sanglit wala siya makahan-ay ug mga pulong batok kanako,

Dili ko usab siya tubagon pinaagi sa inyong mga pulong.

15 Sila nangalisang, sila wala na motubag;

Ang mga pulong mipahilayo na kanila.

16 Ug ako naghulat, kay sila wala na mopadayon sa pagsulti;

Kay sila nagtungok, sila wala na motubag.

17 Ako sa akong bahin motubag gayod;

Ipahayag ko gayod ang akong kahibalo;

18 Kay ako napuno sa mga pulong;

Ang espiritu nagpugos+ kanako sulod sa akong tiyan.

19 Tan-awa! Ang akong tiyan sama sa bino nga walay hungawanan;

Sama sa bag-ong panit nga mga sudlanan kini buot nang mobuto.+

20 Pasultiha ako aron ako mahuwasan.

Buksan ko ang akong mga ngabil aron motubag ako.+

21 Palihog, ayaw tugoti nga ako magpakitag pagpihigpihig sa usa ka tawo;+

Ug sa usa ka yutan-ong tawo ako dili mohatag ug usa ka dungganon nga ngalan;+

22 Kay ako dili gayod maantigong mohatag ug usa ka dungganon nga ngalan;

Ang akong Magbubuhat+ magkuha kanako sa madali.