Job

26 Ug si Job mitubag ug miingon:

 2 “Oh kadako nimo nga tabang alang sa usa nga walay gahom!

Oh giunsa mo pagluwas ang usa ka bukton nga walay kusog!+

 3 Pagkadako sa imong natambag sa usa nga walay kaalam,+

Ug imong gipahibalo sa daghan uyamot ang praktikal nga kaalam!

 4 Kinsa ang imong gisultihan sa mga pulong,

Ug kang kinsang gininhawa ang migula gikan kanimo?

 5 Kadtong walay gahom sa kamatayon nagkurog

Ilalom sa katubigan ug silang nagapuyo niana.+

 6 Ang Sheol hubo sa iyang atubangan,+

Ug ang dapit sa kalaglagan walay tabon.

 7 Siya nagbuklad sa amihanan ibabaw sa dapit nga walay sulod,+

Nga nagbitay sa yuta sa wala;

 8 Nga nagputos sa katubigan sa iyang mga panganod,+

Nga sa ingon ang bagang panganod dili masiak sa ilalom nila;

 9 Nga naglukob sa nawong sa trono,

Nga nagbuklad sa iyang panganod sa ibabaw niini.+

10 Iyang gilatid ang lingin diha sa nawong sa katubigan,+

Diin ang kahayag mosangko sa kangitngit.

11 Ang mga haligi sa langit nangatay-og,

Ug sila nangahibulong tungod sa iyang pagbadlong.

12 Pinaagi sa iyang gahom iyang gikutaw ang dagat,+

Ug pinaagi sa iyang panabot iyang gidugmok ang manunulong.+

13 Pinaagi sa iyang hangin iyang gipasinaw ang langit,+

Giduslak sa iyang kamot ang halas nga nagadailos.+

14 Tan-awa! Kini maoy kadaplinan lamang sa iyang mga dalan,+

Ug hunghong ra ang atong nadungog bahin kaniya!

Apan bahin sa iyang gamhanan nga dalugdog kinsa ba ang makasabot?”+