Xqaʼän chë ma nxiʼin ta yatapon chkipan ri Salones del Reino taq najin ri COVID-19

Taq xchapatäj ri ikʼ marzo rchë ri junaʼ 2022, xyaʼöx re rutzjol reʼ chpan jw.org: «Kan kiʼ qakʼuʼx nqaʼij chiwä chë ri Molaj Ukʼwäy Bʼey xuʼij chë chkipan ri tinamït ri akuchï ri qʼatbʼäl tzij majun ta chik ruqʼaton rma ri yabʼil ri congregaciones ya ütz chik nkimöl kiʼ chpan ki-Salón del Reino chpan ri semana rchë 1 de abril». Jontir röj, ri testigos de Jehová, kan xel qakʼuʼx taq xqaskʼij ruwäch re rutzjol reʼ. Ye kʼa ri yabʼil majanä wä tkʼis.a Rma riʼ, rchë chë ri xkeʼapon ma nkïl ta ri yabʼil xkʼatzin kʼo jojun xejal chkipan ri Salones del Reino chqä xkʼatzin xeksäx aqʼon rchë kan chʼajchʼöj xuʼän kipan ri jay. Ye kʼa, rma ya kaʼiʼ wä chik junaʼ ma qamolon ta qiʼ chkipan ri qa-Salones del Reino, ¿achkë xkʼatzin xbʼan rchë chë ri qachʼalal ütz xeʼapon chpan ri tiempo ri xbʼix?

Xa matyox chë ri qachʼalal kan kʼïy wä chik ikʼ kibʼanon pä ri najowatäj rchë chë ütz xqamöl chik jmul qiʼ chkipan ri qa-Salones del Reino.

Xqaʼän ri achkë rajwaxik chkipan ri jalajöj tinamït

Taq kʼa riʼ wä jun ikʼ qʼaxnäq chë ma xqbʼä ta chik chkipan ri qa-Salones del Reino pa junaʼ 2020, ri Departamento Mundial de Diseño y Construcción, ri kʼo Warwick (Nueva York), xtzʼët achkë xtbʼanatäj kikʼë ri qa-Salones del Reino rma ri COVID-19 y achkë wä xtkʼatzin xtbʼan rchë ma nxiʼin ta yatapon chkipan.

Chwäch le Ruwachʼlew, jalajöj wä kitoʼik ri congregaciones xkʼatzin. Mathew De Sanctis, ri nsamäj rkʼë ri Departamento Mundial de Diseño y Construcción, nuʼij: «Chkipan jojun tinamït, kʼayewal nawïl akuchï nachʼäj wä aqʼaʼ. We chpan jun Salón del Reino majun ta yaʼ, nloqʼ o nbʼekʼamär pa jun raqän yaʼ o pa jun pozo ri kʼo naqaj chriʼ. Chkipan nkʼaj chik tinamït, ri qʼatbʼäl tzij xuʼij achkë rubʼanik kʼo chë nksäx ri aire acondicionado chqä xuʼij chë kʼo chë yeyaʼöx letreros ri xketoʼon rchë chʼajchʼöj nuʼän kipan ri jay».

¿Achkë rubʼanik xkisöl ri qachʼalal ri kʼayewal xkikʼüt pä kiʼ chkiwäch? Chrij ri yaʼ, Mathew nuʼij chë ye kʼïy Salones del Reino xkïl jun rubʼanik ri «ma kan ta nüm rajäl ye kʼa kan kowan xkʼatzin». Jun tzʼetbʼäl chrij riʼ ya riʼ ri xkiʼän ri qachʼalal aj Papúa Nueva Guinea. Ryeʼ xkiʼän jun ri akuchï nachʼäj wä aqʼaʼ ri ma kan ta nüm rajäl. Rchë xkiʼän riʼ, ryeʼ xekiksaj tambos ri 20 litros kipan chqä xekiyaʼ chorros chkë. Ya riʼ xuʼän chë xa xuʼ 40 dólares xksäx rchë xjeʼ yaʼ chpan jun Salón del Reino tapeʼ kʼa näj kʼo wä. Chqä xeloqʼ más 6,000 lavamanos che rä jun kʼayij ri kʼo Asia rchë xetaq äl chkipan ri Salones del Reino ri ye kʼo África.

Chkipan jojun chik tinamït, rchë ma nutzʼapij ta riʼ ruxlaʼ yaʼ chkipan ri Salones del Reino, kʼo chë xeyaʼöx o xejal ventiladores o ri yeyaʼö ruxlaʼ yaʼ. Kʼïy congregaciones kʼo chë xekilöqʼ kaqän ri micrófonos rchë ri qachʼalal ma yekichäp ta ri micrófonos. Chqä chaq taqïl xechʼajchʼobʼëx ri akuchï más nchap wä, achiʼel ri akuchï nachäp wä taq najäq jun puerta o taq nachʼäj aqʼaʼ. Ye kʼo jojun congregaciones xkiʼän chë ruyonïl nqä pä ri yaʼ ri akuchï nachʼäj wä aqʼaʼ. Chlaʼ Chile, chkijujnal ri Salones del Reino ri kʼo xkʼatzin xjal chkipan xkʼwaj jun 1,400 dólares.

Rma rutinamit Jehová nrajoʼ chë ri Salones del Reino ma nxiʼin ta yajeʼ chkipan, ri qachʼalal kan xkitäj kiqʼij rchë ütz ruksaxik xkiʼän che rä ri kchaj. Jun tzʼetbʼäl chrij riʼ ya riʼ ri xbʼanatäj chkipan jojun tinamït. Ri qachʼalal xkiksaj ri toʼïk xyaʼ ri qʼatbʼäl tzij rchë xkilöqʼ ri lavamanos chqä kaqän ri micrófonos. Y ri sucursales xkitoʼ kiʼ chkiwäch rchë kan pa rukʼiyal xkilöqʼ achkë jun rchë ma kan ta nüm rajäl xel chkiwäch. Ri sucursales chqä ri Departamento Mundial de Compras kan ronojel bʼaʼ mul kikʼë ri achkë yebʼanö ri nkʼatzin chkë xkiʼän wä kiloqʼoj y ma kikʼë ta ri xa nkikamluj rukʼayixik. Ya riʼ xuʼän chë ma kan ta nüm rajäl xel chkiwäch ri xkilöqʼ chqä más chanin xyaʼöx pä chkë ri xkikʼutuj.

«Ri xbʼan chpan ri Salón del Reino xuʼän chë ma xinxiʼij ta wiʼ xinapon»

Ri xbʼan chkipan ri Salones del Reino rchë ma nxiʼin ta yajeʼ chkipan rubʼanon chë ri yeʼapon chkipan ri qamoloj ma kan ta kowan nchʼpü kikʼuʼx. Jun qachʼalal ixöq aj Perú, ri rubʼiniʼan Dulcine, nuʼij chë taq xtamaj chë xttzolin pa Salón del Reino, kan xxiʼij jbʼaʼ riʼ. Ryä nuʼij: «Taq kʼa riʼ bʼaʼ tchapatäj ri COVID-19, rïn xyaʼ ri yabʼil riʼ chwä. Rma riʼ, taq xinquʼ chë xtyaʼ chik jmul ri yabʼil riʼ chwä xa rma yibʼä pa Salón del Reino, xuʼän chë kan xinxiʼij wiʼ. Ye kʼa taq xinapon pa Salón, xintzʼët chë ri ukʼwäy taq bʼey kibʼanon wä chik jontir rchë ma nqïl ta ri yabʼil riʼ. Kʼo wä achoq rkʼë nqachʼajchʼobʼej wä qaqʼaʼ chqä kʼo wä kaqän ri micrófonos. Chqä xbʼix chë xtchʼajchʼobʼëx ri Salón taq majanä nchapatäj jun moloj chqä taq nkʼis. Ri xbʼan chpan ri Salón del Reino xuʼän chë ma xinxiʼij ta wiʼ xinapon».b

Jun chik qachʼalal aj Zambia, ri rubʼiniʼan Sara, jun wä chik kʼayewal xqʼaxaj. Ryä nuʼij: «Majanäj ta ri wachjil xkäm rma COVID-19. Rma riʼ, xinquʼ rij achkë xtinnaʼ taq xa nyonïl xkinapon chik jmul pa Salón del Reino». ¿Achkë nunaʼ komä ke ya xapon yän? Ryä nuʼij: «Ri moloj yebʼan chkipan ri Salones del Reino nkikʼüt chi nwäch chë Jehová kʼo qkʼë chkipan re rukʼisbʼäl taq qʼij reʼ. Kimä ri qamoloj, rïn nnaʼ chë kan kowan ntoʼik wlon kimä ri ukʼwäy taq bʼey chqä ri qachʼalal, rma ryeʼ nkikʼuqbʼaʼ nkʼuʼx, nkikʼüt chi nwäch chë yinkajoʼ chqä kan yinkitoʼ».

Chwäch jontir le Ruwachʼlew, ri qachʼalal kan kowan yetyoxin rma xetzolin chkipan ri ki-Salones del Reino. Matyox chiwä rma ikchaj. Kʼïy chkë riʼ, iyaʼon pä chpan donate.jw.org. Kimä ikchaj, röj qabʼanon chë ri qachʼalal jaʼäl kinaʼon chkipan ki-Salones del Reino chqä ma nkixiʼij ta kiʼ.