Ri misioneros yeʼapon «kʼa pa tinamït ri más näj nkanaj wä»

Jesús xuʼij chkë rutzeqelbʼëy: «Xkixok n-testigos [...] kʼa pa tinamït ri más näj nkanaj wä» (Hechos 1:8). Ri testigos de Jehová kan nkitäj kiqʼij rchë nkiʼän ri xuʼij qa Jesús. Tapeʼ ke riʼ, kʼo tinamït ri akuchï ma kan ta qatzjon le Biblia, achiʼel ri tinamït ri kowan ye nmaʼq o ri kowan kʼïy winäq ye kʼo chkipan. Chqä chkipan jojun tinamït ma kan ta kʼïy Testigos ye kʼo (Mateo 9:37, 38). ¿Achkë najin nqaʼän rchë nqtzjon kikʼë más winäq chrij le Biblia?

Rchë nqaʼän ri xuʼij Jesús, ri Comité rchë Servicio rchë ri Molaj Ukʼwäy Bʼey pa kiwiʼ ri Testigos de Jehová yerutäq misioneros chkipan tinamït ri akuchï ma kan ta ye kʼïy Testigos ye kʼo. Chkipan ri qʼij yoj kʼo komä, ye kʼo jun 3,090 misioneros chwäch le Ruwachʼulew ri najin nkitzjoj le Biblia.a Kan konojel bʼaʼ chkë ryeʼ ye bʼenäq chpan jun chkë ri tijobʼäl ri nuyaʼ rutinamit Dios, achiʼel ri Tijobʼäl rchë yetjöx ri nkitzjoj ri Ruqʼatbʼäl Tzij Dios. Re misioneros reʼ ma kikʼewan ta kiyaʼon qa kachoch rchë yebʼä jukʼan chik tinamït. Rma kan kʼuqül kikʼuʼx chpan ruchʼaʼäl Dios, kan kʼo kinaʼoj chqä rma ri tjonïk kilon, ryeʼ nkiʼän jontir ri kʼo pa kiqʼaʼ rchë nkitzjoj le Biblia chqä nkiyaʼ jun utziläj tzʼetbʼäl chkiwäch ri kʼa yeʼok pä chpan rutinamit Dios.

Ri yetoʼöx ri misioneros nuʼän chë ryeʼ yekitoʼ ri nkʼaj chik

Chkipan ri sucursales, ri Sección de Ministros en el Campo rchë ri Departamento rchë Servicio junan nsamäj rkʼë ri Comité rchë Sucursal rchë nyaʼöx chkë ri misioneros ri nkʼatzin chkë. Ryeʼ nyaʼöx jun kachoch ri ma kan ta achkë rubʼanik, yetoʼöx taq npë jun kiyabʼil chqä nyaʼöx jbʼaʼ kirajil rchë nkilöqʼ ri achkë nkʼatzin chkë. Chpan ri junaʼ rchë servicio 2020, ri testigos de Jehová xkiksaj jbʼaʼ ma 27 millones de dólares chkij ri misioneros. Rma ri toʼïk nyaʼöx chkë, ri misioneros ütz nkiyaʼ kan chqä kichqʼaʼ chutzjoxik le Biblia. Ya riʼ chqä yerutoʼ ryeʼ rchë nkikowirsaj ri congregación ri akuchï yetaq wä.

¿Achkë rubʼanik yetoʼon ri misioneros chpan ri samaj chrij rutzjoxik le Biblia? Frank Madsen, jun chkë ri kʼo chpan ri Comité rchë Sucursal ri kʼo Malaui, nuʼij: «Rma ma nkixiʼij ta kiʼ chqä kan kʼïy yekowin nkiʼän, ri misioneros yekitoʼon ri congregaciones rchë nkitzjoj le Biblia akuchï kan kʼayewal naʼän riʼ, achiʼel chkipan territorios ri sutin kij rkʼë tzʼaq o akuchï jun chik chʼaʼäl yetzjon. Chqä rma kan nkitäj kiqʼij rchë nkitamaj kichʼaʼäl o ki-costumbres ri winäq, kan nkiyaʼ jun utziläj tzʼetbʼäl chkiwäch ri nkʼaj chik. Ryeʼ chqä kan yekitoʼ ri qʼopojiʼ kʼojolaʼ rchë nkiksaj kikʼaslemal chbʼanik rusamaj Dios. Kantzij na wä chë kan kʼo kʼïy rma ri nqtyoxin che rä Jehová kimä ri misioneros».

Jun chik qachʼalal ri kʼo chqä chpan jun Comité rchë Sucursal ri kʼo jukʼan chik tinamït, nuʼij: «Ri misioneros kibʼanon chë röj, ri testigos de Jehová, kan nqʼalajin chë yoj kʼo chwäch jontir le Ruwachʼulew chqä chë kan junan rubʼanon qawäch. Yajün ri ma ye Testigos ta nkitzʼët chë majun ta jun nqjachö, nixta ri qajatzul. Ri naʼoj ye kʼo chpan le Biblia kibʼanon chë yoj oknäq jun familia ri kʼo chwäch jontir le Ruwachʼulew».

¿Y achkë rubʼanik yetoʼöx ri publicadores kimä ri misioneros? Paulo, ri kʼo Timor Oriental, kan janina nutyoxij ri samaj nkiʼän ri misioneros ri ye kʼo pa ru-congregación. Ryä nuʼij: «Ri akuchï yoj kʼo wä, kan kowan kʼatän nuʼän. Y tapeʼ ri akuchï kepë wä ri misioneros ma kan ta más kʼatän nuʼän, ma nkiyaʼ ta qʼij chë ri kʼatän nqʼatö kichë. Ryeʼ ronojel mul ye kʼo chkipan ri moloj yebʼan nmaqʼaʼ taq nq-el chutzjoxik le Biblia, y kan ronojel bʼaʼ mul nkikamluj kichʼbʼexik ri winäq kʼa taq nuʼän pä nkʼäj qʼij, ri taq kowan kʼatän nuʼän. Chqä kʼïy mul, kan nkitzjoj na le Biblia tqaqʼij. Ryeʼ kan yekitoʼon ye kʼïy winäq rchë nkitamaj ruwäch Jehová, yajün rïn. Kan kiʼ kikʼuʼx nkiksaj kikʼaslemal rchë nkiyaʼ ruqʼij Jehová, ya riʼ nuʼän chë ri congregación kan más na chik nuʼij riʼ ran nuyaʼ ruqʼij Jehová».

Ya Ketti, jun precursora regular aj Malaui, nuʼij achkë rubʼanik xtoʼöx ru-familia rma jun kʼlaj misioneros. Ryä nuʼij: «Taq xetaq pä pa qa-congregación, xa xuʼ wä rïn nyaʼ ruqʼij Jehová chpan n-familia. Ryeʼ kan kowan xinkitoʼ chqä kan xeʼok utziläj kichiʼil n-familia. Ri wal xkitamaj chkij ryeʼ chë ri nayaʼ ruqʼij Jehová ya riʼ nbʼanö chë kan kiʼ akʼuʼx naʼän. Rma ri utziläj tzʼetbʼäl xkiyaʼ qa, komä, ri oxiʼ wal ye precursoras regulares y ri wachjil najin chik nbʼä chkipan ri qamoloj».

¿Akuchï npë wä ri päq ri nuksäx rchë yetoʼöx ri misioneros ri yetaqon chutzjoxik le Biblia? Kikʼë ri kchaj ri nyaʼöx rchë nbʼan rusamaj Jehová chwäch le Ruwachʼulew. Kʼïy chkë ri kchaj riʼ yebʼan chpan ri página donate.jw.org. Matyox chiwä rma kowan yixspan.