¿Kʼo komä jun ütz qʼatbʼäl tzij ri xtkowin xtqʼät tzij pa rwiʼ le Rwachʼlew? | ¿Achkë nuʼij le Biblia chrij riʼ?

Ri qʼatbʼäl tzij ri ye kʼo chwäch jontir le Rwachʼlew kʼïy kʼayewal najin nkiqʼaxaj. Yajün chkipan tinamït ri achiʼel ta ütz ri qʼatbʼäl tzij kʼo, ye kʼo políticos ma ütz ta yekiʼän, ri winäq yekatäj chkij ri qʼatbʼäl taq tzij o taq yechaʼöx ri qʼatöy taq tzij, ye kʼïy winäq ma yekajoʼ ta.

Le Biblia nuʼij chë kʼo jun qʼatbʼäl tzij ri kan ütz nchʼobʼonäj. Rkʼë jbʼaʼ akʼoxan chik chrij. Ya riʼ ri qʼatbʼäl tzij ri xtzjoj Jesús chpan ri padrenuestro.

«Rïx ke reʼ rbʼanik kʼo chë yixchʼö rkʼë Dios: ‹Qatat ri yït kʼo chlaʼ chkaj, nqarayij chë tbʼan loqʼoläj che rä abʼiʼ. Nqajoʼ chë tpë Aqʼatbʼäl Tzij chqä chë tbʼan ri nawajoʼ rït, achiʼel chlaʼ chkaj, ke riʼ chqä chwäch le Rwachʼlew›» (Mateo 6:9, 10).

¿Achkë nuʼij le Biblia chrij ri Qʼatbʼäl Tzij riʼ?

Ri Rqʼatbʼäl Tzij Dios, jun ütz qʼatbʼäl tzij

Ri Rqʼatbʼäl Tzij Dios chkaj nuqʼät wä tzij.

Jesús xuʼij «ri Qʼatbʼäl Tzij ri kʼo chkaj» che rä (Mateo 4:17; 5:3, 10, 19, 20). Rma riʼ xuʼij: «Ri Nqʼatbʼäl Tzij rïn ma kikʼë ta winäq xtzʼuktäj wä pä» (Juan 18:36).

Ri Rqʼatbʼäl Tzij Dios xtkanaj pa kikʼexel ri qʼatbʼäl taq tzij.

Le Biblia nuʼij: «Ri qʼatbʼäl tzij riʼ xtwulaj chqä xtchüp kiwäch jontir ri qʼatbʼäl taq tzij, chqä xa xuʼ ri qʼatbʼäl tzij riʼ xtkanaj qa xtbʼä qʼij xtbʼä säq» (Daniel 2:44).

Ri Rqʼatbʼäl Tzij Dios, ri yë Jesucristo xtqʼatö tzij chpan, majun bʼëy xtchup ta rwäch.

Le Biblia nuʼij: «Ri uchqʼaʼ xyaʼöx pa rqʼaʼ majun bʼëy xtesäx ta äl pa rqʼaʼ chqä ri rqʼatbʼäl tzij majun bʼëy xtchup ta rwäch» (Daniel 7:13, 14).

Ri Rqʼatbʼäl Tzij Dios xtresaj ri kʼayewal chwäch le Rwachʼlew.

Le Biblia nuʼij: «Chkijujnal ryeʼ xketzʼyeʼ chuxeʼ kiʼuva chqä chuxeʼ kihigo, y majun ta jun xtxiʼin kichë» (Miqueas 4:4).

Tatamaj más chrij Rqʼatbʼäl Tzij Dios

Taq Jesús xjeʼ chwäch le Rwachʼlew, xksaj rkʼaslemal rchë «xtzjoj ri ütz taq rtzjol chrij ri Rqʼatbʼäl Tzij Dios» (Mateo 9:35). Ryä chqä xuʼij reʼ:

«Ri ütz taq rtzjol chrij Rqʼatbʼäl Tzij Dios xttzjöx chwäch jontir Rwachʼlew rchë jontir winäq xkekʼoxan rchë, y chrij riʼ xtchup rwäch ronojel ri itzelal» (Mateo 24:14).

Chkipan ri qʼij yoj kʼo komä, ri ütz taq rtzjol chrij Rqʼatbʼäl Tzij Dios najin ntzjöx chkipan más 240 tinamït. ¿Achkë ütz xtkʼäm pä ri Qʼatbʼäl Tzij riʼ pa kiwiʼ ri winäq? ¿Achkë ütz naʼän rït rchë nawïl ya riʼ chqä? Nqajoʼ chë rït tatamaj más chrij re qʼatbʼäl tzij reʼ.

Tatzʼetaʼ ri video ¿Achkë riʼ ri Ruqʼatbʼäl Tzij Dios?