Achiʼel Abdías, tqaxiʼij qiʼ chwäch Dios

Abdías xjeʼ pa rwiʼ jontir ri samaj xbʼan chpan ri jay akuchï xqʼät wä tzij ri rey Acab. Re itzel rey reʼ xuʼän chë ye kʼïy winäq xkiyaʼ rqʼij Baal. Ye kʼa Abdías kan kʼa «akʼal na» rxiʼin pä riʼ chwäch Jehová (1 Rey. 18:1-13). Rma riʼ taq ri reina Jezabel xuʼij chë kekamsäx jontir rprofetas Jehová, Abdías rtaman wä chë kʼo jun nkʼatzin nuʼän rchë ma nbʼanatäj ta riʼ, ye kʼa nkʼatzin wä chë ma nuxiʼij ta riʼ. Xa xuʼ rkʼë jun profeta ri natoʼ kan nxiʼin wä rij akʼaslemal; ¡ye kʼa Abdías kan ye 100 profetas xerewaj chqä xertzüq tapeʼ kʼo wä jun nüm wayjal chpan ri tinamït riʼ! Kantzij na wä chë ryä kan kwest xuʼän chwäch xerewaj jontir ri profetas riʼ, rma chpan ri tiempo riʼ kan ye kʼïy wä profetas ye kʼo ri ma nkiyaʼ ta rqʼij Jehová chqä yesamäj wä rkʼë ri rey Acab chqä ri reina Jezabel (1 Rey. 18:19).

¿Achkë nqatamaj qa chrij Abdías? Ryä xxiʼij riʼ chwäch ri rey Acab, ye kʼa más na chik xxiʼij riʼ chwäch Dios. Ya riʼ xbʼanö che rä chë ma xxiʼij ta riʼ xerewaj rchʼalal tapeʼ rkʼë jbʼaʼ xtkamsäx. Si chpan ri tinamït akuchï yoj kʼo wä qʼaton chqawäch nqayaʼ rqʼij Jehová, röj chqä nkʼatzin nqatäj qaqʼij rchë nqaxiʼij qiʼ chwäch Dios. Ya riʼ xtyaʼö qachqʼaʼ rchë xkeqatoʼ qachʼalal ri kan kwest najin nkiqʼaxaj.