KʼUTUNÏK RI YEBʼAN CHRIJ LE BIBLIA

¿Nqrküy komä Jehová taq yeqaʼän mamaʼ taq mak?

Le Biblia nukʼüt chë ri winäq yoj ajmakiʼ. Rma röj yoj ralkʼwal Adán, jontir nqmakun. Y taq nqmakun nqajoʼ nqatzolij qiʼ chrij ri xqaʼän. Rkʼajol Dios, Jesucristo, xkäm rchë xtöj qamak. Ri kamïk riʼ nuʼän chë nqïl ri kuyubʼäl mak. Ri rkʼaslemal xyaʼ Jesús pa kamïk kan jun spanïk ri xyaʼ Dios chqë (taskʼij Romanos 3:23, 24).

Ye kʼo winäq kibʼanon nmaʼq taq mak y nkiquʼ si kʼo jun qʼij Dios yerküy. Kan kiʼ qakʼuʼx nqatamaj chë le Biblia nuʼij: «Ri rkikʼel Jesús, ri Rkʼajol, nqrchʼajchʼobʼej chwäch xa bʼa achkë mak» (1 Juan 1:7). Jaʼ, Jehová nkuy qamak tapeʼ ri qamak ye nmaʼq. Nbʼanatäj riʼ taq nqatzolij qiʼ rkʼë ronojel qan (taskʼij Isaías 1:18).

¿Achkë nkʼatzin nqaʼän rchë Dios nuküy qamak?

We nqajoʼ chë Jehová nuküy qamak, kʼo chë nqatamaj rwäch: nkʼatzin nqʼax pa qajolon ri rnaʼoj y achkë rma nrajoʼ chë nqasmajij ri rpixaʼ (Juan 17:3). Jehová kan nrajoʼ nuküy kimak ri winäq ri nkitzolij kiʼ rkʼë ronojel kan y nkitäj kiqʼij rchë nkijäl kikʼaslemal (Taskʼij Hechos 3:19).

Röj nqkowin nqaʼän chë Dios kiʼ rkʼuʼx nuʼän qkʼë. Ryä nqʼax chwäch chë yoj ajmakiʼ. Jehová kan ütz rnaʼoj y kan nujyowaj qawäch. ¿Ma nuʼän ta komä ya riʼ chawä chë nawajoʼ natamaj achkë rbʼanik nakʼwaj jun jïk kʼaslemal chwäch Jehová? (taskʼij Salmo 103:13, 14).