Le Biblia xjäl kikʼaslemal
«Rma kan kʼïy nkʼutunik yenbʼän kowan nchpü nkʼuʼx» (RAUDEL RODRÍGUEZ RODRÍGUEZ)
JNAʼ RI XALÄX: 1959
RTINAMIT: CUBA
RBʼANON QA: KOWAN YÏN TÏX CHKIWÄCH RI QʼATBʼÄL TAQ TZIJ
NKʼASLEMAL: Xinaläx pa ri tinamït La Habana (Cuba) ri lugar ri akuchï xikʼïy wä ri winäq ma jun ta wä kirajil y kan nqä wä chkiwäch nkiʼän chʼaʼoj pa taq bʼey. Taq yïn kʼajol xintjoj wiʼ chrij ri yudo y chrij nkʼaj chik rbʼanik yachʼeyon.
Rma rïn kan kowan nnaʼoj pan escuela, ri nteʼ ntataʼ xkiʼij chwä chë ütz yibʼä pa universidad. Chriʼ taq xinquʼ chë ri rbʼanik nkiqʼät tzij ri qʼatbʼäl taq tzij pa ntinamit nkʼatzin njalatäj rma riʼ kan xinpabʼaʼ wiʼ chkiwäch. Rkʼë jun wachiʼil pan escuela xqachʼäy jun policía rchë nqaleqʼaj rpistola y kan kowan xqasök rjolon. Chrij riʼ, xojkikʼwaj pa cárcel y xbʼix chqä chë nqkamsäx. ¡Kʼa riʼ wä 20 njnaʼ, y xa jbʼaʼ nrajoʼ rchë yikäm!
Rma nyonïl xinkitzʼapij qa xinquʼ achkë rbʼanik xtinpabʼaʼ wiʼ chkiwäch ri xkikamsan wchë, rma ma nwajoʼ ta nkʼüt rchë xa nxiʼin wiʼ. Ye kʼa kan kʼïy kʼutunïk ri yenquʼ kij, ¿achkë rma ma pa rbʼeyal ta nbʼan kikʼë ri nkʼaj chik? O ¿xa xuʼ ya reʼ ri kʼaslemal kʼo?
RI RBʼANIK XJALATÄJ NKʼASLEMAL RKʼË LE BIBLIA: Taq xqʼax tiempo xqʼat tzij pa qawiʼ y xbʼix chë nqkanaj qa 30 jnaʼ pa cárcel. Ya riʼ taq xintamaj kiwäch ri testigos de Jehová ri ye kʼo pa cárcel xa rma ri nkinmaj. Kan xqä nmayej chkij rma ryeʼ ma nkixiʼij ta kiʼ, chqä ryeʼ ma nchʼpü ta kikʼuʼx. Tapeʼ ma pa rbʼeyal ta xbʼan kikʼë taq xeyaʼöx pa cárcel, ryeʼ ma kiyowal ta y ma itzel ta kinaʼon.
Ri Testigos xkiqʼalajsaj chi nwäch chë Dios nrajoʼ nuyaʼ jun utziläj qakʼaslemal chqawäch apü. Rkʼë le Biblia xkikʼüt chi nwäch chë xtyaʼöx chqë jun kotzʼijaläj ilew. Akuchï jontir pa rbʼeyal xtbʼan wä y majun ta chʼaʼoj xtjeʼ y jontir winäq kan ütz kinaʼoj xtkiʼän chqä majun ta chik mak chkij y majun bʼëy xkekäm ta (Salmo 37:29).
Kan jaʼäl xintzʼët ri najin xkikʼüt chi nwäch, ye kʼa nnaʼoj rïn ma jnan ta kikʼë ryeʼ. Xinquʼ chë rkʼë jbʼaʼ ma yikowin ta nyaʼ qa ri política o nyaʼ qa wiʼ taq xkichʼäy, rma riʼ xinchäp rskʼixik le Biblia pa nyonïl. Taq xinskʼij yän jontir, xqʼax chi nwäch chë ri testigos de Jehová xa xuʼ ryeʼ ye achiʼel ri naʼäy taq cristianos ri xejeʼ ojer.
Ri xintamaj chrij le Biblia xuʼän chë ntzʼët chë kan kʼïy nkʼatzin njal pa nkʼaslemal. Nkʼatzin njal ri rbʼanik yitzjon, rma ronojel mul nksaj itzel taq tzij. Y nkʼatzin ma yiskʼan ta chik y ma nnüm ta chik wiʼ rkʼë ri política. Kan kwest xuʼän chi nwäch, ye kʼa rkʼë rtoʼik Jehová, eqal eqal xikowin.
Ri kan kʼayewal rbʼanon chi nwäch ya riʼ nqʼät nyowal. Rma riʼ kʼa najin na nkʼutuj ntoʼik che rä Dios. Ri texto achiʼel ri Proverbios 16: 32, kan kowan xirtoʼ, chriʼ nuʼij: «Más ütz jun achï ri ma chanin ta npë ryowal chwäch jun achï ri kowan rchqʼaʼ, y ri nkowin nuqʼät ryowal chwäch ri nchʼäk jun tinamït».
Pa 1991 xiqasäx pa yaʼ y xinok testigo de Jehová ya riʼ xbʼanatäj chpan jun tonel yaʼ rma kʼa yïn kʼo na pa cárcel. Jun jnaʼ chrij riʼ, jojun chkë röj ri yoj kʼo pa cárcel xqesäx y xojkitäq äl España, rma ye kʼo qachʼalal chriʼ. Kan xa xuʼ xinapon, xinmöl wiʼ kikʼë ri testigos de Jehová, ryeʼ kan ütz nkʼulik xkiʼän achiʼel ta kan kʼïy jnaʼ kitaman pa nwäch, xinkitoʼ rchë nkʼwaj jun kʼakʼakʼ kʼaslemal.
RI UTZIL WLON: Komä kan kiʼ nkʼuʼx nyaʼ rqʼij Jehová rkʼë wixjayil chqä kikʼë nmiʼal. Chqä más yikowin nksaj ri ntiempo rchë nkʼüt chkiwäch ri winäq ri kantzij chrij le Biblia. Kʼo mul, taq nquʼ rij ri nkʼaslemal ri xinbʼän ojer y taq nnataj chwä ri xinbʼän kʼa taq yïn kʼajol xa jbʼaʼ xrajoʼ chë yikamsäx. Janina nmatyoxij rma jontir utzil ri wlon pa. Komä ma xa xuʼ ta kʼo nkʼaslemal, kʼo rma yïn kʼäs. Kan kowan nrayij chë napon yän ri Kotzʼijaläj Ilew, taq jontir kan pa rbʼeyal xtbʼan che rä y «ma xtjeʼ ta chik kamïk» (Apocalipsis 21:3, 4).