Le Biblia xjäl rbʼanik kikʼaslemal
¿Achkë xbʼanö che rä jun winäq ri netzʼan y aleqʼon chë xjäl rbʼanik rkʼaslemal? Tqayaʼ qʼij che rä chë ryä tbʼin chqë.
«Kan nqä wä chi nwäch ri carreras chrij kej» (RICHARD STEWART)
XALÄX PA JNAʼ: 1965
RTINAMIT: JAMAICA
RBʼANON QA: NETZʼAN Y ALEQʼON
RI NKʼASLEMAL RBʼANON QA: Xikʼïy wä pä chpan jun zona ri kan tamatäl rwäch ri nbʼix Kingston che rä rcapital Jamaica, chriʼ kwest nawïl ri nkʼatzin chawä, y ma kan ta kʼo samaj y kowan alqʼomaʼ ye kʼo. Ri winäq ri ye kʼo wä chriʼ kan kowan wä nkixiʼij kiʼ chkiwäch ri pandillas, kan ronojel bʼa q’ij nakʼoxaj chë nkesaj qʼaqʼ.
Nteʼ kan nkamsaj wä riʼ pa samaj, rchë nyaʼ ri nkʼatzin chwä chqä chkë taq nchaqʼ, jun ti qʼopoj y jun ti kʼajol, y xuʼän jontir ri kʼo pa rqʼaʼ rchë xjeʼ qestudios. Ye k’a rïn kan nqä wä chi nwäch ri carreras chrij kej. Y kʼïy mul yikanaj qa pa hipódromo y ma yibʼä ta pan escuela. Y rma riʼ xikowin xibʼä chkij jojun kej.
Y ma kʼïy ta tiempo xqʼax kan xbʼä wan chrij ri apuestas y xqä chi nwäch xijeʼ kikʼë kʼïy ixoqiʼ. Chqä xinskʼaj marihuana. Y rchë yikowin nkʼwaj jun kʼaslemal riʼ, xkʼatzin xileqʼan, y rma riʼ kan kʼïy nqʼaqʼ xjeʼ. ¡Y matyox chë ma jmul xinkamsaj ta jun winäq taq xinbʼän kʼïy asaltos!
Y chrij riʼ xinkikʼwaj pa cárcel. Taq xa xuʼ xinel pä xinchäp chik jmul ri kʼaslemal ri nukʼwan wä. Y más na itzel xuʼän nnaʼoj. Tapeʼ ma ke ri ta yiqʼalajin, kowan yïn wiʼx y kan chanin nkatäj nyowal. Y xa xuʼ rïn nquʼ qa wiʼ.
¿ACHKË RBʼANIK LE BIBLIA XJÄL NKʼASLEMAL?: Chpan ri tiempo riʼ ke riʼ rbʼanik kʼaslemal nkʼwan, taq nteʼ xchap rtjonik chrij le Biblia y xok jun testigo de Jehová. Ri rbʼanik xjal rnaʼoj ya riʼ xuʼän chwä chë xinwajoʼ xintamaj achkë xtoʼö rchë. Chrij riʼ xinwajoʼ xintamaj ri nuʼij le Biblia kikʼë ri testigos de Jehová.
Y kan xintzʼët chë ryeʼ ma jnan ta nkikʼüt kikʼë nkʼaj chik religiones y kan rkʼë le Biblia nkiqʼalajsaj wä jontir ri nkiʼij. Kan xa xuʼ ryeʼ ntaman chë yebʼä chuchiʼ taq jay, nkitzjoj chrij le Biblia, achiʼel wä xkiʼän ri naʼäy taq cristianos (Mateo 28:19; Hechos 20:20). Ri jawanaʼïl nkikʼüt chkiwäch, ya riʼ xbʼanö chwä chë xinyaʼ chwäch wan chë ya riʼ ri religión ri kantzij (Juan 13:35).
Taq xintjoj wiʼ chrij le Biblia, xqʼax chi nwäch chë nkʼatzin njäl rbʼanik nkʼaslemal. Jehová Dios kan nutzelaj ri tzʼil taq bʼanobʼäl achiʼel yajeʼ qa rkʼë jun winäq ri ma akʼlaj ta, y si nwajoʼ chë ütz yirtzʼët Jehová nkʼatzin nyaʼ qa jontir ri xa ntzʼilbʼisaj qachʼakul (2 Corintios 7:1; Hebreos 13:4). Xqʼax chi nwäch chë Jehová nnaʼ achiʼel nqanaʼ röj, y rkʼë rbʼanik nkʼaslemal, nbʼän che rä chë kiʼ rkʼuʼx nuʼän o xa nyaʼ bʼis pa ran (Proverbios 27:11). Rma riʼ xinyaʼ chwäch wan, chë ma ntäj ta chik marihuana chqä ma nchäp ta chik jun qʼaqʼ ri xa nkamsan y xintäj nqʼij chë xinjäl nnaʼoj. Ri kan kʼayewal xinyaʼ qa, ya riʼ ri ixoqiʼ y ri apuestas.
Pa naʼäy ma xinwajoʼ ta chë ri wamigos, xkinaʼej chë najin ntjoj wiʼ chrij le Biblia, kikʼë ri testigos de Jehová. Ye kʼa xinjäl ri xinquʼ taq xinskʼij ri xuʼij qa Jesús chpan Mateo 10:33 ryä xuʼij: «Ye kʼa we kʼo jun winäq yirtzelaj rïn chkiwäch ri winäq, rïn chqä xtintzelaj ryä chwäch ri Ntataʼ ri kʼo chlaʼ chkaj». Rma riʼ kan xinbʼij chkë ri wachiʼil ri tajin nbʼän. Ryeʼ kan ma xkinmaj ta wä chë rïn nwajoʼ yinok cristiano. Tapeʼ ke riʼ, rïn xinbʼij chkë chë njal rbʼanik nkʼaslemal.
RI UTZIL WLON: Ri nteʼ kan xel rkʼuʼx taq xtzʼët chë rïn najin nsmajij ri pixaʼ ri kʼo chpan le Biblia. Komä nteʼ ma nchpü ta rkʼuʼx chrij ri najin yenbʼän. Y kan jnan wä qawäch rkʼë nteʼ chqä ri nqanaʼ chrij Jehová. Kʼo jojun mul nnataj chwä ri xenbʼän ojer y kan ma nmaj ta wä chë xikowin xinjäl nkʼaslemal rkʼë rtoʼik Dios. Komä kan ma ütz ta chik ntzʼët ri tzʼil kʼaslemal y ma nrayij ta chik ri bʼeyomäl achiʼel wä ojer.
Xa ta ma xintamaj chrij le Biblia, komä yïn kʼo ta pa cárcel o yïn kamnäq ta chik. Rma ri xintamaj, komä kan kiʼ nkʼuʼx rkʼë nfamilia. Ri wixjayil kan kowan yirtoʼ chqä kʼo jun nmiʼal ri kan nnman tzij y kan jnan wä nqayaʼ rqʼij Jehová. Kan yityoxin rma kʼo jun xkʼutü chi nwäch chrij le Biblia. Rma riʼ, xa bʼaʼ akuchï yïn kʼo wä ntäj nqʼij ntzjoj le Biblia chkë ri winäq. Janina ntyoxij che rä Jehová, chë xyaʼ qʼij chë xinok chpan rtinamit rma ryä xkʼamö pä wchë.
[Comentario]
«Kan jaʼäl xinnaʼ xintamaj chë Jehová nunaʼ achiʼel nqanaʼ röj, rma riʼ rkʼë ri rbʼanik nkʼaslemal nkʼwaj yikowin nbʼän chë ryä nunaʼ kiʼkʼuxlal o nbʼison»
[Achbʼäl]
Aweʼ yïn kʼo rkʼë wixjayil chqä nmiʼal
[Achbʼäl]
Ri rbʼanik xjäl rnaʼoj nteʼ ya riʼ xbʼanö chwä rïn chë xinwajoʼ xintamaj achkë xtoʼö rchë ryä