Experiencia rchë jun chik achï

Supot, jun achï ri kʼo rachoch Tailandia, ryä kan rkʼison wä riʼ chpan rtjik yaʼ. Pa naʼäy xa xuʼ wä nutäj yaʼ chaqʼaʼ, ye kʼa eqal eqal xchap rtjik yaʼ nmaqʼaʼ chqä nkʼaj qʼij. Ronojel mul taq nutäj wä yaʼ xa xuʼ wä rchë nqʼabʼär. Ye kʼa chrij riʼ, xchap rtjonik chij le Biblia kikʼë ri testigos de Jehová y xtamaj chë Dios kan itzel yertzʼët ri qʼabʼarelaʼ. Rma riʼ, xyaʼ qa rtjik yaʼ, ye kʼa xa jbʼaʼ tiempo. Taq rfamilia xkitzʼët chë xqä chik jmul chpan rtjik yaʼ kan kowan xtiʼon kan.

Tapeʼ ke riʼ, ryä ya nrajoʼ wä chik Jehová y kan pa rbʼeyal nrajoʼ nuyaʼ rqʼij. Ri cristianos, ri ye ramigos wä ryä, ronojel mul xkitoʼ chqä xkiʼij chkë rfamilia chë ma tkiquʼ ta chë ryä kan ma xtyaʼ ta qa rtjik yaʼ y xkiʼij chkë chë kejeʼ más rkʼë. Ya riʼ taq xapon pa ran ri nuʼij 1 Corintios 6:10, chë ri qʼabʼarelaʼ ma xkeʼok ta chpan ri Rqʼatbʼäl Tzij Dios. Taq xkʼoxaj riʼ achiʼel ta kʼa riʼ xjaqatäj rwäch, kʼa riʼ xtzʼët chë nkʼatzin nuʼän jontir ri achkë kʼo pa rqʼaʼ rchë nuyaʼ qa rtjik yaʼ.

Rkʼë ri xtamaj pä, kan xyaʼ chwäch ran chë nuyaʼ qa rtjik yaʼ. Rkʼë rtoʼik ri espíritu santo, ri Rchʼaʼäl Dios, ri rfamilia chqä ri congregación, xkowin xyaʼ qa rtjik yaʼ. Ri rfamiliares kan kowan xel kikʼuʼx taq xkitzʼët chë xqasäx pa yaʼ y xok Testigo de Jehová. Komä, Supot, kan jnan rbʼanon rwäch rkʼë Dios achiʼel wä xrayij, y najin chqä yertoʼ nkʼaj chik rchë nkitamaj rwäch Dios.