Ri nrajoʼ nuʼij ri Molaj Ukʼwäy Bʼey chawä
«Kʼo wä chë yïx tijonelaʼ ta chik» (Heb. 5:12). ¡Taquʼ na peʼ! Jehová, ri más ütz Tijonel ri kʼo, nuʼij chqë chë tqakʼutuʼ chkiwäch ri winäq ri qataman chrij ryä. Y röj mamaʼ ruqʼij chqawäch ri nqakʼüt chrij Jehová chkiwäch ri qa-familia, chkiwäch ri qachʼalal pa congregación o taq nqtzjon kikʼë ri winäq chiʼ taq jay. Ye kʼa, ya riʼ chqä jun mamaʼ samaj yaʼon qa pa qaqʼaʼ. Rma riʼ, ¿achkë ütz nqaʼän rchë nq-ok utziläj taq tijonelaʼ?
Nqïl ruqʼalajsaxik ri kʼutunïk riʼ rkʼë ri xtzʼibʼaj ri apóstol Pablo che rä Timoteo: «Ma tayaʼ ta qa ruskʼixik ruwäch wuj chkiwäch ri winäq, keʼapixabʼaj chqä keʼatjoj». Chqä xuʼij: «Rma we xtaʼän riʼ xtaköl qa awiʼ rït chqä ri yekʼoxan awchë» (1 Tim. 4:13, 16). Ri utziläj taq rutzjol ri nqayaʼ chkë ri winäq, nuʼän chë xkekolotäj. Rma riʼ, janina rejqalen chë nqatäj qaqʼij rchë pa rubʼeyal nqaskʼij ruwäch wuj y nq-ok utziläj taq tijonelaʼ. Re folleto reʼ xkarutoʼ rchë xkakowin xtaʼän riʼ. Tqatzʼetaʼ achkë rubʼanik bʼanon pä che rä.
Textos bíblicos ri nkikʼüt utziläj taq naʼoj chqä tzʼetbʼäl ri kikʼwan kiʼ rkʼë ri naʼoj najin ntzʼet.
Jehová ya riʼ ri Nimaläj Qatijonel (Is. 30:20). Re folleto reʼ xkarutoʼ rchë pa rubʼeyal xtaskʼij ruwäch wuj chqä rchë xkatok jun utziläj tijonel. Ye kʼa, ma tamestaj ta chë ronojel ri nqakʼüt, rkʼë Jehová petenäq wä chqä chë yë ryä nbʼanö chë ri winäq yejelun pä rkʼë (Juan 6:44). Kan ronojel bʼaʼ mul taksaj ri Ruchʼaʼäl Dios rchë nakʼüt jun naʼoj. Tabʼanaʼ chë kan yë Jehová nyaʼöx ruqʼij rkʼë ri nakʼüt y ma yë ta rït. Chqä tatjaʼ aqʼij rchë yeʼatoʼ ri yekʼoxan awchë rchë xtkajoʼ Jehová rkʼë ronojel kan.
Dios nuʼij chawä chë katoʼon rkʼë chutzjoxik ri kʼo más rejqalen, ri nkʼatzin nkikʼoxaj ri winäq chwäch jontir le Ruwachʼulew. Röj qataman chë, we rït xtayaʼ qʼij chë kan yë ri loqʼoläj ruchqʼaʼ Dios xkatoʼö, jontir ütz xttel chawäch (1 Ped. 4:11).
Ri awachiʼil chpan ri samaj rchë tjonïk,
Molaj Ukʼwäy Bʼey kichë ri testigos de Jehová