Jesús nkʼasöx pä

Taq Jesús xkäm chwäch ri cheʼ, José, jun bʼeyon achï, xkʼutuj qʼij che rä Pilato rchë nuqasaj rchʼakul. José xpïs rchʼakul Jesús chkipan tzyäq ri nüm kajäl, xyaʼ jbʼül taq aqʼon chrij y xyaʼ chpan jun jül ri majun ksayon rchë. Chrij riʼ, xuʼij chë tkitzʼapij ri jül rkʼë jun mamaʼ abʼäj. Ri sacerdotes ri kʼo kiqʼij xkiʼij reʼ che rä Pilato: «Nqaxiʼij qiʼ chë rtzeqelbʼëy Jesús nkileqʼaj äl rchʼakul y nkiʼij chë xkʼasöx pä chkikojöl ri kamnaqiʼ». Rma riʼ Pilato xuʼij: «Chöj titzʼapij ri jül chqä keʼiyaʼ soldados rchë nkichajij».

Oxiʼ qʼij chrij riʼ, jojun ixoqiʼ nmaqʼaʼ yän xebʼä akuchï xmuq wä Jesús. Taq xeʼapon, xkitzʼët chë ri jül jaqäl chik. Chpan ri jül, kʼo wä jun ángel ri xuʼij reʼ chkë: «Ma tixiʼij ta iwiʼ. Jesús xkʼasöx yän. Tiʼij chkë rtzeqelbʼëy chë kebʼä Galilea rchë nkibʼewlaʼ kiʼ rkʼë».

María Magdalena chanin xbʼä rkʼë Pedro chqä Juan y xuʼij reʼ chkë: «Achkë na xekʼwan rchʼakul Jesús». Pedro y Juan chanin xebʼä akuchï xmuq wä Jesús. Taq xkitzʼët chë kantzij ri xbʼix chkë, xetzolin chkachoch.

Chrij riʼ, María xtzolin akuchï xmuq wä Jesús. Chpan ri jül xertzʼët kaʼiʼ ángeles y xuʼij reʼ chkë: «Ma ntaman ta akuchï xkikʼwaj wä äl rchʼakul Wajaw». Ya riʼ taq xtzʼët jun achï y xquʼ chë xa yë ri njosqʼin rpan ri kotzʼiʼj. Ryä xuʼij reʼ che rä: «Tat, tabʼanaʼ utzil, taʼij chwä akuchï xayaʼ wä». Taq ri achï xuʼij: «¡María!», ryä xtzʼët chë yë wä Jesús. Ryä xuʼij: «¡Ajaw!», y xqʼetej. Jesús xuʼij reʼ che rä: «Taʼij chkë wachʼalal chë xinatzʼët». Rma riʼ, María chanin xbʼeruʼij chkë rtzeqelbʼëy ri xbʼanatäj.

Chpan chqä ri qʼij riʼ, kaʼiʼ chkë rtzeqelbʼëy Jesús xeʼel äl Jerusalén rchë xebʼä Emaús. Taq ye bʼenäq pa bʼey, jun achï xbʼä äl kikʼë y xkʼutuj chkë achkë najin nkitzjoj. Ryeʼ xkiʼij reʼ che rä: «¿Ma akʼoxan ta kʼa? Pa oxiʼ qʼij qa, ri sacerdotes ri más kiqʼij xkikamsaj Jesús. Komä, jojun ixoqiʼ najin nkiʼij chë ryä kʼäs. Ri achï riʼ xkʼutuj reʼ chkë: «¿Ma ninmaj ta ri nkiʼij ri profetas kʼa? Ryeʼ xkiʼij chë ri Cristo nkʼatzin wä nkäm chqä nkʼasöx pä». Chrij riʼ, xtzjon más kikʼë chrij Rchʼaʼäl Dios. Taq xeʼapon Emaús, ri kaʼiʼ rtzeqelbʼëy Jesús xkiʼij che rä ri achï chë tkanaj qa kikʼë. Taq xkichäp waʼin chaqʼaʼ, ryä xuʼän jun oración rchë nutyoxij ri pan. Ri kaʼiʼ achiʼaʼ riʼ xkinaʼej chë yë wä Jesús ri achï riʼ. Pero chaq kʼateʼ ma xkitzʼët ta chik.

Ri kaʼiʼ achiʼaʼ riʼ chanin xebʼä Jerusalén. Taq xeʼapon akuchï kimolon wä kiʼ ri apóstoles, xkitzjoj chkë ri xbʼanatäj. Taq ye kʼo wä chriʼ, Jesús xkʼüt pä riʼ chkiwäch. Pa naʼäy, ri apóstoles ma nkinmaj ta wä chë yë Jesús. Pero ryä xuʼij reʼ chkë: «Titzʼetaʼ nqʼaʼ, kinichapaʼ. Kan tzʼibʼatäl qa chë ri Cristo xtkʼasöx pä chkikojöl ri kamnaqiʼ».