Jesús nukʼüt ri rbʼanik nqaʼän orar

Ri fariseos nqä wä chkiwäch yetzʼet kimä ri nkʼaj chik. Rma riʼ, nkiʼän wä orar akuchï ye kʼo ye kʼïy winäq, yekiyaʼ wä nmaʼq taq oraciones pa kijolon chqä yekikamluj wä pa taq sinagogas chqä pa taq bʼey. Rma riʼ, ri winäq kan xkiquʼ rij taq Jesús xuʼij reʼ: «Ma taʼän ta orar achiʼel ri fariseos. Ryeʼ nkiquʼ chë ütz xketzʼet rma Dios xa rma kʼïy tzij yekiksaj, pero riʼ ma tzij ta. Ri oración rchë yatzjon rkʼë Qatataʼ Jehová y ma rchë ta yatzʼet kimä ri nkʼaj chik. Chqä ma takamluj ta ri naʼij. Jehová nrajoʼ naʼij che rä achkë qäs nanaʼ».

Chrij riʼ, Jesús xkʼüt chkiwäch ri rbʼanik nkiʼän orar. Ryä xuʼij: «Qatat ri yït kʼo chlaʼ chkaj, nqarayij chë tbʼan loqʼoläj che rä abʼiʼ. Nqajoʼ chë tpë Aqʼatbʼäl Tzij chqä chë tbʼan ri nawajoʼ rït, achiʼel chlaʼ chkaj, ke riʼ chqä chwäch le Rwachʼlew». Chrij riʼ, Jesús xuʼij chkë chë ütz nkikʼutuj kiway rchë jun qʼij, chë tkuy kimak chqä chë tkikʼutuj nkʼaj chik ri nkʼatzin chkë.

Jesús chqä xuʼij: «Ronojel mul tabʼanaʼ orar chqä yë ri ütz takʼutuj che rä Jehová, ri Qatataʼ. Jontir tataʼaj yë ri ütz nkajoʼ nkiyaʼ chkë kalkʼwal. Si awalkʼwal nukʼutuj jun pan chawä, ¿xtayaʼ komä jun abʼäj che rä? Y si nukʼutuj jun kär chawä, ¿xtayaʼ komä jun kumätz che rä?».

Chrij riʼ, Jesús xuʼij achkë nqatamaj qa röj. Ryä xuʼij: «Si rït yë ri ütz naspaj chkë awalkʼwal, ¡más na chik ri Qatataʼ Jehová xtyaʼ ri loqʼoläj rchqʼaʼ pan awiʼ! Rït xa xuʼ nkʼatzin nakʼutuj che rä». ¿Naʼän rït ri xuʼij qa Jesús? ¿Achkë nakʼutuj rït che rä Jehová taq naʼän orar?