Jun burra ri ntzjon

Taq ri israelitas jbʼaʼ ma 40 jnaʼ ye kʼo pa desierto, yekichʼakon wä chik kʼïy tinamït. Komä ye kʼo wä pa taq jyuʼ rchë ri tinamït Moab, chunaqaj ri raqän yaʼ Jordán, y xa jbʼaʼ wä chik nrajoʼ rchë yeʼok apü chwäch ri jyuʼ ri rtzjun Dios chkë. Balac, ri rey rchë Moab, xquʼ chë ri israelitas xtkimäj qa rjyuʼ. Rma riʼ xuʼij che rä jun achï ri Balaam rbʼiʼ chë tbʼä Moab rchë nukʼutuj itzel pa kiwiʼ ri israelitas.

Pero Jehová xuʼij reʼ che rä Balaam: «Ma takʼutuj ta itzel pa kiwiʼ ri israelitas». Rma riʼ Balaam ma xrajoʼ ta xbʼä Moab. Ri rey Balac xskʼij chik jmul Balaam y xuʼij chë xtyaʼ che rä xa bʼa achkë ri nrajoʼ ryä. Pero Balaam jmul chik ma xrajoʼ ta xbʼä. Chrij riʼ Dios xuʼij reʼ che rä: «Nyaʼ qʼij chawä chë yabʼä kikʼë, pero xa xuʼ taʼij ri xtinbʼij rïn chawä».

Balaam xjoteʼ äl chrij rburra y xbʼä Moab. Ryä rchʼobʼon wä nukʼutuj itzel pa kiwiʼ ri israelitas, tapeʼ Jehová xuʼij che rä chë ma tuʼän ta riʼ. Ya riʼ taq r·ángel Jehová oxiʼ mul xkʼüt pä riʼ pa bʼey. Balaam ma nutzʼët ta wä ri ángel, pero rburra nutzʼët. Naʼäy, ri burra xel äl pa bʼey y xnïm riʼ pa jun jyuʼ. Chrij riʼ, xjelun chwäch jun muro ri bʼanon rkʼë abʼäj, rma riʼ xpïtzʼ raqän Balaam chwäch ri muro. Pa rkʼisbʼäl, xtzʼyeʼ qa pa bʼey. Che oxiʼ mul riʼ, Balaam xchʼäy ti chköp rkʼë jun cheʼ.

Chrij riʼ, Jehová xuʼän chë ri burra xtzjon. Ri burra xuʼij reʼ che rä Balaam: «¿Achkë rma yinachʼäy?». Balaam xuʼij: «Amak rït ri winäq yetzeʼen chwij. Xa ta kʼo jun wespada yatinkamsaj». Ri burra xuʼij: «Rïn kan kʼïy jnaʼ yatinkʼwan. ¿Kʼo jmul nbʼanon ya reʼ chawä?».

Jehová xuʼän chë Balaam xtzʼët ri ángel. Ri ángel xuʼij: «Jehová xuʼij chawä chë ma kabʼä ta rchë nakʼutuj itzel pa rwiʼ Israel». Balaam xuʼij: «Rïn xisach, xkitzolin chwachoch». Pero ri ángel xuʼij: «Ütz yabʼä Moab, pero xa xuʼ taʼij ri xtuʼij Dios chawä».

¿Naquʼ rït chë Balaam kʼo xtamaj qa chrij ri xbʼanatäj rkʼë? Majun ta, rma oxiʼ na mul xrajoʼ xkʼutuj itzel pa rwiʼ Israel. Pero ri oxiʼ mul riʼ, Jehová xuʼän chë yë ri ütz xkʼutuj pa kiwiʼ ri israelitas. Pa rkʼisbʼäl, ri israelitas xkiʼän chʼaʼoj kikʼë ri moabitas, y Balaam xkäm. Más ta ütz xa ta Balaam kan ta pa naʼäy xnmaj rtzij Jehová, ¿tapeʼ?