Job majun bʼëy xyaʼ ta qa Jehová

¿YEKOWIN komä rsamajelaʼ Dios nkiköchʼ ri kʼayewal y majun bʼëy nkiyaʼ ta qa, tapeʼ chkiwäch nkʼaj chik majun ta rqʼij? Jun achiʼ ri Job rbʼiʼ kʼo chë xqʼaxaj kʼïy kʼayewal. Tqatzʼetaʼ achkë xbʼanatäj.

Job rchʼalal wä Abrahán y xjeʼ chpan ri tinamït ri komä Arabia. Ryä xjeʼ chriʼ taq ri israelitas ye kʼo wä Egipto. Kʼo jun qʼij, Jehová xuʼän jun moloj kikʼë ri ángeles chlaʼ chkaj y Satanás chqä xjeʼ kikʼë. Chkiwäch jontir, Jehová xyaʼ rqʼij Job rma majun bʼëy ryaʼon ta qa ryä. Ke riʼ xkʼüt chë rkʼuqbʼan rkʼuʼx chrij Job. Ye k’a Satanás xqʼabʼaj chrij Job chë xa xuʼ nyaʼ rqʼij Dios rma jontir ri kʼo rkʼë y rma nuchajij. Ye k’a xuʼij che rä Jehová chë we xtresaj jontir ri kʼo rkʼë, Job ma xtyaʼ ta chik rqʼij.

Dios xyaʼ q’ij chë Satanás xresaj jontir rbʼeyomal Job, xkamsaj ralkʼwal chqä xyaʼ ryabʼil. Rma Job ma rtaman ta chë yë Satanás najin nyaʼö ri kʼayewal riʼ pa rwiʼ, ma nqʼax ta wä chwäch achkë rma Dios ryaʼon q’ij chë nqʼaxaj ri tijöj poqonal riʼ. Tapeʼ ke riʼ majun bʼëy xyaʼ ta qa Jehová.

Chrij riʼ, xeʼapon oxi’ achi’a’ ri rchiʼil Job ri xkibʼechʼaʼej y xetzjon rkʼë. Rkʼë ri xkiʼij xkikanuj rbʼanik rchë xkikʼüt chë yë Dios najin nyaʼö pä ri kʼayewal pa rwiʼ rma ri mak rbʼanon. Ye k’a ma ke riʼ ta. Chqä xkiʼij chë Dios ma nukʼuqbʼaʼ ta rkʼuʼx chkij rsamajelaʼ y chë majun ta kiqʼij chwäch. Ye kʼa Job ma xnmaj ta jontir ri xkiʼij che rä. Ryä xuʼij chkë chë tapeʼ xtkäm ryä majun bʼëy xtyaʼ ta qa Dios.

Rkʼë jontir reʼ Job kowan xchʼpü rkʼuʼx rkʼë ri achkë xtuʼij chkë ri achiʼaʼ riʼ. Ye kʼa Elihú, tapeʼ kʼa kʼajol na, xkʼoxaj jontir ri xkiʼij ri achiʼaʼ riʼ y xqʼïl Job rma más xyaʼ qa rqʼij ryä chwäch xyaʼ rqʼij rbʼiʼ Jehová. Chqä kan kuw xtzjon kikʼë ri rchiʼil Job.

Pa rkʼisbʼäl kan yë Jehová xqʼilö rchë Job. Rkʼë jontir ri rbʼanon qa Jehová, xkʼüt chwäch Job chë Dios más nüm rqʼij chkiwäch ri winäq. Job xqasaj riʼ y xyaʼ qʼij chë xqʼil rma Jehová. Rma riʼ xresaj ryabʼil Job y kan kaʼiʼ mul xyaʼ che rä ri kʼo wä rkʼë rbʼanon qa y xejeʼ chik diez ralkʼwal. Jehová xuʼän riʼ rma «kan kowan nqrajoʼ chqä nupoqonaj qawäch» (Santiago 5:11). Job majun bʼëy xyaʼ ta qa Jehová y rkʼë ri xuʼän xkʼüt chwäch Satanás chë, tapeʼ ri winäq nkiqʼaxaj kʼïy kʼayewal, majun bʼëy xtkiyaʼ ta qa Jehová.

(Ri kʼo chpan rwuj Job).