Keputusen si pentingna si banci siban eme mbaktiken diri man Jahwe ras jadi bagin keluargaNa. Ate Jahwe, kerina jelma min bage keputusenna. Engkai? Perban ate Jahwe rembak kita ras Ia janah nggeluh kita seh rasa lalap. (Ul. 30:​19, 20; Gal. 6:​7, 8) Tapi, labo ipaksa Jahwe ise pe ngelayani Ia. Ipediat Jahwe tiap kalak erban keputusen masing-masing. Uga adi lit kalak Kristen si enggo iperidiken si ngelakoken dosa si serius? Adi la ia ertobat, arus ia ipedarat arah runggun. (1 Kor. 5:13) Amin gia bage, merhat kel Jahwe gelah kalak si ngelakoken dosa e mulihken ngelayani Ia. Situhuna, salah sada alasen si pentingna nggit Jahwe mereken tebusen eme gelah kalak si erdosa banci iampuni adi nggit ia ertobat. Jahwe Dibata si perkeleng ngiahken kalak si ngelakoken dosa gelah ertobat.—Sak. 1:3; Rom. 2:4; Jak. 4:8. w24.08 14 par. 1-2

Sanga itulis Rasul Johanes suratna si peteluken, lit kalak si nyebarken ajaren si salah janah erban perpecahen. Tapi lit ka kalak si tetap “erdalan bas kebenaren.” Patuh kalak e man Jahwe janah ‘dalankenna perentah-perentahNa.’ (2 Joh. 4, 6) Kalak si setia e erban meriah ukur Johanes bage pe Jahwe. (Kua. 27:11) Kai pelajarenna? Adi setia kita, pasti meriah ukurta. (1 Joh. 5:3) Meriah ukurta perban siteh maka enggo siban meriah ukur Jahwe. Sanga idah Jahwe nggit kita nulak godan arah doni enda janah erlajar kebenaren, meriah kel ukurNa. Malekat-malekat i surga pe ermeriah ukur. (Luk. 15:10) Kita pe pasti meriah ukurta sanga siidah turang seninata tetap setia. (2 Tes. 1:4) Sanga doni Setan enda ihancurken pe, pasti meriah ukurta ras puas kita, perban sedekah enda enggo tetap kita setia man Jahwe amin pe kita nggeluh bas doni si ikuasai Setan. w24.11 12 par. 17-18

Asa kai nge dekahna perlu perdiatekenndu sekalak jelma sope turikenndu perasanndu man bana? Adi metersa turikenndu perasanndu, banci kari ianggapna kam kalak si merudusa ntah pe la mehuli erban keputusen. (Kua. 29:20) Tapi, adi ndekahsa pe turikenndu perasanndu padahal enggo tehna ngena atendu ia, banci kari katakenna kam la serius kalakna. (Peng. 11:4) Perlu ingetndu, sope turikenndu perasanndu man bana, ula mis akapndu arus kena erjabu. Tapi si pentingna, arus yakin kam enggo kam siap erjabu janah kalak si ngena atendu e pe cocok jadi teman geluhndu. Uga adi lit kalak si ngena atena ngidah kam? Adi la atendu ngena ia, cidahkenlah arah perbahanenndu. Ula banndu ngarap ia man bandu padahal labo lit ukurndu man bana, sebap perbahanen si bage la mehuli.—Ep. 4:25. w24.05 23 par. 9-10