KALANSEN 19
Yala Jehova Seerew ye krecɛn lakikaw ye wa?
An Jehova Seerew dalen b’a la ko an ye krecɛn lakikaw ye. Mun na? An ka dannayakow sinsinnen bɛ min kan, an tɔgɔ min bɛ an kɛ an dan na ani kanuya min bɛ an ni ɲɔgɔn cɛ, an ka olu sɛgɛsɛgɛ.
1. Jehova Seerew ka dannayakow sinsinnen bɛ mun de kan?
Yesu y’a fɔ ko: “[Ala] ka kuma ye tiɲɛ ye.” (Yuhana 17:17) Iko Yesu y’a kɛ cogo min, Jehova Seerew furadama ye u ka dannayakow sinsin Ala ka Kuma kan. An k’an ka bi donw tariku sɛgɛsɛgɛ. San 1900 laban waati la, Bibulukalanden kulu dɔ y’a daminɛ ka Bibulu sɛgɛsɛgɛ koɲuman. U ye u ka dannayakow sinsin Bibulu ka fɔta kan, hali ni u ka dannayakow ni egilisiw ka kalansiraw tun tɛ kelen ye. O kɔ, u y’a daminɛ ka o Bibulu tiɲɛw fɔ mɔgɔ wɛrɛw ye.a
2. Mun na an bɛ an yɛrɛ wele Jehova Seerew?
Jehova bɛ a batobagaw wele a seerew ka d’a kan u bɛ tiɲɛ fɔ a ko la. (Heburuw 11:4–12:1) Misali la, fɔlɔ la, Ala y’a fɔ a ka mɔgɔw ye ko: “Aw ye ne seerew ye”. (Esayi 43:10 kalan.) Yesu welela, “Seere Tilennen”. (Jirali 1:5) O de la, san 1931, an ye nin tɔgɔ sugandi: Jehova Seerew. An nisɔndiyalenba don o tɔgɔ ka kɛ an na.
3. Jehova Seerew bɛ ka Yesu ka kanuya ladege cogo di?
Yesu ye a ka kalandenw kanu kosɛbɛ fo a tun bɛ u jate iko a ka denbaya kɔnɔmɔgɔw. (Marka 3:35 kalan.) O cogo kelen na, Jehova Seerew ye denbaya kelen ye kelenya bɛ min kɔnɔmɔgɔw ni ɲɔgɔn cɛ diɲɛ fan bɛɛ. O de la, an bɛ ɲɔgɔn wele balimakɛw ani balimamusow. (Filemon 1, 2) An fana bɛ nin cikan kan minɛ: “A’ ye . . . balimaw kanu.” (1 Piɛrɛ 2:17) Jehova Seerew bɛ o kanuya jira sira caman fɛ. Misali la, an balimakɛw ni an balimamuso minnu mago bɛ dɛmɛ na, an bɛ olu dɛmɛ hali u mana kɛ diɲɛ fan o fan.
DƆ FARA I KA DƆNNIYA KAN
An k’a ɲini ka fɛn caman dɔn Jehova Seerew ka tariku ko la ani ka dalilu wɛrɛw lajɛ minnu b’a jira ko an ye krecɛn lakikaw ye.
Krecɛn lakikaw bɛ u ka dannayakow sinsin Bibulu kan ani ka u kofɔ mɔgɔ wɛrɛw ye
4. An bɛ an ka dannayakow sinsin Bibulu kan
Jehova tun kɔnna k’a fɔ ko Bibulu tiɲɛ kumaw faamuyali bɛna jɛya ka ta’a fɛ. Daniɛl 12:4 kalan, o kɔ aw ka baro kɛ nin ɲininkali kan:
Mun de bɛna “caya” Ala ka mɔgɔw cɛma ni u bɛ ka ta’a fɛ ka Bibulu sɛgɛsɛgɛ?
Bibulukalanden kulu dɔ, min kɔnɔmɔgɔ dɔ tun ye Charles Russell ye, an k’a lajɛ olu ye Ala ka Kuma sɛgɛsɛgɛ cogo min na. A’ye WIDEYO lajɛ, o kɔ aw ka baro kɛ nin ɲininkali kan:
Wideyo kɔnɔ Charles Russell ni a ka Bibulukalanden ɲɔgɔnw ye Bibulu sɛgɛsɛgɛ cogo di?
I tun bɛ nin dɔn wa?
An ye yɛlɛma don an ka dannayako dɔw la tuma dɔw la. Mun na? Ni tile bɛ ka bɔ an bɛ jamana kɔnɔfɛnw ye ka ɲɛ ka ta’a fɛ cogo min na, Ala fana bɛ a ka Kuma faamuyali di an ma ka ta’a fɛ dɔɔnin dɔɔnin. (Ntalenw 4:18 kalan.) Bibulu kumaw tɛ yɛlɛma, nka tuma o tuma, ni an ye Bibulu faamu ka ɲɛ ka ta’a fɛ, an bɛ yɛlɛma don an ka dannayakow la.
5. An bɛ ɲɛnamaya kɛ ka kɛɲɛ ni an tɔgɔ ye
Tɔgɔ min ye ko Jehova Seerew, mun na an ye o sugandi? A’ye WIDEYO lajɛ, o kɔ aw ka baro kɛ nin ɲininkali kan:
Tɔgɔ min ye ko Jehova Seerew, mun na o tɔgɔ bɛnnen don?
Mun na Jehova ye mɔgɔw sugandi u ka kɛ a seerew ye? Bawo o mɔgɔw bɛna a jira ko ale de ye Ala lakika ye ka d’a kan nkalon caman dara a la. An ka o nkalon fila dɔrɔn lajɛ.
Diinɛ dɔw bɛ u ka mɔgɔw kalan ko Ala b’a fɛ u ka baara kɛ ni jaw ye u ka bato kɔnɔna na. Nka aw ka Levitike 26:1 kalan, o kɔ aw ka baro kɛ nin ɲininkaliw kan:
Tiɲɛ ye mun ye jaw ko la? Jehova bɛ mun de miiri boliw ko la?
Diinɛ ɲɛmɔgɔ dɔw bɛ mɔgɔw kalan ko Yesu ye Ala ye. Nka aw ka Yuhana 20:17 kalan, o kɔ aw ka baro kɛ nin ɲininkaliw kan:
Tiɲɛ ye jumɛn ye? Yala Ala ni Yesu fila jɛlen ye mɔgɔ kelen ye wa?
K’a dɔn ko Jehova ye a ka Seerew ci u ka tiɲɛ waajuli kɛ ale ni a Denkɛ ko la, o bɛ mun kɛ i la?
6. An bɛ ɲɔgɔn kanu
Bibulu bɛ krecɛnw sanga ni Hadamaden farikolo yɔrɔw ye. 1 Kɔrɛntekaw 12:25, 26 kalan, o kɔ aw ka baro kɛ nin ɲininkaliw kan:
Krecɛn lakikaw ka kan ka mun kɛ ni u krecɛn ɲɔgɔn wɛrɛw bɛ ka tɔɔrɔ?
I ye mun de kɔlɔsi kanuya ko la min bɛ Jehova Seerew ni ɲɔgɔn cɛ?
Ni Jehova Seere dɔw bɛ ka tɔɔrɔ diɲɛ fan dɔ la, u Seere ɲɔgɔn minnu bɛ diɲɛ fan bɛɛ, olu bɛɛ bɛ wale kɛ teliya la walasa ka u dɛmɛ. Walasa ka o misali kelen ye, a’ye WIDEYO lajɛ. O kɔ aw ka baro kɛ nin ɲininkali kan:
Jehova Seerew bɛ dɛmɛni minnu kɛ, o bɛ u ka kanuya jira cogo di?
Krecɛn lakikaw bɛ kanuya jira mɔgɔw la minnu mago bɛ dɛmɛ na
MƆGƆ DƆW B’A FƆ KO: “Jehova Seerew ye diinɛ kura de ye.”
Kabini tuma jumɛn Jehova bɛ to ka a batobagaw wele seerew?
BAKURUBAFƆLI
Jehova Seerew ye krecɛn lakikaw ye. An ye denbaya kelen mɔgɔw de ye minnu bɛ diɲɛ fan bɛɛ. An ye Ala batobagaw ye minnu bɛ u ka dannayakow sinsin Bibulu kan. Ani tiɲɛ ye min ye Jehova ko la, an bɛ o jira mɔgɔw la.
Seginnkanni
Tɔgɔ min ye ko Jehova Seerew, mun na an ye o sugandi?
An bɛ ɲɔgɔn minɛ cogo di?
Yala e hakili la, Jehova Seerew ye krecɛn lakikaw ye wa?
NINNU LAJƐ
Jehova Seerew ye kalansira nkalonmaw da kɛnɛ kan cogo min na, o misali dɔ lajɛ.
Jaabiw sɔrɔ ɲininkaliw la, laala i bɛ to ka minnu kɛ Jehova Seerew ko la.
“Ɲininkali minnu bɛ to ka kɛ ka caya Jehova Seerew ko la” (jw.org ɲɛfura dɔ)
Stephen tun bɛ siya wɛrɛw mɔgɔw koniya kosɛbɛ fo a tun bɛ u kɛlɛ. A lajɛ a ye fɛn min ye Jehova Seerew fɛ ni o y’a bila ka yɛlɛmaw kɛ.
a Kabini san 1879 Jehova ka mɔgɔw y’a daminɛ ka La Tour de Garde sɔn-ni-sɔn gafenin bɔ walasa ka Bibulu ka fɔta ɲɛfɔ, o min ye sɛbɛn ye an bɛ min bɔ fo bi.