KALANSEN 17
Yesu ye mɔgɔ sugu jumɛn de ye?
Yesu ye fɛn minnu fɔ ani ka u kɛ k’a to dugukolo kan, ni an bɛ o fɛnw kalan, an bɛ jogow ye minnu bɛ an gɛrɛ Yesu ni a Fa Jehova la. O jogo dɔw ye jumɛnw ye? Ani an bɛ se ka Yesu ladege cogo di an ka ɲɛnamaya kɔnɔ?
1. Sira jumɛnw de fɛ Yesu bɛ i n’a fɔ a Fa?
Ka Yesu to sankolo la, a ye a Fa kanuman ka ko kɛcogow kɔlɔsi ani ka fɛn caman dege a fɛ san miliyari caman kɔnɔ. O y’a to, a bɛ miiri, a bɛ kow ye ani ka kow kɛ tigitigi iko a Fa. (Yuhana 5:19 kalan.) Tiɲɛ na, Yesu bɛ a Fa jogow ladege cogo dafalen na fo a y’a fɔ ko: “Min ɲɛ dara ne kan, o ɲɛ dara ne Fa kan.” (Yuhana 14:9) Ni i bɛ ta’a fɛ ka fɛn caman kalan Yesu jogow ko la, i bɛna Jehova dɔn ka ɲɛ. Misali la, Yesu b’a janto mɔgɔw la, o kɛcogo in b’a jira Jehova b’a janto i la cogo min na.
2. Yesu y’a jira cogo jumɛn na k’a bɛ Jehova kanu?
Yesu y’a fɔ ko: “Nin diɲɛ ka kan k’a dɔn ko ne bɛ ne Fa kanu, ani ne Fa ye ci min fɔ ne ye, ne bɛ o de kɛ.” (Yuhana 14:31) Ka Yesu to dugukolo kan, a y’a jira k’a b’a Fa kanu kosɛbɛ a kɛtɔ ka a kan minɛ hali waati min na o kɛli tun ka gɛlɛn. A tun ka di Yesu ye fana ka to ka kuma a Fa ko la ani ka mɔgɔ wɛrɛw dɛmɛ u ka teriya don u ni a Fa cɛ.—Yuhana 14:23.
3. Yesu y’a jira cogo jumɛn na k’a bɛ mɔgɔw kanu?
Bibulu b’a fɔ ko Hadamadenw ye Yesu “diyaɲe fɛn ye.” (Ntalenw 8:31) A ye o kanuya jira a kɛtɔ ka dusu don mɔgɔw kɔnɔ ani ka u dɛmɛ k’a sɔrɔ a m’a yɛrɛ nafa ɲini. A ye kabakow kɛ minnu y’a jira ko se b’a bolo ani fana ko a bɛ hinɛ. (Marka 1:40-42) A ye mɔgɔw minɛ ni ɲumanya ye, wa a tun tɛ mɔgɔ bɔ mɔgɔ la. A ka kumaw ye dususaalo ani jigiya di mɔgɔ kɔnɔnajɛlenw bɛɛ ma minnu tun bɛ k’a lamɛn. Yesu bɛ Hadamadenw bɛɛ kanu, o de la a sɔnna ka tɔɔrɔ ani ka sa. Nka kanuya kɛrɛnkɛrɛnnen b’a la ka ɲɛsin mɔgɔw ma minnu bɛ taama ka kɛɲɛ ni a ka kalansiraw ye.—Yuhana 15:13, 14 kalan.
DƆ FARA I KA DƆNNIYA KAN
An k’a ɲini ka fɛn caman dɔn Yesu jogow kan. Ani i bɛ se ka kanuya ni bololabila jira iko Yesu y’a kɛ cogo min na, an bɛ o fana sɛgɛsɛgɛ.
4. Yesu bɛ a Fa kanu
Yesu ka misali bɛ an dege an ka kanuya jira cogo la Ala la. Luka 6:12 ani Yuhana 15:10; 17:26 kalan. O tɛmɛsira kelen-kelen bɛɛ kalannen kɔ, aw ka baro kɛ nin ɲininkali kan:
An b’a jira cogo di ko an bɛ Jehova kanu, an kɛtɔ ka Yesu ladege?
Yesu ye a sankolola Fa kanu ani a tun bɛ to ka kuma a fɛ tuma caman delili kɔnɔ
5. Yesu b’a janto mɔgɔw la minnu mago bɛ dɛmɛ na
Yesu tun bɛ mɔgɔ tɔw magow bila a yɛrɛ taw ɲɛ. Hali ni a tun sɛgɛnna, a tun bɛ a ka waati ni a ka fanga kɛ ka mɔgɔw dɛmɛ. Marka 6:30-44 kalan, o kɔ aw ka baro kɛ nin ɲininkaliw kan:
Nin maana in kɔnɔ, Yesu y’a jira sira jumɛnw fɛ k’a b’a mago don tɔw la?—Tilayɔrɔdenninw 31, 34, 41, ani 42 lajɛ.
Mun de tun bɛ Yesu bila ka mɔgɔw dɛmɛ?—Tilayɔrɔdennin 34 lajɛ.
Ikomi Yesu bɛ Jehova jogow ladege, o bɛɛ bɛ e kalan mun de la Jehova ko la?
Yesu b’a mago don mɔgɔ tɔw la cogo minnu na, an bɛ se ka o ladege sira minnu fɛ, olu dɔw ye jumɛnw ye?
6. Yesu bololabilalen don
Yesu tun bololabilalen don hali k’a sɔrɔ bolofɛn caman tun t’a bolo ani a ye dusu don an kɔnɔ anw fana bololabilalen ka kɛ. Kɛwalew 20:35 kalan, o kɔ aw ka baro kɛ nin ɲininkali kan:
Ka kɛɲɛ ni Yesu ka o kuma ye, an bɛ se ka nisɔndiya sɔrɔ cogo di?
A’ye WIDEYO lajɛ, o kɔ aw ka baro kɛ nin ɲininkali kan:
An bɛ se ka nili kɛ sira minnu fɛ hali k’a sɔrɔ fɛn bɛrɛ tɛ an bolo, olu dɔw ye jumɛnw ye?
I tun bɛ nin dɔn wa?
Bibulu b’a fɔ ko an ka to ka Jehova deli Yesu tɔgɔ la. (Yuhana 16:23, 24 kalan.) Ni an bɛ delili kɛ o cogo la, an b’a jira ko an bɛ waleɲumandɔn jira ka ɲɛsin ko ma Yesu ye min kɛ walasa ka an dɛmɛ an ka kɛ Jehova teriw ye.
MƆGƆ DƆW B’A FƆ KO: “Ala mago tɛ an ka tɔɔrɔkow la.”
Ikomi Yesu ye a Fa cogo jira, a ka kɛwalew b’a jira cogo di ko Jehova b’a mago don an na?
BAKURUBAFƆLI
Yesu bɛ Jehova kanu, ani a bɛ mɔgɔw kanu. Ikomi Yesu bɛ i n’a fɔ a Fa, ni i bɛ ka ta’a fɛ ka Yesu dɔn o b’a jira ko i bɛ ka ta’a fɛ ka Jehova fana dɔn.
Seginnkanni
Cogo jumɛn na an bɛ se ka kanuya jira Jehova la iko Yesu y’a kɛ cogo min na?
Cogo jumɛn na an bɛ se ka kanuya jira mɔgɔw la iko Yesu y’a kɛ cogo min na?
Yesu jogo jumɛn de ka di e ye kosɛbɛ?
NINNU LAJƐ
Yesu jogo dɔw lajɛ an bɛ se ka minnu ladege.
A lajɛ Yesu jɔyɔrɔba ye min ye delili kɔnɔna na.
Yesu ye musow minɛ cogo min na, an bɛ se ka kalansira jumɛn sɔrɔ o la?