KALANSEN 8

Mun na Ala y’a to kojugu ani tɔɔrɔ ka kɛ?

1. Kojugu daminɛna cogo di?

1. Hadama bɛ ka jiriden kɔnnen lajɛ; 2. Diɲɛ masabaw; 3. kɛlɛ jaw — Ala y’a to hadamadenw ka mara kɛ walasa k’a jira k’u tɛ se ka Hadamadenw ka kunkow ɲɛnabɔ.

Kojugu daminɛna dugukolo kan tuma min na Sitanɛ ye nkalon fɔlɔ tigɛ. Sitanɛ dara tuma min na mɛlɛkɛ dafalen tun don, nka “a ma to tiɲɛ kan”. (Yuhana 8:44) Bato min ka kan ni Ala dɔrɔn ye, a ye o nɛgɛ minɛ. Sitanɛ ye nkalon tigɛ muso fɔlɔ Awa ye, ani a y’a nɛgɛn a k’ale kan minɛ ka Ala kan sɔsɔ. Hadama farala Awa kan a kɛlen ka Ala kan sɔsɔ. Hadama ka o wale nana ni tɔɔrɔ ani saya ye.—Jenɛse 3:1-6, 19 kalan.

Tuma min na Sitanɛ ye Awa bila a ka Ala kan sɔsɔ, Sitanɛ ye murutili daminɛ Ala ka masabaya ma, o min bɛ a kɛ kɔrɔtalenba ye, min ka kan ni mara ye. Hadamaden fanba farala Sitanɛ kan u kɛlen ka Ala ka sariyaw fili. O la, Sitanɛ kɛra “diɲɛ kuntigi” ye.—Yuhana 14:30; 1 Yuhana 5:19 kalan.

2. Yala fiɲɛ tun bɛ Ala ka fɛn dannen na wa?

Ala ka baara bɛɛ dafalen don. Ala ye Hadamadenw ni mɛlɛkɛ minnu da, se tun bɛ olu ye ka Ala kan minɛ dafalenya kɔnɔ. (Dutɛrɔnɔmɛ 32:4, 5) Ala ye an da, ka se di an ma an ka se k’a sugandi an yɛrɛ ye ka ko ɲuman kɛ walima ka kojugu kɛ. An ka se ka kow sugandi an yɛrɛ ye Ala ye o min di an ma, o b’a ka kanuya de jira.—Yakuba 1:13-15; 1 Yuhana 5:3 kalan.

3. Mun na Ala ye a to tɔɔrɔ ka kɛ fo sisan?

Waati dantigɛlen kɔnɔ, Jehova ye a tɔ murutili ka kɛ a ka masabaya ma. Mun na? Walasa k’a jira Hadamadenw na k’u mana fɛrɛ o fɛrɛ tigɛ, walasa k’u yɛrɛ mara k’a sɔrɔ ale tɛ, nafa tɛ o la. (Waajulikɛla 7:29; 8:9) San 6 000 Hadamadenw ka tariku kɔfɛ, an bɛ a kɔlɔsi ko a jɛlen don ko mara tɛ se ka kɛ Ala kɔ. Hadamaden kuntigiw dɛsɛra ka kɛlɛ, mɔgɔ faga, tilenbaliya ani bana ban.—Jeremi 10:23; Romɛkaw 9:17 kalan.

Mɔgɔ minnu bɛ sɔn Ala ka kuntigiya ma, olu bɛ nafa bɔ o la, o min danfara bɛ a ni hadamaden kuntigiw cɛ. (Esayi 48:17, 18). Sɔɔni Jehova bɛna Hadamaden gofɛrɛnɛmanw bɛɛ bɔ yen. Mɔgɔ minnu kɛlen bɛ ka Ala sugandi i n’a fɔ u kuntigi, olu dɔrɔn de bɛna sigi dugukolo kan.—Esayi 11:9; Daniɛl 2:44 kalan.

Wideyo lajɛ min tɔgɔ ye ko Mun na Ala y’a to tɔɔrɔ ka kɛ?

4. Ala ka muɲuni bɛ a to an bɛ se ka mun kɛ?

Sitanɛ ye a fɔ ko mɔgɔ si tɛna sɔrɔ min bɛ Jehova bato gansan ni kantigiya ye. Yala i bɛ se k’a jira ko o ye nkalon ye wa? I bɛ se. Ala ka muɲuni bɛ waati di an kelen kelen bɛɛ ma, walasa k’a jira ni an bɛ Ala walima hadamaden ka kuntigiya de fɛ. An bɛ o jira an ka ɲɛnamaya kɛcogo de fɛ.—Job 1:8-12; Ntalenw 27:11 kalan.

5. Cogo di an bɛ se ka Ala sugandi ka kɛ an kuntigi ye?

Mɔgɔw bɛ Bibulu kalan na — An ka sugandili bɛ a jira ni an bɛ Ala de fɛ i n’a fɔ an kuntigi

An bɛ Ala sugandi i n’a fɔ an kuntigi an kɛtɔ ka bato lakika ɲini, min sinsinnen bɛ Ala ka kuma kan n’o ye Bibulu ye, ani ka o sira taama. (Yuhana 4:23) An bɛ se ka ban Sitanɛ ka kuntigiya ma an kɛtɔ ka an sen bɔ politiki ani kɛlɛ kow la i n’a fɔ Yesu.—Yuhana 17:14 kalan.

Se min bɛ Sitanɛ bolo, a bɛ baara kɛ ni o ye walasa ka jɔgɔ bɛnbaliw ani kɛwalejuguw sankɔrɔta. Ni an bɛ an ban o ko sugu kɛli ma, an bɛ se ka juguw sɔrɔ teri kunda, walima dɔw yɛrɛ bɛ se ka u ɲagaribɔ an na. (1 Piɛrɛ 4:3, 4) O bɛɛ nata an ka kan ka sugandili de kɛ. Yala an faralen don mɔgɔw kan, minnu bɛ Ala kanu wa? Yala an bɛ Ala ka sariyaw bato ni hakilitigiya ani kanuya ye wa? Ni an b’o kɛ, an b’a jira ko Sitanɛ ye nkalon tigɛ a kɛlen ka fɔ ko gɛlɛya kɔnɔ mɔgɔ si tɛ se ka kow kɛ iko Ala b’a fɔ cogo min na.—1 Kɔrɛntekaw 6:9, 10; 15:⁠33 kalan.

Ala ka kanuya kɔnɔ a ko k’a bɛna kojugu ani tɔɔrɔ ban. Mɔgɔ minnu b’a jira ko u dalen b’o la, olu bɛna ɲɛnamaya diyabɔ badaa dugukolo kan.—Yuhana 3:16 kalan.

Walasa ka kunnafoni wɛrɛw sɔrɔ, Bibulu bɛ mun de fɔ tigitigi? gafe tilayɔrɔba 11nan lajɛ.