KALANSEN 6

Jigiya jumɛn bɛ mɔgɔ salenw ye?

1. Kibaru duman ye jumɛn ye saya ko la?

Lazarɛ min su lakunnuna o balimamusow Marte ani Mariyama nisɔndiyalen bɛ a kun bɛn

Tuma min na Yesu sera Bɛtani Jerusalɛm kɛrɛfɛ, o y’a sɔrɔ a teri lazare tun sara a bɛ tile naani bɔ. Yesu taara a ka kaburu la ni Marte ani Mariyama ye, olu minnu tun ye su balimamusow ye. Waati dɔnni kɔnɔ, jamaba ye i dalajɛ. Yali i bɛ se ka i miiri Marte ani Mariyama ka nisɔndiya la, Yesu kɛlen ka Lazare lakunun.—Yuhana 11:21-24, 38-44 kalan.

Marte tun bɛ kibaru duman dɔn saya ko la. A tun b’a dɔn ko Jehova bɛna mɔgɔ salenw lakunun ɲɛnamaya kama dugukolo kan kokura.—Job 14:14, 15 kalan.

2. Suw cogoya ye jumɛn ye?

Hadama dali, ani o kɔ a ka saya — Ala ko Hadama ma: “I ye buguri ye, i na kɔsegin buguri la.”—JENƐSE 3:19.

Hadamadenw dilanna ni buguri ye. (Jenɛse 2:7; 3:19) Ni walima hakili tɛ an na min bɛ ɲɛnamaya kɛ farisogo joli ma kɔnɔ. An ye dafɛn farikolomaw de ye, wa ni an sara farikolo yɔrɔ si tɛ yen, min tɛ sa. Ni an sara, an kunkolosɛmɛ fana bɛ jɔ ani an ka miirili kow bɛ ban. O cogo la, Lazare ma se ka foyi fɔ a ka saya waati kɔnɔna kow kan, ka d’a kan a tun tɛ foyi kalama.—Zaburu 146:4; Waajulikɛla 9:5, 6, 10 kalan.

Yala Ala bɛ mɔgɔw nimatɔɔrɔ ni tasuma ye u salen kɔfɛ wa? Kabini Bibulu ye a jira ko suw tɛ foyi kalama, a jɛlen don ko jahanama tasuma ye kalansira ye min tɛ tiɲɛ ye, ani o bɛ Ala tɔgɔ tiɲɛ. Ka mɔgɔw tɔɔrɔ ni tasuma ye, Ala bɛ o miiriya suguw haramu.—Jeremi 7:31 kalan.

Wideyo lajɛ min tɔgɔ ye ko Suw cogoya ye jumɛn ye?

3. Yala mɔgɔ salenw bɛ se ka kuma an fɛ wa?

Mɔgɔ salenw tɛ se ka kuma, wa u tɛ se ka mɛnni kɛ. (Zaburu 115:17) Nka mɛlɛkɛ dɔw de kɛra mɛlɛkɛ juguw ye, olu bɛ kuma mɔgɔw fɛ walasa ka u lafili u k’a miiri k’u ka mɔgɔ salenw de don. (2 Piɛrɛ 2:4) K’a ɲini ka suw kili Jehova bɛ o haramuya.—Dutɛrɔnɔmɛ 18:⁠10, 11 kalan.

4. Jɔni de bɛna segin ɲɛnamaya la?

Cɛ dɔ min kɔseginna ɲɛnamaya la alijɛnɛ kɔnɔ bɛ ka kalan Ala ko la. Ani o cɛ kelen bɛ ka mɔgɔ wɛrɛw dɛmɛ minnu lakunnuna.

Mɔgɔ miliyɔn caman minnu bɛ kaburu kɔnɔ olu bɛna segin ɲɛnamaya la dugukolo kan. Hali mɔgɔ minnu tun tɛ Ala dɔn ani minnu yɛrɛ ye kojuguw kɛ, ka d’a kan u tun tɛ Ala dɔn, olu bɛna lakunun.—Luka 23:43; Kɛwalew 24:15 kalan.

Mɔgɔ lakununnenw bɛna se ka kalan tiɲɛ ko la Ala kan, ani ka u ka dannaya da Yesu kan, u kɛtɔ k’a kan minɛ. (Jirali 20:11-13) O mɔgɔw cɛ la, koɲumankɛlaw na ɲɛnamaya banbali sɔrɔ dugukolo kan.—Yuhana 5:28, 29 kalan.

5. An bɛ mun kalan Jehova kan sulakununni sababu fɛ?

Ala ye jigiya di mɔgɔ salenw ma, a kɛlen k’a Denkɛ ci o k’a ka ɲɛnamaya di anw kama. O la sulakununni bɛ an kalan Jehova ka kanuya de la ani a ka nɛɛma. Ni mɔgɔ salenw seginna ɲɛnamaya la, i b’a fɛ ka jɔni de ye kɛrɛnkɛrɛnnenya la?—Yuhana 3:16; Romɛkaw 6:23 kalan.

Walasa ka kunnafoni wɛrɛw sɔrɔ, Bibulu bɛ mun de fɔ tigitigi? gafe tilayɔrɔba 6, 7 ani 10nan lajɛ.