Dɛmɛ laseli mɔgɔw ma, ‘kɛlɛw ni kɛlɛ kow ŋunuŋunukan’ kɔnɔna na

Nin diɲɛ laban tile in na, an sigilen bɛ n’a ye ka “kɛlɛ kow kibaru mɛn ka kɛlɛ kow ŋunuŋunukan mɛn.”( Matiyu 24:6) O bɛɛ n’a ta, ni gɛlɛya ye an balimaw sɔrɔ o kɛlɛw kosɔn, u mago bɛ dɛmɛ minnu na, u bɛ olu sɔrɔ. San 2022 Ɲɛmɔgɔ kulu ka ɲɛfɔli 3nan kɔnɔna na, kunnafoni dɔw dira minnu bɛ mɔgɔ hakili sigi ka ɲɛsin dɛmɛni baaraw ma minnu bɛ ka kɛ Erɔpu kɔrɔn yan fan fɛ. O dɛmɛw bɛ ka kɛ mɔgɔw ye Ukrɛni kɛlɛ bɛ ka minnu tɔɔrɔ. An balimaw bɛ ka ɲɔgɔn dɛmɛ cogo di hali ni o kɛlɛ bɛ ka juguya ka ta’a fɛ? An balima minnu bɛ Ukrɛni, o dɛmɛw bɛ ka olu nafa cogo di?

U mago bɛ mun de la? Ani o bɛ ka lase u ma cogo di?

Feburuyekalo tile 24 san 2022, kɛlɛ daminɛna don min na Ukrɛni, Komitew ka baarako labɛnbagaw ka komite mɔgɔw ye u ka yamaruya di walasa wari dɔ ka di, ka an balimaw dɛmɛ minnu bɛ Ukrɛni. Ukrɛni tɔn bolofara y’a daminɛ teliya la ka fɛnw san minnu bɛ u ka yɔrɔ la ani ka olu di Kasaaratɔw dɛmɛni komite 27 ma, u ye minnu sigi o ko kama.

Ka fara Ukrɛni tɔn bolofara ka dɛmɛ kan, balima minnu bɛ Jehova Seerew ka Jɛkulu sigiyɔrɔsoba la, olu y’a daminɛ ka a jateminɛ fɛn minnu bɛ se ka Ukrɛni balimaw dɛmɛ. Ɲɛmɔgɔ kulu ka komite fila ni o ye: Komitew ka baarako labɛnbagaw ka komite ni Sɛbɛnw ani fɛn wɛrɛw labɔli komite ye, olu y’a ɲini Baarada mɔgɔw fɛ minnu bɛ fɛnw sanni ko ɲɛnabɔ diɲɛ fan bɛɛ u ka baara kɛ ni Ukrɛni ni Polɔɲi tɔn bolofaraw mɔgɔw ye walasa ka kow sigi sen kan ani ka u boloda. Balima dɔw bɛ baara kɛ nin baaradaw la Ukrɛni ni Polɔɲi tɔn bolofaraw la ni o ye: Baarada min bɛ fɛnw sanni ko ɲɛnabɔ, Baarada min bɛ fɛnw ci ani baarada min bɛ sariyakow ɲɛnabɔ. O balimaw ni Ukrɛni tɔn bolofara komite mɔgɔ dɔ ani baarada mɔgɔ dɔw minnu bɛ fɛnw sanni ko ɲɛnabɔ diɲɛ fan bɛɛ, olu bɛɛ bɛ ɲɔgɔn ye don o don walasa ka kow labɛn.

Jay Swinney o min bɛ baara kɛ baarada la min bɛ fɛnw sanni ko ɲɛnabɔ diɲɛ fan bɛɛ, o y’a fɔ ko: “Balimaw mago tun bɛ min na, an ye o de jateminɛ fɔlɔ. O yɔrɔ balimaw tun degelen bɛ dumuni ni saniyafɛn minnu na ka ban, an tun b’a fɛ ka olu de di u ma. Nka, ka a dɔn o balimaw mago jɔnjɔn tun bɛ fɛn minnu na, o tun tɛ a ko bɛɛ la gɛlɛman ye. Min tun ka gɛlɛn, o tun ye k’a dɔn an bɛna se ka o fɛnw lase u ma cogo min na teliya ni lakana la Ukrɛni kɛlɛ kɔnɔna na.”

Marisikalo tile 9 san 2022, balimaw mago tun bɛ fɛn jɔnjɔn minnu na, olu dɔnna. Dumuni kartɔnw i n’a fɔ sogo ni jɛgɛ minnu bɛ buwatiw kɔnɔ, suman kisɛw, malo, shɔ, olu de tun bɛna di ka fara saniyafɛnw kan i n’a fɔ safunɛ ani banakɔtaga papiyew. O waati la, balimaw y’a jateminɛ ko walasa o fɛnw ka mɔgɔ kelen bɔ kalo kelen kɔnɔna na, o sɔngɔ bɛ taa dolari wari 65 la ni o bɛ bɛn cfa wari 41 000 ɲɔgɔn ma. Ikomi balima caman mago tun bɛna kɛ o fɛnw na, Komitew ka baarako labɛnbagaw ka komite ye u ka yamaruya di walasa wari caman ka don o dɛmɛw dafɛ. O fɛnw tun bɛna se u seyɔrɔ la cogo di k’a sɔrɔ an ma an balimaw bila farati la?

Marisikalo tile 13, Polɔɲi balima 2 taara ni fɛn fɔlɔw ye ka bɔ Polɔɲi tɔn bolofara la ka taa u bila Lviv dugu fɛn marayɔrɔ dɔ la o min bɛ Ukrɛni walasa ka sɛgɛsɛgɛli kɛ k’a dɔn ni u bɛna se lakana kɔnɔna na. Tile damadɔ sani u ka taa, Polɔɲi ni Ukrɛni tɔn bolofara mɔgɔw ye u dɛmɛ ka u ka taama labɛn. Walasa u ka se ka taa o dɛmɛw di balimaw ma, tɔn bolofara ye papiye dɔ labɛn min bɛ se ka u dɛmɛ ka frɔntiɛri tɛmɛn, a ka ye u ka mɔbiliw kan ka jɛya ko u bɛ ka taa dɛmɛw de di. U ye baara kɛ ni Ukrɛni balimaw fana ye walasa k’a dɔn sira min ka telin ni u tɛmɛnna frɔntiɛri la. O labɛnw ni Jehova ka dɛmɛ y’a to, o fɛnw sera ka don Kasaaratɔw dɛmɛni komite mɔgɔw bolo lɛrɛ 24 kɔnɔ u selen kɔ Lviv dugu la. Ani fana, an balimaw sera ka segin Polɔɲi k’a sɔrɔ fosi ma u sɔrɔ.

Hali ni o taama fɔlɔ in ɲɛna, balimaw sera ka fɛn hakɛ min lase u ma, o ma tɛmɛn tɔni kelen kan. U dun mago tun bɛ tɔni hakɛ min na, o tun bɛ taa fo tɔni 200 ɲɔgɔn na. O tɔni hakɛ bɛɛ tun bɛna se ka lase u ma ani ka tila mɔgɔw ni ɲɔgɔn cɛ teliya la cogo di?

“Dusu ɲuman na kɛ i ka mɔgɔw la”

Kɛlɛ min bɛ ka kɛ Ukrɛni, o bɛ ka an balimaw tɔɔrɔ cogo min na, mɔgɔw kɛlen ka o kalan jw.org siti san fɛ, o ye u bila ka dɛmɛ kɛ ka bɔ diɲɛ fan bɛɛ. O mɔgɔ minnu bɛ bɔ yɔrɔjanw na, olu caman ye wariw di Jehova Seerew ka baaraw kama minnu bɛ kɛ diɲɛ bɛɛ kɔnɔ, wa u b’a dɔn ko baara bɛna kɛ ni o wariw ye koɲuman. Mɔgɔ wɛrɛ minnu bɛ Ukrɛni kɛrɛfɛ duguw la, olu fana sera ka u ka waati, u fanga ani u bolofɛnw di o dɛmɛ kama. An ka misali damadɔ lajɛ.

Polɔɲi, mɔgɔw y’a bɔ u yɛrɛ la ka kartɔn ba caman labɛn koɲuman, ani denmisɛnninw fana ye desɛnw kɛ karti dɔw kan u bolo la. Baarada min bɛ fɛnw sanni ko ɲɛnabɔ Polɔɲi tɔn bolofara la, Bartosz Kościelniak min ye o baarada mɔgɔ dɔ ye, o y’a fɔ ko: “Ne ye Zaburu 110:3 kalan siɲɛ caman, o yɔrɔ la, a fɔlen bɛ ko ‘dusu ɲuman na kɛ Jehova ka mɔgɔw la’. Nka k’a ye ko balima kɛmɛ caman ye u labɛn yɔrɔnin kelen walasa ka na dɛmɛ don, o y’a jira ne la ka jɛya ko o tɛmɛsira in kumaw ye tiɲɛ yɛrɛ de ye.”

Baarada dɔ min bɛ fɛnw lase mɔgɔw ma jamanaw ni ɲɔgɔn cɛ, Jehova Seere dɔ min ye o baarada tigi ye, o y’a ka kamiyɔnw di ani ka esansi fana kɛ u la walasa baara ka kɛ ni u ye. A ko: “Nin ko in y’a to ne sera ka n’ka kanuya jira n’balimaw ani Jehova la. Ne ye dɛmɛ min kɛ, o ye ne nisɔndiya kosɛbɛ.” Esansi hakɛ min dira, o bɛ taa fo esansi litiri 7 700 la, wa balimaw ye u ka waati di ka kilomɛtɛrɛ 48 000 bɛɛ boli walasa ka o dɛmɛw lase Ukrɛni balimaw ma!

Ikomi balimakɛ ni balimamuso caman y’a bɔ u yɛrɛ la ka u sen don nin dɛmɛni baara in na ni kanuya ye, Marisikalo tile 28, tile 15 dɔrɔn fɛn fɔlɔw dilen kɔfɛ, an sera ka dumuni, saniyafɛnw ani furaw tɔni 100 de bila ka taa Ukrɛni. An ni jagokɛla minnu ye baara kɛ ɲɔgɔn fɛ, ikomi olu ni an balimaw ye fɛn caman di an ma ni bololabilalenya ye, wari min tun ka kan ka bɔ Ukrɛni balimaw dɛmɛni kama, dɔ bɔra o la kosɛbɛ. Fo ka se bi ma, Jehova Seerew ye fɛn minnu lase Ukrɛni dɛmɛni hukumu kɔnɔ, o ka ca ni tɔni 190 ye. O dɛmɛ ye nɔ jumɛn de bila an balimaw la?

“An ye aw ka kanuya ye olu fɛ yɛrɛ de!”

Dɛmɛ ninnu selen Lviv, Kasaaratɔw dɛmɛni komitew ye olu di mɔgɔw ma minnu mago bɛ o dɛmɛw la Ukrɛni fan bɛɛ. O dɛmɛ ninnu bilala ka taa dugu caman na, a dɔw yɛrɛ ka jan Lviv la ni kilomɛtɛrɛ 1 300 ye. Hali ni o baaraw kɛcogo ɲɛna kosɛbɛ ani ko balimaw ye o kɛ ni u seko bɛɛ ye, o kɛli ye waati caman ta.a

Markus Reinhardt, o min ye Ukrɛni tɔn bolofara komite mɔgɔ dɔ ye, o ko: “Nin kɛlɛ in sen fɛ, balima caman ye Jehova ka kanuya ye. Bilasirali minnu bɛ bɔ Jehova ka jɛkuluba yɔrɔ, u y’a ye fana ko a nafa ka bon kosɛbɛ ka tugu olu kɔ, hali sani kasaara dɔ ka kɛ. Misali la, laadilikan dira an bɛɛ ma ko an ka dɔgɔkun caman dumuni ni ji mara an ka so. Anton, o min ye diinɛ maakɔrɔ dɔ ye Kyiv dugu la, o y’a fɔ o laadilikan ko la ko: ‘Jehova ka jɛkuluba ye an labɛn ko gɛlɛnw kunbɛnni kama, wa an b’a fo kosɛbɛ o kosɔn. Ka dumuniw ni jiw mara an ka so ani ka arajo dɔ bila an kɔrɔ, o ye an niw kisi tiɲɛ yɛrɛ la.’ An bɛ balimaw fo kosɛbɛ bawo u tugura o laadilikan kɔ. O dumuniw marali de ye u dɛmɛ u ka to ni na ani ka to kɛnɛya la sani tɔn bolofara ka kow sigi sen kan walasa ka dɛmɛ lase u ma.”

Balimaw kɛlen ka o dɛmɛw sɔrɔ, o ye nɔ jumɛn bila u la? Mikola ni Zinaida, olu minnu bɛ Kharkiv dugu la, olu y’a fɔ ko: “Aw ye min kɛ an ye, o donna an na kosɛbɛ. Aw ye dumuni ni fura minnu di an ma, aw ni ce kosɛbɛ olu kosɔn. Tiɲɛ yɛrɛ la, an ye Jehova bolo ye nin ko la.” Valentina, o min fana bɛ o dugu kelen na, o ko: “Kɛlɛ in daminɛ na, mɔgɔ caman tun bɛ taa u jɔ ɲɔgɔn kɔ ka makɔnɔni kɛ butikiw da la walasa ka se ka fɛnw san. O bɛɛ n’a ta, mɔgɔw mago tun bɛ fɛn minnu na, o tun sɔrɔ man di tuma bɛɛ. Jehova tun bɛ o ko dɔn wa a tun ɲɛ bɛ o gɛlɛya la. A ye balima dɔw sigi walasa olu ka dɛmɛ lase mɔgɔw ma u ka so, wa balimaw mago jɔnjɔn tun bɛ fɛn minnu na, olu de lasera u ma! Nin gɛlɛya suguw kɔnɔna, ni a kɛra iko bɔcogo tɛ yen bilen, o waati de la an b’a ye ko Jehova ni a ka jɛkuluba bɛ a janto an na cogo kɛrɛnkɛrɛnnen na. K’a ye ko Jehova bɛ an dɛmɛ waati bɛnnen na, kɛrɛnkɛrɛnnenya la tuma min na an mago bɛ a ka dɛmɛ na kosɛbɛ, o bɛ ne nisɔndiya yɛrɛ de.”

Yevhen ani Irina, olu minnu bolila ka bɔ Marioupol dugu la kɛlɛ ɲɛ, olu ko: “Aw ye dɛmɛ min lase an ka denbaya ma ani ka aw janto an na cogo min na, o diyara an ye kosɛbɛ. O dɛmɛ nana a waati bɛnnen yɛrɛ de la. Aw ye fɛn minnu ci an ma, an ye aw ka kanuya ye olu fɛ yɛrɛ de!”

Siga t’a la ko an y’a ye ko Jehova ye baara kɛ ni a ka hakili senu ye ka bilasiraliw di a ka mɔgɔw ma walasa ka dɛmɛ lase mɔgɔw ma ni kanuya ye ‘kɛlɛw ni kɛlɛ kow ŋunuŋunukan’ kɔnɔna na. Aw bɛ bolomafara minnu di an ka baaraw kama diɲɛ bɛɛ kɔnɔ, cogoyaw fɛ minnu caman kofɔlen don donate.jw.org kan, olu b’a to nin dɛmɛw bɛɛ ka se ka kɛ. Aw bɛ o min kɛ ni bololabilalenya ye, aw ni ce olu kosɔn.

Ka dɛmɛ lase mɔgɔw ma joona lakana kɔnɔna na

1. 

   Feburuyekalo tile 24 san 2022: Komitew ka baarako labɛnbagaw ka komite mɔgɔw ye u ka yamaruya di walasa wari dɔ ka di, ka an balimaw dɛmɛ minnu bɛ Ukrɛni. O y’a to tɔn bolofara mɔgɔw ka se ka mɔgɔw dɛmɛli daminɛ

2. 

   Feburuyekalo tile 24 ka taa bila Marisikalo tile 8 na san 2022: Ukrɛni tɔn bolofara y’a daminɛ ka fɛnw san minnu bɛ u ka yɔrɔ la ani ka olu di mɔgɔw ma Kasaaratɔw dɛmɛni komitew sababu fɛ. Fɛn minnu bɔra Polɔɲi, Ukrɛni tɔn bolofara ye a labɛn fana ka olu kunbɛn ani ka u di mɔgɔw ma

3. 

   Marisikalo tile 9 san 2022: Komitew ka baarako labɛnbagaw ka komite mɔgɔw ye u ka yamaruya di walasa dɛmɛw ka lase Ukrɛni mɔgɔw ma

4. 

   Marisikalo tile 10 ka taa bila marisikalo tile 12 la san 2022: Kow bolodara walasa fɛn fɔlɔw ka bɔ Polɔɲi ka taa u bila Lviv dugu la o min bɛ Ukrɛni, walasa ka sɛgɛsɛgɛli kɛ k’a dɔn ni balimaw bɛna se yen lakana kɔnɔna na

5. 

   Marisikalo tile 13 san 2022: Dumunifɛnw ni fɛn wɛrɛw bɔra Polɔɲi ka taa Lviv dugu la o min bɛ Ukrɛni walasa ka sɛgɛsɛgɛli kɛ k’a dɔn ni balimaw bɛna se yen lakana kɔnɔna na

6. 

   Marisikalo tile 14 ka taa bila marisikalo tile 16 la san 2022: Lajɛba kɛyɔrɔ dɔ la, Pozinan kɛrɛfɛ o min bɛ Polɔɲi dugu la, baarada min bɛ yen sɔjɔbaara kama, o baarada mɔgɔw y’a bɔ u yɛrɛ la ka kartɔn dɔw labɛn mɔgɔw dɛmɛnni kama. Dumuniw ni saniyafɛnw bilara o kartɔnw kɔnɔ

7. 

   Marisikalo tile 17 san 2022: Sɛgɛsɛgɛli kɛlen k’a dɔn ni balimaw bɛna se ni fɛnw ye lakana kɔnɔna na, tile naani o kɔfɛ, kartɔnw, fɛnw tun bɛ minnu kɔnɔ dɛmɛ kama, o tɔni 13 bilara ka taa Ukrɛni frɔntiɛri la

8. 

   Marisikalo tile 21 ka taa bila marisikalo tile 27 la san 2022: O cogo kelen fɛ, dɛmɛni kartɔn minnu tun tora, olu farala ɲɔgɔn kan Polɔɲi k’a sɔrɔ ka u bila ka taa Ukrɛni. Wa lɛrɛ 24 kɔnɔna na, u tilatilara ka bila ka taa yɔrɔw la, mɔgɔw mago tun bɛ u la yɔrɔ minnu na

9. 

   Marisikalo tile 28 san 2022: Tile 20 fɛn fɔlɔw dili yamaruya dilen kɔfɛ, dumuniw, saniyafɛnw ani furaw tɔni 100 bilara ka taa Ukrɛni

Fo ka se bi ma, Jehova Seerew ye fɛn minnu lase Ukrɛni dɛmɛni hukumu kɔnɔ, o ka ca ni tɔni 190 ye