Jehova ka majigilenya ladege

1. Mun na Jehovah ka majigilenya ɲɔgɔn tɛ yen?

MƆGƆ minw be kuntigiya kɛra bi bi nin na, yala i be se k’a fɔ ko u majiginin lo wa? Ayi! Nga Jehova, ale min ye Sebagayabɛɛtigi ye, a majiginin lo (Zab. 113:5-8). Mɔgɔ si majiginin tɛ ka se Jehova ma. Kuncɛbaya t’a la hali dɔɔni. Jehova b’an minɛ cogo ɲuman minw na, an bena u la naani lajɛ barokun nin na. An bena a ye u kelen kelen bɛɛ b’a yira cogo min na ko a majiginin lo kosɔbɛ. An bena a ye fana Yezu y’a Faa ka majigilenya ladegi cogo min na. O koow bena an dɛmɛ k’an magwɛrɛ kosɔbɛ Jehova la ani k’a ka majigilenya ladegi bɛrɛbɛrɛ.

KA GƐRƐ JEHOVA LA, O KA NƆGƆN

2. Zaburu 62:9 bɛ mun de jira Jehova ko la? (Ja min bɛ ɲɛ fɔlɔ kan, o fana lajɛ.)

² Tuma caaman na, mɔgɔ tɛ se ka gwɛrɛ kuncɛbaw la. U tɛ mɔgɔw minɛ ni ɲumanya ye sabu u b’a miiri k’u ka fisa ni tɔɔw ye. O kama, mɔgɔw t’a fɛ ka gwɛrɛ u la. Nga Jehova tɛ ten fewu! An sankolola Faa majiginin lo. O kama le a b’a ɲini an fɛ an k’an magwɛrɛ a la ani k’an ka haminankow bɛɛ fɔ a ye (Zaburuw 62:9 kalan). Faa kanutigi b’a deenw lamɛn n’u b’u jɔrɔnankow fɔra a ye. O cogo kelen na, Jehova ninsɔn ka di k’a sagokɛlaw ka deliliw lamɛn. A yɛrɛ y’a kɛ u y’a sagokɛla caaman ka deliliw kofɔ Bibulu kɔnɔ. O b’a yira ko a ka nɔgɔ ka gwɛrɛ Jehova la (Zozuwe 10:12-14; 1 Sam. 1:10-18). Nga ni tuma dɔw la an b’a miiri ko ka gwɛrɛ Jehova la, an man kan n’o ye do?

3. Mun na an dalen b’a la ko Jehova b’a fɛ an ka gɛrɛ a la tuma bɛɛ delili sababu fɛ?

³ Hali n’an b’a jati ko an man kan ni Jehova ka kanuya ye, an be se k’an magwɛrɛ a la delili la. Mun na an be se k’o fɔ do? Yezu ye talen min la deen tununin koo la, a ye Jehova suma ni faa kanutigi dɔ ye. A dencɛ ye fili caaman kɛ ani a tun b’a jati ko a facɛ tɛna sɔn a ka segi ka kɛ a ka denbayamɔgɔ dɔ ye tugun. A kɔsegira soo tuma min na, a facɛ ye mun lo kɛ do? Yezu ko tuma min na facɛman y’a dencɛ ye yɔrɔjan, “a bolila ka taga bolo meleke a dencɛ kaan na.” (Luka 15:17-20). Jehova be i ko o facɛman. N’an dusu kasinin lo an ka fili dɔ kosɔn wala an ka haminankow kosɔn, n’an y’a deli, a be sin k’an lamɛn koɲuman sabu a majiginin lo (Dus. 3:19, 20). Jehova be makari an na kosɔbɛ ani i ko facɛman min bolila ka taga a dencɛ kunbɛn, Jehova b’an hakili sigi ko a b’an kanu ani a b’an dusu saalo (Ezayi 57:15). Jehova b’o kɛ cogo di bi bi nin na? Tuma caaman na, a be tɛmɛ diinan mɔgɔkɔrɔw fɛ, an ka denbayamɔgɔ minw y’a batobagaw ye ani a sagokɛla wɛrɛw fɛ k’an dusu saalo (Zaki 5:14, 15). Jehova b’an dɛmɛ o cogo la sabu a b’a fɛ an k’an magwɛrɛ a la.

4. Yesu y’a jira cogo di ko ka gɛrɛ ale la, o ka nɔgɔn?

⁴ Yezu y’a Faa ladegi cogo di? Yezu majiginin lo i n’a fɔ a Faa. O kama, tuma min na a tun be dugukolo kan, a tun ka di mɔgɔw ye ka gwɛrɛ a la. U tun tɛ siran k’a ɲininga koo dɔw la (Mariki 4:10, 11). Ani u tun tɛ siran k’u ka miiriya fɔ a ye n’a tun y’o ɲini u fɛ (Mat. 16:13-16). N’u tun filila, u tun tɛ siran ko a bena dimi u kɔrɔ sabu u tun b’a lɔn ko a b’u minɛ ni ɲumanya ye, a be hinɛ ani a be muɲu (Mat. 17:24-27). Yezu y’a Faa ladegi koɲuman minkɛ, o y’a to a ka kalandenw fana sera ka Jehova lɔn koɲuman (Zan 14:9). Yezu ka wagati la, diinan kuntigiw tun ka fari, u tun ye kuncɛbaw ye ani u tun t’u janto u ka diinandenw na. Yezu ka kalandenw y’a faamu ko Jehova be dan na pewu o diinan kuntigiw la! A majiginin lo ani a ka nɔgɔ ka gwɛrɛ a la.

5. An ka majigilenya bɛ se ka tɔw dɛmɛ cogo di u ka gɛrɛ an na nɔgɔya la?

⁵ An be se ka Jehova ladegi cogo di? N’an majiginin lo, a bena nɔgɔya tɔɔw ma u k’u magwɛrɛ an na. Ni mɔgɔ majiginin tɛ, a be tɔɔw ɲangoya, a b’a miiri ko a ka fisa n’u ye, ani ni mɔgɔ donna a gasi la, a tɛ sɔn ka yafa o tigi ma. O b’a to mɔgɔw t’a fɛ ka gwɛrɛ a la. Nga, majigilenya b’an dɛmɛ ka mɔgɔw minɛ ni ɲumanya ye, ka muɲu u kɔrɔ ani ka yafa u ma. O b’a to mɔgɔw b’a fɛ ka gwɛrɛ an na (Kɔlɔs. 3:12-14). Diinan mɔgɔkɔrɔw yɛrɛ lo ka ɲi k’u jija kosɔbɛ walisa balimaw kana siran ka gwɛrɛ u la. O kama, u ka ɲi ka wagati kɛ ni balimaw ye. O kɔrɔ ko u ka ɲi k’u jija ka to ka taga lajɛnw kɛ Masaya Boon na sanni k’o kɛ vidéoconférence sababu fɛ, fɔɔ n’u bolomako tɛ. Ani u ka ɲi ka to ka waajuli kɛ ni balimaw ye soo ni soo tuma o tuma n’a be se ka kɛ. O bena a to balimaw b’u lɔn ka ɲɛ ani a tɛna gwɛlɛya u ma k’u kɔnɔnakow fɔ u ye.

JEHOVA KA KO MAN GƐLƐN

6-7. Jehova ye ko dɔw to a batobagaw ta la cogo min na, o misali dɔw fɔ.

⁶ Mɔgɔ minw ye kuncɛbaw ye, u b’a miiri k’u be koo bɛɛ lɔn ani u tɛ sɔn k’u ka miiriya yɛlɛma. Nga Jehova min be koo bɛɛ lɔn, ale tɛ ten. A tɛ ja kelen kan sabu a majiginin lo. An k’a filɛ Jehova ye koo dɔ ɲɛnabɔ ni Musa kɔrɔmuso Miriyama ye cogo min na. Miriyama ni Arɔn ye Musa kɔrɔfɔ k’a sɔrɔ Musa tun ye Jehova ka lasigiden lo ye. O sen fɛ, Miriyama ma bonya la Jehova kan. O kama, Jehova dimina a kɔrɔ kosɔbɛ ani a ye kunna bana bila a la. Nga, Arɔn ye Musa deli Miriyama ye ani Musa ye Jehova deli ko a k’a kɛnɛya. Jehova ye mun lo kɛ do? A ma ban k’a ka desizɔn yɛlɛma. Komi a majiginin lo, a sɔnna ka mɛnni kɛ Musa fɛ ani ka Miriyama kɛnɛya.—Nɔnb. 12:1-15.

⁷ Jehova ye masacɛ Ezekiyasi ka koo ɲɛnabɔ cogo min na, o fana b’a yira ko a majiginin lo. Jehova y’a ka kira ci ko a ka taga a fɔ a ye ko a bena sa. Ezekiyasi kasira ka Jehova deli ko a k’ale kɛnɛya. Jehova makarila a la ani ka saan 15 fara a sii kan (2 Mas. 20:1, 5, 6). Jehova majiginin lo minkɛ, a be hinɛ ani a be sɔn ka mɔgɔw lamɛn.

8. Misali jumɛnw b’a jira ko Yesu ka ko man gɛlɛn? (Marka 3:1-6.)

⁸ Yezu y’a Faa ladegi cogo di? Yezu tun be dugukolo kan tuma min na, a tun be koo ɲuman kɛ tɔɔw ye tuma o tuma n’o tun bɛnnin lo. Misali la, a ye banabagatɔ dɔw kɛnɛya lafiɲɛlon na hali n’o ma diya a kɛlɛbagaw ye u ka dusugwɛlɛya kosɔn (Mariki 3:1-6 kalan). Bi fana, Yezu be kafo ɲɛminɛ cogo min na, o b’a yira ko a tɛ ja kelen kan. Misali la, ni kafoden dɔ ye jurumuba kɛ, a be muɲu a kɔrɔ ani ka sababu di a ma a k’a ka kɛwale juguw dabila.—Yir. 2:2-5.

9. An bɛ se k’a jira cogo di ko an ka ko man gɛlɛn? (Jaw fana lajɛ.)

⁹ An be se ka Jehova ladegi cogo di? An k’an majigi ka Jehova ka miiricogo n’a ka kokɛcogo ladegi sabu a tɛ ja kelen kan (Zaki 3:17). Misali la, bangebaga minw tɛ ja kelen kan, olu tɛ sɔn koo bɛɛ ma ani u t’a ɲini u deenw fɛ u ka koo dɔ kɛ u tɛ se min na. Min fɔra Yakuba koo la Zɛnɛzi 33:12-14 kɔnɔ, o b’o lo yira ka gwɛ. Bangebaga minw majiginin lo ani u tɛ ja kelen kan, olu fana t’u deenw suma ni ɲɔgɔn ye. Diinan mɔgɔkɔrɔw fana man kan ka ja kelen kan. A be se ka kɛ ko diinan mɔgɔkɔrɔw jɛnkulu la, u fanba ye desizɔn dɔ ta ani o tɛ Bibulu ka sariyakolo si tiɲɛ. Hali n’o desizɔn ma bɛn u dɔ ma, a tɛna ja kelen kan walisa u ka sɔn ale ta ma (1 Tim. 3:2, 3). An kelen kelen bɛɛ ka ɲi k’an jija walisa ka tɔɔw ka miiriya faamu hali n’an ka miiriya be dan na u ta la (Ɔrɔm. 14:1). Tiɲɛn na, kafodenw bɛɛ ka ɲi k’u jija walisa bɛɛ k’a ye k’u ye “mɔgɔsabalininw ye.”—Filip. 4:5.

JEHOVA BƐ MUƝU

10. Jehova y’a jira cogo di ko a bɛ muɲu?

¹⁰ N’a sɔrɔ i y’a kɔrɔsi ko a man di kuncɛbaw ye ka tɔɔw kɔnɔ. Kuncɛbaya b’a to u tɛ muɲuli kɛ. Nga, Jehova kɔni tɛ ten fewu! A ɲɔgɔn tɛ yen muɲuli koo la. Misali la, Nuhun ka tile la, Jehova ye muɲuli kɛ saan 120 ka sɔrɔ ka mɔgɔ juguw halaki (Zɛnɛzi 6:3). Nuhun ye wagati sɔrɔ k’a deenw lamɔ ani ale n’a ka denbaya ye kurun dilan. Kɔfɛ, tuma min na Ibrayima tun be ɲiningaliw kɛra Sodɔmu ni Gɔmɔri halakili koo la, Jehova muɲuna k’a lamɛn. Ni kuncɛba dɔ tun lo, a tun bena a jaabi ko: “Ele ye jɔn ye n’i be ne ɲininga?” Nga komi Jehova majiginin lo, a muɲuna ka Ibrayima lamɛn.—Zɛnɛzi 18:20-33.

11. Ka kɛɲɛ ni 2 Piɛrɛ 3:9 ye, mun na Jehova bɛ ka muɲu hali bi?

¹¹ Bi fana Jehova bele b’a yira ko a be muɲu. A ye wagati min latigɛ, a be kɔnɔni kɛra o ka se, a be sɔrɔ ka daan sigi duniɲa juguman nin na. Mun na a be muɲuna do? Sabu “a t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9 kalan). Yala Jehova ka muɲuli ye fuu ye wa? Ayi! Jehova be muɲuna minkɛ, mɔgɔ miliyɔn caaman kɛra a teriw ye. Ani an jigi b’a la ko mɔgɔ miliyɔn caaman wɛrɛw bena se k’u magwɛrɛ a la fana. Nga, daan be Jehova ka muɲuli la. Tiɲɛn lo ko Jehova be mɔgɔw kanu, nga a tɛ sɔn koo bɛɛ ma. A bena daan sigi koo jugu la.—Abak. 2:3.

12. Yesu bɛ ka Jehova ka muɲuli ladege cogo di?

¹² Yezu y’a Faa ladegi cogo di? A saan caaman ye nin ye, Yezu be Jehova ka muɲuli ladegira. Kabi wagatijan, a ɲɛɛ b’a la Sutana be ngalon lara Jehova n’a sagokɛla kantigiw kan (Zɛnɛzi 3:4, 5; Zɔbu 1:11; Yir. 12:10). Yezu ɲɛɛ b’a la fana ko mɔgɔ caaman be tɔɔrɔla kosɔbɛ. Miiri k’a filɛ a kɔrɔtɔnin lo cogo min na “ka Sutana ka kɛwaliw cɛn”! (1 Zan 3:8). Mun lo be Yezu dɛmɛna a ka muɲu ka Jehova makɔnɔ a ka sira di a ma walisa a ka daan sigi Sutana ka kɛwale juguw bɛɛ la pewu pewu? Fɛɛn minw b’a dɛmɛna, u dɔ ye majigilenya lo ye. A b’a lɔn ko Jehova lo ka ɲi k’a latigɛ wagati min na a bena daan sigi duniɲa juguman nin na.—Kɛw. 1:7.

13. Yesu ye muɲuna a ka kalandenw kɔrɔ cogo di, wa mun na a y’o kɛ?

¹³ Yezu tun be dugukolo kan tuma min na, a tun be muɲu a ka cidenw kɔrɔ fana. Misali la, tuma caaman na, cidenw tun be sɔsɔli kɛ walisa k’a lɔn tigi min ye mɔgɔba ye u cɛma. Nga Yezu m’a fari faga u kɔrɔ. A tora ka muɲu u kɔrɔ (Luka 9:46; 22:24-27). A tun lanin b’a la ko u bena na yɛlɛmaniw kɛ ani ka kɛ mɔgɔ majigininw ye. Yala i be segi i ka fili dɔ kan tuma caaman na wa? N’o lo, siga t’a la ko i ninsɔn ka di kosɔbɛ k’a lɔn ko an ka Masacɛ majiginin lo ani ko a be muɲu an kɔrɔ.

14. An bɛ se ka kɛ muɲubagaw ye cogo di?

¹⁴ An be se ka Jehova ladegi cogo di? N’an be ni “Krista ka miiriya” ɲɔgɔn ye, an bena se ka Jehova miiricogo n’a ka kokɛcogo ladegi (1 Kor. 2:16). An be se ka Krista ka miiriya faamu bɛrɛbɛrɛ cogo di? Fɛɛrɛ ɲuman dɔ ye ka Evanziliw kalan tuma o tuma. O kɔ, an ka ɲi ka wagati ta ka miiri o kan k’a filɛ o be min yira Yezu miiricogo koo la. An ka ɲi fana ka Jehova deli a k’an dɛmɛ an ka kɛ mɔgɔ majigininw ye ani ka to ka muɲu i ko Yezu. N’an be ni Krista ka miiriya ɲɔgɔn ye, an bena se ka Jehova ladegi. O bena a to an be muɲu an yɛrɛ kɔrɔ ani an balimaw fana kɔrɔ.—Mat. 18:26-30, 35.

JEHOVA BƐ BONYA DA MƆGƆ MAJIGINNENW KAN

15. Jehova y’a jira cogo di ko mɔgɔ majiginnenw ko ka di a ye? (Zaburu 138:6)

¹⁵ Zaburuw 138:6 kalan. Miiri k’a filɛ: Jehova lo ye duniɲa kuru bɛɛ Masaba ye. O bɛɛ n’a ta, a b’a mako don mɔgɔ majigininw na. An ka mɔgɔ damanin ka misali lajɛ. N’a sɔrɔ u ka wagati mɔgɔw yɛrɛ tun t’u jati, nga Jehova y’u kɔrɔsi. N’a sɔrɔ an t’u dɔw lɔn ka ɲɛ, nga Jehova y’a kɛ u kumana u koo la Bibulu kɔnɔ. Jehova ka hakili senu barika la, Musa kumana Debora koo la. A ye ɲɛnamaya kɛ cɛmɔgɔbaw ka wagati la. Denminɛla tun lo, ani a ye baara kɛ kantigiya la Isiyaka ni Yakuba ka denbayamɔgɔw ye saan 125 ɲɔgɔn kɔnɔ! Hali n’an tɛ koo caaman lɔn o muso kantigi koo la, Jehova y’a kɛ Musa ye koo dɔ sɛbɛ a koo la k’a yira ko mɔgɔw tun b’a kanu kosɔbɛ (Zɛnɛzi 24:59; 35:8). Saan caaman o kɔ, Jehova ye kanbelenin dɔ sugandi k’a kɛ Israɛl masacɛ ye. Sagadɛndɛla tun lo ani a tɔgɔ ko Dawuda (2 Sam. 22:1, 36). Dɔɔni Yezu wolonin kɔ Bɛtilehɛmu, Ala ye bonya la sagadɛndɛla majiginin dɔw kan ka mɛlɛkɛw ci u tagara Yezu woloko fɔ u ye. Olu lo kɛra fɔlɔ ye ka Masiya woloko mɛn (Luka 2:8-11). Tuma min na Yusufu ni Mariyamu tagara ni Yezu ye Alabatosoba kɔnɔ, Jehova ye nɛɛma kɛ Simeyɔn ni Anɛ ye, k’a kɛ u y’a Dencɛ ye (Luka 2:25-30, 36-38). Tiɲɛn na, Jehova “be sanfɛ, nga [a] ɲaa be yɛrɛmajigilenw na”!

16. Yesu Fa bɛ mɔgɔw minɛ cogo min na, Yesu ye o ladege cogo di?

¹⁶ Yezu y’a Faa ladegi cogo di? I n’a fɔ a Faa, Yezu be bonya la mɔgɔ majigininw kan. Mɔgɔw tun be minw jati “mɔgɔ fufafu ye minw ma kalan bɛrɛ kɛ,” Yezu y’u kalan Ala ka Masaya koo la (Kɛw. 4:13; Mat. 11:25). Yezu ye banabagatɔw kɛnɛya fana ani a y’o kɛ cogo min na, o y’a yira ko a b’u kanu ani a be bonya la u kan (Luka 5:13). Ka kɔn a saya ɲɛ, a y’a ka cidenw seenw ko, k’a sɔrɔ baaradenw dɔrɔn lo tun b’o baara kɛ (Zan 13:5). Sanni a ka taga sankolo la, a ye bonya la a ka kalandenw bɛɛ kan ka baara kɔrɔtaninba dɔ kalifa u ma min ɲɔgɔn tɛ yen. O baara ye ka tɔɔw dɛmɛ u ka ɲɛnamaya banbali sɔrɔ.—Mat. 28:19, 20.

17. An bɛ se ka bonya da mɔgɔw kan cogo di? (Ja fana lajɛ.)

¹⁷ An be se ka Jehova ladegi cogo di? An b’a yira ko an be mɔgɔw kanu ani ko an be bonya la u kan, n’an be kibaro diiman fɔ bɛɛ ye, u ka koow cogoya, u fari kulɛri ani u ka lɔnniya mana kɛ min o min ye. An be bonya la an balimaw kan n’an b’a jati k’u ka fisa n’an ye, an ka setigiya n’an ka kunkanbaaraw mana kɛ min o min ye (Filip. 2:3). N’an b’an majigi ani ka “kɔn ka tɔw bonya” o cogo la ani cogo wɛrɛw la, o be Jehova ninsɔn diya.—Ɔrɔm. 12:10, Bibulu Ala ta Kuma; Sof. 3:12.

18. Mun na i b’a fɛ ka Jehova ka majigilenya ladege?

¹⁸ N’an b’an seko bɛɛ kɛ k’an sankolola Faa kanutigi ka majigilenya ladegi, a bena nɔgɔya mɔgɔw ma ka gwɛrɛ an na, an tɛna ja kelen kan ani an bena muɲuli kɛ kosɔbɛ. Ani i ko Jehova, an bena bonya la tɔɔw kan. A to i hakili la ko n’an b’an seko bɛɛ kɛ ka Jehova ka majigilenya ladegi, o b’a to an kelen kelen bɛɛ koo be diya a ye kosɔbɛ!—Ezayi 43:4.