Ta’a fɛ ka nafa sɔrɔ Bibulu tiɲɛ nafamaw kan

1. Tiɲɛ kalansira minnu bɛ Bibulu kɔnɔ, i ye olu dɔn tuma min na, o ye nɔ jumɛn de bila i la?

BIBULU ka kalan jɔnjɔnw y’an ka ɲɛnamaya kɛcogo yɛlɛma. Misali la, tuma min na an y’a lɔn ko Ala tɔgɔ ko Jehova, an y’a daminɛ k’an magwɛrɛ a la (Ezayi 42:8). Wagati min na an ye tiɲɛn lɔn suuw cogoya koo la, an ka mɔgɔ kanulen minw sara, an tun t’an yɛrɛ ɲiningara tugun n’u be tɔɔrɔla (Waaj. 9:10). Ani Ala ye layidu min ta ko a bena dugukolo kɛ alijɛnɛ ye, tuma min na an y’o lɔn, an tun tɛ hami tugun siniɲasigi koo la. O y’a to an lara a la ko an tɛna ɲɛnamaya kɛ saan 70 wala saan 80 dɔrɔn, nga fɔɔ abada.—Zab. 37:29; 90:10.

2. Cogo jumɛn na 2 Piɛrɛ 1:​12, 13 b’a jira ko hali krecɛn mɔlenw bɛ se ka ta’a fɛ ka nafa sɔrɔ Bibulu tiɲɛ nafamaw kan?

² An man ɲi ka Bibulu ka kalan jɔnjɔnw jati fɛɛn gwansanw ye abada. Ciden Piyɛri y’a ka bataki filanan sɛbɛ k’a ci kerecɛn minw ma, u “nɔrɔnin” tun be tiɲɛnkalanw na (2 Piyɛri 1:12, 13 kalan). Nga wagati dɔ la, mɔgɔ jugu dɔw tun be kafo kɔnɔ ani u tun b’a ɲinina ka balimaw lasun u ka tiɲɛn sira bila (2 Piyɛri 2:1-3). Piyɛri tun b’a fɛ k’a balimaw barika bonya walisa u ka se k’u yɛrɛ tanga o mɔgɔ juguw ka ngalonw n’u ka kalanw ma. U tun be tiɲɛnkalan minw lɔn ka ban, Piyɛri y’u hakili jigi u dɔw la. O tiɲɛnkalanw tun bena u dɛmɛ ka to kantigiya la Jehova ye.

3. Mun na krecɛnw bɛɛ ka kan ka ta’a fɛ k’u hakilijagabɔ Bibulu tiɲɛ nafamaw kan? Misali dɔ ɲɛfɔ.

³ Kerecɛn kolɔnbagaw be se ka basigi Bibulu ka kalan jɔnjɔnw kan ka kalan wɛrɛw sɔrɔ. An ka misali dɔ lajɛ: Nanfɛnw dira tobilikɛla fila ma. Kelen ye tobilikɛla ŋana ye ani tɔɔ kelen be tobili degira. Tobilikɛla ŋana be tobili kɛ kabi saan caaman minkɛ, a b’a lɔn a bena nanfɛnw fara fara ɲɔgɔn kan cogo min na walisa gwa ka diya. O cogo kelen na, minw be Jehova batora kabi saan caaman, olu ni Bibulu kalanden kuraw tɛ Bibulu ka kalan jɔnjɔnw filɛ cogo kelen na. Siga t’a la ko kabi an batizera, an ka kunkanbaaraw ani an ka koow cogoya yɛlɛmana. An ye kalan jɔnjɔn minw lɔn ka tɛmɛ, n’an miirila u la, o b’an dɛmɛ k’a lɔn an be se k’u sira tagama cogo min na ka kɛɲɛ n’an ka koow cogoya ye. An ka Bibulu ka kalan jɔnjɔn saba lajɛ ani an k’a filɛ kerecɛn kolɔnbagaw be se ka kalan minw sɔrɔ o la.

JEHOVA DE YE DABAGA YE

4. K’a dɔn ko Jehova de ye Dabaga ye, o ye nɔ jumɛn de bila an na?

⁴ An b’a lɔn ko Danbaga hakilitigi ani Sebagayabɛɛtigi lo ye dugukolo ani ninmanfɛnw bɛɛ dan. Bibulu yɛrɛ b’a fɔ ko: “Fɛɛn bɛɛ lajɛnnin danbaga ye Ala le ye.” (Eburuw 3:4). O tiɲɛnkalan be koo caaman wɛrɛw yira an na. Komi Jehova lo y’an dan, a be koo bɛɛ lɔn an koo la. Ka fara o kan, a b’a janto an na ani a b’a lɔn min ka fisa an ma. K’a lɔn ko Jehova lo ye Danbaga ye, o y’an dɛmɛ ka yɛlɛmani caaman kɛ ani ka kuun sɔrɔ an ka ɲɛnamaya la.

5. Tiɲɛ kalan jumɛn de bɛ sɔrɔ Esayi 45:9-12 kɔnɔ ni o bɛ se ka an dɛmɛ ka majiginnenya sɛnɛ an na?

⁵ Tiɲɛnkalan min ye ko Jehova lo ye Danbaga ye, o b’a yira ko a kɔrɔtanin lo an ka kɛ ni majigilenya ye. Misali la, Zɔbu ye kuma dɔw fɔ Jehova koo la minw tɛ tiɲɛn ye. Koo min tun kɔrɔtanin lo kosɔbɛ, a ɲinɛna o kɔ, a tora ka miiri kojugu a yɛrɛ koo la, ani a y’a ɲini ka joo di a yɛrɛ ma. Nga Jehova y’a hakili jigi ko ale lo ye Sebagayabɛɛtigi ani Danbaga ye (Zɔbu 38:1-4). O ye Zɔbu dɛmɛ k’a faamu ko Ala ka kokɛcogo ka fisa ni adamadenw ta ye fɔɔ ka taga ka na. Ka kɛɲɛ n’o miiriya ye, kira Ezayi y’a sɛbɛ ko: “Bɔgɔmana be se k’a fɔ a baarabaga ma cogo di ko: ‘I be mun le kɛra?’”—Ezayi 45:9-12 kalan.

6. Waati jumɛn de la, a nafa ka bon an ka an hakilijagabɔ an Dabaga Jehova ka sebaaya ni a ka hakilitigiya kan? (Jaw fana lajɛ)

⁶ Ni kerecɛn dɔ be Jehova sago kɛra kabi saan caaman, a be se k’a daminɛ k’a jigi la a yɛrɛ kan sanni k’a to Jehova k’a ɲɛminɛ a ka Kuma barika la (Zɔbu 37:23, 24). Nga n’a miirila koɲuman a Danbaga ka setigiyaba n’a ka hakilitigiyaba koo la, o bena a dɛmɛ ka mun lo kɛ? (Ezayi 40:22; 55:8, 9). O tiɲɛnkalan jɔnjɔn bena a dɛmɛ a majiginin ka to ani ka sɔn a ma ko Jehova ka miiriyaw kɔrɔtanin lo ka tɛmɛ a taw kan.

7. Rahela ye mun de kɛ walasa ka sɔn yɛlɛmani kura dɔ ma?

⁷ Balimamuso dɔ be Sloveni jamana na ani a tɔgɔ ko Rahela. Ale y’a kɔrɔsi ko a kɛtɔ ka miiri a Danbaga koo la, o y’a dɛmɛ ka sɔn yɛlɛmani dɔ ma min kɛra Jehova ka ɔriganisasiyɔn kɔnɔ. A ko: “Wagati dɔw la, a ma nɔgɔya n’ ma ka sɔn an ɲɛminɛbagaw ka desizɔn dɔw ma. Misali la, n’ ye Koow Ɲɛnabɔla Jɛnkulu ka rapɔɔri 8nan filɛ, min bɔra saan 2023 kɔnɔ. Nga hali o kɔ, n’ kɔnɔ gwanna siɲɛ fɔlɔ min na n’ ye balimacɛ dɔ ye ni bonbosi ye a be kalan dira. O la, n’ ye Jehova deli a ka n’ dɛmɛ n’ ka sɔn o yɛlɛmani ma.” Rahela sɔnna a ma ko komi Jehova lo ye sankolo ni dugukolo Danbaga ye, a be se koɲuman k’a ka ɔriganisasiyɔn ɲɛminɛ cogo ɲuman na. Yala a ka gwɛlɛ i ma ka sɔn faamuyali kura wala cikan kura dɔ ma wa? N’o lo, mun na i tɛ i yɛrɛ majigi ka miiri an Danbaga ka hakilitigiyaba n’a ka setigiyaba koo la?—Ɔrɔm. 11:33-36.

MUN NA ALA Y’A TO TƆƆRƆKOW KA KƐ?

8. K’a faamu kun minnu na Ala y’a to tɔɔrɔkow ka kɛ, o bɛ an nafa cogo di?

⁸ Mun na Ala b’a to tɔɔrɔkow ka kɛ? Mɔgɔ dɔw ma se k’o ɲiningali jaabi minkɛ, u dimina Ala kɔrɔ, wala u y’a jati ko Ala tɛ yen le! (Talenw 19:3). Ele kɔni y’a faamu ko an ye jurumu ni dafabaliya min sɔrɔ cɛɛn ye, mɔgɔw be tɔɔrɔ ani ka sa o lo kosɔn. Nga Jehova nɔɔ tɛ. I y’a faamu fana ko Jehova ka muɲuli sababu la, mɔgɔ miliyɔn caaman sera k’a lɔn, ani u y’a faamu cogo min na a bena tɔɔrɔ ban pewu (2 Piyɛri 3:9, 15). O tiɲɛnkalanw y’i hakili sigi ani k’a to i y’i magwɛrɛ Jehova la kosɔbɛ.

9. Waati jumɛnw de la a nafa ka bon an ka an hakili jigin a la kun minnu kama Jehova y’a to tɔɔrɔkow ka kɛ?

⁹ K’a to an be Jehova makɔnɔna a ka dan sigi tɔɔrɔ la, an ka ɲi ka muɲu. N’a sɔrɔ an ka mɔgɔ kanulen dɔ sara, u ye tilenbaliyako kɛ anw wala an somɔgɔ dɔ la, wala gwɛlɛya dɔw b’an kan. O koow ɲɔgɔn na, an be se k’an yɛrɛ ɲininga mun na Jehova tɛ dan sigi tɔɔrɔ la joona joona (Abak. 1:2, 3). O wagatiw la, a ka ɲi an ka miiri k’a filɛ kuun minw kama Jehova b’a to mɔgɔ tilenninw be tɔɔrɔa (Zab. 34:20). An be se fana ka miiri a sagonata koo la, o min ye ka dan sigi tɔɔrɔ la pewu pewu.

10. Mun de ye Anne dɛmɛ a ka se ka a ba ka saya dusukasi muɲu?

¹⁰ N’an b’a faamu kuun minw kama Ala b’a to tɔɔrɔkow ka kɛ, o be se k’an dɛmɛ ka muɲuli kɛ. Anne be Mayɔt guun kan, Ɛndi kɔgɔji yɔrɔ la. A y’a fɔ ko: “N’ bamuso sara a saan damanin ye nin ye ani o ye n’ dusu kasi kosɔbɛ. Nga n’ be n’ hakili jigi tuma o tuma ko Jehova lo tɛ tɔɔrɔ lase an ma. A kɔrɔtɔnin lo ka tɔɔrɔw bɛɛ ban ani k’an ka mɔgɔ kanulenw suu kunu. Ni n’ miirila o tiɲɛnkalanw na, o be n’ hakili sigi ani ka n’ jija cogo min na, o be n’ kabakoya!”

11. K’a dɔn kun minnu kama Jehova y’a to tɔɔrɔkow ka kɛ, o bɛ se ka an dɛmɛ cogo di an ka ta’a fɛ ka waajuli kɛ?

¹¹ K’a lɔn kuun minw kama Ala b’a to tɔɔrɔkow ka kɛ, o be se k’an jija an ka to ka waajuli kɛ. Piyɛri y’a ɲɛfɔ ko Ala be muɲu sabu a b’a fɛ mɔgɔw ka nimisa ani ka kisi. O kɔ, a y’a fɔ ko: “Aw taamacogo ka kan ka kɛ di sa? Aw ye siran Ala ɲa, aw taamacogo ka ɲa.” (2 Piyɛri 3:11). An be koo minw kɛ k’a yira ko an be “siran Ala ɲa,” u dɔ ye waajuli baara ye. I ko an Faa, an be mɔgɔw kanu. An b’a fɛ u ka ɲɛnamaya kɛ Ala ka duniɲa kura kɔnɔ, tilenninya bena kɛ yɔrɔ min na. Jehova be muɲuna walisa ka sababu di i ka kiinmɔgɔw ma u k’ale bato. Nɛɛmaba lo i fɛ ka kɛ Ala baarakɛɲɔgɔn ye ani ka mɔgɔ caamanba dɛmɛ u ka Ala lɔn sanni laban ka se!—1 Kor. 3:9.

AN BƐ “LABAN DONW NA”

12. K’a dɔn ko an bɛ “laban donw na ” o ye an nafa cogo di?

¹² Bibulu tun y’a ɲɛfɔ tigitigi mɔgɔw bena kɛ cogo min na “laban tuma” na (2 Tim. 3:1-5). N’an ye mɔgɔw kɛcogo kɔrɔsi, an b’a ye ka gwɛ k’o kiraya kuma be dafara. An mana a ye ko mɔgɔw ka kokɛcogow be juguyara ka taga, o b’a to an be la a la kosɔbɛ ko Ala ka Kuma be min o min fɔ, o ye tiɲɛn lo ye.—2 Tim. 3:13-15.

13. Ka kɛɲɛ ni Yesu ye misali min di Luka 12:15-​21 ma, an bɛ se ka ɲininkali jumɛn de kɛ an yɛrɛ la?

¹³ K’a lɔn ko an be laban tuma lo la, o b’an dɛmɛ ka baara ɲuman kɛ n’an ka wagati ye. Mun na a kɔrɔtanin lo an k’o kɛ? Yezu ye misali min fɔ Luka 12:15-21 kɔnɔ, an k’o lajɛ (o vɛrisew kalan). Mun na Yezu ko o cɛɛ nafolotigi ye “naloman” ye? Yezu m’o fɔ sabu o cɛɛ tun ye nafolotigi ye, nga a y’o fɔ sabu a tun tɛ sinsin koo kɔrɔtaninw kan. A ye “nafolo lajɛn a yɛrɛ ye” k’a sɔrɔ foyi tun t’a fɛ Alako ta fan fɛ. Ka baara kɛ n’a ka wagati ye hakilintanya la, o tun ye filiba yɛrɛ lo ye sabu a sii tɔɔ tun man jan. Ala y’a fɔ a ye ko: “Bii suu nin na yɛrɛ, n bena n ka kalifa minɛ i la.” Komi duniɲa nin laban wagati be surunyana, an ka ɲi k’an yɛrɛ ɲininga ko: “Yala n’ ka laɲinitaw b’a yira ko n’ be baara ɲuman kɛra ni n’ ka wagati ye wa? N’ be n’ deenw dɛmɛ u ka laɲinita jumanw lo latigɛ? N’ be baara kɛ ni n’ fanga, n’ ka wagati ani n’ bololafɛnw ye ka nafolo lajɛn n’ yɛrɛ lo ye fɔlɔ waa, wala n’ be nafolo lajɛn sankolo la le?”

14. Miki ka ko b’a jira cogo di ko nafa bɛ a la, an ka to k’an hakilijagabɔ laban donw waati la?

¹⁴ Dalilu minw b’a yira ka gwɛ ko an be laban wagati lo la, an ka miiri o la koɲuman. O be se k’an dɛmɛ k’a lɔn an ka ɲi ka desizɔn minw ta. Balimamuso dɔ y’o lo kɛ. A tɔgɔ ko Miki ani a ko: “N’ tilanin kɔ lise la, n’ tun b’a fɛ sɔbɛ la ka taga inivɛrisite la walisa ka kalan kɛ bɛgɛnw koo la. N’ tun b’a fɛ fana ka kɛ kudayi piyɔniye ye ani ka taga dɛmɛ don yɔrɔ min na weleweledalaw man ca. N’ tun b’a fɛ ka kalan ani baara min kɛ, n’ teri kolɔnbaga dɔw ye n’ jija n’ ka miiri koɲuman k’a filɛ ni n’ bena se k’o kɛ ani o wagati kelen na ka n’ ka laɲinitaw dafa Alako ta fan fɛ. U ye n’ hakili jigi ko duniɲa nin bena ban yanni dɔɔni ani ko duniɲa kura kɔnɔ, n’ bena sababu sɔrɔ ka sɛgɛsɛgɛri kɛ bɛgɛnw koo la fɔɔ abada. O la, n’ y’a latigɛ ka kalan dɔ kɛ min tun tɛna wagati caaman ta ani o ye n’ dɛmɛ ka baara dɔ degi. O kɛra sababu ye n’ baara dɔ sɔrɔ ani n’ tun be wari ni wagati sɔrɔ ka n’ ka piyɔniye baara kɛ. Kɔfɛ, n’ yɛrɛ sera ka yɛlɛma Ekuwatɛri jamana na, yɔrɔ min na weleweledalaw man ca.” Sisan, Miki n’a cɛɛ be kafokulu kɔrɔsili baara la o jamana na.

15. Mɔgɔ minnu ma sɔn kibaru duman ma fɔlɔ, mun na an fari man kan ka faga u ka ko la? Misali dɔ fɔ. (Jaw fana lajɛ)

¹⁵ N’an ye kibaro diiman fɔ mɔgɔw ye a siɲɛ fɔlɔ la ani u ma sɔn k’an lamɛn, an man ɲi k’an fari faga. Mun na do? Sabu u be se ka yɛlɛma. An ka Yezu dɔgɔcɛ Zaki ka koo lajɛ. Yezu kɔrɔbayara ka kɛ Masiya ye, ani a tun be mɔgɔw kalan cogo min na, o ɲɔgɔn tun tɛ yen. Zaki y’o bɛɛ ye, nga saan caaman kɔnɔ, a ma sɔn ka tugu Yezu kɔ. Yezu suu kununi kɔ le, a kɛra a ka kalanden ye. A yɛrɛ nana kisɛya kosɔbɛ!b (Zan 7:5; Gal. 2:9). I somɔgɔw ani mɔgɔ wɛrɛ minw m’u mako don kibaro diiman na fɔlɔ, a kɔrɔtanin lo i ka to k’u waaju ani i kana i fari faga u koo la. A to i hakili la ko an be laban wagati lo la. O la, waajuli baara ye kɔrɔtɔko lo ye. I be min fɔ u ye sisan, o be se k’u jija u ka dɔ kɛ dɔ ye kɔfɛ, hali tɔɔrɔba daminɛnin kɔ yɛrɛ.c

JEHOVA B’AN HAKILI JIGIN A KA KALANSIRA MINNU NA, I KA WALEƝUMANDƆN JIRA OLU KO LA

16. Jehova b’an hakili jigin tiɲɛ kuma minnu na, olu y’i nafa cogo di? (yɔrɔ koorilen nin fana lajɛ “Baara kɛ ni Bibulu kalansiraw ye walisa ka tɔw dɛmɛ.”)

¹⁶ An be dumuni minw sɔrɔ Alako ta fan fɛ, u dɔw labɛnna mɔgɔw kama minw ma Bibulu ka kalan jɔnjɔnw mɛn ka ye. Misali la, mɔgɔ minw tɛ Jehova Seerew ye, fɛɛn nunu labɛnna olu lo kama fɔlɔ: forobakalan minw be kɛ lɔgɔkun o lɔgɔkun, barokunw ni videwo dɔw minw be sɔrɔ jw.org kan, ani zurunali minw labɛnna jama kama. Nga an bɛɛ be nafa sɔrɔ u la. U b’an ka kanuya barika bonya Jehova koo la, ani u b’a kɛ an be la Bibulu la bɛrɛbɛrɛ. Ani u b’an dɛmɛ ka mɔgɔw kalan Bibulu ka kalan jɔnjɔnw na koɲuman.—Zab. 19:8.

17. Waati jumɛnw de la a nafa ka bon, an ka an hakilijagabɔ Bibulu tiɲɛ nafamaw kan?

¹⁷ An minw ye Jehova Seerew ye, an ninsɔn ka di kosɔbɛ n’an ye faamuyali kura sɔrɔ vɛrise dɔ koo la. An be Jehova waleɲuman lɔn kosɔbɛ fana Bibulu ka kalan jɔnjɔnw kosɔn, o minw y’a to an y’a daminɛ k’an magwɛrɛ a la. I ko an y’a ye cogo min na, o tiɲɛnkalanw bele be se k’an dɛmɛ bi. N’an ye cikan dɔ sɔrɔ ka bɔ Jehova ka ɔriganisasiyɔn yɔrɔ nga an b’a jati ko an ka miiriya lo ka fisa, an k’an majigi k’a to an hakili la ko Jehova lo b’o ɔriganisasiyɔn ɲɛminɛna. Ale lo ye Danbaga ye, Sebagayabɛɛtigi lo ani a ka hakilitigiya ɲɔgɔn tɛ yen. Ni gwɛlɛya dɔ be anw wala an ka mɔgɔ kanulen dɔ kan, an ka muɲu ani ka miiri k’a filɛ kuun minw kama Jehova b’a to tɔɔrɔkow ka kɛ. N’an b’a latigɛra an bena baara kɛ n’an ka wagati ani an bololafɛnw ye cogo min na, an k’a to an hakili la ko an be laban loonw lo la, ani ko waajuli baara ye kɔrɔtɔko lo ye. An k’a to Bibulu ka kalan jɔnjɔnw k’an barika bonya, k’an jija ani k’an kɛ hakilitigiw ye.