Nafa min bɛ Jehova tɔgɔ la Yesu bolo

1-2. (a) Su laban sani a ka sa Yesu ye mun de kɛ? (b) An bɛna ɲininkali jumɛnw de jaabi nin barokun na?

LAMISALON wulafɛ, saan 33 Nisankalo tile 14nan na, Yezu ye Matigi ka surafana kɛ n’a ka ciden kantigiw ye sangaso dɔ kɔnɔ. A tun b’a lɔn ko yanni dɔɔni, Zuda bena a janfa, ko a juguw bena a tɔɔrɔ ani k’a faga. O kama, surafana kɛnin kɔ, a y’a ka cidenw jija kosɔbɛ. Dɔɔni yanni u ka taga, Yezu ye delili kɔrɔtaninba dɔ kɛ. Ciden Zan y’o delili kofɔ ani o be sɔrɔ Zan sapitiri 17nan na.

² Yezu jɔrɔnanko tun ye min ye o wagati la, a ka delili b’an dɛmɛ ka mun lo faamu o koo la? O delili b’a yira ko koo juman lo tun kɔrɔtanin lo Yezu fɛ a ka cidenya baara kuru bɛɛ la dugukolo kan? An k’o ɲiningaliw jaabi.

“NE YE I TƆGƆ JIRA U LA”

3. Yesu ye mun de fɔ Jehova tɔgɔ ko la ani o kuma kɔrɔ ye mun ye? (Yuhana 17:6, 26)

³ Yezu y’a fɔ a ka delili la ko: ‘Ne ka i tɔgɔ yira u la.’ A y’a fɔ siɲɛ fila bɛɛ ko a ye Jehova tɔgɔ yira a ka kalandenw na (Zan 17:6, 26 kalan).a A tun b’a fɛ ka mun lo fɔ do? Yala a ye Ala tɔgɔ yira u la sabu u tun t’a lɔn le wa? Yezu ka kalandenw tun ye Yahutuw ye. O kama, u tun b’a lɔn ko Ala tɔgɔ ko Jehova. O tɔgɔ be sɔrɔ siɲɛ waa caaman na Eburukan sɛbɛninw kɔnɔ. O la, Yezu tun tɛ kumana Ala tɔgɔ yɛrɛ yɛrɛ koo la. Nga o tɔgɔ kɔrɔ ye min, a tun be kumana o koo lo la. A y’a ka kalandenw dɛmɛ u ka Jehova lɔn koɲuman. Misali la, a y’u dɛmɛ k’a sagonata, a ka koo kɛtaw ani a jogow lɔn, sabu ale kelenpe le be Jehova lɔn koɲuman.

4-5. (a) Mun de b’a to mɔgɔ dɔ tɔgɔ bɛ se ka kodiya an ye ka ta’a fɛ? (b) Mun de y’a to Yesu ka kalandenw sera ka Jehova tɔgɔ dɔn?

⁴ Miiri k’a filɛ ko i ka kafo diinan mɔgɔkɔrɔ dɔ tɔgɔ ko David ani a ye dɔgɔtɔrɔ ye. I b’o balimacɛ lɔn kabi saan caaman. Ani loon dɔ la, bana cunna i kan ani i mako tun b’a la dɔgɔtɔrɔ dɔ k’i furakɛ. O balimacɛ be baara kɛ dɔgɔtɔrɔso min na, u tagara n’i ye o yɔrɔ la. A y’i furakɛ ani k’i niin kisi. Sisan, i b’o balimacɛ kanu ka tɛmɛ fɔlɔ kan. I mana a tɔgɔ mɛn, a ye min kɛ i ye, i hakili be jigi o la. I tɛ David jati dɔrɔn i ko i tun be diinan mɔgɔkɔrɔ min lɔn fɔlɔ la. Nga sisan i b’a jati fana dɔgɔtɔrɔ ye, min ye i niin kisi.

⁵ O cogo kelen na, Yezu ka kalandenw tun be Jehova tɔgɔ lɔn ka kɔrɔ. Nga, o tɔgɔ koo diyara u ye kosɔbɛ sabu Yezu y’u dɛmɛ ka Jehova lɔn koɲuman. Mun na an b’o fɔ? Sabu Yezu ye a Faa ladegi a ka kɛtaw ni a ka fɔtaw bɛɛ la. O la, a ka cidenw sera ka Jehova “lɔn” koɲuman. Cogo di do? U kɛtɔ ka Yezu ka kalankɛcogo filɛ ani k’a kɔrɔsi a be mɔgɔw minɛ cogo min na.—Zan 14:9; 17:3.

“I YE TƆGƆ MIN DI NE MA”

6. Sira jumɛn fɛ, Jehova ye a tɔgɔ di Yesu ma? (Yuhana 17:11, 12)

⁶ Yezu ye Jehova deli a ka kalandenw kosɔn k’a fɔ a ye ko: “I k’u mara i tɔgɔ kosɔn i ye min di ne ma.” (Zan 17:11, 12 kalan). Yala o kɔrɔ ko Yezu tun bena weele sisan ko Jehova wa? Ayi. A kɔrɔsi ko Yezu y’a fɔ Jehova ye ko: “I tɔgɔ.” O la, Jehova tɔgɔ ma kɛ Yezu tɔgɔ ye. Nga Yezu tun b’a fɛ ka mun lo fɔ tuma min na a ko Jehova ye a tɔgɔ di ale ma? A fɔlɔ, Yezu tun ye Jehova ka lasigiden ye ani a be kuma Jehova tɔgɔ la. A nana dugukolo kan a Faa tɔgɔ la ani a ye kabakow kɛ (Zan 5:43; 10:25). Ka fara o kan, Yezu tɔgɔ kɔrɔ ko: “Jehova ye kisili ye.” Tiɲɛn na, Yezu tɔgɔ bɔra Jehova tɔgɔ le la.

7. A ɲɛfɔ misali dɔ fɛ kun min na Yesu tun bɛ se ka kuma Jehova tɔgɔ la.

⁷ An ka misali dɔ lajɛ. Jamana ka lasigiden be kuma jamana kuntigi tɔgɔ la. O la, a ka kumaw barika ka bon i ko jamana kuntigi taw. O cogo kelen na, Yezu tun be kuma mɔgɔw fɛ Jehova tɔgɔ la.—Mat. 21:9; Luka 13:35.

8. Cogo jumɛn na, Jehova tɔgɔ tun bɛ Yesu “la” sani a tun ka na dugukolo kan? (Ekisode 23:20, 21)

⁸ Bibulu be Yezu weele ko “Kuma” sabu Jehova tɛmɛna ale lo fɛ k’a ka cikanw ni kunnafoniw lase mɛlɛkɛw ni adamadenw ma (Zan 1:1-3). Jehova tɛmɛna mɛlɛkɛ min fɛ k’a janto Israɛldenw na kongokolon kɔnɔ, n’a sɔrɔ o tun ye Yezu lo ye. Tuma min na Jehova ye o mɛlɛkɛ ci Israɛldenw fɛ, a y’a fɔ u ye k’u ka mɛnni kɛ a fɛ. A ko: “K’a masɔrɔ ne tɔgɔ b’a la.”b (Ɛkiz. 23:20, 21, Bible senuma). Jehova tɔgɔ be Yezu “la” sabu a ye Jehova ka lasigiden ye ani a b’a Faa tɔgɔ lafasa ani k’a saniya cogo min na, o ɲɔgɔn tɛ yen.

“NE FA, I TƆGƆ BONYA”

9. Jehova tɔgɔ nafa tun ka bon Yesu bolo cogo di? A ɲɛfɔ.

⁹ I ko an y’a ye ka tɛmɛ cogo min na, yanni Yezu ka na dugukolo kan, Jehova tɔgɔ tun kɔrɔtanin lo a fɛ ka tɛmɛ fɛɛn bɛɛ kan. A tɛ bari an na k’a ye ko tuma min na Yezu tun be dugukolo kan, a y’o yira a ka kokɛtaw bɛɛ la. A ka cidenya baara laban fan fɛ, a y’a fɔ ko: “N Faa, i k’i yɛrɛ tɔgɔ boɲa!” O yɔrɔnin bɛɛ, a Faa tora sankolo la k’a jaabi ni kaanba ye ko: “Ne y’a boɲa, ne bena tila k’a boɲa tugu.”—Zan 12:28.

10-11. (a) Yesu ye bonya da Jehova tɔgɔ kan cogo di? (Ja fana lajɛ) (b) Mun na Jehova tɔgɔ ka kan ka saniya ani ka lafasa?

¹⁰ Yezu fana y’a Faa tɔgɔ bonya. Cogo di do? A y’o kɛ cogo minw na, u dɔ ye k’a Faa ka kɛtaw n’a jogo kabakomanw kofɔ tɔɔw ye. Nga koo wɛrɛ be yen min kɔrɔtanin lo kosɔbɛ. Yezu tun ka ɲi ka Jehova tɔgɔ saniya. A tun ka ɲi fana ka Jehova lafasa.c Yezu y’a yira k’o kɔrɔtanin lo kosɔbɛ tuma min na a ye delili kɛcogo yira a ka kalandenw na. A y’a fɔ ko: “An Faa min be sankolo la, i tɔgɔ ka boɲa.”—Mat. 6:9.

¹¹ Mun na Jehova tɔgɔ ka ɲi ka saniya ani ka lafasa? Sabu Edɛn nankɔ kɔnɔ, Sutana ye ngalon tigɛ ka la Jehova Ala kan ani k’a tɔgɔ tiɲɛ. Sutana y’a fɔ ko Jehova ye ngalontigɛla ye, ani ko a be Adama ni Awa jɛnna fɛɛn ɲuman dɔ la (Zɛnɛzi 3:1-5). Sutana y’a fɔ fana ko Jehova be koow kɛ cogo min na, o bɛnnin tɛ. A ka ngalon kumaw ye Jehova tɔgɔ tiɲɛ. Kɔfɛ Zɔbu ka wagati la, Sutana y’a fɔ ko Jehova batobagaw b’a sago kɛra nata kosɔn. A y’a fɔ fana ko adamaden si tɛ Jehova kanu sɔbɛ la ani ko n’u ye kɔrɔbɔli sɔrɔ, u bena Jehova sago kɛli dabila (Zɔbu 1:9-11; 2:4). Jehova ni Sutana cɛ, jɔn lo ye ngalontigɛla ye? Walisa k’o koo ɲɛnabɔ, Jehova y’a to wagati caaman ka tɛmɛ.

“NE BƐ NE NI DI NE KA SAGAW KOSƆN”

12. Yesu tun labɛnnen don ka mun de kɛ Jehova tɔgɔ kanuya kosɔn?

¹² Komi Jehova koo ka di Yezu ye, a tun b’a fɛ k’a seko bɛɛ kɛ k’a tɔgɔ saniya ani k’a lafasa. Yezu y’a fɔ ko: “Ne be n nii saraka.” (Zan 10:17, 18). Tiɲɛn na, a yɛrɛ tun labɛnnin lo ka sa Jehova tɔgɔ kosɔn.d Cɛɛ fɔlɔ Adama ani muso fɔlɔ Awa tun ye mɔgɔ dafaninw ye. Nga u banna Jehova la ka tugu Sutana kɔ. Yezu kɔni, ale sɔnna ka na dugukolo kan, ani a y’a yira ko a be Jehova kanu. A y’o kɛ a kɛtɔ ka to kantigiya la a ka ɲɛnamaya kuru bɛɛ la (Eburuw 4:15; 5:7-10). A tora kantigiya la fɔɔ ka taga se saya ma gwengwenlɔgɔ kan (Eburuw 12:2). A y’a yira o cogo la ko a be Jehova kanu ani ko a tɔgɔ koo ka di a ye.

13. Mun na Yesu tun bɛ se k’a jira, ka tɛmɛn bɛɛ kan, ko Sitanɛ ye nkalontigɛla ye? (Ja fana lajɛ)

¹³ Yezu ka ɲɛnamaya kɛcogo fɛ, a y’a yira ko Sutana lo ye ngalontigɛla ye, Jehova tɛ! (Zan 8:44). Mɔgɔ si tɛ Jehova lɔn ka se Yezu ma. Sutana ye koo minw fɔ Jehova koo la, n’u dɔ tun ye tiɲɛn ye, Yezu tun bena o lɔne. Nga Yezu tun cɛsirinin lo ka Jehova tɔgɔ lafasa. Hali wagati min na a tun be komi Jehova ye Yezu bila, Yezu sɔnna saya ma sanni ka ban a Faa kanutigi la.—Mat. 27:46.f

“I YE BAARA MIN DI NE MA . . . NE Y’O KƐ K’A DAFA”

14. Jehova ye Yesu duba cogo di a ka kantigiya kosɔn?

¹⁴ Suu min kɔnna Yezu saya ɲɛ, a ye delili dɔ kɛ k’a fɔ ko: “I tun ye baara minw di ne ma, ne y’olu bɛɛ kɛ ka ban.” A tun lanin b’a la ko Jehova bena a duga a ka kantigiya kosɔn (Zan 17:4, 5). Ani joo tun b’a fɛ k’a jigi la a Faa kan. Jehova ma Yezu suu to kaburu kɔnɔ (Kɛw. 2:23, 24). A y’a suu kunu ani ka lɔyɔrɔba di a ma sankolo la (Filip. 2:8, 9). Kɔfɛ, Yezu y’a daminɛ ka masaya kɛ Ala ka Masaya kun na. O Masaya bena mun lo kɛ do? Yezu y’o ɲiningali jaabi tuma min na a ye delili kɛcogo degi a ka kalandenw na. A ko: “I ka masaya ka na. I sago ka kɛ dugukolo kan i ko a be kɛ sankolo la cogo min na.”—Mat. 6:10.

15. Yesu bɛna ko wɛrɛ jumɛnw de kɛ?

¹⁵ Yanni dɔɔni, Yezu bena Ala juguw kɛlɛ ani ka mɔgɔ juguw halaki Arimagedɔn kɛlɛ la (Yir. 16:14, 16; 19:11-16). Dɔɔni o kɔ, a bena Sutana fili “dingɛjugu” kɔnɔ. Ka Sutana to o yɔrɔ la, a tɛna se ka koo jugu kɛ mɔgɔ si la (Yir. 20:1-3). Yezu ka saan waa kelen mara tuma na, a bena hɛɛrɛ sigi kokura dugukolo kan ani ka adamadenw dɛmɛ u ka kɛ mɔgɔ dafaninw ye. A bena suuw kunu. A bena dugukolo kuru bɛɛ kɛ alijɛnɛ ye. Jehova sagonata bena dafa!—Yir. 21:1-4.

16. Yesu ka san waa kelen mara laban na, ɲɛnamaya bɛna kɛ cogo di?

¹⁶ Yezu ka saan waa kelen mara laban na, ɲɛnamaya bena kɛ cogo di? Adamadenw ka jurumuw n’u ka dafabaliya bena ban bugubugu. An mako tɛna kɛ a la tugun ka yafa deli an ka jurumuw kosɔn kunmabɔsara barika la. Ka fara o kan, an mako tɛna kɛ soronanikɛla wala sarakalasebaga la. Ani “jugu laban min bena cɛn, o ye saya ye.” Suuw bena kunu. Adamadenw bɛɛ bena kɛ mɔgɔ dafaninw ye.—1 Kor. 15:25, 26.

17-18.(a) Mun de bɛna kɛ san waa kelen mara laban na? (b) Yesu bɛna mun de kɛ a ka mara laban na? (1 Kɔrɛntekaw 15:24, 28) (Ja fana lajɛ.)

¹⁷ Koo wɛrɛ juman lo bena kɛ Yezu ka saan waa kelen mara laban na? Koo kɛrɛnkɛrɛnnin dɔ bena kɛ. Sutana ye sɔsɔliko min lawuli ka Jehova tɔgɔ tiɲɛ, daan bena sigi o la. Cogo di do? Edɛn nankɔ kɔnɔ, Sutana ye Jehova kɛ ngalontigɛla ye, ani a ko a tɛ kuntigiya kɛ ni kanuya ye. Kabi o tuma, mɔgɔ minw be Jehova bonya ani ka nɔɔrɔ la a kan, olu tora k’a yira ko a ka kuntigiya ɲɔgɔn tɛ yen. O la, saan waa kelen mara laban na, Jehova tɔgɔ bena saniya bɛrɛbɛrɛ. O cogo la, a bena a yira ka gwɛ ko a ye Faa kanutigi ye.

¹⁸ A laban, bɛɛ bena a lɔn ko Sutana tun ye ngalon lo la Jehova kan. Ni Yezu ka mara sera a laban na, a bena mun lo kɛ? Yala a bena Sutana ladegi ani ka muruti Jehova ma wa? Ayi! (1 Korɛntikaw 15:24, 28 kalan). Yezu bena Masaya segi a Faa ma. A bena a yɛrɛ majigi Jehova ka kuntigiya kɔrɔ. Tiɲɛn na, Yezu tɛ komi Sutana. A be Jehova kanu minkɛ, a labɛnnin lo ka kari fɛɛn bɛɛ kɔ.

19. Nafa jumɛn de tun bɛ Jehova tɔgɔ la Yesu bolo?

¹⁹ A tɛ bari an na k’a ye ko Jehova y’a tɔgɔ la Yezu la. Yezu kɛra a Faa ka lasigiden ye cogo dafanin na. A be Jehova tɔgɔ jati cogo di? Ale fɛ, fɛɛn si kɔrɔtanin tɛ ka se Jehova tɔgɔ ma. A sɔnna saya ma o tɔgɔ kosɔn ani a labilanin lo ka fɛɛn bɛɛ segi Jehova ma saan waa kelen mara laban na. An be se ka Yezu ladegi cogo di? An bena o ɲiningali jaabi barokun nata la.