Ala kanuya ani an mɔgɔɲɔgɔn kanuya—An bɛ se ka o sɛnɛ an yɛrɛ la cogo min na

Hali ni Musa ka sariya waajibiyalen tɛ krecɛnw kan, a ka ci fɔlenw bɛɛ la belebeleba fila, ni olu ye—ka Ala kanu ani ka an mɔgɔɲɔgɔn kanu—o sen bɛ halisa fɛnw na, Jehova bɛ minnu waajibiya an ma. (Matiyu 22:37-39) O tɛ fɛn ye an bɛ min sɔrɔ ciyɛn ye. An ka kan ka o sɛnɛ an yɛrɛ la de. Cogo di? Cogo nafama dɔ ye ka Bibulu kalan don o don. Ni an bɛ Ala kɛcogoyaw jateminɛ iko u sɛbɛnnen bɛ Bibulu kɔnɔ cogo min na, an na ‘Jehova nɔɔrɔ’ ye. (Zaburu 27:4) O b’a to an ka Jehova kanuya bɛ bonya ka taa a fɛ, ani an ka miiriliw bɛ surunya kosɛbɛ a taw la. O bɛ dusu don an kɔnɔ an ka Ala ka ci fɔlenw mara, ni nin ci in sen bɛ olu la ni o ye, ka mɔgɔw kanu ni kanuya ye kaariya bɛ min na. (Yuhana 13:34, 35; 1 Yuhana 5:3) Cogoya saba bɛ yen minnu b’a to Bibulu kalanni bɛ diya i ye kosɛbɛ:

• Baara kɛ ni i ka miirili ye, ani ka i hakili bɛɛ to i ka fɛn kalanta kan. E k’a miiri ko i bɛ o yɔrɔ la. E tun bɛna mun de ye, ka mun mɛn ani ka suma sugu jumɛn mɛn? Minnu sen bɛ o ko la, olu dusukunnataw bɛ se ka kɛ mun ye?

  

• I ka kalan kɛcogo yɛlɛmayɛlɛma. O kɛcogo dɔw filɛ nin ye: Kalan kɛ ni kanba ye, walima kalan kɛ i kɛtɔ ka Bibulu kantalen lamɛn. Bibulu kɔnɔmɔgɔ dɔ walima Bibulu barokun dɔ ko kalan sani i ka tilayɔrɔbaw kalan ka tugu tugu ɲɔgɔn kɔ. Misali la, baara kɛ ni Ala ka kuma kalanni ɲɛminɛlan gafenin tilayɔrɔ 4 walima 16 ye walasa ka Yesu ka kow kalan. Texte du jour bɔra tilayɔrɔdennin min kɔnɔ Bibulu kɔnɔ, o yɔrɔ tilayɔrɔba bɛɛ kalan. Bibulu kitabuw sɛbɛnnen bɛ ka tugu ɲɔgɔn kɔ cogo min na, u kalan o cogo la.

  

• Kalan kɛ walasa ka faamuyali sɔrɔ. Hali ni i bɛ Bibulu tilayɔrɔba kelen de kalan tile kɔnɔ, ka i hakili jagabɔ o kan ani k’o faamu, o nafa ka bon kosɛbɛ ni tilayɔrɔba caman kalanni ye tile kɔnɔ walasa ka Bibulu bɛɛ kalan k’a ban teliya la. Kow kɛyɔrɔ jateminɛ. Kunnafoni dilenw sɛgɛsɛgɛ. Baara kɛ ni kartiw ani les références marginales ye. I ma fɛn minnu faamu hali n’a kɛra fɛn kelen ye olu cɛla, ɲinini kɛ o kan. N’a bɛ se ka kɛ, i bɛ waati hakɛ min ta ka kalan kɛ, o waati hakɛ kelen ta ka i hakili jagabɔ i ka fɛn kalannen kan.