An bɛ se ka kɛ Sɛbɛnw kalanbaga ŋanaw ye cogo min na

Yala e b’a fɛ ka to kantigiya la kɔrɔbɔliw waati la iko Daniɛl wa? Daniɛl tun ye Ala ka Kuma kalanbaga ŋana ye, ka fara kiraya kuma dunnenw kan. (Daniɛl 9:2) Ka kɛ Bibulu kalanbaga ŋana ye, o bɛ se ka i dɛmɛ ka to kantigiya la. Cogo jumɛn na? O bɛ se ka i ka dannaya bonya Ala ka layiduw dafali ko la. (Josue 23:14) O bɛ se ka i dɛmɛ fana ka Ala kanuya bonya i la, o min bɛna dusu don i kɔnɔ ka ko ɲuman kɛ. (Zaburu 97:10) Nka i bɛ se ka o kalan daminɛ cogo jumɛn na? An ka fɛn kofɔlen ninnu lajɛ.

• Ne ka kan ka mun de kalan? Jɛkulu ka lajɛw labɛnni sen bɛ kalan porogaramu ɲuman na. I bɛna nafa bɔ kosɛbɛ dɔgɔkun Bibulukalan na ni i bɛ waati ta ka ɲininiw kɛ fɛnw kan i ma minnu faamu. Ka fara o kan, dɔw y’a sugandi k’a ɲini ka caman dɔn Bibulu kiraya kumaw kan, hakili senu den ye fɛn minnu ye, ciden Paul ka misiyɔnɛriya taamaw, walima yɛrɛ Jehova ka fɛn danenw kan. Ni i miiri la ɲininkali dɔ la tile kɔnɔ min sinsinnen bɛ Bibulu kan, o sɛbɛn ani o kɛ i ka yɛrɛkalan nata barokun ye.

• Ne bɛ se ka kunnafoniw sɔrɔ min? Wideyo min tɔgɔ ye ko Des outils de recherche pour découvrir des trésors spirituels o lajɛ walasa ka kɛcogoya dɔw sɔrɔ. Walasa ka i ka dɔnkow sɛgɛsɛgɛ, diɲɛ fangatigiya minnu bisigira ni waraw ye, olu bɛ fɛn minnu jira Daniɛl tilayɔrɔba 7 kɔnɔ, a ɲini ka olu dɔn.

• Ne ka kan ka waati joli kɛ kalan na? Ka to ka kalan kɛ sanga ni waati bɛɛ, o de b’a to i bɛ to kɛnɛya la alako ta fan fɛ. I bɛ se k’a daminɛ ka to ka kalan kɛ waati kunkurunninw kɔnɔ, ka kɛɲɛ ni i ka magow ye, o kɔ, i bɛ se ka dɔ fara o waatiw janya kan. Ala ka Kuma kalanni bɛ i n’a fɔ nafolo dogolen ɲinini, n’i bɛ ka nafolo sɔrɔ ka ta’a fɛ, a bɛ diya i ye ka ɲinini kɛ ka ta’a fɛ! (Ntalenw 2:3-6) Kanuya bɛna bonya i la ka ɲɛsin Ala ka Kuma ma ka ta’a fɛ, o la Bibulukalan sen bɛna kɛ i ka don o don ɲɛnamaya la.—1 Piɛrɛ 2:2.

WARA MINNU KOFƆRA DANIƐL TILAYƆRƆBA 7 KƆNƆ, OLU BƐ MUN DE JIRA?

• 

  Daniɛl 7:4

• 

  Daniɛl 7:5

• 

  Daniɛl 7:6

• 

  Daniɛl 7:7

ƝININKALI FARANKAN:

Daniɛl 7:8, 24 tiimɛna cogo di?

BAARA NATA:

Wara minnu kofɔra Jirali tilayɔrɔba 13 kɔnɔ, olu bɛ mun de jira?