An ka baara ɲuman kɛ ni an ka sɛbɛnw ye minnu sinsinnen bɛ Bibulu kan
1 “Kabini san 1965, ne bɛ ka aw ka sɛbɛnw kalan. Ne bɛ Bibulu lajɛ tuma bɛɛ ni ne bɛ ka u kalan. Fɛn minnu bɛ u kɔnɔ, olu ni Bibulu kɔnɔkuma bɛɛ ye kelen ye. Ne b’a fɛ k’a dɔn tuma bɛɛ fɛn min ye tiɲɛ ye tigitigi Ala ko la ani Yesu ko la. Ne b’a fɔ aw ye tiɲɛ na ko ne ye jaabi jɔnjɔnw sɔrɔ ne ka fɛn kalantaw ani Bibulu sababu fɛ.” Cɛ dɔ ye o de sɛbɛn k’a ci Jehowa Seerew ka tɔnsigiyɔrɔsoba ma. O lɛtɛrɛ kelen kɔnɔ, a y’a ɲini Bibulu-kalan ka kɛ a kun.
2 I ko waleɲumandɔn bɛ cɛ la cogo min na an ka sɛbɛnw ko la, waleɲumandɔn bɛ mɔgɔ miliyɔn caman de la fana diɲɛ kɔnɔ an ka sɛbɛnw ko la, minnu sinsinnen bɛ Bibulu kan, ni olu bɔra “jɔnkɛ dannamɔgɔ hakiliman” yɔrɔ. (Mat. 24:45) San o san, sɛbɛn camanba de bɛ bɔ walisa ka mɔgɔ kɔnɔjɛlenw dɛmɛ u “ka se ka tiɲɛ dɔn.” (1 Tim. 2:4) An bɛ se ka baara ɲuman kɛ ni an ka sɛbɛnw ye minnu sinsinnen bɛ Bibulu kan, cogo jumɛn na?
3 An kana u bilalen to ten: San kɔnɔna na, sɛbɛn hakɛ caman bɛ se ka sɔrɔ an bolo, an tɛna baara kɛ ni minnu ye. An bɛ se ka mun kɛ walisa an kana an ka sɛbɛn nafamaw latiɲɛ? An ka kan ka jateminɛ kɛ ni an bɛ taa sɛbɛnw ɲini tuma min na cidenyabaara kama. An bɛna sɛbɛn min jira, sanni an ka taa o ɲɔgɔnna caman ɲini, an bɛ se ka o den kelen walima o den fila ta. Ni an ye o sɛbɛnw bila mɔgɔw bolo ka ban, an bɛ se ka segin ka na dɔ wɛrɛw ɲini. O b’a to sɛbɛn caman tɛna to an bolo sow kɔnɔ ka mɛn. O cogo kelen na, ni sɔn-ni-sɔn gafenin caman b’an bolo an ma se ka minnu bila mɔgɔw bolo, an ka kan ka dɔ bɔ an ka sɛbɛn ɲinita la.
4 Ni sɛbɛn camanba tora: Ni sɛbɛn suguya dɔw camanba tora jɛkulu bolo, balimakɛ min bɛ sɛbɛnw ko kunna, o bɛ se ka jɛkulu wɛrɛw ɲininka minnu bɛ a ka yɔrɔ la, walisa k’a lajɛ ni olu bɛ se ka baara kɛ ni sɛbɛn tolenw ye. Weleweledalaw bɛ se ka u ka sɛbɛn kɔrɔlenw di u somɔgɔw ma minnu tɛ an dannabagaw ye, ani Bibulu-kalandenw ni mɔgɔ wɛrɛw fana ma. Mɔgɔ kura minnu ye nali daminɛ jɛkulu kɔnɔ, a bɛ se ka diya olu fana ye ka o sɛbɛn kɔrɔw sɔrɔ walisa ka olu kɛ u yɛrɛw ka alako ta fan fɛ gafe marataw ye.
5 An ka sɛbɛnw dilanna kuntilenna min kama, fo u ka o kuntilenna sɔrɔ. O ye ka mɔgɔ kɔnɔnajɛlenw dɛmɛ u ka dɔ fara u ka dɔnniya kan Jehowa ka dakabana sagonataw ko la. I ko Yesu kɛlen kɔ ka dumuni di jamabaw ma, a ma dumuni tɔw to yen ten a yɛrɛ ma, an fana kuntilenna ka kan ka kɛ ka baara bɛɛ la ɲuman kɛ ni an ka sɛbɛnw ye minnu sinsinnen bɛ Bibulu kan. (Yuh. 6:11-13) Kisili cikan min bɛ an ka sɛbɛnw kɔnɔ, o tɛna se ka don mɔgɔ tilennenw dusukun na ni a bilalen tora an ka sɛbɛn bilayɔrɔ la, walima an ka sɛbɛn bila bɔrɛ kɔnɔ. O la sa, an ka kan ka kɛ mɔgɔw ye minnu bɛ kow jateminɛ koɲuman u ka sɛbɛn ɲini tuma na, ani ka baara ɲuman kɛ ni o sɛbɛnw ye walisa ka mɔgɔ wɛrɛw nafa.—Fil. 4:5.
[Study Questions]
1, 2. Mɔgɔ caman bɛ mun miiri an ka sɛbɛnw ko la, o bɛ ɲininkali jumɛn lawuli?
3. An bɛ se ka mun kɛ walisa sɛbɛn bilalen kana to ten an bolo?
4. Mun bɛ se ka kɛ ni sɛbɛn camanba tora jɛkulu bolo?
5. An bɛ se k’a jira cogo di ko an ka sɛbɛnw waleɲumandɔn bɛ an na?