An ka bonya min ye ka wajuli kɛ an masurunna mɔgɔw ka degun na
1 A kɛra ɲuman sira ye wo, walima juguman sira ye wo, an masurunna mɔgɔw ka fanga ka bon an kan. An dannayakɛɲɔgɔnw ka fanga b’an bila ka wale ɲumanw kɛ Krecɛnya sira la. (Heb. 10:24) Nka, an ka dukɔnɔmɔgɔ minnu tɛ Seerew ye, an baarakɛɲɔgɔnw, an kalankɛɲɔgɔnw, an sigiɲɔgɔnw ani an dɔnbaga wɛrɛw, olu bɛ se k’an sɛgɛn walasa an ka sira ta min kɔdɔnnen don Krecɛnya ka sariyakolow ma. U bɛ se k’an ‘tɔgɔ jugu fɔ an taama cogo ɲuman kosɔn Krista la.’ (1 Piɛ. 3:16) An bɛ se cogo di ka to an ka latigɛ kan, latigɛ min ye ka t’a fɛ ka wajuli kɛ hali n’an masurunna mɔgɔw ka degun b’an kan?
2 Dukɔnɔmɔgɔw: Tuma dɔw la, furucɛ dentigi min tɛ Jehowa Seere ye, o t’a fɛ a muso n’a denw k’u sen don kɛnɛkan cidenyabaara la. Mɛkisiko jamana na, dutigi dɔ tun bɛ ten. A muso n’a den wolonwula sɔnna tiɲɛ na. A daminɛ na, a y’i ban o ma katuguni a tun t’a fɛ a ka denbaya ka taa wajuli kɛ, ka Bibulu ni gafew jira du ni du. A tun b’a miiri k’o tun b’u ka danbe bɔ u la. O bɛɛ n’a ta, a muso ni denmisɛnw jijalen tora u ka latigɛ kan, min ye ka baara kɛ Jehowa ye, ani k’u sen don cidenyabaara la tuma bɛɛ. Kɔfɛ, cɛ y’a daminɛ k’a ye ko Ala ye wajuli baara min sigi, ko nafaba b’o la. O kɔ, a y’a yɛrɛ di Jehowa ma. San 15 de tɛmɛna sanni a ka sɔn tiɲɛ na, nka yali a tun na o kɛ wa, n’a y’a sɔrɔ a ka denbaya m’i timinandiya a ka bonya fɛ, n’o ye wajuli ye? —Luka 1:74; 1 Kɔr. 7:16.
3 Baarakɛɲɔgɔnw: A dɔ rɔ, a tɛna diya i baarakɛɲɔgɔn dɔw ye n’i b’a ɲini ka seereya kɛ u ye. Balimamuso dɔ y’a fɔ ko tuma min na baro wulila diɲɛ laban ko la baarada la, yɛlɛ tun bɛ kɛ a ma katuguni a y’a fɔ u ye k’u ka Matiyu sigida 24 kalan. Nka, tile damadɔw o kɔfɛ, a baarakɛɲɔgɔn musoma dɔ y’a fɔ a ye k’a ye o sigida kalan, wa, k’a y’a kabakoya. Gafe dɔw dira a ma, fɛɛrɛw tigɛra walasa ale n’a furucɛ ka Bibulu kalan. Kalan fɔlɔ tora senna fo sɔgɔmada ɲɛgɛkanɲɛ filanan na. Kalan sabanan kɔfɛ, u taara lajɛ la, ani sɔɔni o kɔfɛ, u ye saramin dabila k’u sen don cidenyabaara la. Yali o tun na kɛ n’a y’a sɔrɔ an balimamuso m’i cɛsiri k’a ka jigiya ɲɛfɔ tɔw ye wa?
4 Kalankɛɲɔgɔnw: Tuma caman na, masurunna mɔgɔw ka degun bɛ kɛ Seere denmisɛnw kan kalanso la, wa, u bɛ siran ko denmisɛn tɔw na u dɔgɔya u ka wajuli baara kosɔn. Ka bɔ Ameriki jamana na, Krecɛn npogotigi dɔ y’a fɔ ko: “N tun bɛ siran ka seereya kɛ denmisɛn tɔw ye katuguni n tun bɛ siran ɲagaribɔ ɲɛ.” O la sa, cogo minnu tun b’a bolo k’a masurunna mɔgɔw waju kalanso la ani wajulikɛyɔrɔ la, a y’i cɛ ka bɔ olu kɔrɔ. I bɛ se cogo di ka se sɔrɔ i masurunna mɔgɔw ka degun kan? I k’i jigi da Jehowa kan, k’a ka mandiya ɲini. (Nta. 29:25) I bɛ se baara min na ni Ala ka Kuma ye i ka cidenyabaara la, i k’i kunkɔrɔta n’o ye. (2 Tim. 2:15) An da sera npogotigi min ma a ma mɛn, o ye Jehowa delili daminɛ, k’a ɲini a fɛ a k’a dɛmɛ k’a kalankɛɲɔgɔnw fɛ kuma nege don a dusukun na. A ye senfɛ wajuli daminɛ kalanso la; a y’a ye minkɛ k’o ye nɔ ɲuman bɔ, a m’i sumaya tun ka kuma a dɔnbagaw bɛɛ fɛ. A ka kuma laban filɛ: “Funankɛw mago bɛ siniko jigiya la, u b’o fɛ fana, wa, Jehowa b’an bila k’u dɛmɛ.”
5 Sigiɲɔgɔnw: An sigiɲɔgɔn dɔw, walima an dɔnbaga dɔw bɛ se ka dimin cogo dɔ la an kɔrɔ k’a sababu kɛ an ye mɔgɔ sugu minnu ye, an’an ka dannayakow kosɔn. N’i bɛ siran u ka fɔtaw ɲɛ, i k’i yɛrɛ ɲininka, ko: ‘Tiɲɛ min bɛ na ni ɲɛnamaya ye, yali u b’o dɔn wa? N bɛ se ka mun kɛ walasa ka se k’u dusukun sɔrɔ?’ Kafo lakɔlɔsibaga y’a ye ko ka seereya kɛ sigiɲɔgɔnw ye dɔɔnin-dɔɔnin, o bɛ nɔ bɔ. I mago bɛ fanga ni hakilitigiya minnu na walasa i ka t’a fɛ ka dusu tilennen tigiw ɲini, i k’o deli Jehowa fɛ.—Fil. 4:13.
6 N’an dɛsɛra ka jɔ an masurunna mɔgɔw ka degun ɲɛkɔrɔ, o bɛ se ka diya juguw ye, nka, yali o bɛna u nafa wa, ka anw fana nafa? Mɔgɔw ye Yesu kɛlɛ, a yɛrɛ ka dugu mɔgɔw kɔni. A ye a yɛrɛ balimakɛw ka kuma juguw muɲu. Nka a tun b’a dɔn k’a bɛ se k’u dɛmɛ cogo kelenpe min na, o ye ka tugu ɲuman siri la, Ala ye min latigɛ a ye. O la sa, “Yesu ye jurumukɛlaw ka sɔsɔliba muɲu.” (Heb. 12:2, 3) An ka kan k’o ɲɔgɔn kɛ. Bonya min dira i ma, n’o ye Masaya cikan weleweledali ye, i yigiyigibali k’i seko kɛ o la. N’i b’o kɛ, “i na i yɛrɛ kisi ka i lamɛnbaaw fana kisi.”—1 Tim. 4:16.