KALANSEN 38

Ɲɛnamaya ye nilifɛn ye, an ka waleɲumandɔn jira o nilifɛn ko la

A sɛbɛn ɛnprimelen cogoya

Koduman ɲumanba caman bɛ se ka kɛ ɲɛnamaya kɔnɔ. Hali ni gɛlɛyaw bɛ an kan, an bɛ se halisa ka ɲɛnamaya koduman dɔw diyabɔ. An bɛ se k’a jira cogo di ko an bɛ waleɲumandɔn jira ɲɛnamaya ko la, o min ye nilifɛn ye? Kun bɛɛ la nafama min kosɔn an b’o kɛ, o ye jumɛn ye?

1. Mun na an ka kan ka waleɲumandɔn jira ɲɛnamaya ko la?

An ka kan ka waleɲumandɔn jira ɲɛnamaya ko la bawo nilifɛn don ka bɔ an Fa kanuman Jehova yɔrɔ. Ale de ye “ɲɛnamaya ji boyi” ye. (Zaburu 36:10) “Ale yɛrɛ bɛ ɲɛnamaya ni ninakili ani fɛn bɛɛ di mɔgɔw bɛɛ ma.” (Kɛwalew 17:25, 28) An mago bɛ fɛn minnu na walasa ka to ɲɛnamaya la, Jehova bɛ olu di an ma. Nka o dɔrɔn tɛ, a fana bɛ an dɛmɛ ɲɛnamaya kɔnɔ cogo la min b’a to an bɛ ɲɛnamaya diyabɔ.—Kɛwalew 14:17 kalan.

2. An bɛ se k’a jira Jehova la cogo di ko an bɛ waleɲumandɔn jira ɲɛnamaya ko la, o min ye nilifɛn ye?

Kabini i ka ɲɛnamaya daminɛna i ba wolonugu kɔnɔ, Jehova y’a daminɛ ka a mago don i la. Jehova ye delili dɔ don a ka Kuma kɔnɔ, o delili kɔnɔ, a batobaga dɔ y’a fɔ a ye ko: “I ɲɛ tun bɛ ne la sani ne ka bange.” (Zaburu 139:16) Jehova bɛ nafaba don i ka ɲɛnamaya la. (Matiyu 10:29-31 kalan.) Ni mɔgɔ dɔ y’a bɔ a yɛrɛ la ka dan bila mɔgɔ wɛrɛ ka ɲɛnamaya la, hali n’a y’a bɔ a yɛrɛ la ka dan bila a yɛrɛ ka ɲɛnamaya la, o bɛ Jehova dusu kasi kosɛbɛ.a (Ekisode 20:13) Jehova dusu bɛ kasi fana ni an bɛ an ka ɲɛnamaya bila farati la gansan walima ni an tɛ fɛɛrɛw tigɛ walasa ka mɔgɔ tɔw ka ɲɛnamaya lakana. Ni an bɛ an janto an yɛrɛw ka ɲɛnamaya la ani ni an bɛ bonya da mɔgɔ tɔw ka ɲɛnamaya kan, an b’a jira ko an bɛ waleɲumandɔn jira ɲɛnamaya ko la, o min ye nilifɛn ɲumanba ye.

DƆ FARA I KA DƆNNIYA KAN

An ka cogo dɔw lajɛ minnu fɛ an bɛ se ka an ka waleɲumandɔn jira ɲɛnamaya ko la, o min ye nilifɛn ye.

3. I janto i ka kɛnɛya la

Krecɛn minnu ye u ka ɲɛnamaya di Jehova ma, olu bɛ Jehova bato u ka ɲɛnamaya kɛcogo bɛɛ fɛ. A bɛ kɛ iko u bɛ u farikolo bɛɛ di Ala ma saraka ye. Romɛkaw 12:1, 2 kalan, o kɔ aw ka baro kɛ nin ɲininkaliw kan:

Mun de ka kan ka i bila i ka i janto i ka kɛnɛya la?
I bɛ se ka o kɛ sira minnu fɛ, olu dɔw ye jumɛnw ye?

Muso kɔnɔma dɔ bɛ ka kuma a ka dɔgɔtɔrɔ fɛ.

4. Ni i bɛ fɛn o fɛn kɛ, i ka i janto kosɛbɛ walasa mɔgɔ si kana jogin walima ka bɔnɛ a ka ɲɛnamaya la

Bibulu bɛ dusu don an kɔnɔ an ka an yɛrɛ tanga kɛwale faratimaw ma. A’ye WIDEYO lajɛ walasa ka fɛn dɔw ye i bɛ se ka minnu kɛ walasa ka kɛ lakana kɔnɔ.

WIDEYO: An ka an mago don kosɛbɛ lakana ko la (8:34)

Ntalenw 22:3 kalan, o kɔ, i yɛrɛ ani mɔgɔ tɔw bɛ se ka lakana cogo min na nin yɔrɔw ani nin kow kɔnɔna na, a’ye baro kɛ o kan:

I ka so kɔnɔ.
I ka baarakɛyɔrɔ la.
Ni i bɛ farikolo ɲɛnajɛ la.
Ni i bɛ ka bolimafɛn dɔ boli walima ni mɔgɔ wɛrɛ bɛ k’a boli ka i to a kɔnɔ.

Cɛ dɔ bɛ mobili kɔnɔ, a bɛ ka a ka lakana sɛntiri siri.

5. Den min ma bange fɔlɔ, bonya da o ka ɲɛnamaya kan

Muso kɔnɔma dɔ bɛ ka maga-maga a kɔnɔbara la.

Dawuda y’a ɲɛfɔ ko ni den bɛ ka kɔrɔbaya a ba wolonugu la, fɛn o fɛn bɛ kɛ a la, Jehova b’a mago don o bɛɛ la. Zaburu 139:13-17 kalan, o kɔ aw ka baro kɛ nin ɲininkali kan:

Yala Jehova ɲɛ kɔrɔ, mɔgɔ ka ɲɛnamaya bɛ daminɛ tuma min na a ba y’a kɔnɔ ta, walima a bange tuma la wa?

Jehova ye sariya minnu di Israɛl kɔrɔ ma, olu tun bɛ denbaw ani u den minnu bɛ u wolonuguw la lakana. Ekisode 21:22, 23 kalan, o kɔ aw ka baro kɛ nin ɲininkaliw kan:

Denyɛrɛnin min ma bange fɔlɔ, ni mɔgɔ dɔ tun ye dan bila o ka ɲɛnamaya la k’a sɔrɔ a ma a dabɔ a kama, Jehova tun bɛ o tigi ye cogo di?
Jehova bɛ kɛ cogo di ni mɔgɔ dɔ y’a dabɔ a kama ka o kɛ?b
E hakilina ye mun ye Jehova ka o ko yecogo kan?

A’ye WIDEYO lajɛ.

WIDEYO: Nafa don ɲɛnamaya la iko Ala b’a kɛ cogo min na (5:00)

Hali muso min bɛ ɲɛnamaya nafa dɔn, o bɛ se k’a miiri ko kɔnɔtiɲɛ dɔrɔn de ye a ka ko ɲɛnabɔ cogo ye. Esayi 41:10 kalan, o kɔ aw ka baro kɛ nin ɲininkaliw kan:

Ni mɔgɔw bɛ ka muso kɔnɔnasu a k’a kɔnɔ tiɲɛ, a ka kan k’a ɲɛsin jɔni de ma ka dɛmɛ ɲini? Mun na?

MƆGƆ DƆW B’A FƆ KO: “Yamaruya bɛ muso bolo k’a sugandi n’a b’a kɔnɔ tiɲɛ walima n’a t’a tiɲɛ bawo ale de kɔnɔma don.”

Mun b’a to i bɛ da a la ko muso kɔnɔma ani den min bɛ a wolonugu la, ko nafa bɛ olu fila bɛɛ ka ɲɛnamaya la Jehova bolo?

BAKURUBAFƆLI

Jehova ka nilifɛn min ye ɲɛnamaya ye, Bibulu bɛ an kalan an ka o kanu, ka bonya da a kan ani ka a lakana. An yɛrɛw ka ɲɛnamaya ani mɔgɔ tɔw ka ɲɛnamaya sen b’o la.

Seginnkanni

Mun na Hadamadenw ka ɲɛnamaya nafa ka bon Jehova bolo?
Jehova bɛ kɛ cogo di ni mɔgɔ dɔ y’a bɔ a yɛrɛ la ka dan bila Hadamaden dɔ ka ɲɛnamaya la?
Mun na i bɛ waleɲumandɔn jira ɲɛnamaya ko la, o min ye nilifɛn ye?

Kalansen banna don min na:

A ɲini ka nin kɛ

I hakili jagabɔ fɛn dɔ kan i bɛ se ka min kɛ walasa ka i ka kɛnɛya lakana.

Fɛn wɛrɛ:

Your other goal

NINNU LAJƐ

An bɛ se ka Jehova barikada cogo di ɲɛnamaya ko la, o min ye nilifɛn ye?

Dɔnkili 141nan—Ɲɛnamaya ye fɛn kabakoman ye (2:41)

Nin ɲininkali jaabi sɔrɔ: Yala Ala bɛ yafa muso ma min y’a kɔnɔ tiɲɛ wa?

“Bibulu bɛ mun de fɔ kɔnɔtiɲɛ ko la?” (jw.org barokun dɔ)

Ni yɛrɛfaga hakilinaw bɛ mɔgɔ dɔ la dun? A lajɛ Bibulu bɛ se ka o tigi dɛmɛ cogo min na.

“Ne b’a fɛ ka sa—Yala Bibulu bɛ se ka ne dɛmɛ ni yɛrɛfaga hakilinaw jiginna ne kɔnɔ wa?” (jw.org barokun dɔ)

a Jehova b’a mago don kosɛbɛ mɔgɔ dusu kasilenw na. (Zaburu 34:19) Dusukasiba sugu minnu bɛ yɛrɛfaga hakilinaw jigin mɔgɔ kɔnɔ, Jehova bɛ olu faamu, wa a b’a fɛ ka o mɔgɔw dɛmɛ. Walasa k’a ye Jehova ka dɛmɛ bɛ se ka fanga di mɔgɔ ma cogo min na a ka se sɔrɔ yɛrɛfaga hakilinaw kan, nin barokun kalan: “Ne b’a fɛ ka sa—Yala Bibulu bɛ se ka ne dɛmɛ ni yɛrɛfaga hakilinaw jiginna ne kɔnɔ wa?” O bɛ sɔrɔ nin kalansen in kɔnɔ, Ninnu lajɛ yɔrɔ la.

b Minnu delila ka kɔnɔtiɲɛ kɛ, olu kana u yɛrɛw jalaki k’a dama tɛmɛn—Jehova bɛ se ka yafa u ma. Walasa ka kunnafoni wɛrɛw sɔrɔ o ko kan, nin barokun lajɛ: “Bibulu bɛ mun de fɔ kɔnɔtiɲɛ ko la?” O bɛ sɔrɔ nin kalansen in kɔnɔ, Ninnu lajɛ yɔrɔ la.