KALANSEN 28
Jehova ni Yesu ye min kɛ i ye, i ka waleɲumandɔn jira o la
I bɛ kɛ cogo di ni i teri dɔ ye nilifɛn ɲumanba dɔ di i ma? Siga t’a la ko o bɛ i nisɔndiya kosɛbɛ ani a bɛ diya i ye k’i ka waleɲumandɔn jira i teri la o nilifɛn kosɔn. Nilifɛnw bɛɛ la belebeleba an tun tɛ se ka min sɔrɔ abada, Jehova ni Yesu ye o di an ma. O ye nilifɛn jumɛn ye ani an bɛ se ka an ka waleɲumandɔn jira ka ɲɛsin o ma cogo di?
1. Jehova ni Yesu ye min kɛ an ye, i bɛ se ka i ka waleɲumandɔn jira o la sira minnu fɛ, olu dɔ la kelen ye jumɛn ye?
Bibulu ye layidu ta ko “mɔgɔ o mɔgɔ dara [Yesu] la” o tigi bɛ se ka ɲɛnamaya kɛ fo badaa. (Yuhana 3:16) Ka dannaya kɛ, o kɔrɔ ye mun ye? O kɔrɔ tɛ dɔrɔn ka da Yesu la. An mago b’a la fana ka an ka dannaya jira an ka latigɛliw ani an ka ko kɛtaw fɛ. (Yakuba 2:17) Ni an bɛ an ka dannaya jira an ka ko kɛtaw ani an ka kumaw fɛ, jɛɲɔgɔnya min bɛ an ni Yesu ani a Fa Jehova cɛ, o barika bɛ bonya.—Yuhana 14:21 kalan.
2. Jehova ni Yesu ye min kɛ an ye, ko kɛrɛnkɛrɛnnen jumɛn bɛ an dɛmɛ an ka waleɲumandɔn jira o la?
Su laban sani Yesu ka sa, a ye cogo wɛrɛ jira a nɔfɛmɔgɔw la min fɛ u bɛ u ka waleɲumandɔn jira a ka saraka la. A ye seli kɛrɛnkɛrɛnnen dɔ kɛli sigi sen kan, Bibulu bɛ min wele “Matigi ka tabali”, a fɔcogo dɔ ye Matigi ka Surɔfana, a bɛ wele fana Krisita ka saya Hakilijigin. (1 Kɔrɛntekaw 11:20) Yesu ye o ko sigi sen kan walasa a ka cidenw ani krecɛn lakika minnu bɛ na olu kɔ, olu bɛɛ ka to ka u hakili jigin a la ko a ye a ka ɲɛnamaya di an kosɔn. Yesu y’a fɔ o seli ko la ko: “A’ ye nin kɛ walisa ka aw hakili to ne la.” (Luka 22:19) Ni i taara Hakilijigin seli la, Jehova ni Yesu ye kanuyaba min jira an na, i bɛ i ka waleɲumandɔn jira ka ɲɛsin o ma.
DƆ FARA I KA DƆNNIYA KAN
An ka cogo wɛrɛw lajɛ minnu fɛ i bɛ i ka waleɲumandɔn jira kanuyaba ko la Jehova ni Yesu ye min jira. Kun min na Krisita ka saya Hakilijigin nafa ka bon, an bɛ o fana sɛgɛsɛgɛ.
3. Waleɲumandɔn bɛ an bila ka wale kɛ
A ka kɛ ko i tun bɛna to ji la nka dɔ ye i kisi. O tigi ye o ko min kɛ i ye, yala i bɛna ɲinɛ o kɔ nɔgɔya la wa? Walima i bɛna cogoyaw de ɲini walasa k’a jira o tigi la ko i b’a waleɲumandɔn a ka o ko kɛlen kosɔn wa?
An bɛna se ka ɲɛnamaya banbali sɔrɔ Jehova ka ɲumanya de kosɔn. 1 Yuhana 4:8-10 kalan, o kɔ aw ka baro kɛ nin ɲininkaliw kan:
Mun na Yesu ka saraka ye nilifɛn kɛrɛnkɛrɛnnen ye?
Jehova ni Yesu ye min kɛ i ye, ni i miirila o la, o bɛ mun kɛ i la?
Jehova ni Yesu ye min kɛ an ye, an bɛ se ka an ka waleɲumandɔn jira o la cogo di? 2 Kɔrɛntekaw 5:15 ani 1 Yuhana 4:11; 5:3 kalan. O tɛmɛsira kelen-kelen bɛɛ kalannen kɔ, aw ka baro kɛ nin ɲininkali kan:
Ka kɛɲɛ ni o tɛmɛsiraw ye, an bɛ se ka mun de kɛ walasa ka an ka waleɲumandɔn jira?
4. Yesu ladege
An bɛ an ka waleɲumandɔn jira cogo wɛrɛ min fɛ, o ye ka Yesu ladege. 1 Piɛrɛ 2:21 kalan, o kɔ aw ka baro kɛ nin ɲininkali kan:
I bɛ se ka tugu Yesu sen nɔ na sira jumɛnw fɛ?
Ala ka Kuma ko tun ka di Yesu ye, a tun bɛ kibaru duman waajuli kɛ, ani a tun bɛ tɔw dɛmɛ
5. To ka Krisita ka saya Hakilijigin seli kɛ
Walasa k’a dɔn fɛn min kɛra Matigi ka Surɔfana kɛko fɔlɔ la, Luka 22:14, 19, 20 kalan. O kɔ aw ka baro kɛ nin ɲininkaliw kan:
Mun de kɛra Matigi ka Surɔfana la?
Nbuuru ani diwɛn bɛ mun de jira?—Tilayɔrɔdenninw 19 ani 20 lajɛ.
Yesu y’a ɲini a ka kalandenw fɛ u ka to ka Matigi ka Surɔfana seli kɛ siɲɛ kelenpe san kɔnɔ a ka saya Hakilijigin seli waati la. O de la, Jehova Seerew bɛ ɲɔgɔn lajɛ san o san walasa ka u hakili jigin Krisita ka saya la iko a y’a fɔ cogo min na. Walasa ka fɛn caman dɔn o lajɛ nafama in kan, a’ye WIDEYO lajɛ. O kɔ, aw ka baro kɛ nin ɲininkali kan:
Mun de bɛ kɛ Hakilijigin seli la?
Nbuuru ni diwɛn bɛ fɛn dɔ de jira. Nbuuru bɛ Yesu farikolo dafalen de jira a ye min saraka an kosɔn. Diwɛn bɛ Yesu joli de jira
MƆGƆ DƆW B’A FƆ KO: “Da Yesu la dɔrɔn, o la i bɛ kisi.”
I bɛ se ka baara kɛ ni Yuhana 3:16 ani Yakuba 2:17 ye cogo di walasa k’a jira ko o dɔrɔn tɛ bɔli kɛ?
BAKURUBAFƆLI
Yesu ye min kɛ an ye an bɛ waleɲumandɔn jira o la ni an bɛ dannaya da a kan ani ka taa a ka saya Hakilijigin la.
Seginnkanni
Ka da Yesu la o kɔrɔ ye mun ye?
Jehova ni Yesu ye min kɛ i ye, a ka di i ye ka i ka waleɲumandɔn jira o la cogo di?
Mun na a nafa ka bon kosɛbɛ i ka taa Krisita ka saya Hakilijigin la?
NINNU LAJƐ
Krisita ka saya bɛ dusu don an kɔnɔ an ka mun kɛ?
A ye baara kɛ n’a farikolo ye ka nɔɔrɔ da Jehova kan (9:28)
A ɲini ka fɛn caman dɔn dannaya kan ani an bɛ se ka a jira cogo min na.
Muso dɔ ka ɲɛnamaya ɲɛna a kɛlen kɔ ka fɛn caman dɔn Krisita ka saraka ko la. O lajɛ nin maana in kɔnɔ: “Ne saniyalen don sisan wa ɲɛnamaya ka di n’ye.”