KALANSEN 23
Nafaba b’a la ka cɛsiriw kɛ walasa ka batɛmu ta!
Yesu y’a fɔ ko krecɛnw ka kan ka batise. (Matiyu 28:19, 20 kalan.) Batɛmu ye mun ye? Mɔgɔ ka kan ka mun de kɛ walasa ka batɛmu ta?
1. Batɛmu ye mun ye?
Daɲɛ min ye ko “batise,” o bɛ bɔ Gɛrɛkikan daɲɛ la min kɔrɔ ye k’a “su”. Tuma min na Yesu batisera, a kuuru bɛɛ sura Jurdɛn baji la, o kɔ a ‘bɔra ji la.’ (Marka 1:9, 10) Iko Yesu cogo, krecɛn lakikaw bɛ batise u kɛtɔ ka u kuuru bɛɛ su ji la.
2. Batɛmu bɛ mun de jira?
Mɔgɔ ka batɛmu tali b’a jira ko a y’a yɛrɛbakun di Jehova Ala ma. Mɔgɔ b’a yɛrɛbakun di Ala ma cogo di? Sani a ka batɛmu ta, a b’a fɔ Jehova ye delili kɔnɔ ko a b’a fɛ ka a bato fo badaa. A b’o delili kɛ a kelen ni Ala kelen cɛ. A bɛ layidu ta ko a bɛ Jehova kelenpe de bato ani ko a bɛ Ala sago kɛli de kɛ fɛn bɛɛ la nafama ye a ka ɲɛnamaya kɔnɔ. A b’a sugandi ka “ban a yɛrɛ la” . . . “ka tugu” Yesu ka kalansiraw ni a ka misali kɔ. (Matiyu 16:24) A ka yɛrɛbakundili ni a ka batɛmu b’a to a ka se ka teriya sɛbɛ don a ni Jehova cɛ. O b’a to fana a ka se ka teriya sɛbɛ don a ni Jehova batobaga wɛrɛw cɛ.
3. Mɔgɔ ka kan ka mun de kɛ sani a ka batɛmu ta?
I bɛ se k’i labɛn batɛmu kama i kɛtɔ k’a ɲini ka Jehova dɔn ani ka i ka dannaya bonya a kan. (Heburuw 11:6 kalan.) Ni i ka dɔnniya ni i ka dannaya barika bɛ ka bonya ka ta’a fɛ, i ka Jehova kanuya barika fana bɛ bonya ka ta’a fɛ. O la, a bɛna diya i ye ka waajuli kɛ Jehova ko la ani ka ɲɛnamaya kɛ ka kɛɲɛ ni a ka sariyakolow ye. (2 Timote 4:2; 1 Yuhana 5:3) Ni mɔgɔ bɛ ka a ‘taama cogo bɛn Matigi [Jehova] cogo ma, ani “ka a diyaɲeko kɛ tuma bɛɛ”, a bɛ se k’a latigɛ k’a ka ɲɛnamaya di Ala ma ani ka batise.—Kolosekaw 1:9, 10.a
DƆ FARA I KA DƆNNIYA KAN
An k’a lajɛ Yesu ka batɛmu bɛ se ka an kalan fɛn min na, ani mɔgɔ bɛ se ka a yɛrɛ labɛn cogo min na o ko nafamaba in kama.
4. Yesu ka batɛmu bɛ se ka an kalan fɛn min na
Matiyu 3:13-17 kalan walasa ka fɛn caman dɔn Yesu ka batɛmu ko la. O kɔ aw ka baro kɛ nin ɲininkaliw kan:
Yala Yesu denyɛrɛninnama de batisera wa?
A batisera cogo jumɛn na? Yala ji seri-seri la a kan dɔrɔn de wa?
Ala ye baara kɛrɛnkɛrɛnnen di Yesu ma a k’a kɛ dugukolo kan. Yesu ye o baara kɛli daminɛ a ka batɛmu tali kɔfɛ de. Luka 3:21-23 ani Yuhana 6:38 kalan, o kɔ aw ka baro kɛ nin ɲininkali kan:
Yesu batiselen kɔ, a ye baara jumɛn de bila jɔyɔrɔ fɔlɔ la a ka ɲɛnamaya kɔnɔ?
5. Batɛmu ye fɛn ye i bɛ se ka min kɛ
Hakilina min ye ka i yɛrɛbakun di Ala ma ani ka batɛmu ta, a daminɛ na, o bɛ se ka kɛ doni ye i bolo. Nka i bɛ se ka ta’a fɛ ka ɲɛtaaw kɛ fo ka taa se waati ma, min kɔnɔna na i dalen b’a la ko i bɛ se ka o latigɛliba sugu kɛ. Walasa ka mɔgɔ dɔw ye minnu ye o kɛ, a’ye WIDEYO lajɛ.
Yuhana 17:3 ani Yakuba 1:5 kalan, o kɔ aw ka baro kɛ nin ɲininkali kan:
Mun de bɛ se ka mɔgɔ dɛmɛ a k’a labɛn batɛmu kama?
An bɛ an yɛrɛbakun di an kɛtɔ k’a fɔ Jehova ye ko an b’a fɛ ka a bato fo badaa
An ka batɛmu la, an b’a jira tɔw la ko an ye an yɛrɛbakun di Ala ma
6. Ni an ye batɛmu ta, an bɛ kɛ Jehova ka denbaya kɔnɔmɔgɔ dɔ ye
Ni an batisera, an bɛ kɛ denbaya dɔ kɔnɔmɔgɔ ye, o min kɔnɔmɔgɔw bɛ diɲɛ fan bɛɛ. Kelenya bɛ o denbaya kɔnɔmɔgɔw ni ɲɔgɔn cɛ. Hali ni an tɛ bɔ yɔrɔ kelenw na, an bɛɛ ka dannayakow ye kelen ye ani an bɛ ɲɛnamaya kɛ ka kɛɲɛ ni sariyakolo kelenw ye. Zaburu 25:14 ani 1 Piɛrɛ 2:17 kalan, o kɔ aw ka baro kɛ nin ɲininkali kan:
Jɛɲɔgɔnya min bɛ mɔgɔ ni Jehova cɛ ani min bɛ a tigi ni Jehova batobaga wɛrɛw cɛ, batɛmu bɛ nɔ bila o jɛɲɔgɔnyaw la cogo jumɛn na?
MƆGƆ DƆW B’A FƆ KO: “Ne labɛnnen tɛ batɛmu tali kama.”
Yala e b’a fɛ ka cɛsiri kɛ walasa ka batise wa?
BAKURUBAFƆLI
Yesu y’a fɔ ko krecɛnw ka kan ka batise. Sani mɔgɔ ka batɛmu ta, a ka kan ka a ka dannaya bonya kosɛbɛ Jehova la, ka ɲɛnamaya kɛ ka kɛɲɛ ni a ka sariyakolow ye, ani k’a yɛrɛbakun di a ma.
Seginnkanni
Batɛmu ye mun ye, ani mun na batɛmu nafa ka bon?
Jɛɲɔgɔnya jumɛn de bɛ yɛrɛbakundili ani batɛmu cɛ?
Mɔgɔ ka kan ka mun de kɛ sani a ka se k’a yɛrɛbakun di Ala ma ani ka batise?
NINNU LAJƐ
A lajɛ mɔgɔ bɛ se ka fɛn minnu kɛ walasa ka ɲɛtaaw kɛ fo ka se batɛmu ma.
“Kanuya ani waleɲumandɔn ka ɲɛsin Jehova ma, olu bɛ mɔgɔ bila ka batɛmu ta” (w20.03)
A lajɛ cogo min na cɛ dɔ y’a latigɛ ka batɛmu ta k’a sɔrɔ o ma sinsin a dusukunnakow dɔrɔn kan.
A lajɛ kun min na batɛmu ye kuntilenna ɲuman ye ani i bɛ se ka i labɛn cogo min na a kama.
a Ni mɔgɔ dɔ tun batisera diinɛ wɛrɛ la, a ka kan ka segin ka batise tuguni. Mun na? Bawo o diinɛ tɛ mɔgɔw kalan tiɲɛ ko la min bɛ Bibulu kɔnɔ.—Kɛwalew 19:1-5 ani kalansen 13nan lajɛ.