Yesu bɛ ka taama ji sanfɛ

Yezu tun be se ka banabagatɔw kɛnɛya ani ka suuw kunu. Nka o dɔrɔn tɛ. A tun be se fɔɲɔ ni sanji fana kɔrɔ. Yezu ye delili kɛ kulu kan ka ban, a ye filɛri kɛ Galile baji fan fɛ ani a y’a ye ko fɔɲɔba be wulila. A ka cidenw tun b’u ka kurun kɔnɔ n’u be dɛmɛdɛmɛna n’a ye fɔɲɔ kosɔn. Yezu jigira ka bɔ kulu kan ani a y’a daminɛ ka tagama jii kan n’a be tagara kurun yɔrɔ. Cidenw y’a ye ko mɔgɔ dɔ be tagamana jii kan minkɛ, u siranna. Nka Yezu y’a fɔ u ye ko: ‘Ne lo. Aw kana siran.’

Piyɛri ko: ‘Matigi, n’ile lo tiɲɛn na, a fɔ ko n’ ka na.’ Yezu y’a fɔ Piyɛri ye ko: ‘Na.’ Fɔɲɔba bɛɛ n’a ta, Piyɛri bɔra kurun kɔnɔ ka tagama jii kan n’a be tagara Yezu fɛ. Nka a be surunyana Yezu la tuma min na, a ye fɔɲɔba filɛ ani a siranna. A y’a ye ko a be jigira jii jukɔrɔ. A kulera ko: ‘Matigi, n’ dɛmɛ!’ Yezu y’a bolo minɛ ani k’a fɔ a ye ko: ‘Mun na i sigasigara? I ka lanaya be min?’

Yezu ni Piyɛri donna kurun kɔnɔ ani fɔɲɔba lɔra kelen. Miiri k’a filɛ o koo ye min kɛ cidenw na! U y’a fɔ ko: “Tiɲɛ na, i ye Ala Deen ye.”

Yezu ma dan o kabako ɲɔgɔn kelen dɔrɔn ma. Wagati wɛrɛ, Yezu n’a ka cidenw tagara baji faan wɛrɛ fɛ kurun kɔnɔ. U tagatɔ, Yezu tagara la kurun kɔfɛla la ka sinɔgɔ. K’a to sinɔgɔ la, fɔɲɔba wulila. Jikuruw ye kurun gosi fɔɔ a be ɲini ka fa jii la. Cidenw ye Yezu kunu k’a fɔ a ye ko: ‘Matigi, an bena sa! An kisi!’ Yezu wulila k’a fɔ baji ye ko: “Mankan dabila.” O yɔrɔnin bɛɛ, fɔɲɔba lɔra ani baji malara. Yezu ye cidenw ɲininga ko: “Aw ka dannaya bɛ min?” U y’a fɔ ɲɔgɔn ye ko: “Hali fɔɲɔ ni baji be sɔn a ta ma.” Cidenw y’a faamu ko n’u y’u jigi bɛɛ la Yezu kan, u tɛna siran foyi ɲɛ.