Yesu bɛ ka Masaya Kibaru Duman waajuli kɛ

Wagati dɔɔni Yezu batizenin kɔ, a y’a daminɛ ka waajuli kɛ ko: ‘Ala ka Masaya wagati surunyana.’ Yezu tun be Galile ni Zude maraw yaala ani kalandenw tun be tugu a kɔ. Tuma min na Yezu kɔsegira Nazarɛti, a lamɔna yɔrɔ min na, a tagara batoso kɔnɔ. A ye Ezayi ka kitabu dayɛlɛ k’a kalan ni kaanba ye ko: ‘Jehova ye hakili senu di ne ma walisa n’ ka se ka waajuli kɛ ka kibaro diiman fɔ mɔgɔw ye.’ O kuma kɔrɔ ko di? O kɔrɔ ko hali ni mɔgɔw tun b’a fɛ Yezu ka kabakow kɛ, hakili senu dira a ma kuun fɔlɔ min kama, o ye ka waajuli kɛ ka kibaro diiman fɔ mɔgɔw ye. O kɔ, a y’a fɔ a lamɛnbagaw ye ko: ‘Kiraya kuma nin dafara bi.’

Kɔfɛ, Yezu tagara Galile baji daa la. O yɔrɔ la, a ye mɔgɔ naani ye minw nana kɛ a ka kalandenw ye. U tun ye jɛgɛminɛlaw lo ye. A y’a fɔ u ye ko: ‘A’ ye tugu ne kɔ, ne bena aw kɛ mɔgɔ minɛlaw ye.’ Piyɛri, Andere, Zaki ani Zan tun lo. U sinna ka jɛgɛminɛ baara to yen ka tugu Yezu kɔ. U ye Galile mara bɛɛ yaala ka waajuli kɛ Jehova ka Masaya koo la. U ye waajuli kɛ batosow kɔnɔ, lɔgɔfiyɛw ani siradaw la. U tun be taga yɔrɔ o yɔrɔ, jamaba dɔ tun be u kɔ. Yezu tɔgɔ bɔra yɔrɔ bɛɛ, fɔɔ ka se Siri jamana na.

Yezu ye see di a ka kalanden dɔw ma u ka mɔgɔw kɛnɛya ani ka jinaw gwɛn ka bɔ mɔgɔw la. Dɔ wɛrɛw tugura a kɔ tuma min na a tun be waajuli kɛ dugubaw ni dugu denninw na. Muso limaniyanin dɔw ye Yezu n’a ka kalandenw dɛmɛ ni bololafɛnw ye. O muso dɔw ye Magadala Mariyamu ni Zaani ni Suzani ye ani muso wɛrɛw.

Yezu y’a ka kalandenw degi waajulibaara la. O kɔ, a y’u ci ka taga o baara kɛ. U tagara Galile mara yɔrɔ bɛɛ yaala ani mɔgɔ caaman kɛra Yezu ka kalandenw ye ani u batizera. Mɔgɔ minw tun b’a fɛ ka kɛ Yezu ka kalandenw ye, u tun ka ca fɔɔ Yezu y’u suma ni foro ye min suman mɔnna. A ko: ‘ A’ ye Jehova deli a ka baarakɛla caaman ci ka na suman tigɛ.’ Kɔfɛ, a ye kalanden 70 sugandi ani a y’u ci fila fila ka taga waajuli kɛ Zude mara bɛɛ la. U ye mɔgɔ sifa bɛɛ kalan Masaya koo la. U kɔseginin kɔ, koo minw kɛra, u ninsɔn tun ka di k’o lakali Yezu ye. Sutana tun tɛ se ka foyi kɛ ka waajulibaara bali.

Yezu ye labɛn kɛ walisa ale kɔseginin kɔ sankolo la, a ka kalandenw ka taga ɲɛ n’o baara kɔrɔtanin ye. A y’a fɔ u ye ko: ‘ A’ ye waajuli kɛ ka kibaro diiman fɔ dugukolo yɔrɔ bɛɛ la. A’ ye mɔgɔw kalan Ala ka Kuma na ani k’u batize.’