Nuhun ka kurunba

Mɔgɔw nana caya dugukolo kan. U fanba tun ye mɔgɔ juguw ye. Hali mɛlɛkɛ dɔw fana juguyara. U y’u sigiyɔrɔ to yen sankolo la ka na dugukolo kan. I b’a lɔn fɛɛn min kama wa? U y’o kɛ walisa ka adamadenw cogoya ta ani ka musow furu.

O mɛlɛkɛw n’o musow ye deenw sɔrɔ. O deenw bonyana ka fangaba sɔrɔ ani ka kɛ benkannikɛlaw ye. U tun be mɔgɔw niin tɔɔrɔ. Jehova tun tɛ se k’o koo to yen ten. O kama, a y’a latigɛ ka mɔgɔ juguw halaki ni sanjiba ye.

Nka cɛɛ dɔ tun be dan na tɔɔw la. A tun be Jehova kanu. A tɔgɔ ko Nuhun. Muso tun b’a fɛ ani dencɛ saba. A dencɛw tɔgɔw ko: Sɛmu ni Kamu ani Zafɛti. Muso tun be u saba bɛɛ fɛ. Jehova ko Nuhun ka kurun belebeleba dɔ dilan walisa ale n’a ka denbaya ka se ka kisi sanjiba tuma na. O kurun ye kɛsu belebeleba dɔ ye min be se ka to jii sanfɛ. Jehova y’a fɔ Nuhun ye fana ko a ka bɛgɛnw ni kongosogo caaman don o kurun kɔnɔ walisa olu fana ka se ka kisi.

Nuhun sinna k’o kurun baara daminɛ. O baara mɛɛnna saan 50 ɲɔgɔn. Jehova tun ko Nuhun n’a somɔgɔw ka kurun nin dilan cogo min na, u y’o lo kɛ jaatika. O wagati bɛɛ la, Nuhun ye mɔgɔw lasɔmi sanjiba koo la. Nka, mɔgɔ si ma mɛnni kɛ a fɛ.

A laban, u tun ka ɲi ka don kurun kɔnɔ wagati min na, o sera. An k’a filɛ min kɛra o kɔ.