Dimi ye a bila ka mɔgɔ faga

Adama ni Awa gwɛnnin kɔ ka bɔ Edɛn nankɔtu kɔnɔ, u ye deen caaman wolo. U dencɛ fɔlɔ Kayɛn kɛra sɛnɛkɛla ye. U dencɛ filanan Abɛli kɛra sagadɛndɛla ye.

Loon dɔ, Kayɛn ni Abɛli ye sarakaw bɔ Jehova ye. I b’a lɔn saraka ye min ye wa? O ye fɛɛn dɔ ye i be min di Ala ma. Abɛli ka saraka diyara Jehova ye, nka Kayɛn ta ma diya a ye. O koo ye Kayɛn dimi kosɔbɛ. Jehova ye Kayɛn lasɔmi ko a ka dimiya be se k’a to a be koo jugu kɛ. Nka Kayɛn ma mɛnni kɛ.

Kayɛn y’a fɔ Abɛli ye ko: ‘Na an ka taga kongo la.’ K’u fila dɔrɔn to kongo la, Kayɛn wulila a dɔgɔcɛ kama k’a faga. Jehova ye mun lo kɛ o kosɔn? A ye Kayɛn ɲangi: a y’a gwɛn ka bɔ a somɔgɔw kɔrɔ. Jehova ma sɔn Kayɛn ka segi ka na tugun.

An be kalan juman sɔrɔ o la? Ni koow tɛ kɛra komi an b’a fɛ cogo min na, an be se k’a daminɛ ka dimi. N’an y’a ye ko an dusu be gwanna ka taga, wala ni dɔ y’a kɔrɔsi ko an diminin lo ani a tigi y’an lasɔmi, an ka ɲi k’o dimiya dabila joona sanni a k’an lasun ka koo jugu kɛ.

Jehova koo tun ka di Abɛli ye ani a ye koo tilennin kɛ. O kama Jehova tɛna ɲinɛ a kɔ abada. Ni Ala nana dugukolo kɛ alijɛnɛ ye, a bena Abɛli lakunu.