Rahab ye dannaya da Jehova kan

An k’a kɛ i n’a fɔ an bɛ Jeriko dugu kɔnɔ. O dugu bɛ Kanan jamana la, o yɔrɔ la mɔgɔw dalen tɛ Jehova la. Muso dɔ sigilen bɛ o yɔrɔ la min tɔgɔ ko Rahab.

Tuma min na Rahab tun ye npogotiginin ye, a ye Musa ka maana ko mɛn min kɔnɔ Musa ye kɔgɔji bilen cɛci Israɛlkaw ɲɛ ani ka u bɔ Misirakaw bolo. A ye a mɛn fana ko Jehova ye Israɛlkaw dɛmɛ walasa u ka se sɔrɔ u juguw kan kɛlɛw kɔnɔna na. Sisan a y’a mɛn ko Israɛlkaw kɛlen bɛ ka u daga sigi Jeriko da la!

Su dɔ la, Israɛlka fila cira ka taa Jeriko walasa ka o dugu lajɛ. Olu taara Rahab ka so. A ye a ɲini u fɛ u ka don ani u ka to yen. Su kɔnɔna na, Jeriko masakɛ bɔra a kalama ko kolajɛbaaw dɔw bɛ dugu kɔnɔ ani ko u bɛ Rahab ka so de kɔnɔ. O la, a ye cɛw bila u ka taa olu ɲini. Rahab ye o kolajɛbaaw fila ninnu dogo so sanfɛ lenkalaw jukɔrɔ, a ye a fɔ masakɛ ka cidenw ye ko: ‘Cɛ ninnu tun bɛ yan, nka u bɔra dugu kɔnɔ ka ban. Ni aw ye aw teliya ka taa u nɔfɛ, aw na kun u la’. Yala i b’a dɔn kun min na Rahab ye kolajɛbaaw ninnu lakana wa?⁠— Ka d’a kan a dalen bɛ Jehova la ani a b’a dɔn ko Jehova bɛna Kanan jamana di Israɛlkaw ma.

Sani kolajɛbaaw ninnu ka bɔ Rahab ka so, u ye layidu ta ko ale ani a somɔgɔw bɛna kisi Jeriko halaki tuma na. Yala i b’a dɔn u ko a ka min kɛ wa?​​— U y’a fɔ a ye ko: ‘Nin juru bilenman ta, i ka o siri i ka finɛtiri la. Ni i ye o kɛ, mɔgɔ o mɔgɔ min bɛ i ka so kɔnɔ, olu na kisi.’ Kolajɛbaaw ninnu ko a k’a kɛ cogoya min na Rahab ye a kɛ ten cogo la. Yala i b’a dɔn min kɛra o kɔfɛ wa?​​—

Tile damadɔ o kɔ, Israɛlkaw taamana dugu lamini na k’a sɔrɔ u ma mankan foyi kɛ. Tile wɔɔrɔ kɔnɔna na, u taamana dugu lamini na, siɲɛ kelen don o don. Nka tile wolonwulanan, u taamana dugu lamini na, siɲɛ wolonwula. O yɔrɔnin bɛɛ u bɛɛ ye kulokanba bɔ ɲɔgɔn fɛ. Kogow minnu bɛ ka dugu lamini Jehova ye a to olu ka bɔ ka bin. Nka juru bilenman sirilen don so min finɛtiri la, o jɔlen tora! Yala i ɲɛ bɛ o la ja kan wa?⁠— Rahab ni a somɔgɔw kisira!

I bɛ kalansira jumɛn sɔrɔ Rahab kan?⁠— Rahab dara Jehova la ka d’a kan a ye kabako fɛn caman kalan a kan. I fana ye kabako fɛn caman kalan Jehova kan. Yala i dalen bɛ Jehova la i n’a fɔ Rahab wa?​​— Siga tɛ o la!