Kalansen 3

Yesu Krista ye jɔni ye?

Mun na Yesu bɛ wele Ala Denkɛ “fɔlɔ bangelen”? (1)

Mun na a bɛ wele “Kuma”? (1)

Mun na Yesu nana dugukolo kan iko hadamaden? (2-4)

Mun na a ye kabakow kɛ? (5)

Yesu bɛ na mun kɛ yan ni dɔɔnin cɛ? (6)

1. Sanni a ka na dugukolo kan, Yesu tun bɛ sankolo la iko hakilimɔgɔ. A kɛra Ala ka danfɛn fɔlɔ ye. O kosɔn, a bɛ wele Ala Denkɛ “fɔlɔ bangelen.” (Kolosekaw 1:15; Jirali 3:14) Ala yɛrɛ ye Denkɛ kelenpe min da, o kɛra Yesu ye. Sanni Yesu ka kɛ hadamaden ye, Jehowa y’a ta iko a ka “baarakɛla kuntigi” walasa ka fɛn tɔ bɛɛ da sankolo la ani dugukolo kan. (Ntalenw 8:22-31, NW; Kolosekaw 1:16, 17) Ala y’a kɛ fana a ka kuma lasebaga kuntigi ye. O de kosɔn Yesu bɛ wele “Kuma.”—Yuhana 1:1-3; Jirali 19:13.

2. Ala y’a Denkɛ ci ka na dugukolo kan. A y’a ka ɲɛnamaya ta sankolo la k’a bila Mariyama wolonugu la. O la sa, Yesu fa tun tɛ hadamaden ye. O de kosɔn, a ma jurumu si walima dafabaliya si sɔrɔ ciyɛn ye. Ala ye Yesu ci ka na dugukolo kan kun saba de la: (1) k’an kalan tiɲɛ na Ala ko la (Yuhana 18:37), (2) ka kantigiya dafalen mara ka kɛ siraɲɛjirala ye an bɛ tugu min kɔ (1 Piɛre 2:21), ani (3) k’a ka ɲɛnamaya di saraka ye walasa k’an hɔrɔnya ka bɔ jurumu ni saya la. Mun na o wajibiyalen tun don?—Matiyu 20:28.

3. Cɛ fɔlɔ Hadama ye min kɛ tuma min na a ye Ala ka sariya sɔsɔ, Bibulu b’o wele “jurumu.” O la sa, Ala ye saya latigɛ a ye. (Jenɛse 3:17-19) Ikomi a tun tɛ Ala ka ko wajibiyalenw dafa bilen, Hadama tun dafalen tɛ tuguni. A kɔrɔla dɔɔnin dɔɔnin, ka sa. Hadama ye jurumu di a denw bɛɛ ma. O de kosɔn, an fana bɛ kɔrɔ, an bɛ bana, an bɛ sa. Hadamadenw tun bɛ se ka kisi cogo jumɛn na?—Romɛkaw 3:23; 5:12.

4. Yesu tun ye mɔgɔ dafalen ye i n’a fɔ Hadama. Nka, danfara min b’u cɛ, o ye ko Yesu ye kanminɛni dafalen mara Ala fan fɛ hali kɔrɔbɔli bɛɛ la belebeleba la. O de kosɔn, a tun bɛ se k’a ka hadamaden ɲɛnamaya dafalen di saraka ye walasa ka Hadama ka jurumu sara. Bibulu b’o wele “kunmabɔ sara.” O kosɔn, hadamadenw tun bɛna se ka hɔrɔnya ka bɔ saya ka ɲangili la. Mɔgɔ minnu bɛ u ka limaniya da Yesu kan, olu ka jurumuw bɛ se ka yafa, ani u bɛ se ka ɲɛnamaya banbali sɔrɔ.—1 Timote 2:5, 6; Yuhana 3:16; Romɛkaw 5:18, 19.

5. Tuma min na Yesu tun bɛ dugukolo kan, a ye banabagatɔw kɛnɛya, ka kɔngɔtɔw ladumuni, ka fiɲɛbaw mada. A ye suw yɛrɛ lakunun. Mun na a ye kabakow kɛ? (1) A tun bɛ hinɛ mɔgɔ tɔɔrɔlenw na, wa, a ŋaniya tun ye k’u dɛmɛ. (2) A ka kabakow y’a seereya ko ale tun ye Ala Denkɛ ye. (3) O kabakow y’a jira a bɛna min kɛ Ala kanminɛbagaw ye tuma min na a bɛna dugukolo mara iko masakɛ.—Matiyu 14:14; Marka 2:10-12; Yuhana 5:28, 29.

6. Yesu sara. Ala y’a lakunun iko hakilimɔgɔ. A kɔseginna sankolo la. (1 Piɛre 3:18) Kabini o tuma na sa, Ala y’a kɛ Masakɛ ye. Yan ni dɔɔnin cɛ, Yesu bɛna kojugu ani tɔɔrɔ bɛɛ bɔ dugukolo kan.—Zaburu 37:9-11; Ntalenw 2:21, 22.

[Sɛbɛn ɲɛ 7nan ja]

Yesu ka cidenyabaara la, a ye mɔgɔw kalan, ka kabakow kɛ, k’a ka ɲɛnamaya di an kosɔn