AN KA ƝƐNAMAYA KƐ IKO KRECƐNW
I yɛrɛ lakana diinɛ maa murutilenw ka kalanw ma
Tuma caman, Sitanɛ ni a nɔfɛmɔgɔw bɛ nkalonw ni tiɲɛw ɲagami ɲɔgɔn na walasa ka an ka dannaya barika dɔgɔya. (2 Kɔrɛntekaw 11:3) Misali la, Asirikaw ye baara kɛ ni kumaw ye minnu tun tɛ nkalon ye tigitigi ani u fana tun tɛ tiɲɛ ye tigitigi, u ye baara kɛ fana ni nkalonfinw ye walasa ka Jehova ka jamakulu fari faga. (2 Tilew Kibaru 32:10-15) Diinɛ maa murutilenw bɛ baara kɛ ni o fɛɛrɛ suguw ye bi fana. An ka kan ka mun de kɛ ka ɲɛsin diinɛ maa murutilenw ka kalanw ma? U ka kalanw ye baga de ye, o la, an ka u ye iko baga! An kana u kalan abada, an kana u jaabi abada, ani an kana segin o kumaw kan abada. Kunnafoni minnu labɛnna walasa ka i bila i ka siga Jehova ni a ka jɛkuluba la, a ɲini ka o kunnafoniw faranfasi teliya la ani ka ban u la!—Jude 3, 4.
NIN WIDEYO LAJƐ: A’YE “KƐLƐ KƐ DANNAYA KOSƆN”!—YƆRƆ DƆ, O KƆ AW KA NIN ƝININKALI NINNU JAABI:
Intɛrinɛti kan, mɔgɔ dɔw bɛ to ka u hakilina falen-falen ni ɲɔgɔn ye ko dɔw kan. Mun na an mago b’a la ka an janto an yɛrɛ la ni an bɛ an dadon o ko suguw la?
An bɛ se ka tugu Romɛkaw 16:17 laadilikanw kɔ cogo di?