Jɔni ye aw teriw ye intɛrinɛti kan?

N’a fɔra ko teriw “olu ye mɔgɔw ye minnu nɔrɔlen bɛ ɲɔgɔn na ni kanuyaba ye.” Misali la, teriya min tɛ se ka fara, o donna Jonatan ni Dawuda cɛ, Dawuda kɛlen kɔ ka Goliyati faga. (1 Samuɛl 18:1) U fila bɛɛ ye jogow jira ɲɔgɔn na minnu tun b’u kodiya ɲɔgɔn ye ka ta’a fɛ. O la, teriya barikama sinsinnen bɛ ɲɔgɔndɔn sɛbɛ kan. Ka se ka mɔgɔ wɛrɛ dɔn, tuma caman na o bɛ waati ta ani o tɛ taa cɛsiri kɔ. Nka intɛrinɛti kan, mɔgɔw bɛ se ka kɛ ɲɔgɔn “teriw” ye u kɛtɔ k’a digi yɔrɔ dɔ kan dɔrɔn teriya sɛbɛnnen bɛ min kɔrɔ. Mɔgɔw bɛ se ka u ka kuma fɔtaw boloda cogo kɛrɛnkɛrɛnnen na ka kɛɲɛ ni u kuma ɲɔgɔn ye intɛrinɛti kan. U b’a fɛ fana tɔw k’u ye cogo min na, u bɛ se ka kow boloda ka kɛɲɛ ni o ye. O de la u ye mɔgɔ sugu minnu ye tigitigi, a ka nɔgɔ u bolo ka o dogo. O de kama a ka fisa “fɛɛrɛ sigilen ka kɛ an bolo teriw sugandili ko la” intɛrinɛti kan. Mɔgɔ minnu bɛ teriya ɲini aw fɛ k’a sɔrɔ aw tɛ u dɔn kosɛbɛ, aw kana siran ka aw ɲɛ ci olu ka teriya kan walima ka ban olu ka teriya la bawo aw bɛ siran ka u dusu tiɲɛ. Faratiko minnu bɛ se ka kɛ yen, olu kosɔn dɔw bɛ ban ka baara kɛ ni réseaux sociaux ye intɛrinɛti kan. O bɛɛ n’a ta, ni aw y’a sugandi ka baara kɛ ni réseaux sociaux ye intɛrinɛti kan, aw ka kan ka mun to aw hakili la?

NIN WIDEYO LAJƐ: INTƐRINƐTI-AW KANA BIN O JANW KƆNƆ, O KƆ AW KA NIN ƝININKALI NINNU JAABI:

• 

  I ka kan ka mun de jateminɛ fɔlɔ sani i ka komantɛri di walima ka fotow bila réseaux sociaux kan?

• 

  Mun na i ka kan ka i teriw sugandi koɲuman intɛrinɛti kan?

• 

  I bɛ waati hakɛ min kɛ réseaux sociaux kan mun na i ka kan ka dan sigi o waati hakɛ la?—Efesekaw 5:15, 16