I ka yɛrɛkalan kɛ fɛn ye min bɛ i nafa kosɛbɛ

MUN NA O NAFA KA BON: Yɛrɛkalan min sinsinnen bɛ Ala ka Kuma kan, o b’an dɛmɛ ka tiɲɛ “fɛrɛ ni a janya ni a jɔ janya ni a dunya dɔn”. (Efesekaw 3:18) A b’an dɛmɛ fana an jalakibali ka to diɲɛ juguman cɛma ani an banbannen ka to “ɲɛnamaya kuma” la. (Filipekaw 2:15, 16) Yɛrɛkalan min sinsinnen bɛ Ala ka Kuma kan, o b’a to an ka se ka fɛnw sugandi kalan kama an mago bɛ minnu na tiɲɛ yɛrɛ la. An bɛ se ka mun de kɛ walasa ka nafa bɔ kosɛbɛ Bibulu kalanni ani a sɛgɛsɛgɛli la Bibulukalan kɔnɔna na?

AN BƐ SE KA O KƐ COGO MIN NA:

• I bɛ yɛrɛkalan kɛ ni Bibulu min ye, taamashyɛn kɛ tɛmɛsiraw la o kɔnɔ, ani fɛn minnu nafa ka bon i ɲɛna, i ka olu sɛbɛn a kɔnɔ. O kɛ hali n’a y’a sɔrɔ ko Bibulu sɛbɛnlama de b’i bolo walima ko a bɛ i bolo masinmafɛn dɔ de kan

• Ka i to Ala ka Kuma kalanni na, nin ɲininkali ninnu kɛ i yɛrɛ la: ‘Jɔni? Mun? Tuma jumɛn? Yɔrɔ jumɛn? Mun na? Cogo jumɛn na?’

• A ɲini ka kow faamu. Ɲininikɛ minɛn minnu bɛ yen, baara kɛ ni olu ye walasa ka ɲinini kɛ barokun ni barokun walima ka ɲinini kɛ Bibulu tɛmɛsiraw kan

• Hakilijagabɔ kɛ i ka fɛn kalanta kan walasa k’a dɔn o bɛ i kun kan cogo min na

• I ye fɛn minnu kalan, olu waleya i ka don o don ɲɛnamaya kɔnɔ.—Luka 6:47, 48

WIDEYO LAJƐ MIN TƆGƆ YE KO “COMMENT TENIR FERME GRÂCE À UNE BONNE ÉTUDE INDIVIDUELLE” ANI O KƆ AW KA NIN ƝININKALI NINNU JAABI:

• Mɔgɔ dɔw ye mun de fɔ yɛrɛkalan kan?

• Mun na an ka kan ka delili kɛ tuma bɛɛ sani an ka yɛrɛkalan daminɛ?

• Mun de bɛ se ka an dɛmɛ ka Bibulu tɛmɛsira dɔ faamu ka ɲɛ?

• An bɛ yɛrɛkalan kɛ ni Bibulu min ye, an bɛ se ka taamashyɛn sugu jumɛnw de kɛ o kɔnɔ?

• Mun na hakilijagabɔ nafa ka bon kosɛbɛ n’an bɛ ka Ala ka Kuma kalan?

• An bɛ fɛn minnu kalan, an ka kan ka mun de kɛ ni olu ye?